تويت
.gif){kind=icon}
سرقتك بالزمن لحظه وعشتك بالفراق اوقات الجزء السادس
ஐالجزء السادس ஐ
اليوم الثانيـ ------>>>
وصل حمدان لجده قرابة الساعه ست صباحا لانه مالقى حجز واضطر يجي على السياره وطبعا الرحله للمنطقه الغربيه استغرقت حدود ست ساعات ..
وفي نفس الوقت كان طارق بالمستشفى بلحاله لان جلوي اضطر يرجع للرياض ..
وقف طارق وهو يشوف حمدان جايه يمشي بسرعه ؟.
حمدان "السلام عليكم"
طارق "وعليكم السلام والرحمه"
حمدان "خير يا طارق خالد شفيه "
طارق وهو يمسح بوجهه بيدينه من التعب له اكثر من ثلاثين ساعه مانام ..
"والله مدري شاكين بشي بس رفضو يعلموني وشهو وقالو بيسوون فحص كلي واشعه مقطعيه للدماغ وللحين مدري عنهم "
حمدان ووجهه اصفر "ياربـ سترك انا قلبي مو مرتاح لنوباتـ الصداع الي تجيه "
طارق بخوف "والله مدري بس كانت تجيه بزود وله كم شهر يشكي بس ياخذ مسكنات واظن ماعاد تنفع الله يهديه كم مره قلت له يروح طبيب مختص وهو رافض"
حمدان "ليت ماتنفع وانا اخوك ربك يستر بس "
طارق "يارب "
حمدان وهو يناظر في وجه طارق التعبان ومحاجره السوداء من الارهاق وقلة النوم "اقول شكلك مرهق انا حجزت لنا غرفه بفندق قريب من هنا "
ناظره طارق بقلة تركيز "تصدق نسيت موضوع النوم والحجز"
حمدان وهو يحط يده على كتفه "ما يخالف وانااخوك رح ارتح وانا بجلس هنا لين يجي الطبيب ونعرف وش فيه .."
طارق بعناد "بجلس هنا وانتظر الطبيب المسؤول عن حالته "
حمدان باصرار "يا اخوي ريح والي كاتبه الله صاير صاير جلستك بتضرك مو نافعتك رح الله يهديك ونم لك كم ساعه "
تعبه الجسدي والنفسي كان اكبر من كل تحدي وعناد .. ومالقى نفسه الا طالع من المستشفى ورايح للفندق .؟.
*
.؟.
*
.؟.
جلس حمدان متململ وكل دقيقه يرفع الجوال يشوف الساعه..وصل جده بحدود ست والساعه الحين 8 و الطبيب ماجا ..
الا وجواله يدق .. ابو مقرن يتصل ...
"الو "
"السلام عليكم .."
"وعليكم السلام هلا ابو مقرن"
فهد بخوف " حمدان شعندك متصل على الفجر "
حمدان "والله يا خوي خالد طاح مغمى عليه بمطار جده وهو الحين بمستشفى (.........) وانا انتظر الطبيب المسؤول عنه عشان يعلمنا وش فيه
فهد بصدمه "وخالد وينه "
حمدان "بالعنايه يا خوي شكل سالفته كبيره "
فهد "ياربي سترك ورحمتك الوالده درت "
حمدان "لا لا تعلمها بشي خلنا نتبين السالفه حتى ريوف ماتدري وانا ماشوف له داعي نعلمهن على الاقل بس لين تطلع النتايج ونشوف وش فيه "
فهد "نعم الراي انا جايكـ في اقرب فرصه بس لاصار شي وكلمك الطبيب دق علمني"
حمدان "زين"
فهد "سلام"
حمدان "سلام"
جلس حمدان مسند ظهره للكرسي ومشبك اصابيعه ببعض ينتظر وصول الطبيب .. وشوي الا واقف على راسه طبيب طويل وشعره فيه شوية شايب وباين الوقار على وجهه .."السلام عليكم"
وقف حمدان "وعليكم السلام والرحمه"
الطبيب "قالو لي بالاستقبال انك من اهل خالد ....... "
حمدان "انا اخوه "
الطبيب "حياك الله اخوي ياليت تتفضل معي المكتب لان السالفه يبيلها جلسه"
بان الخوف على عيون حمدان قال الطبيب يواسيه (قل لن يصيبنا الا ما كتب الله )
حمدان "ونعم بالله "
وراحوا لمكتبه .. وهم بالطريق قابلهم طارق "السلام عليكم"
الطبيب وحمدان "وعليكم"
حمدان للطبيب "هذا طارق زميل وصديق خالد واخونا"
الطبيب "تشرفنا "
وراحو كلهم مع الطبيب للمكتب الي بالطابق الثالث وبعد ماجلسوا .. قال الطبيب "شوفوا يا اخوان كل شي يصير لابن ادم مقدر ومكتوب من الله سبحانه والواحد لازم يرضى بقضاء الله وقدره "
سكت شوي حتى عقولهم المترقبه تتشرب هالكلام وتستوعبه ويخفف وطء الصدمه عليهم ..
كمل "......... خالد وكتشخيص مبدئ اظنه مصاب بصداع نصفي فقط لكنه من النوع الشديد لكن............(وصار وجهه اصفر)"
طارق وقلبه يرج بصدره "ايه"
الطبيب بأسى "مدري فيه شي مو طبيعي غير الصداع الي اوهنه لانه شاب قوي ومو ضعيف ولما عملنا التحاليل اللازمه تبين انه مصاب بسرطان الدم"
طاح جوال حمدان بالارض وقال طارق بصدمه "ايش"
الطبيب بهدوء "قدر الله وما شاء فعل"
حمدان بكلمات غير مترابطه ويدينه ترجف "سرط....ان .. كيف شلون ومن وين جاه"
الطبيب وهو يهز راسه بعجز "للاسف يا اخ حمدان هالمرض بالذات أسبابه غير معروفه ...و........"
