قمـــــــــ خـــــالد ـــــــــــــر قصه ولا اروع اتمنى الكل يقراها

[°•ஐ piNk ♥ DrEaM ஐ•°]

تـــــــــــــــابع الفصل الاول




خليل بصرخه هزت المستشفى: وضــــــــــحـــــــــه......



خالد انتفض من صوت اخوه .. اول مرة يشوف خليل على هاذي الحاله .. ولكن من يقدر يستحمل

هالموقف.. تم يهدي في اخوه اللي بدى يصرخ من كل اعماقه وهز المستشفى بصوته .. خالد احتار .. قمر

تبجي من صوب وامه شابصه بوضحه ماتبي تخليها وخليل منهار على الارض واهو بعد يحس بالانهيار ..

مرت اخوه الغاليه .. وضحه اللي الكل كرهها لان خليل تعب عشان يتزوجها بس مسرع ما حبوها باول يوم

دخلت بيتهم.. وضحه اللي كانت دوم وياه تصل فيه وتسال عن احواله يوم كان بلندن.. وكانت لين تفكر

باليهال ولا تشكي خليل تشكيه عنده واهو يصبرها على خبال اخوه اللي مبين ما بيرد له ابدا .. حرام حياتنا

تتغير.. مريم توها معرسه وجاسم تقدم ووضحه تروح .. يا رب.. شباجي ..


خليل مرة وحده اوتعي .. قط شماغه وعقاله وطلع من الدار



خالد يمسكه: وين رايح خليل

خليل بعصبيه: فج عني .. خلني اروح

خالد يمسكه بقوة: اذكر الله يا خليل الاعمار بيد الله


خليل بصرخه: اقلك فج عني..


خالد ترك خليل اللي طلع من الغرفه


ام خليل برعب: روح وراه ياوليدي لا يسوي شي بنفسه


النرس دخلت بنفس الوقت اللي طلع في خالد يركض ورى اخوه ..



وصل للباركات وقعد يطالع وين سياره خليل ومرة وحده الرنج يشخط من وراه ويطير.. خالد ما بطى وركب

سيارته الاكس فايف وراح وراه ..



قمر تحظن ام خليفه واهن قاعدات على الارض .. خايفات ما يدرين شبيصير ..



بعد ما خذوه جثه وضحه للثلاجه قعدت قمر تصرخ من البجي وام خليل معاها .. يبجون على الام اللي ما

تهنت ويا عيالها.. الام اللي حملت وتعبت وما لاقت الا الموت ياخذها من احلى حلم بحياه كل ام .. قمر ما

فكرت الا بالعيال .. خانت حيلي.. من امبونهم يتيتمون .. بعد عيني وضحه حتى ما شافتهم ولا لمستهم .. يا

رب استر على عبيدك



بعد ساعه قمر قامت واتصلت في مريم تخبرها عن المصيبه اللي صارت .. اول ما طلعت من الدار شافت

جاسم بويهها وطارت بحظنه



قمر بصوت مبحوح: راحت الغاليه العزيزة جاسم.... راحت

جاسم كانن عيونه محمرين وفكه يرتجف من البجي : ترحمي عليها يا قمر ترحمي عليها ..



قمر تمت تبجي بحظن عمها وبعد شوي وصلت مريم اللي قلبت المستشفى مناحه وصريخ على ارفيجتها

الغاليه .. جاسم ما يقدر يهديها ولا يسوي لها شي تصرخ من كل قوتها ليما طاحت مغشي عليها .. دخلت

قمر الدار تشوف ام خليل شافتها طايحه على الارض واهي ساكته .. ارتعبت قمر وراحت لها .



قمر: خالتي ..... خالتي قومي ... قومي خالتي تكفين قومي ....



ما قامت ام خليل وقمر طلعت من الدار تدور على جاسم .. ما حصلته.. راحت لاحد النرسات وجرتها للغرفه

وهناك اسعفوا ام خليل اللي ارتفع عليها الضغط من وفاة وضحه ..



على الليل خبر وفاه وضحه انتشر للكل .. ام خليفه ماتت من البجي ومروة ونوفه ولطيفه راحن المستشفى

يشوفون اللي صاير.. شهالمصيبه .. الكل كان يترحم عليها ويدعي لخليل بالصبر .. يعرفون شكثر خليل كان

يحب وضحه وشكثر تعب عشان يزوجونها منه .. يوم كانن بالمستشفى شيخه اتصلت في نوفه ..



نوفه بتعب: هلا شواخ

شيخه فزعت: علامج نوفو .. تصيحين

نوفه ردت تبجي لشيخه: شواخ ... وضحه ماتت

شيخه بصرخه: شنووووووووو

نوفه: وضحه حرمه خليل توفت من بعد الولاده.. شواخ .. راحت الغاليه راحت..


شيخه تمت تبجي وسكرت عن نوفه ونزلت تحت وقبل لا تنزل طلعت لها نورة


نورة: شيخو علامج

شيخه واهي تبجي: وضحه ... حرمت خليل ماتت

نورة مسكت عمرها: شنووووووووووووووووووو

شيخه: ماتت واهي تولد .. تخيلي نورو


نورة دارت بهالارض والسما.. وضحه حرمه خليل ماتت.. توها كانت وياها وتسولف معاها بالعزيمه

وماتت.. نورة مااستحملت ودخلت دارها وسكرت الباب وحست وكانها اهي المذنبه بوفاه وضحه ليش انها

تمنت لو انها زوجه خليل بدالها..


شيخه انزلت وين ماكانت امها وابوها واخوها يالسين وصدمتهم بالخبر


شيخه: يوبا حرمه خليل بن ظاحي توفت

بو ناصر وناصر قامو: شنو

ام ناصر قامت لها تمسكها من يدها: شتهرجين يا شيخو استخفيتي

شيخه واهي تبجي: لا يمه من صج.. ماتت واهي تولد .. توها نوفو مخبرتني .. يمه حالتهم حاله هناك ..

الكل منهار

بوناصر وناصر يسترجعون بوناصر: يالله .. شيلي عباتج ويا بناتج وخلينا ننزل الجهرا اللحين اللحين


ام ناصر واهي تطق على راسها: يا بعد روحي يا خليل.. الله يعينك على فقد حرمتك

شيخه راحت لدار اختها: نورو... نورو قومي تزهبي بننزل الجهرا

نورة واهي عافسه عمرها من البجي : ماني رايحه ... روحو انتوا .. ماني رايحه

شيخه: نورو بلا سخافه .. يالله قومي نروح لهم ..

نورو: قلت لج مو رايحه يعني مو رايحه ..

ناصر كان عندهم: شالسالفه

شيخه واهي تمسح دموعها: نورو تتسيخف ما تبي اتيي

ناصر: نورة ... نورة حبيبتي اشفيج


نورة واهي تبجي: مافيني شي.. روحو عني .. ماابي اروح


ناصر: هاو نورة اشفيج .. الموت حق علينا كلنا علامج تسوين في روحج جذي فكري في اهلها شحالهم


اللحين .. نوفه ومروة وقمر اكيد يحتاجون احد يعاونهم ويصبرهم على هالمصيبه ..


