البحر المسحوب تفعيلاته هي ( مستفعلن مستفعلن فاعلاتن ) .. لازم لما نجي نركب شطر ..تفعيلات الكلمات اللي بالشطر لازم تطابق هذيل التفعيلات .. بأي شكل من الأشكال ..
مثال : اذا نبي نركب على نفس التفعيلات بالضبط تقدرين عندج ستين مثال موزونات على نفس التفعيلة بالضبط
طبعا كلمات عاديه .. مو مقصد منها اي معنى ولكن بالطريقه اللي ركبت فيها الكلمات هذيل .. هي طريقة توافق طريقة تفعيلات البحر المسحوب بالضبط ..
في ناس يجي ياخذ نص التفعيله الأولى بعدين يشبك النص الثاني مع التفعيلة الثانية بعدين يجيب التفعيلة الثالثه
و في ناس يجيب التفعيلة الأولى و نص الثانية بعدين يشبك النص الثاني من التفعيلة الثانية مع الثالثه .. وهكذا لكل شاعر طريقته في طريقة وزن القصيدة ..
كلمة ( مستريح ) من الكلمات اللي لو نجيبها بأي شكل من الأشكال على هذه التفعيلات راح تخرب التنسيق
طبعا أنا أتكلم اذا جت بآخر شي .. لأنها راح تخرب التفعيلة الثالثه اللي هي ( فاعلاتن ) ...
مثلا عندنا شطر للشاعر خالد الفيصل يقول فيه : ( إنت الذي حطيت بالجوف رمحين ) .. خلونا نفكه على التفعيلات :
نلاحظ :
- كلمة ( أنت ) أخذت من حروف التفعيله الأولى على قدها و قعدت .. اللي هي ( مست ) لأن ثلاث حروف أخذت ثلاث حروف .. والثلاث حروف كلهم ننطقهم لما نقولهم عشان جذي كلهم أخذو من التفعيله كل واحد له حرف.
- كلمة ( الذي ) أيضا هي اربع حروف وجميعها ننطقها .. أي : لما نقرا كلمة الذي ( ننطق حرف الألف وننطق حرف اللام وننطق حرف الذال و ننطق حرف الياء ) عشان جذي جت وكل حرف أخذ له حرف و نلاحظ انهم أربعه .. عشان جذي أخذوا اربع حروف بس اللي هم الحروف اللي بالضبط بقوا من التفعيله الأولى ( فعلن )
الحين :
( انت ) أخذت ( مست )
(الذي ) أخذت ( فعلن )
نلزق التفعيله اللي أخذتها ( انت ) مع التفعيله اللي اخذتها ( الذي )
مست + فعلن = ( مستفعلن ) ... و هي التفعيلة الأولى من تفعيلات البحر المسحوب
نروح حق :
كلمة ( حطيت ) أربع حروف كلهم نطقناهم ياخذون اربع حروف من التفعيله .. طبعا الحين ما بقى عندنا الا التفعيلة الثانية و الثالثه ما يصير ناخذ من الثالثه و نطوف الثانية .. فـ ناخذ اربع حروف من التفعيله الثانيه اللي هي ( مستفعلن ).. لما ناخذ اربع حروف منها راح يطلع ( مستف )
بالجوف : بالجوف لو نعد الحروف فيها راح نلقاهم 6 حروف .. لكن عندنا حرف الألف بعد الياء ما ننطقه .. لما نقرها وحنا نقرا الشعر نقراها ( بلجوف ) عشان جذي عندنا حرف ما انطق فـ ما تاخذ ست حروف .. تاخذ بس خمسة حروف ..
حلووو .. خمس حروف .. الحين بقا عندنا نص التفعيلة الثانية ( علن ) لأن راح نصها على كلمة ( حطيت ) و باقي معانا التفعيلة الثالثه كاملة ما اخذنا منها ولا شي الى الآن
نبي خمس حروف .. راح ناخذ اللي بقوا من الثانيه اللي هم ( علن ) وهم ثلاث حروف بس .. و يبيلنا حرفين زياده عشاان نكملهم خمسه فـ راح ناخذهم من التفعيله الثالثه اللي هم ( فا )
كلمة بالجوف الحين أخذت التفعيلة التاليه ( علن + فا )
بالأخير عندنا كلمة رمحين : خمسة حروف .. كلهم نطقناهم راح ناخذ خمس حروف .. و أساسا باقي لنا خمس حروف من التفعيله الثالثه لأن راحوا منها حرفين لكلمة بالجوف .. بقى لنا خمس حروف منها اللي هي ( علاتن )
فـ تصير :
رمحين .. تاخذ التفعيله أو بالأصح النص تفعيله اللي هي ( علاتن )
خلونا الحين نجمع البيت أنت -------> أخذت على قدها لأن كل حروفها انطقوا ( مست ) الذي ------>أخذت على قدها لأن كل حروفها انطقوا ( فعلن ) حطيت----->أخذت على قدها لأن كل حروفها انطقوا ( مستف ) بالجوف ---> أخذت خمس حروف لأن عندنا حرف الألف ما نطقناه ( علن ) اللي هو الباقي من التفيعله الثانية اللي هي (( مستفعلن )) و ( فا ) اللي هي من التفعيله الثالثه اللي هي ( فاعلاتن )
رمحين -----> أخذت على قدها لأن كل حروفها انطقوا . فـ أخذت الخمس حروف الباقيه من التفعيله الثالثه اللي اهم ( علاتن )
نجمع التفعيلات و نرتبهم .. راح يطلعون مستفعلن مستفعلن فاعلاتن ... و اللي هم تفعيلات البحر المسحوب ..
ترا الشرح طوويييييل حيييل لأنه كلام زاايد ياخذ مسافه .. بس ترا لا أحد يظن ان التطبيق نفس الكلام .. التطبيق والله ما راح ياخذ دقايق منك كـ مبتديء .. وان شاء الله بعد التطور راح ياخذ ثواني والله .. لحد يحاتي طوول الشرح ..
لذلك يا غرور أثنى .. كلمة ( مستريح ) راح تخرب كل التقسيمة اللي احنا قسمناها اذا حطيناها بالأخير و بأي شكل من الأشكال.. لأنها تبي حروف زياده وما نقدر نجيب لها حروف زياده على المسحوب .. فـ اذا نبي نحطها غصب طيب .. نروح ندور بحر ثاني غير المسحوب يتناسب معاها
أتمنى إني شرحتها .. وهي حقيقة ترا التفعيلات في ناس شعرااااء ما يعرفون فيها شي .. ولكن فقط من باب التوضيح لغرور أنثى ليش ما قدرنا نحط كلمة مستريح .. أو على قولتها ( شمعنى ) ..
ولكم كل الود و التقدير
اخوكم /
عبدالوهاب الدلح العنزي
راحل بعيد
[align=center] سبحان الله و بحمده سبحان الله العظيم
أستغفر الله الذي لا إله إلا هو و أتوب إليه
[/align]
تعليق