حياتي معاك الجزء الثاني

[Dj^_^MaN]

(الفصــــــل الثـــاني )


الساعه 10 الصبح في بيت بو عيسى وبالتحديد حجرة عبير بنيته الوحيدة .. يرن تليفون عبير رنين متواصل .. وهيه من الكسل مافيها ترد عليه .. عبير عمرها 23 سنه بنت حلوة وجميله شعرها طويل ومشكلتها كانت القصر .. عبير كانت تحب مروان من يوم هم يهال .. مروان عمره ما حس باي احساس اتجاه عبير الا انها بنت عمه الدلوعه الي اومرها كلها اتنفذ بلمح البصر .. اهلها ماكانو باخلين عليها بشي لدرجه انها استوت بنت دلوعه حاقدة .. غيورة .. ماتحب بنت تكون احلى ولا اغنى عنها .. حبها لمروان كان تملكي .. كان مجرد شعور بالسيطرة .. ما حبته عشان قلبه ولا عشان شي .. حبته عشان جماله ووسامته وتقول في خاطرها .. يوم عرسي اكيد ربيعاتي بيتخبلن وبيحسدوني عريلي وراح اكون البنت الي عندها كل شي ممكن بنت انها تحصله .. تم التليفون يرن ويرن .. لين ما تكرمت عبير وردت عليه ببرود وكسل
عبير : الوووه
سعيدة: حووه نشي .. بعدج راقدة ..مالت عليج ... قومي نشي جوفي حواليج شو مستوي ....
سعيدة هيه ربيعه عبير وبنت عمتها وكانت محيره حق ناصر اخو مروان .. ناصر ايحبها وهي تحبه .. وملجتهم بعد ما تخلص عبير الجامعه يعني بعد شهر لانه هذا اخر كورس وتخلص ......
عبير: شو مستوي ؟؟
سعيدة: اقول .. اذا خبرتج شو بتعطيني
عبير ووملت من هالحركات : جوفي انا مب فاضيه لج .. بترمسين ولا
سعيدة: مروان رد البلاد
عبير وهي تنش من شبريتها وتفرك عيونها : سعووود .. شو .. شو قلتي ؟؟ مروان .. م..م..م..مـ..مــروان .. مروان ما غيره .. مروان حبيبي رد .. رد بوظبي .. حلفي بربج .. عاد ارمسي
سعيدة وهي تضحك : هيه هيه .. توه ناصر فديت روحه مخبرني .. البارحه رد الساعه 12 الفليل .. ويايب هدايا حق خواته بالهيل اونه ..
عبير: ويابلي شي
سعيدة وهي تضحك على عبير : ههههههههههههه هي اكيد يابلج .. شو انتي قاصه على عمرج .. انتي منو عشان ايب لج ..
عبير : سعود .. قولي والله انه رد .. ماني مصدقه .. اخيرا الملجه بتستوي
سعيدة: انزين تخييلي هو ما يباج .. شو بتسوين
عبير وهي محرجه : جااااااااااااااااااااااااااااااااب لا تقولين مثل هالرمسه .. بعدين هو منو عشان ما يوافق علي والله ... صلا زين يوم انا وافقت عليه .... اقول .. غيري ثيابج وتعالي بيتنا .. يالله اترياج
سعيدة: لا والله وليش انتي ما تيين عيوني
عبير : انا ماروم
سعيدة: ولا انا
عبير: سعود .. بسج .. روحها اعصابي محترقه .. بتين ولا لاء ..
سعيدة: انزين انزين .. 10 دقايق وانا عندج .. باي
عبير : باي
وتبند التليفون عبير وهيه تفكر .. مروان .. مروان حلم طفولتها ومراهقتها والحين شبابها خلاص رد لها .. والحلم بيتحقق .. حلم الطفوله اخيرا بيتحقق .. استانست من الخاطر .. وراحت تعدلت وسحت شعرها ونزلت عند امها اتخبرها عن صحه الخبر ..
عبير: هلا والله باحلى ام في الوجود .. ( وتحبها عراسها )
