حـــــــــيـــــاتـــــي انــــتـــي ...

[ŋαŋ]

مرحبا ..
من بعد هالغيبه اللي تكون شوي طويله
رجعت لكم وفي جعبتي قصة واتمنى ان هي تعجبكم
واللحين راح اخليكم مع القصة
-----------------------------------------------------------------

((الجزء الاول ))
الساعه سبع بتوقيت احلى مدينه ..مدينه العين دار الزين وبالتحديد في احد المعارض كانت ميثا تتحوط ومنيه تتشرى شنط ونعول حق الجامعه ..وكانت وياها بنت خالتها موزه وهن دوووم ويا بعض شرات الاخوات..كان الجو فنااان والناس كلهم طالعين يستانسون بالجو
ميثا: اووووه وايد زحمه اليوم والبياعين ما يتوازون ؟؟
موزه :لازم زحمه يا الغاليه ..اليوم الخميس وكل العرب مأجزين وطالعين يستانسون بالجو ..تعالي بنسير انشوف الاشرطه اللي يبيعونها وعقب بنسير نشرب لنا شيء يبرد على فوادنا ..
ميثا: لا لا ما ابغي اروح ..روحي انتي ما اداني اتعامل ويا اللبنانيين.. وما اداني حركاتهم
موزه: ميثاني بتين والا لا ...تعالي بنشوف اذا نزل شريط ميحد اليديد..الاغاني اللي فيه روووعه سمعت نص الاغاني في الاذاعه
ميثا: انزين عشان خاطرج بس يا موزوه .. بس تخلصين بسرعه
موزه: اصلاً انا بأخذ الشريط وبنروح ما بنأخذ وقت ..يله ويهنا
ميثا: امري لله ..
وسارن صوب التسجيلات عشان تآخذ موزه الشريط اللي تباه ..واول ما وصلن عند التسجيلات يلست تتخبر راعي التسجيلات عن شريط ميحد اليديد
موزه :لو سمحت نزل شريط ميحد حمد اليديد
اللبناني : ايوه فيه شريط لميحد نزل من يومين راح احط لك اياه ..واسمعيه اذا هو لي بتريديه
موزه :اوكيه ..بس بسرعه
وفي نفس الوقت كان واقف واحد اسمه سهيل ..ما شاء الله عليه وسامه بدرجه يلفت الانظار وكان وياه ربيعه مايد بن محمد وهم ربع من زمان
اللبناني يكلم ميثا ..
اللبناني :والقمر ..مش عاااوز كاسيت ..
ميثا: لا مشكور يا الاخو
اللبناني : شوه هالصوت ..بلبل ..يخزي العين كل المغنيات راح يسيبن الفن مدام هالصوت الجميل موجود
ميثا: يا الاخو ممكن شوية احترام
اللبناني:يا عيني عالقمر وهو معصب
سهيل تغيظ من الموقف اللي يالس يشوفه معقوله اللي يشوفه ..هذا والبينه متستره ويالس يتغزل .. قال في خااطره لازم اوقفه عند حده وافك البينه من كلامه البايخ ..
سهيل : يا الاخو..لو تسمح احترم بنات الناس احسن لك والا والله العظيم لأكسر لك فجك ..سمعتنيه ..والا لا
اللبناني : وانته شو دخلك يا زلمه انته بتأرقب لصبيه شي
عصب سهيل أكثر ويلس مايد يهديه ..الانه اول مره يشوف سهيل بهذي الحاله واول مره يشوف شخصيته العصبيه .
مايد:هدي نفسك يا سهيل لا ترفع ضغطك على واحد سفيه ..خله يولي الخام
سهيل :سير لا ..انا براويك فيه ان ما حشم بنات الخلق..شوه بنات بلادنا لعبه في يدين هالاجانب ..لولا الفضيحه جان غسلت شراعه جدامك وجدام هالخلق
ميثا: يا أخويه مشكور وما قصرت ..بس ما ابغيك تدخل في مشكله على سبت شيء ما يرزى
سهيل:افاا عليج يا ختيه ..لا تحاتين توكلي انتي وختج وسيرن
ميثا: ان شاء الله
سهيل :في حفظ الرحمن

ميثا : ..:يالله موزه خلينا انروح
موزه:ان شاء الله
وسااارن ..وركبن سيارتهن موزه كانت مبهوره من تصرف الريال وميثا كانت في حاله الله يعلم بها كانت طول الطريج مضايجه سرحانه ما انتبهت الا على رمست موزه ..اللي طول الطريج ترمس برمسه ما قدرت ميثا تستوعبها
موزه:اسميه شميمي ..هالريال..
ميثا :موزوه ..فديتج ما ابغي اسير بيتنا ابغي اسير بيتكم اليوم ..ما اروم اجابلهم وانا بهذي الحاله ..وانتي تعرفين كيف امايه تحاتيني اذا شافتني تعبانه ..ما اباها تستهم
موزه :عااااشت بنت خالتيه ..برمس امج وبخبرها انج بتباتين عندنا
ميثا:الله يهديج بس يا موزه شوه عاااشت بعد
موزه:مستانسه الانج من زمان ما بتي عندنا
ورمست موزه خالتها عشان تخبرها بقرار ميثا
ام عبدالله:الووو
موزه:السلام عليج
ام عبدالله:وعليج السلام
موزه :خالتيه فديتج اشحالج ..عساج ابخير
ام عبدالله :بخير ..يعلني افداج ..اقول غناتي ميثاني فيها شيء
موزه :لا ما فيها شيء بس بتبات عندنااليوم
وانا مسويه لج عشان يكون عندج خبر ..عشان ما تحاتينها ونحن باجر بنوصلها
ام عبدالله:خلاص برايها هيه سايره بيتها مب بيت غرب ..وانتي مثل اختها اللي الله حرمها منها
موزه :مشكوره حبيبتي ...بخليج ما ابغي اطول عليج ..
ام عبدالله : الله يحفظج يا بنتي وما اوصيج على اختج
موزه:ان شاء الله في عيوني
ام عبدالله: تسلم عيونج ..عطيني بنتي برمسها
موزه:غالي والطلب رخيص ..بي تبين ترمسين ميثاني
ميثا:الوووه
ام عبدالله: حي الله ببنت سعيد
ميثا :الله يحييج ..خير يا امايه تبين شيء
ام عبدالله ابغي سلامج يا بنتي الله الله في عمرج ...بس خطفي البيت شلي كنادير لج
ميثا :ان شاء الله