طارق انعدم واقعه من حوله "و ايش ماظن يا دكتور الي بنسمعه مصيبه اكبر من الي تو سمعناه"
الطبيب برحمه "المرض بحكم انه بالدم يعني منتشر "
حمدان بألم "يعني نتركه يموت ونتفرج"
الطبيب يحاول يواسيهم "الرسول صـلـ الله عليه وسلم ـى قال يا اخوان "عجبا لأمر المؤمن أمره كله خير " وهذي كفاره من الله ومغفره له انتم كبار يا إخوان ومؤمنين بقضاء الله وقدره وحنا مانبي نستعجل الأمور يمكن نلقى حل ولا مخرج طبي "
طارق وهو يناظر في حمدان "ومتى نعرف النتايج "
الطبيب "الليلة إن شاء الله أو بكره اعرفو إني بحاول قد مقدر استعجال النتايج عشانكم ضيوف علينا هنا وتقديرا لظروفكم"
طارق بصدمه الخبر إلي مازالت تشله "مشكور ماتقصر بس نقدر نشوفه"
الطبيب "لا للأسف لأنهم يسوون له الفحوصات الحين"
حمدان بغصه "طيب صاحي هو يدري عن إلي يصير حوله"
الطبيب "طبعا صاحي المسكنات هدأت الوجع وهو بخير حاليآ"
سكتوا العيال ماعاد عندهم كلام يقولونه غير الدعاء له والانتـظار
ويا ما أصعبه من أنتـ ظ ـار !!
،
،
،
>>>> قبل العصر بربع ساعـه
نزل ماجد من غرفته بعد مانام له ساعه يرتاح فيها .. ابتسم وهو يسمع ازعاج خواته بالبيت وتذكرت ايامهم منول ايام الوناسه والجمعات والبيت الي كانن خواته منوراته والي بزواجاتهن تركن فراغ كبير فيه ياليت العادات والتقاليد تسمح انهن يكونن حوله وببيته بس يالله اهم شي سعادتهن وراحة بالهن ..
دخل الصاله "سلام"
وعم الهدوء ثواني لان وجوده ملا الصاله الوسيعه "وعليكم السلام"
جلس جنب امه وقال لخواته "اقول بنات اليوم بيوصل اثاث جناحي ياليت تسنعنه عندي شغل مو فاضي "
امه "يمه فضي نفسك ساعه طيب تاكد انه الاثاث الي طلبته"
ماجد "يمه هو هو اكيد معطيهم عموله وش كبرها عشان يوصلونه في موعده زين تعرفين فارس مالقى حجز بعيد والعرس بعد زواج بندر بشهر"
صرخن البنات "شهر"
ماجد "ههههه ايه ولا تقولن متى يمدينا نشتري فساتين لان فساتين زواج مشاري وبندر تكفي"
ريوف وعيونها طالعه من الصدمه "يالهوي اذا ماشريت لعرسك اجل اشتري لمن "
ماجد "ههههههه عليكن حركات يالحريم لازم التكاليف يعني "
اماني "هذا عرسك انت مو حيا الله "
"هههههههه رايقات"
قالت اماني وهي تجلس قدامه "اقول مجود شرايك تعطينا قصيده من قصايدك الزينه "
ماجد "افتحي لاب توبي تلقين قصيده بدايتها الشعر يعني .. وبعض احيان ما يعني"
اماني "القها علينا"
الا وهو ياذن "بعدين اقرا لك بس الحين صلاه وانا اساسا ناسيها لاني كاتبها من زمان"
.. قالت ريووف وهي تسمعه يإذن "يووووووو امانيو وجع ليه ماذكرتيني ادق على محل الحلويات واطلب حلا وفطاير "
اماني "انا شدخلني ان كنتي نسايه"
امهن "امر الله من سعه لا فاضو من الصلاه اطلبن"
ريووف بتكشيره "ايوه وننتظر لين المغرب على بال ما يوصل"
ام ماجد "اطلبي من غيره "
ريووف واماني "لا مانستغني "
وجلسن يضحكن على بعض لان هالمخبز مافيه زي حلوياته وفطايره ...
دخلت البتول الي سمعت اخر سالفه وقالت تمزح "ايوووووا من يفكنا من لسان جود الحين نسيتي انها تتشرط دايم لا جتنا وتذلنا "
قال ماجد بعفويه "بتجيكم جود اليوم"
البتول "ايه هههههه اجل هالرعب ليه ياربي يا ماجد ماتعرفها لا استلمت ريووف واماني تهزيء تموت ضحك "
اماني كانت تضحك وريووف كانت تبتسم وعيونها على اخوها وتعبيراته ... كان هادئ وملامحه عاديه بس مسكته للجوال بقوه ورجفه تفضح مشاعره ..
وقف ماجد لانه اقام ... وبيلحق الصلاه لا تفوته
قالت ريووف بهمس "شفتي يوم جت سيرة جود وش سوى "
اماني بهمس عن البتول وامهن "ماسوا شي لاتكبرين السالفه"
ريووف وهي تتمهزا "ماسوا شي اماني لا تسوين مو فاهمه"
اماني باستسلام جزءي "طيب ارتبك شوي وتوتر بس"
ريووف "ههههه الاعتراف بالحق فضيله"
اماني وهي تخزها "قومي نصلي ابرك بس "
،
،
---------->>>بغرفتهن ..
كانت اماني تسوي مكياجها وريووف تمشط شعرها الا جوالها يدق "الوووو"
ماجد "هلا ريووف انا بمحل الحلويات الي تحبنه قولي وش طلباتك"
فتحت فمها بصدمه "هاه"
ماجد بعجله "ريووف عجلي علي وراي اشغال"
ريووف "هاه ايه طيب ........"