نورة بحزن قاتل : ماابي ناصر.. بسبتي اهي ماتت.. انا السبب.. انا الحقوده .. الحسوده ( وقفت كلام


وراحت بالبجي والصراخ)


ناصر: شيخو روحي انتي تزهبي ونزلي ويا امي وابوي انا بهديها وبلحقكم


شيخه: ان شالله


كسرت شيخه خاطر ناصر.. مع انهم ما عرفوها الا من شوي بس وايد انصدمن للسالفه ..



على العشا بو ناصر وصل ويا حرمته وبنته بيت ام خليفه.. بيت بو خليل كان مثل المقبرة .. الحزن لاف كل


مكان .. وبو خليل اول ما عرف بالسالفه راح البيت وكسر صور وضحه كلهم واهو يبجي .. بجى من

خاطر .. من حرقه قلب على حرمه ولده الطيبه المؤمنه الطاهرة .. حرام تروح عنهم جذي.. في دار خليل


قمر كانت يالسه ويا مريم اللي تشم اغراض وضحه وتبجي وتطق على راسها .. فقدت اعصابها لدرجه انها

راحت تحرق يدها عن الحنه اللي فيها .. قمر يودتها واهي ما تدري شلون تعابلها ..



قمر: مريم حرام عليج تسوين جذي.. ترحمي عليها .. ادري فيها غاليه عليج

[°•ஐ piNk ♥ DrEaM ஐ•°]

مريم: هاذي وضحه .. وضحه الخاينه.. راحت عني وعن خليل .. جذبت علي.. قالت انها بتكون وياي


بعرسي .. خاينه خاينه وضحو يالخاينه ..



طاحت مريم على الارض واهي تبجي من خاطر .. قمر ما كانت تفكر بنفسها كانت تفكر بهاذي العايله اللي

انهارت من وفاه الغاليه.. اذا اهي نفسها تبي ترمي نفسها بحظن احد وتطلع اللي فيها شعلبالهم اهم اللي

عاشوا وياها .. قعدت تذكر خالد .. من طلع الصبح ورى خليل للحين ما رد .. وينه .. ان شالله ابخير..

خالد لحق خليل بالطريج ليما وقف عليه جدامه بالطريج وخلاه يوقف.. طلع من سيارته وراح لعند اخوه اللي

كان منزل راسه على السكان .. خالد فتح الباب وحمل خليل لبرع واهو يلمه ويبجي وياه .. خليل انهار مرة

ثانيه وتم يبجي على جتف اخوه .. تباعد عن خالد وصار يمشي بالشارع الفاضي واهو رافع راسه ومرة

وحده طاح على ركبته واهو يصرخ : ليش يا ربي .. ليش ما خذيتني بدالها.. تدري اني احبها .. احبها يا

ربي.. وضحه .. وضحه حبيبتي وضحه .. وضحه حياتي ..



سكت خليل عن البجي .. ومرة وحده قام وراح لدبه السيارة .. طلع منها جنطه كان حاط فيها اغراض

لليهال .. حذفهم لبعيد ونظرة الشر بعيونه .. بس هدئ شوي.. وركب سيارته



خالد: خليل على وين

خليل: ......... ولا مكان ..

خالد: انزين خلني اروح وياك ..

خليل: ....... ماابي...



صك الباب وراح عن اخوه اللي ظل واقف محتار.. بس خليل عنده حق .. وكل الحق باللي يسويه .. تخيل لو


قمر اللي توفت مو وضحه .. راح يموت لانه مو مستعد يعابل الحياه من بعدها ..




مرت ايام العزا ال10 أحزن ما يكون .. مريم اللي كل شوي وتنهار عليهم .. ام خليل اللي مرضت .. ام

وضحه اللي ياتهم من السعوديه وين ما يسكنون وصارت الوقعه بييتها .. ام خليفه وام ناصر اللي اهتمن

بكل شي.. حتى لولوة حظرت ال10 ايام كامل .. ولا تخلفت عنها.. نورة ما راحت وظل ناصر وياها يروح

ويرد من الجهرا.. عايشه راحت قعدت وياها ويا ريلها .. ما قدروا يطلعونها من حبستها .. كانت تحس بالنار

تسعر فيها .. تقوم وتقعد بالصلاه وتقرى بالقران .. تبجي واهي تستغفر ربها وكانا اهي السبب بموت

وضحه ..



شيخه كانت ويا بنات خالتها تعابلهن .. حتى انها تصالحت ويا مروة وصارن ارفيجات.. عايله بو سعود اول


ما عرفوا راحوا الجهرا.. سعود تعب حاله يوم عرف ان مريم منهارة وكان يبي يشوفها من قلب ويطمن

عليها.. مريم من زود الصدمه قالت لعمها جاسم انها ما بتتزوج خلاص وتبي تفج الخطبه



جاسم بصدمه: ينيتي مريم.. شهالحجي ..

مريم: أي .. ماابي عيال الغاليه يتلتهون بلا ام .. انا بربي العيال ولا علي من احد .. والزواج انا من زمان

ماابيه .. واللحين لي عذر.. انا ما بتزوج وقولوا لسعود اني ابي افج الخطوبه


جاسم مسك مريم بقوة: تراج مصختيها .. ألريال لعبه بيدج .. يفج الخطبه .. خلصوا الناس يعني .. الكل

مستعد يربي عيال خليل مو بس انتي .. قمر اللي تعابلهم كل يوم بروحتها وردتها مااشوفها قالت خلاص


ماابي اتزوج خالد بظل اعابل عيال وضحه ..


مريم بصوت مفجوع: هاذي الغاليه يا جاسم... مااقدر افكر الا بالعيال.. وينه اخوي .. ما تدرون عنه وينه ولا


وين طارح نفسه .. همكم الناس اللي تيي تعزي .. ويوم اللي انا افكر بعياله قعدت تلوممني ..


خالد بتصميم: اذا خلصت الناس يا مريم وما ظل احد يربي عيال خليل لا تنسين اني انا موجود ويا قمر ..


وانا مستعد مااييب عيال واربي عيال اخوي .. وتعالي بعد انتي ناسيه ان عندهم ابو اللي ييتي وقررتي من


نفسج انج تربينهم


مريم: اللي بتقولونه ما يهمني .. انا ماابي اتزوج وخلاص.. السالفه منتهيه ..



راحت مريم وجاسم وخالد محتارين .. قمر كانت بالمستشفى ويا اليهال اللي حطوهم بالحضانه ليش انهم


مولودين قبل الموعد .. بو خليل سمى العيال .. ألولد ابراهيم والبنت العنود على مسماهم ويا امهم

المرحومه .. خليل محد يدري عنه من 10 ايام بس طلال اللي يعرف لانه من بعد ماتركت وسيمه راح بيت


المزرعه ويا الفروس ويوم وفاه وضحه بالليل ياه خليل وكان منهار بس ما قال له شاللي مييبه .. عرف

طلال يوم اتصل في عمه جاسم .. جاسم استفسر عن خليل بس طلال ما خبره لان تفهم وضع خليل وانه يبي

يقعد لحاله ..