وبعد دقايق وصلن بيت ام عبدالله ونزلن ..وشافن عبدالله اللي عمره 22 سنه ..اول ما شاف موزه استانس من خاطره الانها راعية سوالف وضحك ..
عبدالله :مرحباالساع باللي لفانا
ميثا :عيب يا الطفس..الناس تسلم اول
ميثا:امنوه رمسج انتي ..انتي مجابلتنيه 24 ساعه انا ارحب ببنت خالتيه
موزه :الله يرحب بك عفضله
ميثا: عبدالله وين ساير بكل هذي الكشه
عبدالله :بسير امواعد الربع في المول ..اقول موزه ما تبيني اييب لج شي من المول
ميثا:وانا ما بتيب لي شي
عبدالله:امتحنت ..ليش اييب لج خلي ابوج اييب لج اللي تبينه
موزه:لا انا ما ابي شي دامنك ..ما بتييب لها شي
عبدالله: خلاص امري لله بس عشان خاطرج يا بنت خالتيه ..بييب لكن عطور على ذوقي ههههه..يله فداعه الله
ميثا وموزه :في حفظ الرحمن

بعد الرمسه اللي ارمسوها برع ..نزلت ميثا قشارها ودخلن البيت ..وكانت ام عبدالله مدخنه البيت ..والريحه تريح نفس الواحد خصوصاً بعد السالفه اللي استوت في المعرض ..
ميثا وموزه: السلام عليج
ام عبدالله :وعليكن السلام ..ان شاء الله استانستن
البنات : هيه استانسنا واااااايد
راشد وهو نازل من على الدري هيه وااااايد استانستن والدليل ميثا يايه مبوزه
ميثا وهيه تنغز راشد: رشووود قل خيراً او اصمت ..اكرمنا بسكوتك يا أخي
ام عبدالله :هيه والله بنتي شووه بلاج معتفسه ..شي يعورج
ميثا: هااااااااااه لا ما شي بلاني يا امايه
حست موزه ان رمسة راشد لخبطت ميثا ..وقالت في خاطرها الله يهديك يا راشد لازم تخلي امك تستهم ..وتذكر اختك بالسالفه
موزه: صدقيني يا خالتيه بنتج ما فيها شيء بس قبل لا ندخل البيت شفنا عبدالله اللي عكر مزاجها اشوي
ام عبدالله:بس هذي السالفه ..ما عليج من حركات عبود بخبر ابوج عليه
راشد : ههههههه الله يا الدنيا عبود مجابلنج 24 ساعه بس هالمره احس ان عبود ماله خص بسالفج
ميثا:اسكت احسن لك ...امايا انا بسير اجهز كناديري ..موزوه قومي ويايه
راشد :على وين العزم يالحبيبه
ام عبدالله: ما لك خص بالبنت بتسير اتبات عند خالتها
راشد: ابويه يدري
ام راشد : هيه خبرت ووافق بعد
في الطابق الثاني في حجرت ميثا..كانت موزه اطالع حجرة بنت خالتها اللي تهبل ..كان كل شيء فيها حلو لون الحجره والاثاث والستاير كل شيء حلو ومرتب ..
ميثا: يا ربي وين شنطتيه مالت المكياج..اوووووووه هذيه
موزه: اسميها حجرج روووعه وحلوه مثل راعيتها
ميثا:عيونج الحلوه يله خلصت
موزه: يله الانا اتاخرنا
وعقب ما سلمت ميثا على امها وابوها اللي شافته راد من العزبه ..طلعن وروحن بيت موزه




في بيت موزه ..دخلن موزه وميثا الصاله
وشافت ميثا خالتها ام علي خالتها الوحيده ...وهوت تحبها على راسها
ميثا:اشحالج خالتيه ..فديتج والله اشتقت لج واااااايد ..ليش ما تينا
ام علي :اشتاقت لج العافيه ..زين يوم ييتينا..ما بغيتي تيينا ..امنوه الاكبر لازم انتي تسيرين عليه
ميثا :ههههه حراااام عليج ياالغاليه ..الجامعه مأخذه كل وقتي
ام علي : خلاص مسموحه يا بنتي بس ايام الاجازات لا تقطعينا ..ولا تقطعين هلج ..صلة الارحام زينه
ميثا: ان شاء الله ..فالج طيب
موزه : امايه ..ميثاني بتبات عندنا اليوم ههههه شو رايج في المفاجأه
ام علي : زين زين ..البيت بيتها ..سيرن وطن قشاركن وصلن وتعالن عشان تتعشن
سارن البنات يصلن ونزلن عشان يتعشن
ام علي :يله بناتي اقربن
ميثا: لا يا خالتيه بنتريا عمي لين ايي
موزه: انتي ما تدرين ان ابويه وعلي يتعشون في العزبه
وبعد مااقتنعت بكلام موزه يلست تتعشىويا خالتها وموزه والعيال الصغار((عبيد..سلامه..حميد ..شمه))وبعد دقايق دخلوا بوعلي وعلي الصاله
هوود هوود
ام على: هدى ..اقرب محد غريب غير ميثا بنت سعيد ..بنت ختيه آمنه
واتغشت ميثا ...ووقفت عشان اتسلم عليهم
بو علي : اشحالج بنتي عساج ابخير ..
ميثا:بخير ..اشحالك عمي
بوعلي : بخير ....دامن المزرعه ما شيه على احسن حال
علي بينه وبين نفسه (( ما شااء الله على بنت خالتيه غدت حرمه قامت تتغشى عني ))
علي : احم احم اشالج ميثا...واعلومج
ميثا:بخير وسهاله وعلومي طيبه
علي : واخبار الجامعه والدراسه وياج
ميثا: صدق انه تعب بس كل شيء تمام
موزه: ميثاني قومي بنسير حجرتيه..انسوالف ..
ميثا : زين موزوه ..برخصتكم تأمرون على شيء قبل لا نترخص
ابو علي وام علي وعلي :مرخوصه سلامة راسج
وسارن الطابق الثاني ...وصكن على عمرهن الحجره
وتمت ام علي وابو علي ..وعلي تحت في الصاله
ام علي : علوه فديتك ..ما تباني اخطب لك ..ميثا..خلنا نفرح فيك
علي : لا ما ابغي ..لو عبرن البنات من البلاد ما بأخذ ميثا..ما ابغي وحده من هلي
ام علي : شوه بلاها البنيه ..ما عليها قصور وهلها مربينها تربيه عدله ..وبطرانه اللي تباه عندها ..ما تنعاب البنيه
ابو علي :خليه ...على هواه يا أم علي لا تلحين عليه يوم يبها بيخبرج
ام على :برايك يا ولديه ...كيفك بس انا اخبرك من الحين تراك ما بتلقى شراتها
على : مشكورين ...الانكم ما ضغطوا عليه وميثا في حسبة أختي

