إعـــــــلان

تقليص
لا يوجد إعلان حتى الآن.

تموت عيونهم فيني .. وانا بك ميته عيني الجزء السابع والعشرون

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • تموت عيونهم فيني .. وانا بك ميته عيني الجزء السابع والعشرون


    ..الجــــ السابع والعشرون ـــــــزء..

    دخلت بخطوات ثقيله ودموعها نزلت حاره على خدها..دورت بعيونها عليه يمكن يكون كل هذا حلــــم او بالأصح كابوس..
    لكن خاب ظنها ونزلت راسها تمسح دموعها..
    سمعت صوت ريم:يله مشعل تصبح على خير..<<ومسكت يد لمى..
    مشعل:وانتي من اهله..
    طلعوا فوق وريم على طول دخلت غرفتها اما لمى طاحت عيونها على غرفة تركي..ناظرتها بنظرات حزيـنه وقلبها ينزف جروح..
    قالت بهمس:سامحني..<<لفت ودخلت غرفة ريم اللي شافتها متمدده على السرير ونايمه حتى مابدلت ملابسها..ابتسمت على شكلها وراحت تبدل ملابسها..
    لمت شعرها وتمددت جنب ريم..ولفت للجهه الثانيه وشافت صورة جماعيه لريم ومشعل وتركي..رفعتها وجلست تتألمها..تحسست بأصابعها تركي اللي يبتسم بفرحه وتنهدت بضيق..غلبها النوم ونامـــت..
    ××
    اليوم الثانـــــي..
    نزلت من غرفتها وراسها مصدع..دخلت المطبخ وسوت لها كوب كابتشينو..جلست على الطاوله وحطت يدها على خدها..ودها تعرف حالـة مشعل الحين..
    ام فيصل:صباح الخير..
    مها:..............
    ام فيصل:مها..
    مها انتبهت لأمها:هلا ماما صباح الخير..
    ام فيصل جلست:صباح النور..
    مها ابتسمت لأمها اللي تناظرها بنظرات غريبه:ماما وش فيك تناظريني كذا متغير فيني شي..
    ام فيصل وقفت:بتتغير حياتك كلها..<<وراحت وتركتها بحيره..
    مها"ياربــــــي وش تقصد من امس وهي تتكلم معي بكلام غريب وش السالفه"..<<رفعت كتوفها بأستغراب ورن جوالها ردت..
    :هلا ريوووم..
    ريم تسكر شنطتها:هلا مها تبينا نمرك علشان نروح المستشفى..
    مها وقفت:ايه طيب لمى معك..
    ريم:مها وش ذا السؤال ايه معي يعني بتكون مع مين..
    مها:ايييييه صح امي قالت لي انها معك بس نسيت..
    ريم بخبث:اللي ماخذ عقلك..
    مها"مافيه غيره اخوك":محد ماخذه غيرك ياحلوووه يله بسكر علشان يمديني البس..
    ريم:اوكي باااي..<<سكرت ولفت على لمى اللي غرقانه في النوم قربت منها ورفعت البطانيه عنها..
    :يلـ..<<سكتت وهي تشوفها حاظنه صوره ابتسمت وهزتها..
    :لموو لمى يله اصحي..
    تحركت بكسل وفتحت عيونها:هممممم..
    ريم:يله اصحي علشان نروح المستشفى..<<وطلعت..
    عدلت جلستها وطاحت الصوره جنبها رفعتها ودمعت عينها:صباااح الخير (ابتسمت بألم) اي خير وانت بعيد عني..<<باست الصوره وحطتها على الطاوله..
    كانت واقفه عند الباب وسمعتها مسحت دموعها دخلت وطصنعت الابتسامه:يلــــــه اخلصي علينا..
    ارتبكت"ياربــــي عسى ماسمعتني":طيب شوي اففف ماعندك صبر انتي..
    ريم بخبث:ماتبين تشوفين تركي..
    لمى تلون وجهها:هاه ايـــش..
    ريم:اقول ماتبين تشوفين تركي..
    لمى خذت ملابسها ودخلت الحمام ((الله يعزكم)) وبسرعه قالت:وش رايك يعني..
    ريم:هههههههههههههههههههههههه طيب استعجلي مشعل ينتظرنا تحت..<<دخلت المطبخ تسوي لها شي تشربه رن جوالها ورفعته ناظرت الاسم وابتسمت بفرحه وبلهفه..
    :هـــــــــــــلا حبيبي..
    ××في الحديقه××
    مشعل:ادخل جوا اظن تدل المجلس..
    نايف:طيب بس لاتتأخر عشان نروح المستشفى سوا..
    مشعل:اوكي سلام..<<وطلع..
    دخل جوا وهو في نص الصاله سمع صوتها ودق قلبه راح لمصدر صوتها وطل مع الباب لقاها تضحك ومستانسه..
    حطت الجوال على الطاوله وفتحت السبيكر:هههههههههههههههههههههههههه حتى انت وحشتني...<<حركت السكر في الكوب وهي مو منتبهه للي يراقبها..