ونقلته الاغراض الي تبيها ثم سكرت الجوال مصدومه شوي الا وتنفجر ضحك..
ناظرتها اماني "الحمد لله ياربي انهبلتي"
ريووف "ماتصدقين لو اقول لكـ"
وعلمت اماني... الي فتحت فمها بدورها ..
اماني "ههههههه توه مشغول وماعنده ساعه يفضي نفسه فيها "
ريووف سكتت فجأه "عشان تعرفين اني ما امزح يوم اقول لك ان ماجد يحبها للحين"
جلست اماني "طيب يا ريووف يومنه يحبها ليه ماخطبها ليه تزوج نجوى ما تلاحظين ان فيه علامه استفهام كبيييييره حول الموضوع"
سكتت ريووف شوي وقالت بتردد "اماني بقول لك بس لا احد يدري وخصوصآ جود"
اماني "قوليـ"
ريووف "قبل ملكة ماجد بتقريبا اسبوع كان فيه جمعه عندنا انا وجود وندى وبنات ابو طارق "
اماني وهي تفكر "مذكر"
ريووف "انتي كنتي مسافره مع رجلك الديره"
اماني "طيب"
ريووف "كنا نسولفـ وقالت نجوى لجود يا بختك على الاقل ماجد يحبكـ من بين الكل ورغم انه اكبر منك بتسع سنين تقريبا جود استحت وسكتت بس الغيره كانت واضحه بعيون نجوى الي كان ماجد معجبها وكانت تستفز جود الي قالت لها لما زودتها عيب هالكلام قالت لها نجوى وهي تضحك عيب ليه تنكرين انك تحبينه جود طبعا مستحيل تعلمها بالصدق لان نجوى راح تركض لامها وتعلمها وامها بدورها تفضح جود بجماعتنا كلهم قالت جود لا ماجد ولا ميه زيه يحركون فيني نبضه قلب او ادني اهتمام ومن سوء حظها ان ماجد كان مار من غرفتي وسمع كلامها (قالتها بحزن) "
اماني تفاعلت مع ريووف لان السالفه ذي ما تعرفها "لاااااااااااااااااااا"
ريووف بحزن "بعد ما راحن البنات لبيوتهن جلست بالصاله معه وكان يقلب بالقنوات بعصبيه اخر شي قال لي ريووف قلت نعم قال بسالك سؤال وجاوبي عليه يا ايه يا لا قلت اسال قال صدق ان جود هي الي قالت لا ماجد ولا ميه زيه يحركون فيني نبضه قلب او ادني اهتمام انا انلجمت وولع وجهي ودخت الله لا يوريك حالتي يوم سالني طبعا ماجاوبت صرخ فيني روعني وقلت ايه قالته بس ورفع يده سكتني قلت له يا ماجد فهمت غلط خلني اشرح لك وناظرني ذيك النظره وقال لا تفتحين سيرتها قدامي مره ثانيه ومن باعني بعته برخص التراب ومن ما حركت فيه نبضة قلب وادنى اهتمام انا مستغني عنه قلت بس الا ويهب فيني بكل صوته ويرمى الريموت بالارض لينه مية قطعه وقال ان فتحتي معي هالسيره لا انتي أختي ولا اعرفكـ وطلع من عندي زعلان"
اماني راح وجهها اصفر وقالت لريووف وهي تهزها "ريووف ليش ما علمتيني ليش سكتي لين الحب الي بينهم انتهى انتي ماتشوفين جود كل يوم تذبل بسبب زواجه من الي ما تتسمى "
ريووف وهي مدمعه "اماني كنت صغيره و اول مره يصرخ فيني ماجد روعني غير انه ملك على نجوى عقبها بأسبوع "
اماني وهي ضامه وجهها بيدينها "يا الله "
ريووف بحزن "اماني انا مستعده اتقبل زواجه بغير جود الي كانت تحت حمايته وكانت مخصصه بحبه من يوم وهي صغيره لين كبرت لو الي تزوجها غير نجوى ، نجوى ما ينعرف لها مع كل هبه ريح تتغير ساعه نقول مدينه وحبيبه وساعه تقلب على الوجه الثاني انا اتمنى لاخوي السعاده والاستقرار ماجد يستاهل الخير يا اماني وانا خايفه من حياته تتعكر لا تزوج"
دق الجوال يقاطع نقاشهن لينها جود "الوووو تراي بالطريق حبيباتي افتحوا الباب لا انلطع بالشارع (قالت تستهبل) الاخت ندى عندها مشوار مستعجل لمحلات نعومي ااااااااااااااااااااااااااااي وجع ندوش "
ريووف "هههههههههههههههههههههههه الله لا يأمنك على سر مسلم "
جود مسويه مظلومه"حرام عليكـ يالنذله يالله سيو اتفاهم معك لاجيتـ"
ريووف " ههههههههههه طيب بدق على الشغاله تفتح طرف الباب لك والبيت امان مابه احد "
جود "اوكي سياااااااا"
اماني وهي تتذكر "بروح اجيب لاب توب ماجد ابي اقرا القصيده بدايتها مشوقه "
ريووف "هههههههههه طيب لا تبطين"
ثواني الا واماني جايبته .. فتحنه على الملف الخاص بكتاباته ولقت القصيده الي ماحط لها عنوان بمكان وسط فوضى احاسيسه ومشاعره
ريووف "يالله اقري باسمعك"
اماني "اوكي بس مافيه زي القاء ماجد "
الشعر يعني .. وبعض احيان ما يعني *** والجرح ضيفٍ سكن بي والحشا بيته
الشعر ارضي .. يوم ان الهم زارعني *** الشعر نهرٍ .. شربــني يــوم صبّيتـــه