علي ما رفض ميثا عشان سمع عنها شيء مب زين او الانها مب مربايه ...على العكس كانت جميله بشكل ..ومؤدبه ..وخجوله ...وفوق كل هذا دلوعة هلها ..الانها البنت الوحيده .. بس هذا هو قدرها انها تنرفض من اقرب الناس لها ..

--------------------------------------------------------------------------------

فوق في حجرة موزه ....موزه يالسه تسمع الخليجيه ..وميثا منسدحه على الشبريه ..ويوم غني ميحد هالمقطع(اهواك يا مشعل غرامي ..ياللي بحشايه حطلي حر ..حبك على الفؤاد نامي ..حباً جديد احس به فرق )..سمعت موزه ميثا تصيح
موزه:ميثاني ..شوه بلاج غناتي ...شله اتصيحين ..مب عايبنج بيتنا هاااااه لازم معوده عالعز ((كانت موزه تحاول تضحكها ))

ميثا:............
موزه :ميثا لا يكون تفكرين بالموقف اللي استوى في المعرض
ميثا: ......... هيه كيف تبيني انسى
موزه:يا ويلي عليج يا الحساسه .. بس انتى لا زم تستانسين الان هذاك الريال الطيب خذ حقج من اللبناني الزلع
ميثا: زين هوه شله يدافع عني ...انا ما اقرب له وشوه بيكون موقف الناس اللي شافوا الهده ...وشوه ذنبه يتبهدل ويا اللبناني
موزه: يا اختي الدنيا بعدها بخير..ارقدي يا الغاليه ولا تحطين في خاطرج وما عليج من رمسة العرب ..يا ليتني مكانج هههه حليله الريال اخاف صدتيه
ميثا: سخيفه ما يضحك ..وبعدين كيف بصيده وانا متغشيه يله تصبحين على خير
موزه: هيه والله ..بس يمكن انعجب بج والا ما يلس يناقر الريال لين انبح صوته هههه وانتي من اهله يا الغاليه واحلام سعيده
ورقدت ميثا بعد ما يلست اتفكر في كل اللي استوى المغرب في المعرض وكيف كان الريال طيب وياها ..وخذ حقها بحسن نيه

انرد لسهيل الريال اللي خذ عقل ميثا بطيبة اخلاقه ..
في بيت سهيل ...وبالتحديد في حجرته . بعد ما تعشى واتسبح طاح على شبريته وتنهد .يا ويل حااااااااااااااالي انا.... مب بنت غزال من حلاتها الله يحفظها ويخليها لهلها ..الله يبحص هذاك اللبناتي ..لو الود ودي جان خيسته في السجن بس مايد الله يهديه دوم يخرب عليه ويمنعني جني اصغر عياله ما تقول ضابط ويعرف يتصرف(( كان سهيل يشتغل ضابط في الشرطه وعمره 28 سنه وعنده اختين وحده في الجامعه ووحده في الاعداديه وهو وحيد امه..وابوه)) شل سهيل موبايله عشان يتصل بمايد
سهيل : ميود اللحق عليه ..اللحق على اخوك
مايد : خير شوه بلاك ..شيء يعورك ..جان شيء يعورك خل امك اتسوي لك طبيخه تراها زينه حق الاعواق
سهيل : ويا ويهك ..انا قليبي يعورني ويلس يغني (..ورد جوري يفوح وجناتك ..والزمرد فيه خصيته ..والمحاسن في تحياتك ..رد قلبي يوم شليته )
مايد : يااااااويلي امنوه هاذي اللي شلت قلبك ..حليلك ..لولا حرمته جان ييت احاضيك ..ما تهون عليه اخليك وانت حالتك والله هنها
سهيل :تطنز ...انت الله سهل عليك وعرست وخذت اللي اختارها قلبك وانا بعدنيه..
مايد : تبانا ندور لك حرمه ..خبرني بمواصفاتها
سيهل: ما اضني يا أخويه بتلقاها
مايد: انت شوووه ياك اول مره تطري العرس ..واول مره احس ان في قلبك بنت
سهيل : واذا اول مره ..انا انسان لي احاسيس ومشاعر
مايد: لا تكون هاذيج البنيه اللي ضاربت اللبناني ..عسبت غازلها
سهيل:.... هيه
مايد : بتبطي ..لا تيلس تحلم واااايد يا سهيل لا تبنى قصور بلا اساس
سهيل: مايد
مايد: نعم
سهيل: الله ينعم بحالك ...لو تكرمت اجلب ويهك ما فيه لخرابيطك
وبند سهيل عن مايد اللي يحرق اعصاب سهيل بسوالفه ...