    :والله دنيتي ماتسوى بدونك متى بترجع..هههههههههههههههههههههههه واكيد بتكون احلى مفاجأه..
    انصدم من اللي قاعد يسمعه تزلزت الارض من تحته..ونيران شبت في صدره..بدى الدم يفور في راسه مشى بخطوات سريعه وبعصبيه سحبها بقوه وعطاها كف قوي شهقت منه وطاح الكوب من يدها حطت يدها على مكان الكف وهي تناظره مصدومه..
    :الوو الوو قلبي وش فيك..
    مسك الجوال ورماه وتكسر لقطع صغيره..مسكها من فكها وضغط عليه وقال من بين اسنانه والشرار يتطاير من عيونه:قولي لي من هذا..
    ريم واقفه وتناظره وكـــــأنها جثه..ماحست بشي لابالكف الحار ولابفكها اللي شوي وبينكسر من ضغطه عليه بلعت غصاتها والدموع تجمعت في عيونها..
    نايف هزها بعصبيه وصرخ:قولــــــي لي من هذا..
    صار صدرها يرتفع وينزل شهقت من البكي ودفته عنها..
    نايف ضرب يده في الطاوله وقال ببطئ:قولــــي لي من هذا..
    ريم ارتاعت وشفايفها صارت ترتجف بخوف مو طبيعي انفجرت في وجهه وهي تبكي:مو من حقك تسألنــــي..
    نايف دفها وطاحت على الكرسي سند يدينه الثنتين على الكرسي وقرب منها لدرجة صارت انفاسها على خده..ناظرت في عيونه اللي صارت حمرا من العصبيه وصدره اللي يرتفع وينزل..ارعبها شكله اول مره تشوفه بهالهيئه..
    ضرب يده على الطاوله بقوه:ريـــــــم للمره الرابعه اسألك من هذا..
    ريم بصوت مرتجف:قلتلك مو من حقك تسألني..
    نايف قرب منها:اجل من اللي له حق يسأل..
    ريم بعدت وجهها عنه ونزلت دموعها وشهقت..
    نايف بعصبيه لف وجهها:ريــــم احسن لك قولي من هذا قبل ما اسوي شي تندمين عليه طول عمرك..
    ريم بعدت يده بقوه ودفته عنها ووقفت مسحت دموعها وناظرته بأحتقار:اظن مو حرام اني اكلم خالي واقول له هالحكي لكن الحرام..<<اشرت على رقبته..
    :هذا ياولد عمـــــي يامحترم ياعاقل..<<مشت عنه لكن قبل ماتطلع لفت عليه وبكت..
    :خيبت ظني فيك يانايف..<<لفت عنه وركضت لفوق وهي حاطه يدها على فمها وتبكـي..
    لمى اللي نازله من الدرج وصدمها شكل ريم لحقتها:ريــــم ريم وش فيك..<<مسكتها مع كتفها بخوف لكن ريم بعدتها وهي تصرخ بألم..
    :بعــــدي عني..
    دخلت غرفتها وخبطت بالباب وتسندت عليه طاحت على الارض تبكــــي قتـــــل حبهـا له قتل مشاعرها حطم احسايسهــــا..هذا الجرح اكبر من انها تتحمله..
    "حرام عليك يانايف ليـــه تسوي فيني كذا هاذي نهاية حبي لك تشك فيني تشك في تربية عمك"..<<شهقت وهي تتذكر كلماته والكف اللي عطاه اياه حطت يدها على خدها ماكان الكف يألما قد ما نايف ألمها وحطم كل شي فيها..
    دقت الباب بخوف:ريـــم تكفين الله يخليك افتحي..
    ما كانت تسمع إلا صوت شهقاتها..
    لمى تزيد دق الباب ويزيد خوفها:ريـــــم افتحي تكفيــــن..
    ريم صرخت:اتركينــــــي لحالي..
    لمى حطت يدها على قلبها"ياربـــي ياربي وش فيها"..<<دقت الباب..
    :ريــــــم تكفين..
    ريم قاطعتها بأنفعال:انقلعـــــــــي عني..<<خبت راسها بين رجولها وبكت بحرقه وبألم..
    ما كانت عارفه وش تسوي نزلت تحت بسرعه وشافت نايف واقف في نص الصاله ونظره لفوق كان في حالة صدمه وجامــد في مكانه..
    حس بشي على كتفه:يله نمشي..
    لف على مشعل وحزن الدنيا كلها في عيونه"ليــــــــه سويت كذا ليه":انا ماراح اروح..
    مشعل بأستغراب:ليه..
    نايف نزل يده بقوه ومشى بخطوات سريعه:من غير ليه..<<طلع وسكر الباب بقوه ركب سيارته وضرب يده على الدركسون وصرخ..
    :غبــــــــــــــــــــــي..<<شد شعره وسند نفسه على الكرسي وهو مغمض عيونه ويتنفس بسرعه..
    "ياربـــي انا وش سويت"..
    في نفس الوقت كان مشعل مستغرب من هيئة نايف:وش فيه هذا..
