إعـــــــلان

**آينشتاين** · 01-28-2009, 05:28 AM

نبذه بسيطه ..

الأمير , الفارس, الشاعر عبيد بن علي الرشيد , و الرشيد كما هو معروف فخذ من آل جعفر من عبده , أحد بطون قبيلة شمّر. ولد عبيد تقريبا عام 1220 هـ , و يعتبر من أشجع فرسان الجزيرة العربية في ذاك الوقت ..

يقول عنه طلال السعيد في الموسوعة النبطية الكاملة, الجزء الأول :
" كان بسيفه يشكل الدعامة الأساس لحكم آل رشيد بحائل, و كان قائدا للجيوش و محاربا صلبا علق روحه على طرف سيفه و خاض المعارك بجرأة و اقدام قلما يوجد لها مثيل و هو من الرجال القلائل الذين امتازوا بالقوة الذاتية و الجسارة و المهارة الحربية منقطعة النظير".

**آينشتاين** · 01-28-2009, 05:41 AM

ولد عبيد في زمن كله حروب و اضطرابات , و كانت الحروب على وقتهم مثل شربة الما, أسهل شي عندهم انك تحارب, فما يمدي حرب تطفى إلا و تالع حربن أخرى. و عبيد نشأ على هالحياة و على هالحالة, على صوت الخيل و قرقعة السيوف, اللي خلته يصير فارس و شجاع. يقول في وصف احدى الحروب :
يا مل قلبٍ بين خمـــسٍ وعشـرين =هجسٍ وهاجوسٍ وعدلٍ ومايـــل
يديـــرهـن دولاب الافكــــــار تسعين =بالصـدر ينشر دقهـــن والجلايـل
واصبحت منهن خاليٍ كود ثنتيــن =سعدى ومصقولٍ يداوي الغلايــل
وخماســــيٍ غمقٍ صوابه وجوزين =إلـى اقرنوا قحص الامهار الاصايل
يا دارنا مـن جــــاك جينـاه عجلين =بالليل نسري والصفر والقوايل
فإن كانهم عنا بالانشاد محفيـــن =من الراس ما نعتـــاز دز الرسايل
جيتهم على اول سـرية وقم الألفين =كن الشهر به ديدحــــان المسايـل
حضر الجبل والبـدو ناسٍ صليبين =يتلن لنا حمـرات شقـــر الجدايل
جينا صباح وهم لنا مستكنيـن =وثار الدخن من حر صلو الفتايـــل
وحصل لنا عقــب المواصــل وفا الدين =وراعي السـف ردت عليه الجمايل
وبفضـل رب العرش عدل الميازين =صـارت على القصمان وأولاد وايل
عجاجتٍ تجلى صدى القلب يا حسين =دبيلـــةٍ مـــــا مثلهـا بالدبايل
كم ميمـرٍ داجــــــو عليه الغلامين =خلوا دماغـــــه عــــن علابيــــــه مايل
ربعي مروية السيوف المسانيـن =خلو صفا بقعـــا مـن الــــدم سايل
واللي ذبـحت بشذرة السيف تسعين =منهــم ولانــــي عن طردهم بسايل
ذبحت أبـو صالح صعوط المجانين =وودعــــت دم الشيــخ بالقــــاع سايل
واللي وطينا ما تشوف المحبيـن =والكــذب تنفــــاه العلـوم الصمايل
جـــــونا يبون ديارنــا والبساتين =يبغون منــزلنــا قفـــــارٍ وحايل
يقـــــول جـــده يـــوم صولة هل الدين =قــادو عليــــه ذاهبيــــن الحمايـــل
ونكس على ربعه يسوق الفراميــن =فيدة عماهم تايهين الدلايــل
يصيح مثل البارحــه ما هنا شين= ولا حصل له غيـــر قطـــع الوصايل
واليـــوم يبغونــــا وحنـا معيين =نجـــــدع بحد السيف مــــن جاه عايل
أغداه بالمكحول خـرط الفراقين =وعرضاتهـم في مشرفات النثايل
أطاع حكـــــي الذايــــدي والسلاطين =كم واحدٍ قبله رمي بـالحبايـل
ناسٍ يبون العـز منهــــم ذليلين =وش قال مشعــانٍ بهم بالاوايل
واللي عطـــــوا حق الديار الهزازين =فحنا إلى عــدت الرجال الحمايل
ربعي على حرب المعادي ضريرين =مــن سابــــقٍ كسابـةٍ للنفايل
عنـدي له اللي يلبسـون التوامين =إلــى اجذبـوا شروى بروق المخايل
يتلون عيد الضيــف ريف المساكين =الشيخ أبو متعـب عزيز النزايل
ان سلم راس الشيـــخ فحنا عزيزين =ارجيه من معطــي العطايا الجزايل
إلى بغا أمرٍ ما يطيــع المشيرين =الحيد شيال الحمول الثقايـل
وصلوا على قنديل سكن الحجازين =راعي المقام المعتلـــــى والرسايل
ومني عدد ما شمـع اللبن بالطين =وما بيـت الله تشـد الرحايل
و في الحرب هذي, يقال ان سيفه المصقول , لصق بيد عبيد من كثر ما ذبح فيه من القوم اللي حاربوهم, ولا قدر يفك السيف عن يده لين حطها بماء دافي.