بعد ما بند سهيل عن مايد ..حس بأرق حاول يرقد بس ما قدر يلس يقرأ مجله جواهر وعقب قام وسار حجره أخته مريم ..ويوم دخل ما لقها قال أكيد هذا البنت سهرانه على التلفزيون ..بسير اشوفها شوه اطالع ويوم نزل شافها اطالع الفلم اللي مصورينه يوم سافروا العام..
سهيل: مريم شوه اطالعين ؟؟
مريم: حسيت بملل قلت بشوف الشريط اللي صورناه يوم كنا في سويسرا
سهيل:هيه والله ذكريات حلوه
مريم: هههه هيه والله اتذكر تعرفنا على عايله وكانت بنتهم متخبله عليك شوي وبتأكلك ..
سهيل : اووووه لا تذكريني ما صدقت انرد البلاد ..بس اتصدقين اني ادبتها هههه عشان مره ثانيه ما تيلس اطالع تذكرين يوم قلت حق امايه انغير الفندق الانهم بيبندونه حق الصيانه
مريم: ههههههه ثرك مب هين ..طلعتنا من الفندق..وامايه ما تعرف السالفه الصدقيه
سهيل : هههه لازم مب هين ...اقول مريم ابويه رد والا بعده
مريم: لا رد قبل ما تنزل بشوي وسار يرقد ..الشغل متعبنه اذا ما اشتغلت فالشرطه جان ساعدته على الاقل .. مخلنه بروحه
سهيل : ردينا انا احب شغلي وما فيه على العباله في مزرعه ابويه في الحر والموت ..البركه في أخوج سيف
مريم:هيه والله هو اللي دووووم يعاون ابويه في شغله الله يعينه ..بس حرااام دوم مخلي عمي وعمتيه بروحهم ومطيح في مزرعتنا اللي في ليوا
سهيل:الله يعينه ..بس انا يوم بلقى فرصه بسير اشوف احوال المزرعه
مريم: بنشوف
سهيل:مريم سيري يبي لي عصير
مريم: ان شاء الله ..الحين بسير

وسارت مريم المطبخ التحضيري عشان تييب لأخوها عصير ..وهيه تفكر بأخوها بالرضاعه وولد عمها سيف اللي كاسر خاطرها ..سيف اكبر من مريم بسنه عمره 24 سنه ..وهو اصغر من سهيل باربع اسنين ..عنده اخوان ثنينه سالم اللي عمره 26 وحمد عمره 28 كبر سهيل وهم معرسين وعنده اختين شمسه وعمرها 23 معرسه وماخذه ولد خالتها وحصه عمرها 20 سنه .. وعقب ما صبت مريم العصير لسهيل سارت الصاله
سهيل : يالله يا مريم انتي سرتي تطبخين ..ليش بطيتي
مريم: تأخرت الاني عصرت لك العصير ما ابغيك تشرب مال الدكاكين
سهيل :هههه ما قصرتي يا بنت سالم ليش ادلعيني هالكثر
مريم:ادلعك مؤقتاً بس يوم بتعرس خل حرمتك هيه اللي ادلعك ههههه
سهيل :حتى لو عرست ما استغني من دلعج لي
مريم: هههه ...اقول سهيل
سهيل :خير
مريم: ما شي بس الجامعه الاسبوع الياي بيودونا زياره لمركز الشرطه ..اضني اللي تشتغل فيه
سهيل: والله زين يوم خبرتيني عشان انضبط امورنا
مريم: بسرعه مر الوقت الحين الساعه12 ونص بسير ارقد ورايه نشه باجر ..ما بترقد ؟؟
سهيل :لا ما فيه رقاد ضاربني ارق
مريم: زين برايك ..تصبح على خير
سهيل :وانتي من اهله

عقب ما روحت مريم لحجرتها يلس سيهل يفكر بالبنت اللي شافها في المعرض وطلع خاري في الحوي ويلس في الحضيره وورى الضو ..ويلس يقصد ويوم تعب من العد قال والله تعبان ابغي ارقد مب حاله بتم سهران احرس البيت ..ليش الرقاد محاربني عقب سار الميلس ولقى العود ويلس يدندن اشوي ما حس بالوقت و سمع صوت ابوه ويوم شاف الساعه لقها 4 ونص

سهيل :والخيبه تخيب العدو 4 ونص

بو سهيل : شوه اتسوي يا ولديه في الميلس
سهيل: هاااااااه لا ما شيء
بو سهيل :شوووه بلاه ويهك غادي جذه ...انت ما رقدت
سهيل:............لا
سهيل:لا اله الا الله ..شيء يعورك يا ولديه
سهيل :يقول في خاطره قليبيي يعورنا (( لا يا ابويه ما فيه شي))
بو سهيل :زين قم بنسير المسيد انتريا الصلاه
سهيل : ان شاء الله بس ببدل كندورتيه
وعقب ما ردوا من المسيد يلس بو سهيل في الحضيره ..وسهيل سار يقول حق البشكار يسوي قهوه وحليب حق ابوه ..واول ما وصل سهيل حجره البشاكير لقاها مقفوله ويلس يدق
سهيل: حوووووووووووووووه فجوا الباب اعنبوه مب رقاد ...يا راجوه فج الباب
راجوه :بسم الله ...جين جين ارباب
ويوم فتح راجوه الباب شم سهيل ريحة الزقاره اللي طاره الحجره
سهيل: راجو انت معلوم وين اشتغل انا
راجو:ايوه ارباب انته شغل في سورطه
سهيل: يعني انتي عندك خبر ..مره تاني اذا انا يشم ريحه مال زقاره في حجره مال انته انا بيسوي حق انته مشكل زياده
راجو وهو خايف : جين جين ارباب
سهيل :يله سو دله قهوه وحليب وودهن حق باباه في الحضيره وبعدين سو ريوق خبز رقاق وبلاليط وقرص هب تحرقه زين
راجو: جين ارباب

عقب ما اتقهوا وتريق سهيل ويا ابويه وامه سار يرقد ونبه على امه اتوعيه قبل الصلاه عشان يسير المسيد ..وعقب ما طاح على الشبريه استسلم للنوم ورقد