سهّرت وجهي وكف الصبح يصفعني *** كنــي بصمتــي جرحتـه يــوم ناديتـه
يــامــا تحلمــت في قربــك ولـوعنـي *** قلـــت اتحلـــم ببــعدك لــو عـانيــــته
يلعن ابو الحلم بس الحين طاوعني؟؟ *** لـو ادري انه بيصدق كــان صحيتــه
ما انته لحــالك عشان تقـول بـايعنـي *** كثيـر كسـروا ذراعــي يــوم مديتــه
اكـذب البعد .. لـين الــهم يـقـنعـنــي *** كنـي علـى كثـر مـا اذكرني تناسيته
قبل انتفارق وتنسى جرحي اسمعني*** وش فـايـدة كـــل جـرحٍ فيّ خليتـه؟؟
ما قلت لك من (بعد) بعدك يسنّعنـي *** هلحـين شفـني عمـا فاللــيل سـرّيتـه
ضايع من اللّه وطاري البعد ضيعني *** تبــي تــدلــه وطــالــع ويــن وديتــه
يـاكبر ظلـمك تسـافر مـا تــودعنــي *** مـاكنـك الـلــي ذبحنـي لــين حبيتــه
كـم قلــت يـا آدمـي بـعدك يروعنـي *** ويــاكـم جـرحٍ يـجينــي مــاتحريتـــه
اذكرني اليا نثرك الشوق واجمعنـي *** واذكرني اليا حضنك اسمي وضميته
واذكرنـي اليا ذكرت الدمع قطعنـي *** وان مر في خاطـرك رقمـي ودقيته
مع السلامـه وقبل تسـافر اسمعنـي *** تبقـى أكثــر انسـان بكـانـي وحبيته
ஐللشاعر / محمد الوسميஐ
سكتن البناتـ والهدوء عم الغرفه وجلست اماني بدون مقدماتـ تصيح ..
اماني عقب ماهدت "ريووف ماجد يتعذبـ انتي مستوعبه هالواقع"
ريووف بغصه "قال لك القصيده قديمه مر عليها دهور "
اماني القويه اختبص حالها "حتى لو ريووف ودي اكلمه عن هالموضوع بس متردده"
ريوف بابتسامه حزن "وش بتقولين يا ام ماجد ليش تسرعت في حكمك على جود.؟ وليه تزوجت نجوى ؟وليه؟ وليه؟ وليه؟"
اماني وهي ترجع تسيطر على نفسها "انا ما اكره نجوى ولا ابي اخرب بيتها بس اخوي ما يهون علي ابيه يفضفض لي اخوي عزيز نفس واعرفه "
ريووف "حاولي وشوفي"
اماني باصرار "بحاول"
،
،
،
تحت ----->>>
وصل ماجد ويوم دخل من المدخل الرئيسي الا البتول بوجهه "طلبن البنات اهب مسرعهن "
ماجد "شيلي الاغراض عني بالاول"
البتول بغباء "يو نسيت لحظه دفعت الحساب ولا اروح اجيب الفلوس من ورى خشومهن "
ماجد "ههههههه لا دفعت ترى كلها ميتين ريال"
طلعت عيون البتول قدام " حلا بميتين علينا يالاربع "
ماجد "تستاهلن "
كمل وهو يدخل الاكياس "رحت ادور المطعم الي ورق العنب حقه تحبنه يالله لقيته"
طلعت عيونها زود ... ماجد وهو يشوف ملامحها "شفيك"
البتول "ولا شي بس المطعم مو حول المخبز انت الي جايب الاغراض"
ماجد يستهبل "لا خيالي "
البتول "ههههههههه يا حليله خيالك ذا لا طلعت خله بالبيت عندنا "
ماجد "ههههههههه والله انك خبله اهم شي ما تفشلونا في بنت عمي "
البتول بهبالها المعتاد "ههههههههههههه اخاف يجيها انهيار لا شافت كرمك الزايد "
قال وهو يغمز "طول عمري كريم وجود تستاهل"
البتول "وحناااااااا ما نستاهل"
ضربها على راسها بشويش "الا تستاهلن يالله تاخرت على شغلي بروح اخذ اوراق من فوق ثم بطلع"
دخلت جود البيت وهي تتحلطم لان ندى عيت تخلي السواق يدخل بالسياره جوا فاضطرت تطقها كعابي من البوابه الكبيره لين مدخل البيت ..وكعبها المسمار العالي ما ساعدها ..
نزلت طرحتها وهي تدخل وصادفت البتول في وجهها .. بعد السلام قالت جود بعصبيه "اوريك ندوشوه ان ما توطيت ببطنها ماكون جود بنت صالح "
البتول بتنبها ان ماجد بالبيت بس جود مواصله تعصيبتها "والله لاذبحها"
البتول "بس اخوي ...........
جود (تحسبها تتكلم عن مشاري) "يطق راسه بالجدار ذابحتها ذابحتها عز الله بيجي العرس ورجليني متورمه من الكعب "
البتول "ههههههههههههههههههه محد قال لك ترززي بكعب طوله متر"
جود وهي تخزها "اسوي بروفات عشان العرس تبيني اهابد وافضح عمري بين المعازيم "
البتول "ههههههههههههههههههههههههه طيب اطلعي للبنات شوفيهن فوق وانا بروح للمطبخ "
جود "اوكي"
وقفت جود قدام الدرج الكبير وهي متازمه اخر شي نزلت عبايتها وكانت لابسه تنوره جنز ضيقه وبلوزه سوداء وشعرها مسيحته وماحطت مكياج بس روج زهر خفيف ومسكره ..طلعت درجتين وتعبت من الكعب تحس ظهرها بينكسر دنقت تفك الجزمه (وانتم بكرامه) وطاح شعرها قدام وهي تحاول تفكها ...