طاف اسبوعين من وفاه وضحه .. وخليل للحين مارد البيت.. جاسم عرف ان خليل بالمزرعه وراح له ويا

خالد عشان يردونه البيت..



خليل: مو راد البيت ولا ابي اشوف رقعته مرة ثانيه


خالد: شهالهرج يابو العنود .. شلون تترك كل شي وتنعزل

خليل: ماابي شي...... من بعد وضحه.......... عافيت كل شي


جاسم: مو كلام هاذا ياخليل.. انت ناسي اهلك .. ابوك امك اختك اللي حارقه قلوبنا برفضها لولد عمك تبي

تفضي نفسها لعيالك .. ولايكون ناسي عيالك

خليل بقهر: بستين الف داهيه.. ماابيهم .. انا بغيتهم عشان يظلون وياي ويا وضحه.. اهم السبب بموتها. اهم


خالد: اذكر الله يا خليل.. شقاعد تقول.. انت مو بوعيك.. وضحه راحت بحكمه الله .. مو معناته تخلي روحك

حق هالقهر والعذااب.. عيالك يبونك ..



خليل: انا مااابيهم .. سوو فيهم أي شي.. ماابيهم ولا ابي اشم رواحتهم بعد ..

جاسم قام بعصبيه: انت شفيك... ما تخاف من ربك .. يهال مالهم ذنب تقول عنهم هالكلام.. خرفت وقعدت يا

خليل

خليل قام بعصبيه: يوم اللي تخسر قلبك وروحك وكيانك كله راح تفهم اللي اقوله ... خالد لوتموت قمر شراح

يصير فيك؟

خالد قام بعصبيه: فال الله ولا فالك يامعود..

خليل: وانت ياجاسم لو لولوة يصير فيها شي شراح يكون موقفك؟


جاسم هدى وسكت........


خليل بحزن: شفتوا... هاذا ما صابكم وخالد ثور علي وانت حنيت راسك .. عيل انا شنو .. اللي حبيتها من 5

سنين وبالغصب زوجوني اياه بذباح الروح وعشت معاها احلى سنتين انتهت باسوى ماساه اعيشها

بحياتي .. انا ميت ياخالد .. ميت يااخوي .. بس الا اعضائي يتحركون .. ولا لو الود ودي اسلم الروح

واموت وتنتهي معاناتي ..


خالد حس لاخوه وراح له وكلمه بالهداوة: صح كلامك .. لو يصير شي بقمر انا راح اموت ... تدري ليش..

لان للحين ما عندي منها الا الذكريات وبتحترق دنيتي وانا اتذكرها .. بس وضحه ماراحت يا خليل.. وضحه

ماراحت قبل لا تخلف لك احلى بنت وولد يحملون عبيرها وريحتها اللي تعم الدنيا كلها .. انت لاتنسى انهم

من وضحه قبل لا يكونون منك .. ومو ذنبهم لو ماتت امهم بالولاده .. لاعتب على حكمه الله ..


خليل سالت دموعه بس ظل على موقفه: ماابيهم ... خذهم انت ياخالد .. ربهم انت وجاسم .. انا مافيني

اجابلهم واذكر امهم كل لحظه...



راح خليل عنهم وردوا للبيت واهم يحسون بالفشل والحزن لان خليل اللي يعرفونه راح ..................ولا

بيرد مرة ثانيه




طاف الشهر على وفاه وضحه .. واليوم يردون اليهال للبيت.. قمر راحت ويا مريم وخالد عشان ايردون

اليهال .. طول الايام وقمر ما قعدت بالبيت يا بالسوق تكمل اغراض اليهال يا عندهم او ويا خالتها

المريضه .. حتى خالد ما كانت تدري عنه الا بالتلفون .. يوم شافها خالد تنتظره عشان يروحون المستشفى

شافها منهارة .. ضعفت عن قبل وعيونها تحوطت بالسواد حتى انها كانت تتنفس بقوة وكانها تعبانه




خالد: حياتي اشفيج


قمر بتعب واضح: مافيني شي... سلامتك

خالد: متاكده.

قمر: أي حبيبي.. خلنا نروح انييب العيال.. الكل ولهان عليهم

خالد ضمها واهو يمشي وياها: يالله حياتي




كانت الساعه 11 يوم ترد قمر ويا البيبيز مع مريم وخالد .. الكل رد لانهياره يوم شافوا اليهال .. منهم من

حس ان اليهال اهم السبب ومنهم من انكسر خاطره على اليهال.. لكن المشكله كانت براس ام وضحه اللي

كانت تفكر انها تاخذ اليهال وياها



جدال كبير كان بالميلس بين بو خليل وخالد وجاسم وذعار اخو وضحه ونفيس خالها وامها..



ام وضحه بدت الكلام: مثل ما تعرفون .. ارويحتي وضحه راحت .. وانا خلاص.. انحرمت من شوفتها .. وانا

يايه اقل لكم اني برد والعيال معاي


خالد انصدم وجاسم وبو خليل يعرف لام وضحه انها تفكر بهاذا الشي من اول ما وصلت الجهراء



بوخليل بكل هدوء وهيبه: واحنا يا ام ذعار

ام وضحه: انتو فيكم الخير والبركه .. وولدكم للحين عايش وكاهو خالد متزوج الحمد لله وبيفرحكم بعياله ..

(اونها تبجي) وانا مالي الا وضحه .. ووضحه راحت .. يعني عيالها اهم ونستي بهالدنيا من بعد ما راحت ..

بو خليل يفكر في خاطره .. والله انج حيه رقطه يالشينه .. وضحه ما تدرين عنها من سنتين وتوج تذكرينها



ذعار بحزن مصطنع: أي والله .. ما كفاكم خذيتو اختي بعد بتاخذون عيالها .. لا الله يرضى ولا محمد

رسوله ..

جاسم: اللحين يعني انتو اللي ماندري عنكم من سنتين تبون تفهمونا انكم بتربون العيال احسن عنا ..

نفيس: والله ما قلنا جذي يا بو محمد .. حنا نبيهم ذكرى للمرحومه

خالد: مسامحه يا بو زيدان.. بس اللي تبونه ما يمكن يصير

ذعار بحقارة : شقصدك يا بو وليد ..

بو خليل: كلمه وحده ماكو غيرها هرج ... اليهال يبقون عند اهل ابوهم

ام وضحه: حشى والله حرام عليكم

بوخليل: حشمي نفسج .. انا كلمتي ما تنرد ياام ذعار مادامني حي .. اليهال يبقون ويا اهل ابوهم اهو للحين

حي وعايش بالدنيا ولا انتوا ناسين هالشي..