في الجانب الثاني من مدينه العين في بيت ام علي نشت موزه وميثا الساعه 9 على حشره الصغاريه ويلست موزه اتهزبهم على الحشره اللي امسوينها
ميثا: حراااام عليج يا موزوه هذيلا يهال لازم بيسوون حشره
موزه:وانتي شوه عليج ما عندج حد يصدع بج
ميثا:امنوه قال عندي أحمد وحمد ملعوزينا بحشرتهم
موزه :شو رايج انتبادل هههههه
ميثا: ههه اسميج سوالف يا موزه ما الوم عبدالله فيج
موزه عقب ما احمر ويها اشوي قالت :هههههه بس لا تنسين تيبين العطر اللي اشتراه الجامعه
ميثا: هذا اذا اشتراه
عقب الهزبه والضحك تلبسن ونزلن يتريقن تحت وعقب ما خلصن قالت ميثا لخالتها انها تبا اتسير بيتهم
ميثا:خالتيه ابغي اروح البيت
ام علي : ليش يا بنتي ..ما لحقنا نيلس وياج
ميثا: تعرفين يا خالتيه ان امايه بروحها وابويه والشباب كل عصر يسيرون العزبه
ام علي :برايج يا بنتي بخلي علي وموزه يوصلونج
شمه: لا لا تسيرين تمي ويانا براويج بيت العرايس اللي في حجرتيه
ميثا:لا حبيبتي انا بسير عندي واجبات انتي ما عندج
شمه وهي اتصيح : لا ما عندي
ام علي : عيب يا شموه لا اتصيحين انتي حرمه
ميثا:خالتيه خليها اتسير ويايه هي وسلامه وعقب المغرب بييبهن
سلامه: انا ما اقدر عليه امتحان جغرافيا
ميثا: انتي ذاكرتي البارحه ؟؟
سلامه:هيه ذاكرت بس اليوم براجع
ميثا: خلاص عيل انتي شلي كتابج وانا براجع لج
سلامه: والله عيل بسير اتلبس وبشل لي جلابيه
شمه :الله بروح بيت ميثا....بسير اتلبس
ام علي:الله يهديج يا بنتي شمه بتلعوزج
ميثا: ههه برايها ...الا شمه
موزه: عيل ما في داعي اسير ويا علي سلامه وشما يسدن
وفجأه يدخل علي عليهن في الصاله ..ويلس يتريق
ام علي : علي فديتك اباك اتوصل بنت خالتك بيتها
علي : ان شاء الله ..موزوه ما بتين ويانا
موزه:لا سلامه وشمه بيسيرن وياكم وعقب المغرب ميثا بتردهن
على : وين تبا شمه بتلعوزج يا ميثا
ميثا: لا برايها ..حشرة شمه ما تضر
وعقب ما تريق علي قال حق ميثا تنزل قشارها وتيب البنات وياها ..اول ما شافت شمه سيارة اخوها ربعت وفتحت الباب عشان تيلس على السيت الجدامي بس علي واجعها وقالها تيلس ورى ويا سلامه وعقب يت ميثا تبا تركب ويا البنات ورى بس علي ما خلاها

علي : ميثا تعالي جدام
ميثا: هااااااااه لا ورى احسن
شمه : اسمعي كلامه والا بيهزبج مثلي
علي :يا ميثا الناس اذا شافوج يالسه ورىبيقولون هذي ما تستويله ..ليش راكبه وياه
ميثا:خلاص بيي

وسارت تركب على السيت الجدامي وهي تسب موزه في خاطرها الانها ما طاعت تي وياهم ..وكل اشوي على يالس يرمس اخواته ويقولهن يصطلبن وما يلعوزن بنت خالتهن
علي : ميثا اذا شما لعوزج سويلي تلفون وخبريني
ميثا:..........
شما:اصلن ميثا تحبني ما بتخبر عليه ..صح يا ميثا
ميثا: هيه صح
علي: ههههههه لا تقوين اخواتي عليه
ميثا:لا اصلا شما وسلامه هاديات وما يشاغبن
علي : باين اقول ميثا اذا المكيف مزعجنج رفعيه على فوق
ميثا:لا مب مزعجني
وعقب ربع ساعه وصلوا بيت سعيد ابوعبدالله ونزلوا كلهم ..وسلم علي على خالته وسار عنهن..وعقب الصلاه تغدوا كلهم ويا بعض وبعد الغدى سارت ميثا حجرتها عشان تراجع لسلامه وشمه يلست ترسم وتلون عدالهن وعقب يلست ميثا تصورهن بكاميرة الفديو ..

ميثا: اشرايكن العصر انسير حديقه الهيلي .....؟؟؟ نلعب ونتحوط
سلامه وشمه:موافقين
ميثا: عيل العصر بخبر امايه
سلامه وشمه:الله بنستانس...

--------------------------------------------------------------------------------

عقب ما سار سهيل يرقد يوم استوت الساعه 11 ونص وعت فاطمه ولدها سهيل ..وقام يتسبح عشان يلحق على الصلاه وعقب ما ردوا من الصلاه يلسوا يتغدون سمع سهيل تلفونه يصيح ويوم شاف التلفون كان المتصل بو سهيل ((مايد))..غسل ايده وسار حجرتة عشان يرمس ربيعه

مايد: الووه
سهيل : السلام عليك
مايد: وعليك السلام ......شوه اخبارك
سهيل : مب بخير البارحه طول الليل ما رقدت....ما رقدت الا الصبح
مايد: شووووووووووه مسهرنك هاه يا بو مايد
سهيل: وانته شوووه لك
مايد: افااااا ليش معصب يا بو الشباب
سهيل: وانته ليش متصل شو تبا بي
مايد: سهيل حشرني يباني اوديه حديقه الهيلي واباك تي ويايه
سهيل : انزين حرمتك بتي
مايد: هيه بخلي الولد عندها وانا وانت بنسير نلعب هههههه
سهيل : هههه متفيج عيل انا بييب اخواتي بعد
مايد: انزين الساعه 5 الا ربع اباك تكون هناك ..وبيكون بينا اتصال
سهيل : اوكيه انتلاقا في الحديقه
مايد: مع السلامه
سهيل :في وداعه الرحمن


الساعه 4 ونص طلعت ميثا وبنات خالتها عقب ما خبرت امها وشلت وياها البشكاره الانها اول ما تطلع من الحديقه بتودي بنات خالتها بيتهن ..اول ما وصلن قصن خمس تذاكر حقها وحق البنات والبشكاره وتذكره حق الدريول عشان يستانس ..ودخلن الحديقه بعد 5 دقايق وصل مايد وحرمته عفرا وولده سهيل اللي عمره 3 سنين ووصل سهيل ومريم واختهم الصغيره شيخه اللي عمره 15 سنه ..وقصوا لهم التذاكر ودخلوا ..كانوا الرياييل جدام مايد شال ولده وسهيل وياهم وعفرا ومريم وشيخه وراهم ..انتبهت شيخه على ربيعتها سلامه وقالت لمريم انها بتسير تسلم عليها وسارت ويا مريم ويوم قربن اكثر اكتشفت مريم ان ربيعتها الروح بالروح يالسه على الكرسي اتشوف البنات يلعبن ..