    لمى ماتدري تقول له عن ريم وإلا تسكت..
    مشعل رفع كتوفه بأستغراب وخذ مفتاحه:لمى يله روحي نادي ريم..
    لمى بأرتباك:ريم ماراح تجي..
    مشعل رفع حاجبه:ايش..
    لمى نزلت راسها وفركت يدينها بتوتر:ماراح تجي..
    مشعل:ليه..
    لمى:تعبانه بطنها يعورها وراسها مصدع..
    مشعل وهو يطلع الدرج:بطلع اشوفها..
    لمى لحقته ومسكته:لالالا هي قالت ماتبي تشوف احد..
    مشعل يستهبل:بس انا مو احد..
    لمى ابتسمت:عارفه السبت هاهاها يله نمشي..
    مشعل:ههههههههههههههههههههههههه يله..
    ××
    دخل للغرفه الهاديه..تقدم له ودقات قلبه تزداد من شكل تركي اللي متمدد على السرير الابيض وكأنه جثه كأن الانسان اللي متمدد قدامه بلا نبض وبلا روح..كأن هالانسان مو نفسه تركــي اللي يعرفه..الجروح مغطيه اغلب مناطق جسمه..ويده مكسوره وراسه ملفوف..والاجهزه حوله..جلس جنبه ومسك يده..
    :تركــي انا عارف انك تسمعني الحين تكفى الله يخليك اصحـى انا من غيرك ولاشي..<<مسح دموعه وحط راسه على السرير..
    حس بشي يضغط على يده رفع راسه بسرعه وشافه يحرك شفايفه بضعف وصوته ماينســـمع..
    ابتسم بفرحه وقرب منه وهمس:تركي تسمعني..
    تركي فتح عيونه بصعوبه ورجع يسكرها يحس نفسه دااايخ والدنيا تلف فيه:آآه..
    بندر مايدري يضحـــك وإلا يبكي ابتسم وماقدر يتكلم..
    تركي بلع ريقه وفتح عينه وبصوت ضعيف فيه بحه:بـ..ندر..
    بندر:تركي صحيــــت..
    تركي وهو يلهث:عطشان ابي مويه..
    بندر بسرعه فتح الثلاجه وطلع مويه وشربه:بالعافيه..
    تركي خذ نفس طويــــل:الله يعافيك (لف راسه عليه) تصدق احس نفسي نايم سنين..
    بندر بقهــــر:انت بس قل لي من اللي وصلك لهالحاله والله ما اخلي فيه عرق ينبض..
    تركي بلع غصته:والله مدري (عقد حواجبه يتذكر) بس اذكر انهم ثلاثه او اربعه ضربوني لدرجة حسيت ان ظهري انكسر..
    تجمعت الدموع في عيونه وشلون يقول له انك صرت انسان عاجز بأي طريقه يقول له..
    تركي ابتسم بتعب:بدينا بالدموع خلاص هذاني صحيت..
    بندر نزلت دموعه:دموع الفرح والله لو تدري وش صار فيني يوم دريت انك بالمستشفى بغيت انجن..
    تركي حاول يمد يده بس ماقدر ناظر فيها شاف جروح وبقهر:الله ياخذهــــم..
    بندر تنهد بضيق"وش بتسوي لو دريت انك انشليت"..
    دخلت الممرضه ومعها بوكيه ورد واصلاً الغرفه كلها مليانه ورد..
    تركي:ياحليــــلي لهالدرجه انا مهم..
    الممرضه ابتسمت:good morneing..
    تركي يستهبل:هلا بالزين كله..
    بندر ضحك تركي ابد مايبطل حركاته..
    الممرضه عقدت حواجبها:what..
    تركي:لا سلامتك..
    بندر:هههههههههههههههههههههههههههههههههههه..
    الممرضه طلعت وهي مكشره وتتحلطم..
    بندر:وانت ماتبطل حركاتك..
    تركي:وش اسوي ابي اضحكك شوي اعوضك عن الدموع اللي هليتها علشاني..
    بندر بفرحه:صح انا ماقلتلك..
    تركي:لا وشو..
    بندر:انا ودانا رجعنا لبعض..
    تركي:يعني وشلون..
    بندر:نايف درا اني احبها وهي تحبني..
    تركي بفرحه:ياشيـــــــــــــخ على البركه..
    بندر:هههههههههههههههههههههههههههههههه الله يبارك فيك..
    تركي:بس وشلون درا..
    بندر:مدري عنه المهم انه درا..
    تركي دار بعيونه على الغرفه كلها:وش ذا ماشاء الله انتشر خبر اني في المستشفى بسرعه..
    بندر وقف:ايــــه لازم ينتشر انت شخصيه مهمه في المجتمع..
    تركي كشر:تتريق حظرتك..
    بندر وهو يشوف الكروت:لا والله ما اتريق (وبدى يقلب في الكروت) هاذي كرت من سوسو وهذا من رانيا وهذا من شذى وهذا من دلوعة تركي ياعينـــــــــي..
    تركي بدون نفس:خل الممرضه تجي تشيل هالمصخره..