ام عيسى : هلا والله بحلى بنيه بالدنيا .. شياج ناشه من وقت جذا ..
عبير: سعود بتيني
ام عيسى : هيه حياها الله
عبير وهي تناظر امها وتقول في خاطرها .. يعني الحين امي ما تبى تخبرني شي ؟؟؟؟ معقولة ؟؟ اممممم خلنا نستدرجها شوي ..
عبير: امايا .. صدق الي سمعته ؟؟ شو مستوي في بيت عمي ظاحي
ام عيسى وهي تغز بنتها : هييييييه قولي جذه .. ما مستوي شي ..
عبير : يعني محد رد من السفر
ام عيسى وهي تضحك : ههههههههههههههه قولي جذه .. هيه فديت ويهه مروان رد من السفر البارح الفليل .. ووابوج عزم عمج ومروان واخوانه عالغدى ..
عبير : صدق امايا .. ايييييييييييييييه
ام عيسى : بلاج
عبير : امايا .. تتوقعين بيرمسون عني .. وعن مروان
ام عيسى وهي معصبه : صدق انه مافيج مذهب .. جلبي ويهج عني .. صدق ما تخيلين عروحج .. الحين شي بنت تقول هالرمسه .. شو تعقين عمرج عليه .. اصلا انتي مليون من يتمناج .. يكفي صالح ولد خالتج
عبير: وييييييييه ما بجى غير انا عبير .. عبير بنت منصور .. اخذ صويلح ..
ام عيسى : شو بلاه صالح ولد اختي .. ريال والنعم فيه .. بس انتي الي ما تستاهلينه
عبير : انزين انزين امي .. بروح فوق .. واذا يت سعودة خلها تيني فوق ..
ام عيسى : مثل ما تبين ..
صعدت عبير حجرتها وهيه تفكر في مروان .. الي اصلا ولا كانت عباله .. ولا طاريها يا باله .. قعدت تفكر من وين بتسوي فستانها ووين بيكون العرس .. وتقول ما بخلي عرسي في خيمه .. بسويه في اكبر فندق في بوظبي .. قعدت تفكر وتفكر عبير .. وهيه سرحانه ولا عليها .. يرن تليفونها ويقطع عليها احلامها .. وسرحانها .. جافت الرقم .. بس ماعرفته .. كان غريب عن بالها .. اصلا ماعرفت منو متصل فيها .. المهم ردت عالتلفون
عبير : لووه
المتصل : مرحبا ..
عبير وهي مستغربه : اهلا .. منو وياي
المتصل : ايه هذا مب تليفون موسى
عبير: لاء .. لا موسى ولا فرعون .. النمرة غلط ( وتبند التليفون )
رد اتصل الريال .. واتصل .. وهيه مول قالت في خاطرها شو هالبلشه هاي .. واخر شي ردت عليه
عبير: نعم
المتصل : اختي ممكن دقايق
عبير: خير ..؟؟
المتصل : عفوا .. بس هذا مب تليفون هدى
عبير: ماصار موبايل هذا تليفون عمومي الا .. اول شي تبى موسى .. والحين هدى .. منو تبى بالضبط ..
المتصل : الصراحه .. اباج انتي
عبير وهيه مغيضة : صدق انك ما تستحي ولا فيك ذرة ادب ( وتبند التليفون في ويهه )
ويتم هالريال يتصل ويتصل وهي ولا عاطتنه سالفه لين ما ييت سعيدة ..
سعيدة: حشرنا تليفونج ردي عليه ؟؟
عبير: مابا .. هذا واحد مستخف قاعد يتصل علي من متى .. لوع بجبدي .. جنه ما وراي شغله غير ارد على امثاله ..
سعيدة : انزين انتي تترين حد يتصل
عبير: لاء
سعيدة : انزين بنديه... اغلقيه
عبير : والله فكرة .. ومسكت تليفونها واغلقته ..