مريم: السلام عليكم
ميثا: فديتج مريوم انتي هنيه ...وقامت اتسلم عليها
مريم: لا هناك ههههههه... انتي شووه يايبنج اهنيه
ميثا: الناس شووووه يسوون في الحديقه غير اللعب ...ضجت ويت انا وبنات خالتيه
مريم: عيل موزوه وينها
ميثا: في بيتهم لو تدري اني سرت الحديقه وشفتج بتذبحني
مريم: ههههههه
وفجأه يرن تلفونها وتفتح شنطتها عشان اطلع التلفون شافت رقم اخوها ..

مريم: الوووه
سهيل: عيب يا مريم خليتي عفرا بروحها
مريم: شفت ربيعتي ويلست اسلم عليها
سهيل : يله تعالي وهاتي شيخه وياج
مريم: ان شاء الله
ميثا: بتروحين
مريم: هيه بس انتي وبنات خالتج بتن ويانا ..ابغي اعرفج على عفرا مرة ربيع اخويه وولدها سهيل ..ينحب والله
ميثا : خلاص بسير وياج عشان اتعرف على سهيل وامه

زقرت ميثا بنات خالتها والبشكاره ومريم زقرت اختها وسارن يدورن عفرا ..ويوم لقنها سلمت ميثا عليها ويلست على الكرسي هي ومريم اما البنات سارن يلعبن وكانت البشكاره اطالعهن وبعد دقايق زقر سهيل مريم عشان تشل ولد مايد سهيل وتوديه عند امه
يوم سمعت ميثا صوته حست ان هذا الصوت مب غريب عليها ..استحت تصد على ورى ..وقالت في خاطرها معقوله يكون هو لا لا مستحيل يمكن وحد صوته نفس صوت هذاك الريال ..يت مريم وهيه تقود سهيل اللي كان يصيح
عفرا : ليش يصيح ؟؟
مريم: ريلج يباه يكون عندج الانه هوه وسهيل عقب اشوي بيركبون قطار الموت
ميثا: شووه اسمك يا حلوووو
سهيل : اتمي تهيل
ميثا: ههههه سهيل ليش اتصيح؟؟
سهيل : ابغي باباه
مريم: ميثا قومي بنركب قطار الموت
ميثا: اوووكيه يله ....اندوك هالحلاوه يا حلووو
سهيل : تكراً
وعقب ما راضت ميثا سهيل بالحلاوه سارت هيه ومريم يبن يركبن القطار.. ترين القطار لين يوقف وكانوا سهيل ومايد راكبين قبل وردوا يركبون مره ثانيه كان القطار فاضي هذي المره كانت مريم وربيعتها وسهيل وربيعه مايد واولاد صغار يلسن مريم وميثا ورى ..حس ان البنت اللي ويا أختها يعرفها من قبل والبشكاره اللي وياها شافها البارحه في المعرض ويا البنات اللي لعوزهن اللبناني فقال لمايد انه بييلس في الكراسي اللي جدام اخته بس قال له مايد احسن شيء بيخلون بينهم وبينهن كرسيين ..وافق سهيل وساروا ييلسون على الكراسي ..كان الجو حلو والمهيبه كانت بارده فطاحت غشوه ميثا وفي نفس الوقت صد سهيل على ورى عشان يقول لأخته تتقبض ...

_______________________________

يوم صد سهيل لورى ..شاف البنت اللي عند أخته بدون غشاه استحى وصد لجدام بس قلبه كان بعده يناظر ميثا ..مريم ما عرفت كيف بيكون موقفها من التصرف اللي سواها سهيل صدق تلومت من ربيعتها ..قررت يوم يوصلون البيت بترمسه ..وبعد ما ركبوا القطار ساروا المصلي يصلون صلاه المغرب وعفرا والبنات سارن يصلن في مصلي الحريم ..وبعد الصلاه ساروا يأخذون شيء يآكلونه ..خذولهم سندويجات وعصير ..سهيل ومايد يلسوا على الكراسي اللي موجوده في الحديقه والحريم قالن يبغن يتمشن اشوي في الحديقه قبل لا يروحون ..

مايد:سهيل شوووه بلاك يا الغالي ليش ساكت..؟؟؟
سهيل:.........
مايد: انا يالس ارمسك ...!!
سهيل: ما شيء يا مايد ...لا تستهم
مايد:ليش ما احاتيك وانت من نزلنا من القطار وانت متغير مب سهيل اللي اعرفه
سهيل:مايد تعرف؟؟؟ال......
مايد: كمل يا أخويه شوووووه اللي اعرفه
سهيل : ال.......البنت اللي ويا أختي ما عرفتها
مايد: لا ما عرفتها
سهيل : نفس البنت اللي شفناها في المعرض البارحه
مايد:هاااااااااااااااااه نفس البنت اللي كان اللبناني يغازلها ؟؟؟
سهيل:هيه نفسها
مايد: وانت كيف عرفت !!
سهيل:عرفتها من البشكاره اللي وياها ...
مايد: لا مب دليل هذا ......يخلق من الشبه اربعين
سهيل:وقلبي يقول لي انها هيه
مايد: ما ادري شوه اقول لك
سهيل:اااااااااااااااااااااه يا قلبي ...قم خلنا نروح

حزت السيره سلمت عفرا على ميثا وكل وحده عطت رقمها لثانيه ..وسارن عند البوابه يترين سهيل ومايد. و.بعد ما خبرت ميثا الدريول انهم بيروحون طلعت ويا بنات خالتها قبلهم ..ووصلت البنات وعلى الساعه تسع وصلت البيت وكانت ام عبدالله تترياها على المنامه ..
ميثا : امايه شوووه اتسوين خااااري ؟؟
ام عبدالله:ضقت من اليلسه بين اربع يدران قلت بيلس على المنامه
ميثا: زين الجو غااااوي بعد
ام عبدالله: استانستوا في الحديقه
ميثا: هيه استانست وااايد وتعرفت على وحده اسمها عفرا ومعرسه وعندها ولد عمره ثلاث سنين ..فديته والله حبوب
ام عبدالله: من قوم امنوه هيه ؟؟
ميثا: ما اعرف بس هيه كعبيه ومأ خذه ولد عمها ..و ساكنين في المعترض
ام عبدالله: والنعم ابها
ميثا: امايه انا ابغي اعزمها في يوم من الايام
ام عبدالله: ما عليه بنعزمها هيه وريلها
ميثا: مشكووووره يا امايه(( وتحبها على خدها)) .....بسير داخل عشان اخلص واجبيه وارقد ورايه دوام باجر ..
ام عبدالله : والعشى ما تبغين تتعشين
ميثا:لا شبعانه ما ابغي عشى
ام عبدالله: براحج