    بندر كمل ولاكنه سمعه:وهذا من حبيبة توتو (عقد حواجبه) من توتو..
    تركي:الكائن الحي اللي متمدد قدامك..
    بندر:ههههههههههههههههههههههههههههههههههه (وكمل) وهذا من سلمى وهذا من روان وهذا من نو..<<تغيرت ملامح وجهه يوم قرى الكرت..
    تركي:ايه كمل يالاخو اطربنا..
    بندر مشى لعند تركي ومد له الكرت:تركي تعرف هاذي نوف..
    تركي قرى الكرت اللي كان مكتوب فيه
    "يابـعــد عمري ان شاء الله عجبتك الهديه..وفيه هديه ثانيه راح توصلك في الطريق بس مو لك لأعز الناس عليك..
    حبيبتك نوف.."
    تركي عض شفايفه المجروحه بقهـــر:حقيــــــره سافله انا اوريها..
    بندر:مو هاذي اللي..
    تركي قاطعه بأنفعال:إلا هي..<<ومسك صدره اللي يألمه..
    :آآآآآآآآه..
    بندر بخوف:انادي الدكتور..
    تركي بتعب:لا ماله داعي..<<غمض عيونه واسترخى ورجع الكلام المكتوب يدور في باله..
    "اعز الناس علي مين تقصد"..<<وعيشته في دوامة تفكيــــر عميق لما تعب ونام..
    ××
    واقفه تنتظر عند الباب وتناظر ساعتها"افففف ذولي ليه تأخروا"..<<لفت بتدخل لكن سمعت صوت هرن سيارته..سيارته هـــــو..خذت نفس عميق وحطت يدها على قلبها..
    سمعت صوته وارتفعت حرارة جسمها:ماودك تجين وإلا عجبتك الجلسه عند الباب..
    مها استغربت ليه يتكلم معها كذا لفت عليه وبقهـر:ايه عجبتني ودك تجي تجلس معي تعال تفضل حياك..
    مشعل يضحك وهو يتقدم لها:افااا زعلتي ترى مايهون علي زعلك..
    مها حمر وجهها ومشت لناحية السياره:يله تأخرنا..<<ركبت وقلبها يرقص من الفرحه..
    لمى:مافيه صباح الخير..
    مها لفت على لمى وتغيرت ملامح وجهها:لمى انتي بخير..
    لمى بحزن:مثل ماتشوفين (تنهدت) اليوم بيصحى..
    دخل وسكر الباب:ماقلنا كيفك..
    مها ابتسمت:تمام كيفك انت..
    مشعل ينزل نظارته:بخير (ركز المرايه الاماميه عليها وغمز لها وحرك شفايفه بدون صوت) دامك بخير..
    مها لفت على الشباك وابتسمت ابتسامه وسيعه وعيونها تدمع من الفرحه"اخيـــــــراً يامشعل اخيراَ حسيت فيني"..
    لمى تراقبهم وودها لو كان اللي جالس تركي ويناظرها بلهفه وحب مثل اول بس الحين هذا الشي لايمكن يصير لانها حست بقيمته متأخر بعد ماضاع كل شي..
    نزلت راسها بضعف ويأس وقلبها يصرخ"سامحنــــــي ياتركي"..
    ××
    سكرت وهي تبتسم بفرحه وراحت تركض وهي تنزل الدرج:خالـــتي خالتي..
    ام مشاري:هديل شوي شوي..
    هديل نطت على الكنب ومسكت يدين خالتها:عندي لك خبـــــر بس اول شي وش بتعطيني..
    ام مشاري:هديـــل خالتك تعبانه مو رايقة لك..
    هديل غمزت لخالتها:انا اعرف وش اللي يخليها تروق خالتي جاهزه تسمعين..
    ام مشعل بتعب:قولي اللي عندك مع اني عارفه ان ما عندك سالفه..
    هديل كشرت:افاااا..
    ام مشاري:هديل اذا عندك شي مهم قوليه ماعندك روحي اتركي خالتك ترتاح..
    هديل:طيـــب لو قلت انه خبر عن تركي..
    ام مشعل بلهفه وخوف في نفس الوقت:وش فيــــه..
    هديل بفرحه:خالتي تركي صحى..
    ام مشعل مومستوعبه:وشــــــــو..
    هديل دمعت عينها من الفرحه:والله قبل شوي اسمع مشاري يكلم بندر وقاله انه صحى وهو بخيـــر ويسولف وكأن مافيه شي..
    مشاري نزل بسرعه:وصلكم الخبــر..
    ام مشاري:ايه الحمد الله..
    ام مشعل كانت تبكي ما اقدر اوصف فرحتها هاللحظه:ابي اشوفه مشاري الله يخليك ودني له..
    مشاري ابتسم:يله..
    ام مشاري وقفت:هديل يمه جيبي عباياتنا..
    هديل نطت من الكنب:ان شاء الله..
    ××
    راكان واقف قدام المرايه يسكر ازارير قميصه وعلى وجهه اكبر ابتسامه..
    وقفت عند الباب وتكتفت وهي رافعه حاجبها:على وين من صباح رب العالمين..