وتمو يرمسون ويرمسون عن مروان واخواته وامه .. ماخلو حد ما رمسو عنه .. وستوت الساعه ثنيتن وسعيدة وعبير قاعدات ايواجين من فوق اكيد بيوجوفن عيال عمها الا شوي وتوصل سيارة ستيشن مخفي شامل وينزل منها عمها ظاحي ووراهم احمد وولده محمد العود وسالم المتوسط .. بعدين وراهم سيارة ثانيه مرسدس بو دمعه وينزل منها شاب عبير او ما شافته عرفت منو وصارخت
عبير: مروان .. سعود .. مروان مروان .. جوفيه محلاته ..
سعيدة: فديت ناصر حبيبي والله ... اصلا هو احلا من مروان فديت قلبه والله ...
ونزل مروان وناصرمن السيارة وسار وايه عمه منصور وولد عمه عيسى واخوانه عتيق وخميس .. ثم دخلو الميلس
بو عيسى : حيالله مروان ولدي .. والله ونورت العاصمه بوجودك مروان
مروان : الله يحيك عمي .. وبوظبي منور بهلها طال عمرك
عيسى : ها مروان .. وين ناوي تشتغل
مروان : والله بشركه بو ربيعي لقو لي وظيفه
بو احمد: وظيفه .. لا يابوك انا بفتح لك مكتب روحك .. وتخلي الناس يشتغلون عندك هب انت تشتغل عندهم
مروان : بس يا بوي .. لازم اعتمد اول شي عنفسي عقب
عيسى : حد تيله فرصه .. وما يغتنمها ...
مروان : هيه عيسى انا
عيسى كان اخو عبير العود وكان انسان ما يستحمل .. صعب العشرة وياه.. اخذ بنت عمه العود عفرا من 5 سنين وعنده منها 3 بنات والحين هو معلقها لا مطلقها ولا متزوجنها .. وهذا سبب الي خلا اخوه العود عوق ما يكلم منصور وعلاقتهم مب شرات زمان ...
محمد: يدي .. يالله عاد متى بناكل
احمد: حمود استح ..
منصور: ههه لا ماعليك .. الحين بينجبون الغدا
وقعدو وتغدو لين ما ستوت الساعه 5 ..
مروان : يالله عاد عمي .. اانا بترخص عنكم الحين
بو احمد : ليش شو وراك مروان
مروان: بزور ربيعي .. متوله عليه .. تعرفه حميد المهيري ..
احمد: راعي دبي
مروان: هيه راعي دبي .. يالله بترخص عنكم ..
الكل : مع السلامه ..
ناصر: اقول مروان بروح وياك .. وصلني الستي .
مروان: انزين يالله طوف
وطلعو ناصر ومروان .. وركبو سيارة محمد المرسدس بو دمعه كان مروان ماخنها لين ما يشتري له هو سيارة ..
مروان: اقول نناصر
ناصر : هلا
مروان: بمر عالشوق اسلم عليها ..
ناصر : ليش عقب .. تعرف بتستوي مناحه يوم بتجوفك
مروان : ولهان عليها .. وامون تدريبها ساكنه في اللذيد ..
ناصر: برايك بس بسرعه ..
مروان: هههه شو عندك في دبي
اصر : هههههههههه يا ويهك .. لا مواعد الربع والله .. يا بوي الحين خلاص بعرس ... هههههه عقلنا فديتك
ناصر كان اكبر عن مروان بسنه وكانو متشابهين في كل شي الشكل الطبع .. لكن تفكيرهم مختلف كليا ..
ناصر كان خاطب سعيدة بنت عمه عبير .. بس لين الحين ما حددو الملجه .. طبعا كان ماخذنها عن حب .. وهذا الشي الوحيد الي كان مروان يحسد ناصر عليه .. وهم في الدرب .. مروان حاط شريط اغاني .. جدييييييم من سنه يدي لكن ذكراه بشي .. ذكراه هالشريط بمحبوته حور .. لانه كان اخر شريط سمعه وهو يسافر البلاد .. كان لراشد الماجد " علمتني وشلون احب .. وشلون احب .. علمني كيف انسى .. انسى .. يا بحر ضايع فيك الشط والمرسى .. علمتني شلون احن .. شلون احن .. علمني كيف اقسى " ويقطع تفكيره صوت ناصر