_______________________

بعد ما سلم سهيل على ربيعه ركب سيارته هو واخواته ..وطول الدرب كان ساكت وخايف من ردت فعل مريم بعد اللي استوى اما مريم كانت ساكته تفكر شوه بتقول حق اخوها ..حتى شيخه كانت مستغربه من اخوها اللي تغير فجأه الانها متعوده على
سهيل المزوحي اللي دوم يسولف وياها ويتخبرها اذا استانست وشوه سوت ..اول ما وصلوا البيت لقوا ابوهم وامهم يالسين في الحضيره ..نزل اخواته وسار المسيد يصلي بعد ما رد يلس في الحضيره ..يسوالف ويا أبوه وامه

سهيل: وعلومكم يا شوابي
ام سهيل:انا عيوز .......انا بعدني شباب
بوسهيل :شوه هالرمسه يا ولديه ..صح اني كبرت وشيبت بس امك بعدها صغيره ..انا مأخذنها يوم عمرها 15 سنه
سهيل:السموحه اصلا انا اسوالف بس ...لا تآخذين على رمستيه يا امايه((ويحب راسها ))
ابو سهيل :ما سويت قصيده يديده يا ولديه
سهيل: هيه كتبت قصيده البارحه
ابوسهيل : ما شاء الله عليك يا ولديه اسميك غديت شاعر...طلعت على اهلك
سهيل:هههه الا قول شويعر ..قصيد اللي تطريهم محد يروم يوصل لمستواه
ابو سهيل : ان شاء الله بتستوي شراتهم وبتغلبهم بقصايدك ....يله يا ولديه عد علينا
سهيل : تم ...

البارحه مغتاضه ...سْهيليّ الجنوب
جتْ بالخفا بالرّاضه...بين النّحر والثوب
تكثر عليه أمراضه...لمفارق المحبوب
الروح هوب معتاضه...في الغالي الرعبوب
تذكرحسين ألفاضه ...لي لها بهواه دْروب
وسلمتوا

ام سهيل : صح لسانك يا ولديه
ابوسهيل : شوه هالقصيده يا ولديه ...اتشيب اسميها صح لسانك
سهيل : صح الله بدنكم ..والله لا يحرمني منكم ....برخصتكم بسير ارقد تعبان ما رقدت البارحه
ام سهيل: ما تبغي عشى يا ولديه
سهيل:لايا الغاليه تعشوا انتوا
ابو سهيل:يا ولديه انت شيء بلاك مب سهيل اللي اعرفه ..
سهيل:لاما فيه شيء ..((ويقوم سهيل ويدخل البيت..ويلا قي اخته اترياه))
مريم: سهيل ممكن اكلمك اشوي
سهيل: خير ... يا مريم
مريم: قوم خلنا انسير حجرك ابغي ارمسك ..رمسه ما ابغي حد يسمعها
سهيل: على هواج ..(( ويقومون ويروحون لحجره سهيل ...وفي حجره سهيل ))

يلست مريم على الكرسي اللي مخصص لطاوله الكمبيوتر ..وسهيل وقف جدام الدريشه ..ومسك طرف الستاره بأيده وتم يطالع القمر ويقول في خاطره..اكيد مريم ما بتسامحني على اللي سويته اليوم ..يحق لها تخاف على ربيعتها ..ومريم كانت تحاول تبدأ بالموضوع ..وهي مرتبكه ما تقدر تتكلم بكلمه وحده
سهيل: خير يا مريم شوه بغيتي ...ناقصنج شي
مريم: سهيل لا تحاول تتهرب ...انت شوه سويت اليوم ونحن راكبين القطار
سهيل:انا ما غلطت في شي وبالصدفه..يوم صديت ابغي اقول لج تتقبضين شفت البنت بدون غشاه!!
مريم: ولو يا سهيل مب حلو تصد على البنات وحتى لو اني اختك بس ويايه بنت ..والناس ما يعرفون اني اختك ..ومن حقك توصيني بس طريقتك ما عيبتني مول يا سهيل..
سهيل : السموحه منج يا اختي ومن ربيعتج ..والله ما كنت اقصد
مريم : مسموح ...انا بسير ارقد تأمر على شيء
سهيل:مشكوره يا الغاليه ..تصبحين على خير
مريم:وانته من اهله ......بس انت ما بتتعشى ويانا
سهيل: لا ما اشتهي العيشه
مريم : اخاف حاط في خاطرك مني ؟؟
سهيل: افااا يا مريم ان احط في خاطريه منج
مريم: متأكد ؟؟؟
سهيل: هيه يله اطلعي ابغي ارقد هههههه
مريم:هههه ان شاء الله بطلع

سارت مريم لحجرتها ويلست ترتب ملفاتها ..يا ويلي على اخويه اخاف قلبه تعلق بميثا ..من اول نظره بس مب معقوله اخويه اسنين واحنا نحاول نقنعه يعرس ..وهو ما يحب طاري العرس اصلا ونحاول نعرف اذا يحب وحده بس للاسف سهيل من روحه ما يبغي يعرس .. واليوم من ردينا من الحديقه وهو متغير ما شاء الله عليج يا ميثا .. احس ان اخويه خلاص بيغير قراره ...انا لازم اتمهل اشوي واستدرج اخويه بالكلام
بفرح من خاطريه ان عرس اخويه ...وبكون اسعد انسانه اذا كانت العروس اللي في بالي ..كانت مريم اتهاذي بهذي الكلمات وهيه ترتب ملفها



السبت في بيت ام علي ..موزه معصبه من بنت خالتها ميثا الانها ما خبرتها انهم بيروحون حديقه الهيلي ...وفي نفس الوقت يالسة تتحرطم من صباح الله على اخوانها اللي اخروها على جامعتها ..نزل علي يتريق عشان يروح دوامه