ذعار بسفاله : والله ما يندرى يا بو خليل.. من وفاه وضحه وولدك الشيخ غايب . .الله العالم وينه .. يعربد

ولا بنسمع خبره بعد جم يوم

[بنت الخير]

مشكوررررررررره ساااارونه
اجرنا واجرج
وباجر انشاءالله كملي لنا القصه انزين :):):)

[°•ஐ piNk ♥ DrEaM ஐ•°]

خالد بعصبيه: الثم لسانك يا ذعار وخل عنك الهرج الفاضي.. وحتى لو صار اللي تقوله بعد العيال يظل لهم

يدهم وعمهم اللي راسه للحين يشم الهوا

ذعار بحقاره: ما تعودنا نخلي عيالنا بديار الغرب

بو خليل قام: اشوفك تطوف بالكلام يا ولد البلاح .. بس الحشيمه مو لك الحشيمه لامك اللي يالسه تسمعك

وش تهرج علينا

ام وضحه: اللي يقوله ذعار اهو الصح.. والله يابو خليل لو كانت البنت بنتك وحرقه القلب حرتك خليت

عيالها مع غيرك ولا بتاخذهم معاك

بوخليل: اكيد نعم .. والله شنو هالمذهب اني اخذ العيال واخلي ابوهم مكانه

نفيس قام وياه ذعار: كلمه وحده ماكو غيرها.. العيال يطلعون معانا للسعوديه ..

خليل على الباب: واللي يقول لا يا ولد البلاح..؟


الكل طالع الصوت اللي يه من على الباب.. كان خليل واقف .. وشكله مو ناوي على خير..


ذعار بضيج: حيا الله من شرفنا.. خلصت العربده ولا ماخذ استراحه

خليل: خلصت حياتك يالمايع المندس مثل الحيه .. ياي تاخذ عيالي وانا للحين عايش..

ام وضحه: والله الحق حقنا ولا انا غلطانه

خليل ولا اهو حاشم : انجبي انتي ياالحيه الرقطه.. علبالج انا ناسي انتي وولدج واخوج هالمندوك شسويتو


فيني وفي وضحه يوم بغيت اتزوجها .. انتي مينونه طاير مخج تفكرين اني اعطيج عيالي .. عشان

تربينهم.. انتي لو فيج خير ربيتي هالشاين العايب اللي مفشل قبيلتكم بعمايله السوده

طول الحس عند ذعار: احشم نفسك انت قاعد تكلم عمتك

خليل : عمعم الله راسك بجدف الا الحشيمه من اصلنا ومنبتنا ..انتوا اللي حشمو حالكم شايلين شيبه الدار

بشراع وميداف حسبالكم قلت الخيرة والفحوله يا البلاحه .. ويايينا تتكلمون بالحق .. ما حق لكم علينا الا

بنسبكم الغالي وضحه .. والغاليه راحت .. (تهجد صوت خليل بس ظل ثابت)

ام وضحه: اخر كلامك يا بو خليل؟

خليل اللي رد عليها: اللي سمعتيه من كبيرنا يا حرمه.. ضبي اغراضج ولمي قشارج وروحي من وين

ماييتي.. مثل ما نسيتي وضحه .. انسي ان لها عيال .. دامني انا ابوهم .. بحرم عليج شوفه عيونهم ويالله ..

الباب اللحين يسع يمل .. ان ما كان بيم .



ام وضحه تطالع خليل باحتقار وتسحب ولدها وتطلع ويا اخوها وخليل يظل واقف مكانه مثل الصخر .. بو

خليل يطالعه بكل فخر .. هاذا ولدي اللي ربيته وعلمته على التحمل بالمواقف الصعبه ..خالد وجاسم شالو

عمرهم وراحوا لاخوهم يفخرون فيه وفي موقفه



جاسم: عرفت انك بترد .. يوم اللي ينفح حشاك بحس عيالك بترد



خليل ابتسم واستغلوا الفرصه وعزوه على الغاليه .. راح بو خليل لولده وتم يطالعه.. مسكه من جتوفه



بوخليل بتاثر: ريال من منبت رياييل.. عافاك ربي ياولد ابراهيم


حظن بو خليل ولده بقوة يحسسه بالفخر اللي عم فيه .. خالد وجاسم بعد وقفوا بشهامه فخر باخوهم وحبيب

قلبهم خليل..



التفت خليل لخالد: وين عيالي .

خالد: حياك..



راح خالد ووراه خليل وجاسم ..الغرفه كانت مليانه بالبنات.. نوفه و مروة وشيخه وحتى لولوة ومريم

وقمر .. جاسم تنحنح والبنات تغطن



جاسم: قمر تعالي

قمر تعطي الياهل حق نوفه: ان شالله

طلعت قمر حق عمها: هلا عمي (وشافت خليل) ................. عظم الله اجرك بو ابراهيم

خليل بحرقه قلب: اجرنا واجركم

جاسم :قمر فضي الدار خليل يبي يشوف عياله

قمر بابتسام: ان شالله ..

دخلت قمر الدار: يالله يا بنات اطلعن بو ابراهيم يبي يدخل..



البنات فرحن على الكلام ومريم بدت تبجي على اخوها واهي تلم ولده بحضنها طلعن البنات من الدار وجاسم

التفت للولوة وابتسم لها من خاطر واهي استحت وراحت عنه... جاسم ولولوة من بعد ليله اللي طلبها بدوا

يكلمون بعض بالتلفون .. وعلاقتهم ببعض قوت اكثر عن أي شي ثاني .. ومستعدين انهم يظلون مع بعض

ليما ينتهي الحداد على وضحه عشان يملجون ..



جاسم: حياك بو العنود...



دخل خليل الدار وجسمه ينتفض.. يحس بروحه بتطلع منه .. تذكر وضحه وحسها وكانها موجوده بالدار..

دخل وشاف مريم قاعده وحامله احد اليهال.. وقمر تحمل الياهل الثاني .. راح لعند مريم اللي سلمته ولده

وتمت بحظنه تبجي من خاطر وخليل يهدي فيها .. يه جاسم واخذ مريم من عند خليل وخلاها تبجي بحظنه ..

قعد يطالع ولده ابراهيم اللي كبر .. كان راقد .. يحليله .. عنده خشم امه ونفش شفايفها .. زاقد شوقه انه

يشوف البنت ..اذا الولد وهالكثر يشابه وضحه .. شعلى البنت .. خل الولد عند مريم وراح لبنته .. قمر

تطالعه بفرح وخالد وراها وخليل مثل المتلهف على بنته .. البنت كانت صاحية وتطالع ابوها بوسع عيونها

وكانها تعرفه .. خليل شق حلجه على حلاه بنته.. طالعه على امها .. نفس لون العيون ونفس تقسيم الويه

بس حسها تشابه قمر شويه ..


خليل: يحليلج يالحلاو .. طالعه على امج .. حبيبتي والله



ضمها خليل لصدره بلهفه وكانه يحس بوضحه ببنته .. روح وضحه كانت ولابد بالغرفه لان الهدوء عم

بالمكان وخليل يبوس بنته ويسمي بالرحمن عليها ..قمر تبتسم للوضع وتحمد لله .. ولكن فجاه .. الدنيا تدور

بعيونها .. اللوعه بجسمها تسري .. وتحس بحرارة غريبه تنبعث منها .. مسكت يد خالد و ما قدرت توقف لذا

قعدت على الكرسي وخالد يمسكها ..