ناصر: مروان .. ابوي نسيت بيت شوق ولا شو .. وقف
مروان: اوه والله نسيت هذا بيتهم ..
ناصر: هيه ابوي بيتهم .. يالله انزل
دخلو مروان وناصر البيت .. بعد ما سمعو صوت عيال شوق الي ماشالله كانو 4 .. بنيتن وولدين الاكبر كان ظاحي وعمره 11 سنه وبعدين فاطمه وعمرها 9 سنوات وبعدين خالد وعمره 6 سنوات واخر العنقود سارة الي عمرها سنه ... مروان وهو يضحك لانه اول مرة يجوف سارة .. وشلاها وهي اول مرة تجوفه فرتاحت له وايد وعلى طول ضحكت له .. شوق سمعت صوت ظاحي يزقرها بصوت عالي .. : شووووووووووق شووووووووقو خالي مروان .. خالي مروان هني .. وتركض شوق وهي مب مصدقه .. واول ما شافت اخوها ركضت ولوت عليه ..
شوق: مروان لاء ماصدق .. معقوله .. يالقاطع .. ما بغيت ترد .. من متى هني متى رديت
مروان: رديت البارحه الفليل .. اقولج ( ويأشر على سارة ) شو هذا انتاج يديد
شوق وهي تضحك : هههههههههه الله يغربل بليسك .. هيه هاي العضو اليديد سارة .. شو رايك فيها تخبل صح.. اقول تشبهني ولا تشبه خليفه ..
خليفه من ورى : لا تشبه ابوها جوفي محلاتها ................ هلا والله مروان
مروان وهو ايواه خليفه ولد عمه وريل اخته .. هلا فيك خليفه .. ................ انزين عيل .. يالله بخليكم انا .. وراي درب لدبي
شوق: وين وين ............لا منت ساير .. شو ساير تسوي هناك
مروان : بروح اسلم على ربعي بعدين بخطف عامون متوله عليها ..
شوق: خلاص عيل برايك .. بس اقول يوم الاحد غداك وعشاك عندي هني فاهم ..
مروان: انشالله ولا يهمج .. يالله .. مع السلامه .. نصور امش
ناصر: شوقو بقص لسان خويلد هذا .. لسانه وايد طويل ..
شوق: فديت ولدي من شرورك يالله روح
ويركبون السيارة ويسيرون عدرب بوظبي دبي وناصر يسولف عن عن دوامه والشغل .. واخر شي مروان وصل ناصر السيتي ورد جميرا .. اول ما حدر جميرا حس باحساس قوي .. احساس ما جد حسه من قبل .. ماعرف شو هو .. هل هو شوقه لحور .. او انه شي مفاجأة تترياه هني ..؟؟ ماعرف مروان شو استوابه .. بس الي عرفه انه احداث يديدة راح تنكتب في صفحه حياته .. لين الحين مايدري القدر شو كاتب له او لحور .. او لللاثنين معا ................... واخيرا ايقود السيارة صوب بيت حميد ويتريا 10 دقايق وينزل هو مليئ بالحماس
وما يعرف شو مخبيله القدر .

انتظروا الباقي..

-

[دقوس]

تسلم اخوي على القص وايد حلوه انا ناطر الجزء الثالث بس في بعض المفردات الصعبه :)

[Dj^_^MaN]

العفو حبيبي ولو انت قولي عنها وانا جاهز للمساعده

[SuPeR BoY]

يعطيك العافيه اخوي دجي مان

وإنشالله في إنتظار الباقي

[شبح الحب]

مشكور اخوي

وننتظر الباقي

[Mr.rahe]

مشكور

[Dj^_^MaN]

العفو ولو ما سويت شي كله لعيونكم