علي: لا اله الا الله شوه بلاج تتحرطمين دوم ..
موزه:سلامتك لو انت في مكاني بتسويلنا عرس
على : بل بل وكل هذا عشان جامعج ..يله قومي انا بوديج ..
موزه:هيه واخوانك يخلون حد يرتاح وما يعصب
ام علي: شوه ياج يا بنتي على اخوانج ..تراهم يهال لا تحطين في خاطرج منهم
شمه:انا ما احبج انا احب ميثا الانها ما تصارخ مثلج
موزه:لا انا أموت فيج ..اذا خلصت يا علي قم خلنا انسير ..احسن من مجابلة ام لسانين
شمه: هههه احسن يا الغيوره
ام علي: شموه عيب اطولين لسانج على اللي اكبر منج ...
علي: يا الله يا امايه عيالج دوم يتناقرون ...يله قومي موزه عن اتأخر عن شغلي ما فيه على حشره ابو كرش مسؤولنا ...اللي مأذينا ما ذاه
موزه: يله بتشيل وبشل فايلاتي وبلحقك ..((وبعد ما طلعوا من البيت يلسوا يسوالفون في السياره لين ما يوصولون جامعه الامارات ))

موزه: متى بوصل الجامعه يوعانه
علي: ليش انتي ما تريقتي ؟؟
موزه:لا ما تريقت بس شربت كوب حليب ...بتريق في الجامعه الاني بكون فاضيه ما عندنا محاضره
علي: حسبي الله عليج ..يوم انتي فاضيه اول الدوام جان سرتي توصلين اخوانج ...بدل ما تتحرطمين عليهم الحين شوه اللي بيفكني من صدعة المسؤول ؟؟
موزه: ما فيها شيء ..يعني عيب يوم توصل اختك
علي : لا مب عيب بس انا قلت بوصلج على اساس ما تتأخرين عن محاضراتج
موزه: مشكور يا بو حسن ما قصرت فيه في ذمتيه ..بس انا عندي سالفه ويا بنت خالتك المصون
علي : ميثا شوه بلاها بعد ..انتي ما خليتي حد مره اخوانج ومره بنت خالتج
موزه: امس سارت ويا سلامه وشما الحديقة وما قالت لي ..حتى السماعه ما رفعتها
علي: تبا الفكه منج دوم مجابلتنها في الجامعة...يله انزلي بسرعه بتأخر عن شغلي
موزه : انزين دواها عندي هالبنت ...مع السلامه (( ونزلت ودخلت مبنى الجامعه ))

في الجامعه وبالتحديد في الكفتيريا كانت ميثا تتريا ربيعتها مريم ...وهيه تتافف يا ربي من هالبنت خست وانا اترياها دوم تتأخر حتى لو عندها ما عندها محاضرات ..بتصل فيها وبشوف وين هيه الحين ..ميثا وهي يالسه تحط السماعه على اذنها تبغي ترمس مريم بالدس ..دقت الرقم تم يصيح لين انقطع وعقب دقت مره ثانيه الانها خافت على مريم..سهيل في السياره ما سك تلفون أخته اللي نسته على الجرج اللي في سيارته ..كان متردد بس قال لازم ارد يمكن مريم متصل من تلفون وحده من ربيعاتها عشان تخبرني عن تلفونها اللي نسته ..

ميثا:الووووووه مريوم وينج الله يهديج ..عيزت وانا اجرخ تلفونات
سهيل:..............
ميثا:ليش ما تردين عليه ..هاااااااه ما عليه خليني اشوفج بس..
سهيل:السلام عليكم
ميثا وهيه امبحلقه بعيونها:اا.... انت امنوه ....ووين مريم
سهيل:مريم توها داخله مبنى الجامعه...ونست تلفونها في السياره..وانا اخوها
ميثا:السموحه يا أخويه .. ما عندي خبر انها ناسيه الموبايل
سهيل :مسموحه(( وبند بس كان حاس ان هذا الصوت مب غريب ...))

بعد الموقف المحرج اللي استوالها يلست تقول في خاطرها أكيد هذا أخوها اللي شفته وياها في الحديقه الانها ما عندها أخوان غيره وهو نفسه اللي هزب اللبناني ..معقوله يا ربي الصدفه لاعبه دور ويايه ..الله يسامحج يا مريم واااااايد نسايه ..فجأه تيها موزه من ورى واتزيغها ..

موزه : بووووووووو
ميثا : بسم الله زيغتيني يا الساحره
موزه: انا ساحره يا خاينه
ميثا: ليش شوه سويت
موزه: لا ما سويتي شيء ....شوه اتسمين روحتج للحديقه بدوني
ميثا: هههههه اقول موزه شوفي منوه ياي صوبنا
موزه: امنوه
ميثا: الغاليه مريوم
مريم: السلاااااام عليكن
ميثا وموزه : وعليج السلام
مريم: شوه بلاكن محتشرات
موزه: سارت ويا اخواتي حديقه الهيلي .. وما خبرتني
مريم: صدق استانسنا البارحه في الحديقه ...والله السيره وياج حلوه يا ميثا
ميثا: يا ك الموت يا تارك الصلاه
موزه: يا خاينات ...بنقول بنت الخاله ما تكرمت تتصل ليش ما تتصلين انتي والا انا مب ربيعتج
مريم:افاااااا والله انتي على العين وعلى الراس ..بس بالصدفه شفت ميثا واخواتج البارحه
موزه :اهاااااااااااااااا ما عليه بطوفها هذي المره بس المره اليايه بعاقبكن
مريم+ميثا : هههههههه السموحه منج
موزه:يله انا الحين بسير عندي محاضره وقت الغدى بشوفكن
مريم+ميثا: ان شاء الله .....الله يحفظج

____________________________________

انتظروا الجزء الثاني قريب انزله
:):):)

[• GaMe oVeR •]

يسلمووو على القصه


وننتظر الجزء الثااني

[ŋαŋ]

مشكور مرقص على المرور
والرد

[Z@G®†éY]

يسلمووو على القصه


وننتظر الجزء الثااني

[ŋαŋ]

انشاءالله اخوي فهودي عن قريب
انزله

[الحـ~ـلـ~ـم]

مشكورة اختي علي القصه
















وانتظر المزيد من ابدعاتك























ويعطيج العافيه اختي بنت الكويت 2005

[أسهر أعد النجوم]

يسلموووووووووووش ع القصه
اخوج : برهوم الشمري

[ŋαŋ]

الله يعافيك اخوي من تكون
ويسلموووو على المرور



الله يسلمك اخوي برهووم الشمري
ومشكور على المرور

[الطير الجريح]

يسلموووووووووووووو على القصه