    راكان ناظرها بنص عين:مو شغلك..
    مشاعل تقدمت له وهي تميل بجسمها:افاااا ركوني..
    راكان تعطر وهو متجاهل وجودها..
    مشاعل انقهرت:انت هيــــــه انا احاكيك..
    راكان لف بدون مايناظرها ودفها عنه..
    مشاعل:آآآآآآآآآآآي..
    ام راكان ماسكه عبايتها:يله راكان..
    راكان:يله..
    مشاعل:ماما بتروحين وين..
    ام راكان تأففت:بروح لولد خالك اللي طايح في المستشفى مدري وش سالفته..
    مشاعل تلعب بخصلات شعرها:شكلك ماتبين تروحين..
    ام راكان:ايه ما ابي بس وش اسوي كلام الناس مايرحم بيقولون ولد اخوها في المستشفى ولا راحت تزوره..
    راكان وهو ينزل ويهمس لنفسه:اصلاً وجودك وعدمه واحد (على صوته) يله يمه لانتأخر..
    ام راكان مرت من غرفة هيفاء اللي سمعت صوتها وصوت ضحكها موصل اخر الدنيا استغربت من تكلم ذا الوقت فتحت الباب..
    هيفاء شهقت ودخلت الجوال تحت المخده وبأرتباك:هلا ماما صباح الخير..
    ام راكان بنظرات شك:من تكلمين..
    هيفاء بلعت غصتها:هاه اكلم جنا (رفعت الجوال) جنو احاكيك بعدين باااي..<<وسكرت وابتسمت بدون نفس..
    :اي اسئله ثانيه..
    ام راكان:تجين معي نزور تركي..
    هيفاء بغرور:هاهاها ضحكتيني انا ازور هذا نو وي مستحيل..
    ام راكان:طيب على الأقل اتصلي على خالك فهد تحمدي له على سلامة ولده..
    هيفاء سحبت البطانيه وغطت نفسها:افكـــر يله تصبحين على خير وسكري الباب وراك..
    ام راكان طلعت وسكرت الباب..
    هيفاء ابتسمت ورفعت الغطا:افففف مابغت..<<وطلعت جوالها..
    ××
    مدت له بيالة الشاهي:ترى كلمت ام فيصل بالموضوع..
    طاحت البياله من يده مو مستوعب اللي سمعه:وشـــــــــــو..
    ام رياض ارتاعت:بسم الله عليك وش فيك..
    طلال:متى كلمتيها..
    ام رياض:قبل امس العصر..
    طلال:بس خالتي تركي و..
    ام رياض قاطعته:انا ماكنت ادري عن تركي حتى ام فيصل شكلها ماتدري..
    طلال:طيب وش قالت..
    ام رياض:بتقول لأبوفيصل والله يقدم اللي فيه خير..
    غاده:نقول مبروك..
    طلال بضيق:لسه ماصار شي..
    ام رياض:وش فيك طلال..
    طلال:متوقع ترفضني..
    ام رياض بأستغراب:ترفضك ليه انت وش ناقصك..
    طلال وقف ورفع شماغه:مدري والله مدري..<<طلع..
    في:وش فيه اخوك..
    غاده رفعت كتوفها:وانا وش يعرفني..
    ام رياض:بنات صاير بين مها وطلال شي..
    غاده وفي فتحوا عيونهم على الاخير..
    غاده:يعني وشلون..
    ام رياض:موقف مثلاً خلا طلال يتوقع رفضها..
    غاده:بصراحه خالتي انا دايماً احس انهم يتجنبون بعض مدري ليه..
    في:قصدك مها تتجنب طلال (بقهر) تحسب فيه مرض معدي..
    غاده:ههههههههههههههههههههههههههههههههه..
    ام رياض:طيب ليه تتجنب تعرفون السبب..
    في بهمس:يمكن عشان مشعل..
    غاده:لالا ما اظن..
    ام رياض:وش فيكم تتساسرون..
    غاده:خالتي انا مدري وش السبب..
    في:ولا انا (وقفت وخذت عبايتها) يله انا رايحه..
    غاده رفعت راسها:وين..
    في:بروح لأبوي رجع اليوم من جده..
    غاده وقفت:والله ليــــــــــــــه ماقلتي لي على فكره تراه عمي..
    في بأستهزاء:احلفـــــي والله توني ادري انه عمك..
    غاده عصبت:فيـــوه..
    في:هههههههههههههههههه يله خالتي اشوفك على خير..
    ام رياض:خلاص بتروحين..
    في:بجيكم دايم وبتملون من خشتي..
    ام رياض ابتسمت:حياك الله في اي وقت..
    في:يله مع السلامه..
    ام رياض:مع السلامه..
    في مسكت يد غاده:يله امشي يالعله..
    غاده:آآآآآآي آآآآآآي فيوه شوي شوي..
    ××
    ؛؛..تأخرتي ولا اقدر اعيد ايام معاناتي..علاقتنا ابد ما ابي تعيدين النظر فيها..؛؛