**آينشتاين** · 01-28-2009, 05:51 AM

ولا شك , أن الفارس البدوي, ما يقدر يتخلى عن حصانه لو يعرض عليه الذهب مقابله ما باع, و اللي صار لعبيد, إن أحد ولاة الأتراك طلب منه فرسه " كروش" , فما وافق عبيد, و بيّن ان فيصل الدويش و محمد بن هادي قبل البيه سألوه كروش , بس انه ما يبيعه ولا يبدله لو بغالي الأثمان :

يا بيه انا لكروش ماعطي ولاابيع ***قبلك طلبها فيصل و ابن هادي

يا بيه لو كثرت بالقول مااطيع *** هو كيف تبغيني أسلم جوادي

يا بيه ما يرهم على مثلها البيع ***ولا يجي مثله بقودة امهادي

ما جمع أصله بالقراطيس تجميع *** أصله يعرفونه جميع البوادي

باع الى من لقموا بالمصاريع **** و صاح الصياح و ثارعج الطرادي

أنهج عليها و انعدي للتراثيع *** مثل الفحل لا صار وقت الهدادي

و اصلّها لعيون بيض مفاريع *** فوق الحنايا و السبايا غوادي

هذاك بيعه و الصبايا مفاريع *** بين القنا و مخفرات الهنادي

**آينشتاين** · 01-28-2009, 05:54 AM

اما القصيدة هذي, تمثل فلسفته في الحياة و الحياة الي كان يعيشها, و ذهبت أغلب أبياتها أمثال دارجة :

القلب من كثر الهواجيس قزّان *** ما يستريح من الدهر ربع ساعة

يا غافر الزلات يا والي الاحسان *** تجعل من التقوى لنفسي بضاعة

أنا على لان و ربعي على لان *** متخالف رايي و راي الجماعة

مانيب شاري غير بت من الضان *** يقنع باشراك البهم في ارضاعه

أنا ولد علي سلايل كحيلان *** و ربي خلقني للسبايا وداعة

الناس ما تسقيك لا صرت عطشان *** ولا يشرب المظمي حذا من ذراعه

اضرب على الكايد لا صرت بحلان ***و عند الولي وصل الرشا و انقطاعه*

عيبن على اللي يتقي عقب ما بان *** و عيب طمان النفس عقب ارتفاعه

اما تجي بعقود حص و مرجان *** ولا فهي لابليس طار بشعاعه

واطرابة الدنيا مع الفجر دخان *** واكرارةٍ باطراف خطو الصعاعة*

*ملاحظة : اورد مؤلف الكتاب البيت السابع كما يلي :

اضرب على الكايد لا صرت بحلان ** و عند الولي وصل الحبل و انقطاعه
و اورد البيت الأخير ذاكرا الصماعة بدلا عن الصعاعة . و التعديلات اخذت من شايب من أهل حايل .