خالد بفزع: حياتي اشفيج ..

قمر ما تقدر تشوف خالد تحس ان الدنيا تدور فيها: خالد .. يود يدي خالد ..

خالد مسكها وقلبه يدق من الخوف: حبيبتي علامج ما تقولين لي ..

قمر: مااقدر ... احس براسي يدور .. شقاعد يصير .. مااقدر

خالد يكلم مريم اللي فزع قلبها على قمر: مريم يبي قلاص ماي (يكلم قمر) سمي بالرحمن حبيبتي وغمضي

عيونج ..


قمر سوت اللي قاله خالد وحست ان الدورة خفت شوي عليها ..


جاسم: شربي الماي قمر

مريم خذت الماي لقمر عشان تشربه. شربت شوي وردته ..


ابتسمت لخالد اللي مات عليها من الخوف: اللحين احسن؟؟

قمر: أي . احسن شوي..


قامت قمر عشان تطلع وخالد يمسكها .. اول وما وصلوا عند الباب طلعت شهقه من قمر وخرت من يد خالد


اللي مسكها بالهوا وصرخ: قمر...


الكل راح لقمر وخليل خلى عياله مكانهم وراح لعندها..


حملها خالد لغرفتهم وحطاها على الفراش.. مريم كانت تبجي وجاسم يهديها

جاسم: علامج مريم ليش تبجين مافيها شي بس شويه ضعف

مريم: حتى قمر بتروح ........ مثل ماراحت وضحه

جاسم : وطي حسج لا يسمع خالد



خالد كان لونه مبهت .. يحس بالموت .. قمر اشفيها .. لأيش طاحت عليه .. اهو حسها مو سويه بس

الطيحه اكدت له شعوره.. قبض التلفون واتصل للاسعاف .. ياو الاسعاف واخذوا قمر وياها خالد .. خالد

حس بالرعب يعم بقلبه .. يحس باللوعه .. وكان قمر بتفارجه .. ياترى بمرضه قمر كانت تحس بنفس

المشاعر.. الله يسلمج يا حياتي الله يسلمج..



دخلوا قمر المستشفى وبعد نص ساعه من المعاينه خالد كان يتحقرص بصاله الانتظار ولا اهو داري باللي

بزوجته.. شاف الدكتور يطلع ويرد ومعاه دكتورة .. زاد خوفه وجاسم اللي لقه يهدي فيه


جاسم: طول باك يا خالد خير ان شالله ..

خالد: ان شالله يا بو محمد ان شالاه... ترا بموت ان صار فيها شي.. انا هملتها طول هالشهر

جاسم: لا هلمتها ولا شي اهي كانت مشغوله بعيال خليل .. بس اكيد شويه ضعف لان مريم قالت انها ماكانت

تاكل شي من ايام ..


خالد: انا حسيتها امس يوم نرد العيال انها مريضه شوي .. بس ما اصريت عليها انروح المستشفى.. ليش

ليش .. ماابيها تموت .. ما ابي اخسرها .. حرام تموت قمر .. احبها ..


الدموع تحوس بعيون خالد .. وقعد واهو حاط راسه بين ايديه واهو فاقد اخر عصب له ..يحس بالعجز.. ما

يدري ليش قعد يتذكر ايطاليا .. ويتذكر قمر اللي كانت وياه.. وكانه من صج مو صجيه وكانها حلم .. ومرت

الذكريات مثل الفلاش بباله.. حس انها بتروح بتروح .. حتى انه بغى يبجي .. عمره ماحس بانه قليل حيله

جذي.. الله عانك يا خليل على فقد وضحه


واخيرا طلعت لهم الدكتورة


خالد شقح لها: بشري يادكتورة علامها قمر

الدكتورة: انت زوجها

[°•ஐ piNk ♥ DrEaM ஐ•°]

خالد : أي نعم .. علامها حرمتي

الدكتورة تبتاسم: زوجتك مافيها شي... الا انها حامل..

خالد ما صدق عمره .. فتح ثمه وظل يطالع الدكتورة

جاسم اللي ما صدق عمره: شنو .......

الدكتورة تضحك: علامكم.. البنت حامل .. مافيها شي.. الف مبروك

جاسم : الله يبارك في حياتج مبروك بو وليد ..



خالد التفت لجاسم: جاسم .. بصير ابو

جاسم: وخوش ابوه

خالد يشق احلج : جاسم بصير ابو .. أبو يا جاسم ابو


جاسم نسى روحه وحظن خالد وخالد يحمل عمه واهم يضحكون والنرسات طايحينها ضحك عليهم


خالد خل عنه جاسم: جسوم بصير ابو يااااااااااي من قدي اليوم من قدي

جاسم بحزن: وانا حمودي متى بيي؟

خالد : جريب يا عمي جريب.. بروح اشوف الزينه شلونها شعلومها

جاسم: انا بروح اخبر البيت ..



راح خالد لقمر وجاسم راح البيت وخبر الكل والكل استخف من الفرحه وشوي نسوا من الهموم اللي تيمعت

عليهم


دخل خالد لقمر اللي كانت ويا الدكتورة تخبرها عن الشي


الدكتورة:.... بس انتي لازم تحافظين على صحتج . انتي اللحين مسؤوله عن نفسج وعن البيبي اللي

ببظنج.. اكلي زين واشربي زين ولا تجهدين نفسج باشياء مالها داعي .. انتي صغرية بس قويه البنيه

وتقدرين تنجبين بصحه وسلامه بس هدي الدلع واكلي وبتصيرين احسن ما يكون ..


قمر كانت ساكته وصاخه ومن دخل خالد تمت تطالعه بعيون حزينه وكانها تسمع مصيبه .. انا حامل .. انا

حامل ..


طلعت الدكتورة من بعد ماكررت نفس الكلام على خالد المبتهج. .اول ما طلعت الدكتورة التفت خالد لقمر


خالد بفرح كبير: الف مبروك حبيبتي ... يتربى بعزج


بس قال خالد اخر جمله قمر انهارت بالبجي .. خالد تعجب منها .. اشفيها قمر زعلانه .. لا يكون بس بدت

سوالف الحمل وياها.. راح لعندها واهو يهديها


خالد بحنيه: علامج حياتي .. اشفيج تصيحين .. بدال ما تستانسين وترقصين.جاسم رقص مساعه بغرفه

الانتظار


قمر واهي تبجي: ماابي الياهل .. ماابيه


خالد انصدم .. علامها قمر .. لايكون ينت


خالد: شنووووووووو شنو ماتبينه ..