    دخلوا المستشفى ولمى اول ماوطت رجلها جاها احساس غريــــــب احساس بالخوف والألم والحزن والفرح في نفس الوقت فرحانه انه رجع لها وصحى للدنيا اللي بدونه ولاشي وحزنها انها بتشوفه في هالحاله وهو متمدد على السرير ومايقدر يحرك رجوله اللي حست انه فقدها بسببها هـــي..
    مسكت مها وضغطت على يدها..
    مها بهمس:امسكي نفسك..
    لمى بأرتباك:ما اقدر ما اقدر ببكي قبل لااشوفه..
    مشوا ورا مشعل وكل ماقربوا للغرفه يزيد توتر لمى ويزيد ارتباكها..
    مشعل مسك قبضة الباب:قولوا لي من الحين اذا بتبكون خلكم برا احسن..
    مها ضغطت على يد لمى:لا ان شاء الله ماراح نبكي..
    مشعل فتح الباب ودخل وطاحت عيونه على اخوه اللي نايم وملامحه هااااديه وبندر نايم على الكرسي بلع غصته ونزلت دموعه غصب عنه..مسحها بسرعه وهز بندر..
    :هيه يالأخو..
    بندر فتح عيونه وفركها:هلا مشعل..
    مشعل:صحى كلمك..
    بندر عدل جلسته وابتسم:ايه ذا الولد ابد مايترك هباله..
    مشعل:طيب درا انه..<<ماقدر يكمل الكلمه وسكت..
    بندر بضيق:لا ماقدرت اقوله..
    عند الباب مها من بين اسنانها:يله لمى..
    لمى بردت اطرافها وارتجفت وبصوت مرتجف:ما اقدر اشوفه وهو بهالحاله..
    مها:بكيفك..<<ودخلت عورها قلبها اول ماشافت تركي..
    :السلام عليكم..
    بندر:هلا وعليكم السلام..
    مشعل:وين لمى..
    عفس وجهه من اسمها كان صاحي بس ماقدر يفتح عيونه يحس بألام في كل جسمه همس بصوت مبحوح:لمى..
    مشعل ابتسم بفرحه وراح جنبه:تركي تسمعنــــي..
    تركي فتح عيونه وابتسم بتعب:هلا مشعل..
    مشعل بلهفه ودموعه على خده:الحمد الله على سلامتك يالغالي..
    تركي:الله يسلمك..
    مها:الحمد الله على سلامتك..
    تركي:هلا مها الله يسلمك..
    مها:كيفك الحين..
    تركي بضيق:عايش..
    مشعل:مها روحي نادي لمى..