**آينشتاين** · 01-28-2009, 05:56 AM

و لعبيد بعض القصائد الغزلية النادرة, و هو مقلّ من ناحية الغزل, و قال هالقصيدة بعد رجوعه من إحدى الحروب البعيدة, يقول ياصف الضلع اللي مر عليه :

لي بأيسره من لابسات العشاريق *** خشف يخلط المسك و الزعفراني

وش عيشتي لولا رجا ذابل الريق *** لولا رجا لاما زريف المثاني

ابو قرون كنهن دفن الهيق *** وامجدل فوق المتن له وقاني

من حط فوق الصدر زين العشاريق *** حص و مرجان زها بالبياني

روض البختري زاهي بالزماليق *** و امفلجات به كما القحوياني

هي نقوتي من لابسات العشاريق *** من مصر الى غربه لشرقي عماني

**آينشتاين** · 01-28-2009, 06:10 AM

و هنا يوصف زوجته بهالقصيدة .
و في اخر ايامه له هالقصيدة اللي تحوي الكثير من الحكم. و مثل ماهي عادته, يعتز بنفسه و يفخر بأفعاله الحميدة, و يحق له الفخر و الاعتزاز, لأنه كان قول على فعل :
طلبت ربي عالم السر و الغيب *** يقبل صلاتي له و يقبل صيامي
و يحعل لنا عرض نزيه عن العيب **** و يفكنا من شر سو الاثامي
بن ادم ملفا الخطا و العذاريب *** لو ما فعل رميت عليه التهامي
حميت انا نفسي عن الشك و الريب *** ولا احسب ان يلقا بعرضي كلامي
ربعي لقوا بي عقب ما شبت انا عيب *** تسطير كتب مفسرين الحلامي
قلت اخبروني يا ملا وش ذالعيب *** قالوا على ساقة رفيقك اتحامي
قلت ان هذا من قديم لنا عيب *** مستارثينه من خوال و عمامي
العيب ترك المعرضه بالمواجيب *** والا الرفيق بطاعته ما نلامي
رفيقنا كنه بروس الشخانيب **** في راس حد نايف ما يظامي

وهناك الكثير من اشعاره .. وابياته لم اتمكن من وضعها لانها تأتي في منتصف القصه ! ..
مات عبيد العلي الرشيد بعد ما عمّر , عاش حياة طويلة مليئة بالانتصارات و الحروب , الله يرحمه .

**آينشتاين** · 01-28-2009, 06:13 AM

انتهى !!!

مع تحياتي
آينشتاين

**مـــحـــامـــي** · 01-28-2009, 06:22 AM

الأمير الشاعر عبيد بن علي الرشيد..رحمه الله
اسم برز بشكل عام في شبة الجزيره العربية
كان فارسا لا يشق له غبار وكان شاعر الجزلات
الـاـه يـرحـمـه ...
يعطيك العافيه ع الموضوع
واتمنى منك في المواضيع القادمة عدم ذكر اسم المعركة

**Demon of Dark** · 01-28-2009, 06:29 AM

الله يرحمه ويغمد روحه الجنه

موضوع رائع تسلم ايدك عليه

ماننحرم

**آينشتاين** · 01-28-2009, 06:39 AM

المشاركة الأصلية بواسطة مـــحـــامـــي مشاهدة المشاركة

الأمير الشاعر عبيد بن علي الرشيد..رحمه الله
اسم برز بشكل عام في شبة الجزيره العربية
كان فارسا لا يشق له غبار وكان شاعر الجزلات
الـاـه يـرحـمـه ...
يعطيك العافيه ع الموضوع
واتمنى منك في المواضيع القادمة عدم ذكر اسم المعركة

محامي .. تمت ازالة اسم المعركه
شكرا ً على التنبيه وشكرا ً على المرور الرائع ..

**آينشتاين** · 01-28-2009, 06:41 AM

المشاركة الأصلية بواسطة demon of dark مشاهدة المشاركة

الله يرحمه ويغمد روحه الجنه

موضوع رائع تسلم ايدك عليه

ماننحرم

الأروع مرورج ..
شاكر تواجدج ..

**رافض الحب** · 01-28-2009, 09:59 AM

يسلمووو على الموضوع الجميل

ويعطيك الف عاافيه

**آينشتاين** · 01-28-2009, 11:16 PM

شكرا ً على المرور ..

إعـــــــلان

مساحه خاصه للأمير الشاعر عبيد بن علي الرشيد..رحمه الله !

مساحه خاصه للأمير الشاعر عبيد بن علي الرشيد..رحمه الله !

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق