مرحبا
اليوم حبيت اكتب لكم عن شباب نفتخر فيهم من بلدنا الحبيبة الكويت
اكيد كلكم هالأيام متابعين مسلسل عيون الحب اللي يعرضونه على تلفزيون الوطن و الام بي سي
و مسلسل رسائل من صدف اللي يعرضونه تلفزيون دبي
و تابعناه على تلفزيون الراي في شهر رمضان الماضي
اليوم بكتب لكم عن المؤلف المبدع الشاب الكويتي
عبدالعزيز الحشاش

اللي كتب هالأعمال الاجتماعية الحلوه
و كان ولا زال فعلا مفخرة الشباب الكويتي اللي نرفع الراس فيه
فهو كاتب موهوب و قدر ان يثبت نفسه و يضع له بصمة رغم إنه لا زال في بداياته و رغم ان مثل ما تشوفون صغير بالسن
اشتغل مع نجوم مثل حياة الفهد و سعاد عبدالله و عبدالحسين عبدالرضا في الاذاعة
و اشتغل مع نجوم في التلفزيون و قدر يقدمهم في قصص حلوة شدتنا و في اشكال ما تعودناهم عليها
واليوم يايبتلكم معلومات عامة و معلومات حصرية عنه يمكن محد يعرفها من قبل
++ المعلومات العامة ++
- سيرته الذاتية -
اسمه : عبدالعزيز مبارك الحشاش
هو ولد الكاتب الكويتي المعروف مبارك الحشاش اللي كتب مسلسلات كثيرة و أبرزها مسلسل رقية و سبيكة
- مواليد الكويت 7 مارس
- خريج جامعة الكويت - كلية العلوم الإجتماعية قسم علم إجتماع
- كاتب و سيناريست
- عضو في رابطة الأدباء الكويتية
- حاصل على عدة جوائز و شهادات تقدير في مجال كتابة القصة القصيرة و المسرحية
- نشرت له العديد من القصص و المقالات في العديد من الصحف و المجلات المحلية و العربية
- كاتب في مجلة بازار
- أعماله التلفزيونية : مسلسل عيون الحب و مسلسل رسائل من صدف
- أعماله الإذاعية : مسلسل لا طاح الجمل بطولة حياة الفهد و عبدالعزيز جاسم - مسلسل القلب الحنون بطولة هدى حسين و فهد العبدالمحسن - مسلسل نافذة على الكويت بطولة سماح و محمد حسن - مسلسل المسامح
كريم بطولة سعاد عبدالله و غانم الصالح
مسلسل راعي الديوانية بطولة عبدالحسين عبدالرضا و سعاد عبدالله
++ المعلومات الحصرية ++
عبدالعزيز ترتيبه بين أخوانه الثاني و عنده من الأخوان 6
و كلهم أولاد يعني ما عنده خوات
---------
اخوه يوسف الحشاش هو الممثل و المخرج المسرحي اللي دايما يشارك في المهرجانات
المسرحية و مثل في مسلسل عبدالعزيز ( رسائل من صدف ) و كان دوره ولد الفنان فيصل العميري
و هذي صورته
يحليلهم ماكو شبه بينهم
و على فكرة ترا يوسف اصغر من عبدلعزيز .. شلون مادري ؟؟ عبدالعزيز شكله اصغر ههههه الله يخليهم حق بعض
----------
عبدالعزيز كان يدرس في امريكا اعلام و ما كمل دراسته و رجع الكويت و دخل جامعة الكويت
و لأن تخصص الاعلام كان يبي معدل عالي ( اعلى من معدل امريكا ) <---- يحليلها جامعتنا قوانينها تضحك
فاضطر عبدالعزيز ان يدرس علم اجتماع بدال الاعلام. و مثل ما صرح في اكثر من لقاء دراسته لعلم الاجتماع فادته وايد في الكتابة
وهو الحين يشتغل اخصائي اجتماعي في وزارة الشؤون في ادارة المسنين
----------
عبدالعزيز كان كاتب مسلسل عيون الحب قبل سنه و نص من وقت عرضه .. يعني النص كان عند المخرج
دحام الشمري من زمان .. و ما كان المخرج عنده نيه يصور المسلسل لأنه كان وقتها مسوي مسلسل التنديل و كان مكتفي فيه و كان يعتقد ان المسلسل بيحقق صدى قوي
لكن تلفزيون الوطن اطلبوا من المخرج ان يسوي لهم مسلسل فقام و سوى النص مال الحشاش اللي اهو عيون الحب اللي انعرض و تفوق على مسلسلات وايد في رمضان 2008 لما انعرض لدرجة انه تفوق على مسلسل التنديل نفسه و مسلسل الداية و مسلسلات خليجية كثيرة
و المسلسل كان ورا شهرة هالكاتب الكويتي الشاب الطموح
----------
المعلومة الحصرية و المفاجئة عاد اللي ما أظن أحد يعرفها إن الكاتب عبدالعزيز الحشاش لما خلص كتابة مسلسل عيون الحب كان كاتب في نهاية الحلقة الأخيرة جملة تطلع على الشاشة تقول : هذا العمل اهداء الى كل أم
و كان يقصد في هالجمله أمه .. لأنه وهو يكتب المسلسل كان يتخيل شخصية عايشه اهي أمه
لكن المخرج ما حط الجملة لسبب غير معروف !
على كل حال الدراما الكويتية و الخليجية اكسبت مؤلف شاب صغير مخه مفتح و مثقف و عنده مخيلة خصبة ننتظر منه كل جديد و الحين اتركم مع بعض الصور لعبدالعزيز
والله يوفقه يا رب
- له كتاب بعنوان (إنه الليل يأتي) وهو مجموعة قصصية
له فيلم سينمائي قصير بعنوان ( الستارة )بطولة منصور المنصور و أحمد الصالح و اخراج منصور حسين المنصور
قرينا في الجرايد انه يحضر لمسلسل جديد اسمه أيام الفرج
و بيعرضونه في شهر رمضان القادم على تلفزيون الراي بعد
الله يستر و ما يحطونه في توقيت بايخ مثل توقيت مسلسل رسائل من صدف
لأن التوقيت اظلمه وايد
و هذي مجموعة من الصور للكاتب
صورته لحظة تسلم جائزة أفضل مؤلف في رمضان الماضي عن مسلسل رسائل من صدف
صورته في حفل توقيع كتابة في معرض الكتاب السنة اللي طافت لما نزل كتابة الأول انه الليل يأتي
و هالسنه رحت معرض الكتاب و سألت عن كتابه ولا خالص ماشاء الله ما حصلته :(
يستاهل ولد بلدنا نرفع فيه الراس
وهذا موقعه الشخصي