    يتبــــــــع..<<




  • #2
    رد: تموت عيونهم فيني .. وانا بك ميته عيني الجزء السابع والعشرون



    تابــــــــــع..<<

    مها بأرتباك:طيب..<<لفت بتطلع لكن شافت لمى داخله وعيونها على تركي وتبكي لكن بدون صوت"آآآآآآه ليته فيني ولافيك"..
    نزلت راسها الم وحســـــره وتقدمت بخطوات بطيئه وهي ترتجف..
    تركي اول ماشافها عوره قلبه هاذي لمى هاذي روحــه هاذي كل شي في دنيته نزل عيونه عنها ولاقال ولاكلمه بس انرسمت على شفايفه ابتسامة استهزاء..
    لمى بلعت غصاتها وبصوت اقرب للهمس:الحمد الله على سلامتك..
    تركي بقسوه:الحين هاذي تسمينها سلامه..
    استغربوا من كلامه ولمى شهقت من البكي"معاك حق تسوي اي شي فيني"..
    مشعل بأنفعال:تركي الـ..
    تركي قاطعه بعصبيه:ممكن تتركونا لحالنا..
    مشعل:لا انت انجنيت..
    تركي غمض عيونه بقوه:لو سمحتوا اتركونا لحالنا..
    بندر:خلاص مشعل يله نمشي..
    مها خافت ان تركي يقول للمى شي يخليها تنهار..<<طلعوا من الغرفه وسكروا الباب..
    لمى تسندت على الجدار تبكي وهي حاطه يدها على فمها..
    تركي ابتسم بأستهزاء:فرحانه الحين صح..
    لمى شهقت بصدمه:فرحانه..
    تركي تنهد:انشليت هاذي اكبر واحلى هديه اقدمها لك يالمى..
    لمى كانت مصدووووومه ولسانها عجز عن نطق حرف واحد..
    تركي كمل وهو متعمد يقسى عليها:تذكرين الرساله اللي رسلتيها لي والمكتوب فيها لو خيروني بين موتي وفرقاك تذكرين وش اخترتي يالمى..
    لمى ودها ترد عليه بس ماقدرت"هذاك كان اول الحين لو تخيرني بختار موتي روحي ماتغلى عليك ياتركي"..
    كمل:اخترتي فرقاي وهذاني بفارقك واخليك ترتاحين مني..
    لمى بصوت مرتجف:لا ياتركي حرام عليك..
    تركي:حرام علي وإلا حرام عليك انتي كنتي تعذبيني بكل كلمه تقولينها لي (اشر على الورد) شوفي هاذولي هاذولي من البنات اللي كنت احاكيهم وتركتهم علشانك علشاني حسيت اني قاعد اخونك ههههههههههههههههههه بس انتي ماكنتي سائله عني اصلاً..
    تركته يكمل ويجرح على راحته معاه حق في كل كلمه يقولها..
    تركي:ويوم قلتي لي روح العب على غيري خلاص ماعاد لي خلق العب عليك ولا على غيرك مع اني والله احبك عن جد ما العب..
    آثرت عليها كثير كلمة "احبك" عضت على شفايفها بقوه وهي تشهق نزلت راسها وهي تفرك يدينها بتوتر:تركي آسفه..
    تركي تنهد بضيق:تأخرتي يالمى كثير..
    لمى انهارت على الكرسي تبكي وهي حاطه يدها على وجهها..
    تركي عوره قلبه عليها وده يروح يمسح دموعها يحظنها ويهديها بس فيه شي داخله يمنعه..
    انفتح الباب ودخلت وهي كلها شوق ولهفه:تركي الحمد الله على سلامتك يمه..<<بكت ومسكت يده وباستها..
    تركي ابتسم وباس يدها:الله يسلمك..<<وعيونه على لمى اللي وقفت وطلعت وهي تجر المها وحزنها معها..
    مها شافت لمى وركضت وراها:لمى لمى..
    لمى تمشي وماسمعتها تناديها كان كلام تركي يتردد في مسامعها ضحكت بقوه وصدى ضحكتها ملى الممر..
    مها مسكتها وهزتها:لمى وش فيك انجنيتي..
    لمى ناظرتها بدون احساس كل شي انتهــــــى خلاص..
    مها هزتها بقوه:لمى تكلمي ردي علي..
    لمى بكت بحرقه وحظنتها وهي تهذي بكلمات مافهمتها..
    مها نزلت دموعها وهي تحاول تهديها لكن مافيه فايده..
    ××في غرفة تركي××
    ابومشعل باس راس تركي:الحمد الله على سلامتك وانا ابوك..
    تركي:الله يسلمك يبه..<<دور بعيونه عليها..
    :اقول وين ريم..
    ابومشعل:مشعل ماجت معك..
    مشعل:لاتقول تعبانه..
    ام مشعل شهقت:وش فيها..
    مشعل ابتسم على شكل امه:لا يمه لاتخافين بس راسها مصدع مانامت زين كله من الاخ تركي..
    ام مشعل حطت يدها على قلبها:طيحت قلبي..
    تركي:ما قالكم الدكتور متى بطلع..
    ابومشعل:لا بتقعد هنا كم يوم لما تتحسن وش طاير عليه..
    تركي:ولاشي بس مليــــــــــت من ريحة المستشفى..
    ابومشعل:هذا وهو اول يوم..
    تركي:طيب ماقالوا متى ببدى العلاج الطبيعي..
    انصدموا:وشـــــــــــــــــــــــــــــو..
    تركي:ههههههههههههههههههه وش فيكم..
    مشعل:انت تدري انك..
    تركي قاطعه بضيق:انشليت ايه ادري سمعت الدكتور ويا بندر يتكلمون في هالموضوع..
    ابومشعل بحزن باين عليه:الدكتور قال بعد مايشيلون الجبس من يدك وجروحك تلتأم..
    تركي بعد عيونه عن ابوه اللي تجمعت فيها الدموع"آآآآآآه ياكبر الجرح في قلبي وذا الجرح لايمكن يطيب"..
    ام مشعل من قلب:حسبي الله على من كان السبب..
    ابومشعل:إلا من اللي سوى فيك كذا..
    تركي:محد انا طحت مع الدرج على ظهري..
    ابومشعل بنظرات شك:تركي قول الصدق..
    تركي:يبه هذا الصدق..
    اندق الباب..
    ابومشعل:تفضل..
    دخلت ام راكان وراكان وراها..
    ام راكان وراكان:السلام عليكم..
    الكل:وعليكم السلام..
    ام راكان:الحمد الله على سلامتك..<<وقربت منه بتبوسه بس تركي وبحركه متعمده..
    :آآآآآآآآه..
    ام راكان ارتاعت وبعدت عنه:عورتك..
    تركي يسوي نفسه متعور:ايه شوي..<<وغمز لبندر اللي كان يضحك بصوت واطي..
    راكان:تركي كيفك..
    تركي ناظره بأحتقار:حمد الله عايش..<<وشدد على اخر كلمه..
    ××
    ..((الساعه6..المغرب))..وبعد ما الكل راح لتركي وتحمدوا له بالسلامه وتطمنوا عليه مابقى إلا هو وبندر في الغرفه..
    تركي يتثاوب:وانت ماودك تروح ابي انام..
    بندر:نام احد ماسكك..
    تركي:وش مقعدك عندي..
    بندر:ابي اتفرج على خشتك (سحب البطانيه وغطاه) نام تصبح على خير..
    تركي رفعها:ناوي تخنقني انت..
    بندر بقهر:انا اندري عنك فيه احد ينام الحين..
    تركي غمض عيونه وهو يتثاوب:ايه انـ..<<ماكمل كلمته لان النوم هاجمه ونام..
    بندر ابتسم على شكله ووقف طلع يمشي في الممرات يكلمها مشتاااق لها..
    ××
    في هالوقت طلعت ريم من الحمام ((الله يعزكم)) بعد ماتحممت وقفت قدام المرايه تناظر عيونها الحمرا من البكي وخدها اللي صاير ازرق من قوة الكف..حطت يدها على خدها وفركته..ودموع متجمعه في عيونها رافضه تستسلم وتطيح..
    مشطت شعرها وحطته على جنب يخبي خدها..فتت دفترها وكتبت والقلم بيدها يرتجف من رجفة يدينها..

    ..على ذاك الطريق اللي يسمونه غرام احباب..
    وطت رجلي على دربه ولا ادري وش نوى فيني..
    تبعته لأخر دروبه الين القمر قد غاب..
    تعب قلبي ولاتعبت مسافات توديني..

    رمت الدفتر والقلم وشهقت من البكي حطت راسها على الطاوله وبكت بحرقـــه والم وحسره..
    ××
    كشرت ولفت عنها وهي تهز رجلها:ابي ارجع البيت..
    خلود:دلول تكفين لاتزعلين..
    دلال بقهر:لاااا ماتبين تجين وما ازعل..
    خلود:والله انا ودي اجي بس انتي تعرفين...
    دلال قاطعتها:تركي صح (وقفت وخذت شنطتها) على راحتك تبين تجين حياك الله ماتبين بكيفك يله باي..<<ومشت وهي مقهـوره بنت عمها وصديقتها واختها ماراح تحضر زواجها..
    سمعتها وهي تمشي:دلول وقفــــي..
    دلال بدون نفس:خير وش تبين..
    خلود:زعلانه صح..
    دلال وهي تصد عنها:يعني وش رايك..
    خلود:دلال انا ما ابيك تضيقين صدرك عشاني والله منصور لو شافك زعلانه ومكشره بيدعي علي..
    دلال حمر وجهها من طاري منصور..
    خلود:فديت اللي يستحون انا..<<وباستها..
    دلال دفتها:انطمي هههههههههههههههههههههههههههههههههههه..
    شافوها جايه تمشي بخطوات سريعه قالت وهي تلهث:سلام..
    خلود ودلال ضحكوا على شكلها:هههههههههههههههههههههههههههه..
    دانا جلست وكشرت:ردوا السلام على الاقل..
    خلود ودلال جلسوا:وعليكم السلام..
    خلود:ليه تأخرتي..
    دانا:الشوارع زحمــــــه وحر بس تصدقون عاد ماحسيت بهذا كله..
    دلال:ليه..
    دانا بأبتسامه وسيعه:حاس فيني فديـــــــت قلبه واتصل علي وما انهى المكالمه إلا لما وصلت لكم..
    خلود:ههههههههههههههههههههههههه قسم بالله مجانين..
    دلال:اقول دنو ورا مايجي يخطبك نبي نفرح فيكم..
    دانا حمر وجهها:لا وين تو الناس علينا..
    خلود:قولي آمين..
    دانا من قلب:آميـــــــــــــــــن..
    خلود:ان شاء الله ابخرك يوم عرسك..
    دانا استحت رفعت الكاس:ترى بالكاس..
    الكل:هههههههههههههههههههههههههههههههههههههه..
    ××
    نزل بيالة الشاهي:خلاص انتي شوفي راي مها ولاتستعجلين عليها خليها تفكر براحتها..
    ام فيصل وقفت وقلبها يرقص من الفرح:ان شاء الله..<<طلعت فوق ودقت غرفة مها ودخلت..
    مها رفعت راسها:هلا ماما..
    ام فيصل:يمه انتي فاظيه..
    مها سكرت الكتاب:ايه فاظيه خير ماما تبين شي..
    ام فيصل جلست:كل خير (وبحنان) يمه انتي كبرتي و..
    مها قاطعتها:اذا الموضوع عن الزواج فقلت لك من قبل ما ابي لما اخلص دراستي وبعدين مو وقته نتكلم بهالمواضيع..
    ام فيصل بضيق:ليه يمه الرجال مايتعوض ادب واخلاق وماينقصه شي..
    مها بأستهزاء:ومن هو هذا بالله..
    ام فيصل:طلال..
    مها بصدمه:طــــــــــلال..
    ام فيصل:ايه..
    مها دمعت عينها وبصوت مرتجف:ما ابي اتزوج وطلال هذا بالذات ما ابيــــــــه..
    ام فيصل:ليه انتي شايفه فيه عيب..
    مها بأنفعال:لا ما ابيه وبس..
    ام فيصل وقفت وقبل ماتطلع:فكري زين ترى الولد مو مستعجل يقول خلوها تفكر على راحتها..<<وطلعت..
    مها حطت يدها على قلبها اللي يدق بسرعه ودموعها متجمعه في عيونها..ما كانت تتخيل في يوم انها ترتبط بغير مشعــــــل..
    مستحيل تقبل في طلال وفي احد غيره ومحد راح يجبرها تسوي شي هي ماتبيه..<<وقفت ونزلت وهي متأكده من قرارها..
    قالت وهي تبلع غصتها:يبه..
    ابوفيصل بفرحه:هلا مها تعالي جنبي..
    مها يوم شافت الفرحه في عيون ابوها مابغت تخرب عليه فرحته وتقول قرارها الحين جلست جنبه وطصنعت الابتسامه..
    ابوفيصل:وش فيك وانا ابوك..
    مها ماسكه نفسها لاتبكي:هاه لامافيني شي..
    ××
    كان يدور بسيارته وهو حاط يده على خده واليد الثانيه على الدركسون اللي ضاغط عليـــه من القهر..
    "ياربــــــي انا وش سويت ليه اهينها ليه اشك فيها وانا متأكد من تربيتها وش صار فيني (ضرب يده في الدركسون وصرخ) غبـــــــــــي"..
    رن جواله وطنشه لكن رن بألحاح وبطفش:اوهوووووو..<<رفع جواله ورد بدون نفس..
    :خيــــــــــر..
    قالت بدلع:هااااااي..
    نايف تأفف:نعم خير وش تبين..
    فاتن فتحت عيونها على اخر شي:نايف وش فيك..
    نايف:ولاشي اسمعي انا مو رايق الحين بعدين احاكيك سلام..<<وسكــــر..
    فاتن انقهرت ورمت جوالها بعصبيه:على بالك يعني ميتــــــــــه عليك..
    نجود تاكل شيبس:وش قال..
    فاتن بدون نفس:يقول مو رايق الحين ياحيـــــاتي مدري مين مزعله..
    نجود ابتسمت بخبث:شكلك بديتي تحبينه..
    فاتن بأنفعال:اقـــــــول بلا كلام فاظي (سحبت الشيبس) هاتــــي..
    نجود رفعت حاجب:اصلاً الحب مبين في عيونك..
    فاتن وقفت وبعصبيه:انتــي من وين تعرفين الحب عساك بس تدرين وين الله حاطك فيه..<<رمت عليها الشيبس وطلعت..
    نجود همست وهي مكشره:اففففف ياربي متى تفكني منها..<<رفعت جوالها وطلعت صورته..
    :آآآآآآآآه محد مصبرني على اختك غيرك..<<وباستها بقــــوه..
    بصوت عالي:نجــــــــــــــــود..
    نجود ارتاعت وسكرت الجوال:طيب جايه جايه..
    ××
    ؛؛..والله مايهون علي تنام وخاطرك زعلان..؛؛

    عجبته الفكره صح انها فكره مجنونه بس لازم يسويها مايقدر ينام وهي زعلانه منه..غير طريقه وراح لطريق بيتهــــا..وقف عند البيت وناظره فتره متردد ينزل وإلا لا..
    في الاخير نزل وهو خايف من ردة فعلها لما تشوفه خذ نفس طويـــــــل ورن الجرس..
    :



    تعليق


    • #3
      رد: تموت عيونهم فيني .. وانا بك ميته عيني الجزء السابع والعشرون

      [align=center][align=center][table1="width:95%;"][cell="filter:;"][align=center]الله يصـبيرني على هالعشأق المجأنين ..
      نكمـل القصهـ ,,
      تحيـأتي
      دموووع
      [/align]
      [/cell][/table1][/align][/align]
      [align=center]



      http://www.shbab1.com/2minutes.htm[/align]

      تعليق


      • #4
        رد: تموت عيونهم فيني .. وانا بك ميته عيني الجزء السابع والعشرون

        نتابع بصمت

        دمت بكل خير

        تعليق

        يعمل...
        X