طلع ماجد من مكتبه الي بجنب غرفته بالقسم اليمين من البيت .. وهو فوق بينزل لفت انتباهه ريحة عطر .. ما تنسي وصوت معصب طل مع الدرج وشافها .. مدنقه تدبر في شي وشكلها معصبها ..
شوي الا تصيح بهمس "لااااااااااااا يا خسارة 350 ريال الي دفعتها "
ابتسم ورجع لمكتبه ينتظرها تطلع .. عشان ينزلـ ..
وبعد عشر دقايق نزل وكان المكان خالي .. بس في شي يلمع بالارض رفعه ولقاع تعليقة سلسال بحرف M ضمه بقبضة يده لانه تخيل حلم بسيط وامنيه ..
البتول برباشه "مارحت "
ماجد "بطلع الحين (مد عليها التعليقه) هذا لكـ "
وكأنه مو داري لمن ؟؟؟؟
قالت بطفاقه وتهور "لا مولي ريوف بتلبس طبعا k واماني A وانا ماحب الحروف وجودM (قالتها بعفوووووووويه لكن وجههااااااااااااا ووووووووووووولع احترق تمنت الارض تنشق وتبلعها مرت جنبه بتنحاش من فشلتها...
مسكها مع يدها "من M"
البتول بخوف "محد"
هزها بعصبيه "مـــــــــــن "
قالت تكذب "صديقتها"
ضحك بدون نفس "دوري غيرها انا عرفت من يا البتول ما يحتاج تقولين "
وفك يدها وطلع ...طلعت الشغاله بالقهوه والبتول مسنتره ترتجف بوسط الدرج نزلت ريووف "بنت وينك يالله تعالي"
البتول "طـ طيب "
وطلعت لهن فوق ..
دخلت ريووف الغرفه ولحقتها البتول الي جلست ويدها على قلبها
جود "ههههههههههه شفيك كانك شايفه سكني بسم الله علينا"
البتول (لسانها متبري منها) " طحت لي بمطب قوي مع ماجد"
جود بصدمه "ماجد هنا"
البتول "كان هنا وطلع "
اماني ويدها على قلبها"وش هببتي"
البتول وهي تخز جود "جودوه سلسالك وينه "
حطت جود يدها على رقبتها ومالقته حركت بلوزتها وطاح السلسال بس والتعليقه مو فيه .."ياااااااربي وين راح"
مدته البتول عليها ..
جود براحه "بغيت اصيح يوم مالقيته"
البتول "انا الي بصيح ماجد لقاه بالدرج طايح وسالني لمن و.............."
حمر وجهها ..
حبست جود انفاسها من الصدمه ..وقالت ريوف وهي تخزها "قلت له لا مولي ريوف بتلبس طبعا k واماني A وانا ماحب الحروف وجودM "
رمتها اماني بالجوال "الي يخس ابليسكـ"
تغير لون وجه جود "شقاااااااااال يالمرجوجه"
البتول ووجهها طايح "سالني من m وقلت محد وصرخ فيني قلت صديقتها لكنه فك يدي وقال دوري غيرها انا عرفت من يا البتول ما يحتاج تقولين ثم طلع وصفق البابـ وراهـ "
بغى يغمى على جود .. "عرف مـن .؟ "
اماني بهدوء "ماعليك من البتول وهذرتها لازم تزود في السالفه شوي"
جود بامل "جد "
اماني "ايه"
وغمزت لبتول الي فتحت فمها بتعترض..
انتبهت جود للاب توب الي بينها وبين ريووف ورفعته في حضنها وقرت القصيده ..
ناظرت في البناتـ .. ولقت وجيههن متغيره ..بكل هدوء سكرته وحطته على جنب..
ما صدقت المغرب يإذن الا والبنات يتفرقن للصلاه وهي بقت بلحالها في الغرفه والدموع الي حبستها طول هالساعه نزلت وجلست تشاهق وهي تتذكر الكلماتـ الي انطبعت براسها
ما انته لحــالك عشان تقـول بـايعنـي *** كثيـر كسـروا ذراعــي يــوم مديتــه
عرفت انه زعلان منها ومجروح بسبب الكلام الي سمعه منها .. بس فات الاوان وحبل الوصل بينهم مقطوع
وهو مو لها لغيرها..
لبنت اخوها!!
للحمها ودمها ..؟
لازم تنسـى..الحياه تستمر..هو الله يوفقه وهي الله يعوضها !
الي سوتـه مو قليل .. اهي جرحته ذبحته .. خلته انسان ينزف الم في ابياتـ شعره وقصيدهـ
ما حست الا بيد على كتفها رفعت راسها وشافت اماني ..
دنقت جود وما قالت شي ...
اماني بحب واخوه "انسي تمر الذكرى يا جود كلن يشيل جروحه على كفه "
جود بابتسامه كلها طعون "قلتيها بس البلا قلبي ما يطاوعني "
اماني "اذبحيه لو لزم الامر يا جود كرامتك فوق الكل ..؟"
جود وهي تبتسم بخيبه "الكلام سهل والفعل صعب يا اماني من يوم مافتحت عيني على الدنيا وماجد هو نورها كان طيب حبيب حنون كان زي بندر عندي كبرت وكبر حبه بقلبي تذكرين كنت لما تجتمعون اترك جمعتكم وروح ادوره هو وبندر واجلس معهم لين ماصار عمري 15 وانا ما افترق عنهم حتى هو كان يودني وطبعه يتبخر لا جلست معهم تدرين اماني ماجد مع بندر غيييييير عن ماجد الي نعرفه"
ابتسمت اماني"عارفه يا قلبي على قولة امي حنا من جيل واحد ههههههه"
جود "ههههههههههه الا صدق وينها عمتي ما شوفها "
اماني" اكيد بغرفتها "
جود وهي توقف "بروح اسلم عليها"
اماني "اوكي انتي سلمي عليها وتلقينا بالمطبخ"
جود "اتفقناااا"
نزلت جود الدور الي تحت وراحت لجناح ام ماجد دقت البابـ "ادخل"
ابتسمت جود "مساء الخيرات"
انشرح صدر ام ماجد بشوفة جود "هلاااااا وغلااااا بال**************************************** بنت ال****************************************"
سلمت جود عليها "لله يحييك يا عمه وش اخبارك"
ام ماجد "بخير ما دامك بخير يا بنيتي وين هالغيبه عنا"
جود "تدرين زواجات الشله مبهذلتنا بس قدرت اتملص اليوم واجي " وابتسمت
"الله يوفقهم ويرزقكـ بالزوج الصالح"
مرة سحابة حزن على وجهها ومع حمرة وجهها دعت الله تفهم عمتها على ان السالفه حيا
"يالله يا خاله بروح للبنات في المطبخ شرايك تجين معي"
ام ماجد "الحين بجي بس قبل بعطيك شي"
استغربت جود "شي ايش ..؟"
وقفت ام ماجد وفتحت خزنه عندها بالغرفه وطلعت منها علبه مربعه..وعطته جود ..
"وش ذا يا عمه"
ام ماجد "افتحيها"
فتحته جود وانذهلت كان عقد ذهب ابيض نااااااعم على شكل دموع وورد مترابط ومعه خاتم كان جناااااااان عيونها منبهره بجماله
ام ماجد "شرايكـ فيه "
جود "روووووووووووووووعه ياخذ العقل"
ام ماجد "تراه لـك"
انصدمت جود "لي انا ..؟ "
ام ماجد "ايه"
تبلمت جود مو فاهمه ..قالت ام ماجد "هذا ذهب والماس يمه وما فيه جيد يستاهله غير جيدك"
تبلمت زود ...ذهـــــب .. والمــــــــاس
جود استحت من مرة عمها "طيب وش المناسبه "
ام ماجد "يمه انتي بحسبة بناتي وانا بغيته لك هديه عساه اعجبك"
دمعت عيونها "يجنن يا عمه تدرين انه كان عندي تصميم انا راسمته يشبهه (ضحكت وهي مدمعه) وكنت مسميته دموع جود "
حزت بخاطر ام ماجد هالقلبين الي كل واحد بعيد عن الثانــــــــــي سنين ودهور ..
ام ماجد ما اخطت بقرارها يوم قررت تعطيه لها ..
لانها صاحبته في الاساس ومصمم عشانها ..
ام ماجد "حافظي عليه يمه وحطيه بعيونكـ"
جود وهي لسى متأثره "بغليه اكثر من حياتي "
وقامت وحبت راس مرة عمها وضمتها ...
ثم طلعت من الغرفه
،
/
/
،
/
/
،
/
/
،
/
/
----------->>>بالمستشفى ...
دق طارق على جود "هلااااااا جود"
جود وهي طالعه الدرج عشان تحط العلبه بشنطتها"اهليييييييييييييييين طروق اخبارك"
طارق "بخير الحمد "
جود وهي تناظر حولها "اخبار خويكـ"
طارق وهو يتنهد "هو طيب وصاحي مابه الا العافيه "
فرحتـ جود من قلبـ "طيب وش فيه هو "
طارق يراوغ"لسى النتايج ماطلعت بس صحته زينه الحمد لله انتي وينك"
جود "انا ببيت عمي سلمان "
طارق يحذرها "ريووف لا تدري"
جود "افا يا طروق تعرف عمتك زين بير ماله قرار "
طارق "والنعم بعمتي الي اصغر مني"
جود "ههههههههههههههههه احلى عمه بالعالم"
طارق يحب جود بشكل مو طبيعي "فديت راسها والله ال****************************************ـ"
جود "لاتنسى بلغني بالتفاصيل"
طارق "ابشري بالخير سلام"
جود "سلااااااااااااااااااااام"
شوي الا وريووف تروعها "بوووووووووووووووووووووووووووو"
جود اختبصت "قطييييييييييييييييييييعه ريووفوه"
ريووف "هههههههههههههههههههههههههاي من تكلمين "
جود "اكلم الجني الازرق وش تبغين"
ريووف بلقافه "الله يخليك علميني تكلمين من ؟."
جود "ههههههههههههههههههههههه ياشين اللقافه كنت اكلم ولد اخوي"
ريووف "طارق ماغيره"
جود وهي تبتسم "طارق ماغيره"
ريووف "بصراحه ولد ولد عمنا ذا له معزه بقلبي غير الكل يحبه حتى خالد ما يبطل كلام عنه .. خالد الي كلامه قليل هههههههه"
ابتسمت جود "اشوف الخاطر وسيع والبال مرتاح اليوم"
ريووف وهي تجر جود ويجلسن بالصاله تحت "خالد وافق نسوي فحوصاتـ"
جود بصدمه "خالد زوجك"
ريووف "ههههههههه لا ولد الجيران"
جود "احلـى خبر سمعته الصراحه وااااااااااااااااااااااو ياما قلت لك الصبر الصبر ومادامك تحبينه ويحبك بيتغير"
ريووف وهي تتنهد "عارفه يا جود بس بداية زواجي واجهتني صعوباتـ معه ماقول مشاكل او هوشات لا بس اشياء كثيره ماحبيتها فيه لكن مع الصبر بدا يتغير للافضل ان شاء الله عسى مايرجع خالد المنطوي زي قبل حتى شغله كطيار ماهو مساعدنا ابد بس الحمد لله على كل حال "
جود "يستاهل الحمد والشكر "
طلعت البتول من المطبخ جوالها على اذنها "بنات ماجد يقول تبون عشا ولا شي من برى"
تغير لون وجه جود وقالت ريووف "ايه مسوي خير"
قاطعتهن اماني "لعنبو ابليس وش ذا الكسل مايحتاج يتخسر حنا نطبخ"
ريووف "لا والله صدق راعي المثل خذ خير قال مامن ماعون"
البتول وهي تصارخ "وبعديييييييييين ماجد عصب"
وجلسن اماني وريوف يتهاوشن وجود تضحك بصوت واطي حتى ما يوصل له صوتها ...
البتول "ماجد يتهاوشن وش ذنبي تهزئني..طيب .. طيب ..(تستهبل) لاتعصب مجودي ....يمه طيب ههههه"
قال بصوت عاليـ "الشرهه مو عليكن الشرهه على الي بيعشي هالوجيه "
سكتن البناتـ لان البتول حطته سبيكر ..شوي الا يضحكن بصوت عاليـ ..
ماجد "تدرن ياخسارة الدقيقتين الي كلمتكن فيها "
ريووف "ههههههههههههههه مجودي حبيبي خلاص توبه شسوي خواتك محششاتـ "
اماني "لا يا قليلة الحيا"
الا وماجد الصغير داخل عليهن بالصاله وجا يركض "خاااااااااااااااالة جود "
جود بمحبه "بعد قــــــــــــلب خاله والله "
بعد
،
قلبهـا
،
كلمه حلم فيها ليل نهار وبالنهايهـ ضاع في هجير البعد وحظه الـ ع ـاثر ..ماكان يدري انها موجوده والا ما تكلم واستهبل مع خواته .. حتى صوته ما تستاهل تسمعه ..
قال بسلطه "شوفن اطلبن من مطعم (-----------) وخلن الحساب علي"
البتول وكالعاده لسانها متبري منها "ماجد مو تفشلنا شلون نقول له يحط الحساب عليك"
ماجد بثقه "قولن الحساب على ماجد بن سلمان ومالكن شغل "
البتول "طيبـ برذر بس بحدود كم تبينا نطلب"
ماجد بعصبيه "مو ماجد الي تسالينه عن الفلوس اطلبن الي تبن ومالك شغل"
البتول تستهبل "لو بالف "
ماجد وما اهتز له رمش "لو بعشرين زيها سلام "
وسكر الخط ...
البتول وهي مكشره "يااااااربي اخوي ذا ماعنده اسلوبـ "
كملت وهي تحرك حواجبها "مدري وش الكرم الي نازل اليوم عليه اول مره يجيب لنا ماجد حلا بنفسه لا ويروح لمطعم ويجيب لنا ورق عنبـ والحين بيرسل لنا عشا"
فهمن البناتـ تلميحها .. قالت جود وهي تحذفها بالمخده حقت الصوفا "اخوك متزوج استحي"
قد ماتذبح هالكلمه الا كلما اسرعت في تقبل واقعيتها كان احسن لها .
البتول وبحقد "وووووع لازم تحومين لي كبدي"
اماني "البتول مالك داعي"
البتول "اختلاف الراي لا يفسد للود قضيه"
ريووف "هههههههههههه احلفي يا شيخه "
البتول بتكشيره اكبر "ووووووووعين مالقيتي الا اسم شيخوه النسره ام النسره"
جود "هههههههههههه اقول لا تحشين مانبي ناخذ ذنوب احد"
البتول "على قولتكـ مانبي ذنوبهن جعلهن........"
قاطعتها جود "شقلناااااا"
البتول "هههههههههههههاي نسيت بروح اطلب لنا عشا تبونه على الساعه كم"
ريووف "جود نامي عندنا اليوم"
جود "مقدر صعبه ندى اليوم راحت تختار مسكة الفستان وبكره بتبدا ترتيب اغراضها عشان ننقلها هنا"
ريووف "المسكه تبيها ورد ولا اكسسوار "
جود "بتشتري فراشه كريستاليه عجبتها الاسبوع الي فات مره كيوتـ غير انها مناسبه لفستانها الي كلها فراشاتـ "
ريووف "ههههههههههه وتقولين رايحه نعومي "
جود "هههههههههههههههههههههه استهبل عليها بس اخذت لي كوع بجنبي .. حتى صايره زرقاء (تستهبل) اوريكـ عشان تصدقيني "
ريووف "ههههههههههههههههههههههه ضفي وجهك قال توريني قال "
البتول وشوي وتقطع شعرها "الحييييييين وبعدين معكم العشا متى تبونه "
اماني "هههههههههههههههههههه شفيها ذي مشفوحه اليوم"
البنات"هههههههههههههههه"
البتول "خفيفات دم بروح اطلب على عشر بما ان الشيخه جود مو نايمه عندنا"
اماني "جزاكـ الله خير يالله فارقي اطلبي "
ريووف "هههههههههههه الله يخليلي خواتي ويحفظهن من العين ذوووووووق"
جود "هههههههههههههههههاي كفك"
الا والجرس يرن ردت اماني من السماعه " من "
"حنا شركة .............. هذا بيت الاخ ماجد بن سلمان معنا اثاثـ موصى عليهـ خصيصا ومطلوب توصيله هنا"
اماني "ايه هذا البيت ثواني وتفتح البوابه آليآ "
"شكرا اختي"
اماني "هذولا الي جايبين اثاث جناح ماجد بروح انادي امي تطلع لهم "
كتمت جود غصتها وراحت للمطبخ مع ريووف ...جلسن على الطاوله يشربن نسكافيه ..قالت ريووف وهي تشوف العلبه بيد جود " ماهزاااا يا ميس جود"
ابتسمت "هديه من عمتي ام ماجد"
نطت ريووف عندها "بشووووووف"
جود تستهبل "هههههههههههههههههه وحده مشفوحه ووحده ملقوفه وش صاير لكن يا بنات عمي اليوم"
اخذتـ ريووف العلبه وفتحتها .. بهرتها لمعه الالماس ..
بس الابتسامه ماتتـ .. يوم شافتـ شكل العقد
جود وهي فعالم ثاني "روعه صح تذكرين ريوفه زي العقد الي رسمته ×دموع جود× بس ذا احلى مليون مره"
ارتبكت ريوف ورحمها ربي بجية اماني ..
اماني "طلعت لهم امي عشان تدلهم على مكان الجناح.."
ريووف "الا شلونه الاثاثـ تراي ماسالت ماجد عنه "
اماني "اظني شفت لونه بيج بس النقش شغل روعه ومعه الصوفا والمقاعد والديكوراتـ وكل شي "
التهت جود تفر كاسها بيدينها ..اماني "وااااااااااااااااااااااااااااااااااااو روووووووووووووووووعه يجنننننننننننن لا تقولين ذي هديتك للبتول"
جود وهي تتذكر "ايه صح هديتي للبتول بشنطتي صدق اني نسايه "
ريووف "وش جبتي لها "
جود "تشكيله من مكياجي تهبل "
ريووف "الله روووووووووعه"
اماني كانت مذهوله بالعقد الي تشوفه "يجنن رهيب لمن ذا ؟"
ريووف "امي مهديته لجود"
اماني "رهيب تلبسينه بالعافيه يا قلبــــــــــي"
جود "يعافيك يا ام ماجد الا وين راح فيه"
اماني "راح يلعب بلاي ستيشن في غرفه فارس ومشاري سابقا "
جت البتول وجلست معهم "وصل اثاث جناح ماجد"
اماني "ايه لهم فتره يحوسون وامي واقفه على روسهم "
قالت ريووف "مشاري معرس بعذره بس فارس وينه يوم امي واقفه على روس العمال "
قالت البتول برباشه "دريتي يا جود عن مصيبتنا فارس بيخطب عويش بنت شيخوه"
طاح الكاس من يدها وانكب على الطاوله والشغاله تداركت الوضع ونظفته وما انكب على جود شي..
ريووف وهي تضربها بشويش "ماعندك اسلوب انتيـ "
البتول "سوري جود بس تعرفيني لا تحمست لسالفه "
جود "عاد مالقى الا عايشه ، عايشه الله يعينكم يا عيال عمي على بناتـ اخوي "
البتول "ههههههههههههههه كانك عجيز مضيعه ولدها قدام باب الحرم انتي وذا الاسلوب"
غصب عن جود والبناتـ، ضحكوا فيه احد يجلس مع البتول ومايستخف ..
،
،
**
،
،
>>> بشركة ماجد
وقف ماجد قدام رسم تخطيطي لمشروع بادين فيه وعيونه مركزه بس باله مو معه .. مسك جواله وارسل مسج /انا حولت مهرك على حسابك بالبنك واي شي ينقصك بلغيني ...
ماجد /
حتى صار مو متاكد على رقمه ما زال موجود معها ولا لا ...
دقايق الا وجواله يدق ...ابتسم بسخريه ورد "نعم"
بصوتـ ناعم قدر الامكان "ينعم عليكـ "
ماجد بالم "زين متذكره رقمي ومتذكره اني موجود حي"
نجوى "شدعوه زعلان "
ماجد "ابد سلامتك كنت طايح مريض بالمستشفى وما كلفتي عمركـ تدقين تسالين عني تتطمنين علي"
ارتبكت وطاح وجهها "سوري ماجد كنت مستحيه غير اني دقيت عليك مره ومارديت"
ماجد بعصبيه مكبوته بصدره متجليه بكلامه"عذر اقبح من ذنب وكان بامكانك تدقين بدل المره عشر ولا مكالماتك بس بالمناسبات والجمعات"
نجوى بعصبيه"الحين انت ليش معصب "
مسك اعصابه واسترجع هدوءه الضرب في الميت حرام "ابد سلامتكـ ماني معصب و لاشي اليوم وصل الاثاث حق جناحنا وهم يركبونه الحين "
نجوى "زين "
"ومهرك بحسابك واذا نقص عليك شي عطيني خبر "
نجوى "طيـب .. ماجد بغيت اطلب منك طلب "
ماجد "امري"
نجوى "ممكن تعمم جوالي "
سكت شوي ثم قال "ان شاء الله بكره اعممه لك "
نجوى "طيب يالله باي "
ماجد "سلام"
سكر جواله ورماه على جنب ورجع يكمل اشغاله .. وموضوع واحد بكل ما اتاه الله من قوة يدفعه عن باله كيف يقدر ينسى او يتناسى ان كرامته انهدرت وراحت مع شرف بنت ولد عمه وزوجته هالشي يزعجه ليل نهار .. 3 سنين بعذاب نفسي مو طبيعي ..3 سنين وكل شي واقف ضده ..
زواج بدون حب .. زواج فرض عليه ..زواج هدم كل اماله
صحيح جود جرحته بكلامها لكنه كان ناوي يأخذها و يأدبها لكن ام طارق طلعت بالساحه ودمرت مخططاته كلها .. نسفتها .. وبعثرتها
وصار مفروض عليه يتزوج بنتـ بدون شرفـ....اكيد مالها ذنب لانها بنت متعب واخت طارق وتركي ..
لكن الشعور بالانهزاميه وجرح الكرامه مؤلم بشكل ما ينوصف..
وهذا هو حالـه ,,,
.
تعليق