قمر: ماابيه ... ماابي ياهل ماابي



خالد قام عنها.. حس بالاشمئزاز .. اكو ام ما تبي ولدها اكو حرمه تنزعج من كونها حامل.. لايكون ماتبي

الياهل لانه مني ولانها للحين مانست اللي صار ويا ندى


خالد بحزن كبير: ..... لانه مني

قمر رفعت راسها بصدمه: .. شلون تقول شي جذي.. انا اتمنى هالشي اكثر منك .. (ردت تبجي)

خالد ارتاح جزئيا من اللي قالته قمر بس للحين مو عارف ليش اهي زعلانه جذي: انزين ليش تبجين ؟؟

قمر: ... اخاف اموت عنه ... اخاف اموت عنه وعنك .. ومااقدر اربيه .. مثل وضحه.

خالد حس بالراحه.. الحمد لله: اااااااااااه يا قمر .. شوي واموت علبالي ماتبينه ولاشي ثاني .. (ابتسم

ويلس يمها) حبيبتي اللي صار مع وضحه .. ماانكر انه يمكن يصير وياج بعد الشر عليج .. بس بعد .. الله

كريم يا قمر .. وانتي ان شالله ما بيصير فيج شي والياهل بيتربى بعزج يالغاليه وانا وياج..


قمر بحزن: وان مت .. شراح يصير

خالد: مستحيل تموتين .. شلون الدنيا سايبه وياج انتي.. ما اسمح لج تموتين .. وان متي ..اموت نفسي

والياهل ونروح كلنا فيها


قمر تشهق: خـــــــــالد

خالد يضحك: رووووووووح خالد وحياه خالد .. لا تصيرين جذي متشائمه رحمه الله اوسع من أي شي

ياقمر .. تدرين .. عشان تزيد ثقتج بهالحمل ان شالله يكونون توم


قمر بفزع اكبر: عشان يكونون يتيمين بدال يتيم واحد

خالد عصب: يالله عن الكلام الفاضي.. وين قمر الصابرة المؤمنة برحمه الله وقدرته ..

قمر تمسح دموعها: ونعم بالله ..............

سكتت قمر وخالد بعد .. واهم يحاولون يفكرون بشي واحد.. بيكون عندهم ولد


قمر بهدوء: خالد.. انا حامل

خالد والابتسامه شاقه حلجه: بيكون عندنا ولد

قمر بفرح : احبك بو وليد

خالد: احبج ام الهنوف... احبج حب ما تتصورينه .. احس ان لو كان في الحياة سبب اني اعيشها.. هو

انتي.. قمر انا ما اتخيل حياتي من دونج.. انتي استويتي كل منالي وامالي..

قمر تمسح دمعتها: الله يخليك حياتي .. قول لا اله الا الله .. عن لا يحسدنا احد

خالد يتقرب منها ويمسك يدينها: محد يقدر يفرق بيني وبينج... حتى الموت... لاني ما راح اسمح له انه

ياخذج مني .. انتي حبيبه خالد.. انتي قمر خالد ..


تم خالد ويا قمر شوي وبعدين طلع عشان يكلم الدكتور ان كان يقدر ياخذ قمر.. مر على مكتب الاستعلامات


اللي بالقسم مالقى احد التفت يرد لدار قمر الا بصوت يناديه: خالد ...


التفت خالد للصوت وكانت الصدمه...من غير المعقول شلون الماضي دايما يلاقي له الطريق اللي يخليه

يعيش ويا المستقبل.. لان الشخص ماكان أي شخص.. كانت شيماء صديقة ندى...

[بنت الخير]

ثـــــــــــانكس ســــــــارونه وادري القصه طويله وتعب بس الله يعينج استحملينا شوي على ما تنتهي القصه :):):)
وبخبرج خبر بيريحج مني .......
انا الاسبوعين اليايين مراح اشبك لان امتحانات والله كريم واول ماتخلص الامتحانات برد اكمل قصتي بس اتمنى انها على نهايه الامتحانات تكون خالصه القصه لاني بسااااااااااافر :):):):)
ومشكوووووووووووووووووره

[عاشقــ تويتي ـة]

ما تقصرين حياتي سااارونتي على التكملة

بس وقت ما تقدرين كمليها مانبي نضغط عليج

[أمونه]

تسلميييييين ع التكمله سويره


ناطرين البقيه

[بنت الخير]

سااارونه انا اقول انتي اتحطين لنا اجزاء وايده وتنحاشين ها::):):) انا اوريييييييج بما ان اليوم اخر يوم اشبك والسبه العله الامتحاااااااانات
اليوم لظهر اذا مالقيت التكمله بزعل ومابدخل المنتدى كلش ................>>>>>اشدعوه تقدر "بس تحاول تهدد""
ناااااااااااااااااااااااااااااااطره التكلمه .....................

[°•ஐ piNk ♥ DrEaM ஐ•°]

اشكركم على الرد للكل



الجز الثـــــــــــاني عشــر


الفصــــــــل الأول




شيماء تقترب من خالد: I can` t believe it .. انت هني..

خالد بارتباك: هلا هلا شيماء شخبارج

شيماء: تمام الحمد لله... انت شخبارك

خالد: عايشين .. الا بالكويت ..

شيماء تغيرت ملامحها وانقلبت الى الحزن: لو بس تدري يا خالد ..things changed since you

gone and it never came back to it origin

خالد: خير عسى ما شر..

شيماء وعيونها تدمع: ندى يا خالد ... ندى تعاني من اللوكيميا..


خالد انصدم .. حس بالشلل يعم بدنه .. ندى مريضه .. وباللوكيميا.. من متى


خالد: من متى...

شيماء ببجي: من قبل لا تتفارجون بس اهي ماكانت تدري.. كان وياها بس ما تحس فيه ليما ياتها نوبه قويه

يوم كنا بايطاليا.. اول شي ظلت في مستشفى ويست منستر .. بس اهي بغت اتيي الكويت.. عشان .. تكون

جريبه منك ..


خالد حس بالموت... ندى مريضه .. ومرض جايد بعد .. ليش جذي.. هل هذا عقاب الله فيها .. ولا عقابه

فيها .. بس كل شي مقبول . الا ان ندى تموت .. حرام تموت



خالد : وينها اللحين

شيماء: غرفه العنايه الفائقه .. تعال وياي



خالد تردد بس راح ويا شيماء وشريط الذكريات يمر بذاكرته .. ندى وياه بلندن .. بالمحاظرات .. بالشانزلييه


بفرنسا .. بروما وباليرمو .. يوم كانو بفينيسيا.. بهاذا الخبر نسى قمر تماما ولا طرت على باله .. حس نفسه


رد خالد الاولي.. خالد المحطم؟. إلى يحب ندى واللي يتالم لفراقها.. كاهو افترق عنها بالجسد وبالروح

بعد ...



اول ما دخلت شيماء قامت حرمه انجليزيه ظهرت بالاخر انها ام ندى... ندى كانت مغمضه عيونها وشكلها

ماساه .. مبيض الويه من بعد ماكان مورد .. وزنها كله راح وصارت جلد على عظم.. حس بنفسه راح يغشى

عليه .. صرخ كل ودج بجسمه بكلمه لااااااااااا...



راح قعد يمها .. يطالعها بعيون دامعه.. الاجهزة منتشرة بكل مكان .. وصوت دقاتها تقتل الصمت .. مسك

يدها حسها بارده .. ضمها بيدينه الثنتين عشان تدفى.. ندى حست ان احد يمسك يدها وفتحت عيونها .. ما

صدقت اللي تشوفه جدامها .. تحلم ولا صج .. خالد قاعد يمها .. ماسك بيدها .. ويناظرها ... تمت تطالعه


ودموعها جريان على خدودها . . شيماء سحبت ام ندى وطلعت وياها وصارت ندى لحالها ويا خالد




ندى بصعوبه: ....... مااصدق...... انك هني ......... حبيبي


خالد نزل راسه يخبي دموعه .. الموقف اكبر منه ...


ندى: ..... ييت الكويت.. بس عشان اكون وياك ....

خالد بحرقه قلب: بس يا ندى... لا تتكلمي .... مو زين لج

ندى تبتسم ابتسامه ذابله: ........ بالعكس... انا كنت مريضه.. من السكوت.. والحين احس روحي بخير..

وانا اتكلم وياك ... وينك عني من زمااااان

خالد: ما كنت ادري.. توني شايف شيماء عند اللوبي وما كنت ادري..


ندى: شتسوي هني

خالد نسى السبب اللي خلاه يدخل المستشفى.. نزل عيونه وشاف خاتمه وتذكر قمر.... يااااااااااه قمر .... انا

شلون نسيتها .... ترك يد ندى وتباعد عنها شوي و كانها بجيستها بتحرقه .. ندى حست ان خالد تغير

فجأة ...



ندى باستغراب: .... علامك

خالد بارتباك: لا..... ولا شي.... سلامتج

ندى: عيل ليش تركت يدي ..........(وكانها تتذكر شي) اااااااه ..... قمر


مارد بس ظل يطالعها بنظرة غير مفهومه...


ندى تبتسم بالم: .... نسيت اني الفصل المنتهي بحياتك.. و أني الانسانه اللي ما تحبها وكرهتها ...


(سكتت ندى وظلت تبجي في هدوء)


خالد تلوم على نفسه من اللي يصير ويا ندى.. ونسى قمر ورد لندى يمسكها بيدها


خالد: لا تقولين جذي.. أنتي الخير والبركة .. انسي اللي قلت لج إياه بإيطاليا.. كان طالع مني .... بغير

قصد..


ندى: ..... عشانها اهي ......... انت قلت اللي قلته ... قل لي خالد .... للحين انتوا ويا بعض


خالد: ......... ايه

ندى: ............. و بديت تحبها اكثر مني


خالد سكت لان كلام ندى صح بس ما يبي يألمها .. اهو يحب قمر اكثر من الدنيا كلها .. بس بعد يحب ندى...


مهما صار.. اهي يوم من الأيام كانت الدنيا والعالم بالنسبة له


ندى: ... اااه .. فهمت... السكوت علامه الرضا..يعني انت تحبها..

خالد بنظرة حازمه وجاده: ايه .. قمر زوجتي يا ندى ...

ندى تمت تطالعه..واهو القى القنبله عليها: .. وان شالله عن جريب ام عيالي بعد..


ندى انصدمت... قمر حامل... من خالد...


بغباء شديد: حااااامل........ منك؟

خالد: اكيد مني .. حرمتي اهي


ندى رد الحقد بقلبها..سلبته منها وبعد تحمل ولده او بنته.. والله الا الته عيشتج وانا على فراش المرض...


بدت تبجي ندى وعيونها مفتوحه على وسعن .. كانن دمعات قهر .. وحسد .. والغيرة إلى تنهش في لحمها ..

ليش كل شي يصيبني انا ما يصيبها اهي .. ليش ما تموت .. ليش ما تموت..


ندى: ........ الف مبروك ....

خالد: الله يبارك في حياتج ....


سكت خالد عن ندى وحس انه لازم يطلع اللحين لانه تاخر على قمر ..


خالد: يالله ندى.. انا بمشي اللحين

بس قام مسكته من يده: تكفى خالد ..... لا تخليني لحالي... خلك ويا

خالد خل يده منها بهدوء.. ابتسم لها : بزورج عن جريب ان شالله .. اللحين مضطر اروح يا ندى ..

ندى بحزن: عشان تروح لها ...

خالد: ....... ايه ..

ندى لفت ويهها عنه: روح خلاص.... ماابيك تكون وياي.. روح لها

خالد استسلم : ... عن اذنج .. اشوفج على خير


ما ردت عليه ندى .. تنهد وطلع من الروم وشيماء وامها يطالعونه... اول ما دخلت شيماء راحت لعند ندى


شيماء: شصار

ندى بحقد: الحقيرة..... الحراميه .... حامل منه....

شيماء: منو.... قمر

ندى : ومن غيرها ... الحقيرة ...

شيماء: بس اهي زوجته .. ولازم تكون حامل منه ..

ندى: شيماء... ابيج تتصلين في سيف العثماني.. خليه ايي الكويت باسرع وقت ممكن

شيماء: يمكن ما يقدر

ندى: قوليله السالفه تخص خالد .. وراح ايي لج باسرع ما يكون..


شيماء حست ان ندى تخطط لشي.. وشي جايد بعد .. بس ياربي لاتطيحنا بورطه ويا خالد وسيف.. لان

شيماء بصراحه تخاف من خالد بن ظاحي



رد خالد لغرفه قمر وقبل لا يدش سحب نفس قوي ودخل.. شاف مريم قاعده ويا قمر وجاسم بعد..


قمر: صيفت ... وين رحت

خالد: هاا... ولا مكان .. رحت ادور الدكتور ما لقيته

جاسم: الدكتور توه كان هني ...

خالد بارتباك: صج ... وانا رحت ادوره ...


جاسم حس ان خالد شوي مرتبك ومتغير.. وين راح ..


خالد: انزين شقال

جاسم: نقدر نردها وقت مانبي.. بس لازم نخليها ترتاح .. (يصد لقمر) سمعتي..اكلي وارتاحي ولا تعورين

راسج باشياء مالها معنى..

مريم: انزين جاسم توه محاضرتك مخلصه علينا .. بعد بتعيدها؟

جاسم: انظر من عاد الى ارض الاحياء.. جان نسيتي لسانج هناك

مريم: الا ماتقدر ما تسمع حسه يعلني فداه يا ربي..


ضحك جاسم وقمر على رده مريم الا خالد اللي كان مشغول البال .. راح لعنده جاسم يكلمه


جام: حوووووووووو خالد وين رحت

خالد:ها... لا ولاشي.. يالله نرد البيت احسن لنا من هني ..


قمر تطالع خالد بعيون مستغربه.. علامه خالد؟ حيل مو طبيعي.. مادري شايف منو ولا من قال له شي

وكدره.. خالد انتبه لنظرات قمر .. اكيد حست بشي .. قمر ذكيه بطبعها وخبرت طبعي بايطاليا .. وتعرف اني

انشغل ليما افر بندى.. لذا ابتسم لها بنعومه واهي ردت الابتسام بس الخوف اللي في قلبها .. هيهات

يهدى..

وجذي انتهت سعاده خالد بمولوده اليديد وكاهي الأحزان تبدى تخيم على حياته من يد ويديد من بعد ما حاول

المستحيل وحارب اشياء وايد عشان يلقى اللي عنده...



على يومين خبر حمل قمر انتشر على طول العايله حتى الرميثيه وين ما سعود واهله يسكنون .. طبعا مو

مريم اللي خبرتهم وانما جاسم لان مريم من بعد وفاه وضحه عافت الزواج وسعود عشان تربي عيال خليل

وتخليهم يحسون بحنان الامومه .. الكل رفض هاذا الشي اللي قاعدة تسويه بس بو خليل قال اللي يريحها

تسويه ومحد بيجربها على شي.. ومن جذي السالفه تسكرت وسعود استوى معلق ما يدري عن اللي يصير

بحياة مريم غير اانها ما ترد عليه ولا يعرف اخبارها الا من جاسم...



خالد من جهة ثانية ما تغيرت معاملته لقمر على الرغم من انشغال باله على اللي يصير ويا ندى..

واستعدادات قمر للبيبي الياي بطيئة نوعا ما لانها ما تبي تستعيل.. اهي وخالد فرحانين حيل من الموضوع

وشوي شوي نست سبب موت وضحه وتمت تدعي بالشفا والسهاله بالولاده لنفسها.. مريم منشغلة بعيال


خليل لدرجة انها ما ردت للجامعة.. نوفة ومروة استغربوا هاذا الشي لانهم يعرفون شكثر مريم تهتم

لموضوع الدراسه .. من طرف ثاني شيخه دخلت الجامعة مع اختها نورة اللي من وفاة وضحة واهي

متغيرة .. ما تتكلم وايد ولا تتصل في نوفة بنت خالتها عشان ما تسمع أي اخبار تحزنها مع انها يوم عرفت


ان قمر حامل فرحت من خاطر .. شيخه الصغيرة بدت تتغير شوي شوي .. ومن بعد ذيج الليلة مع طلال


تغيرت مشاعرها وتصرفاتها وايد وشوي شوي تستوي بنت مسؤولة مع ان الرباشة ظلت وياها..

ناصر من طرف ثاني بدى يشتغل ويا ابوه وعمامه بتجارتهم ووكالات السيارات اللي عندهم.. يبيع ويشتري

بالسيايير.. طلال راح كليه الشرطه وترك الشركه الا انه يروحه من وقت لوقت.. روح خليل الفكاهية ترد

شوي شوي وكل وقته يقظيه بين العيال والشغل.. طلب من امه انها تسكر داره ويا وضحه وظل يرقد بدار

العيال .. جاسم ولولوة ظلوا متمسكين ببعض ومقررين يملجون بعد ما تمر 6 شهور على وفاه وضحه والكل

موافق على هذا الشي.. صبحه وعبيد من بعد 3 شهور من وفاه وضحه تزوجوا وطلعوا من الجهراء

وسكنوا بالرميثية عشان خاطر صبحه ..


ومع كل هذي الاحدااااااث مرت اطول 6 شهور بحياة البن ظاحي من بعد المأساة الكبيرة وفاه وضحه ...


بس الحياه استمرت عندهم .. استعدادا لاحداث اكثر خشونه الوقع ...


بدى الفصل الدراسي الثاني .. وكان الوقت ظهر بيوم الاربعاء اخر يوم دوام بالاسبوع.. شيخه كانت تحس

بالمرض من ايام بس ما تكلمت ولا قالت للبيت حست انها الام عاديه نتيجة اكل ما مشى ببطنها .. كانت تتالم

[°•ஐ piNk ♥ DrEaM ஐ•°]

وتبي ترد البيت بسرعه.. راحت عند احد صديقاتها .. فاطمة..

اول ما وصلت شيخه لارفيجاتها




فاطمـــــة: شيخو والله اليوم ما عندي سنكرز زياده ما عندي الا هاذا

شيخه واهي تمغص: انتي من صجج ويا خشمج هذا ماابي سنكرز يلعن يومه من سنكرز اكيد اهو اللي ما

غصني جذي

قامت لها شمس وفاطمه: علامج شيخو يعورج شي..

شيخه: أي بطني يعورني من ايام ولا ادري من شنو

فاطمه: تبين تروحين عند الممرضه

شيخه: لا ابي ارد البيت من منكن تقدر تردني البيت

شمس: انا عندي محاظرة بعد ربع ساعه..

فاطمه: انا وياها ... روحي عند الممرضه ولين خلصت المحاظرة بنرد لج شرايج

شيخه: لا فالج مو ظيب برد البيت باي طريقه

فاطمه: شنو أي طريقه ان عرف اخوج انج طالعه ويا بنات غيرنا بيقص رقبتج..

شيخه: والله خله يقصها ويبط هالبطن مرة وحده والله اتعذب انا على حساب اخوي الفاضي.. يالله باي


شمس: شبتسوين

شيخه: والله ماادري... يالله باي


بعد ماراحت شيخه عن البنات


فاطمه: مينونه هاذي تسوي أي شي.. تخلي حتى السكورتي يوصلها البيت

شمس: طبي لسانج هاذي شيخه المصباح ما تنزل نفسها لاحد علبالج مثل بعض الناس

فاطمه: عدال عدال اهي بعد ارفيجتي بس انا اعرف حق شيخو..

شمس: باين ماعرفتي شي

فاطمه: اثرينا بسكاتج ...




شيخه قعدت عند أحد الكراسي اللي بالجامعة واهي مغطية ويهها عن الشمس ولا أحد يشوف ويهها

المتعور.. تبي تفكر بأي شي يقلل الألم بس ما قدرت.. قعدت تتذكر طلال يمكن يخف الألم .. لكن لا ..

كل ما تذكره قلبها يدق بقوة ويزيد عليها العوار.. منبعد ذيج الليله ما لها حال.. اربع وعشرين ساعه يم المسجل

والاغاني قايمه .. حتى الاغاني إلى كانت تسميها تعبانه تسمع لها .. من أيام أخوها ناصر عطاها تلفون

وبطاقة كهدية على تفوقها بأول فصل جامعي.. تفكر تتصل فيه ايي ياخذها لكن اهو مشغول ..وقته اللحين

بنص الدوام.. ماكو الا ابوي . . واتصلت عليه بالمكتب



بو ناصر: الو

شيخه: شهالالو الكشخه مااقدر انا .. خلاص حبيتك

بو ناصر بضحكه: ها خبله .. الا متصله فيني اليوم اكيد طريت على بالج

شيخه: انت دوم بالبال يوبا.. يوبا حبيبي.. انا تعبانه بالجامعه وابي اسالك ان تقدر تردني البيت..

بو ناصر: سلامتج ماتشوفين شر وبابوه وينه

شيخه: بابوه ماخذ امي تتحوط بالسوق ويا ام سيف (حرمه عمها)

بو ناصر: انا ما عندي سيارة خبرج من يوم طيحتي بابو اللي ياخذني ويردني .. جربي ناصر

شيخة: مو مشغول يعني

بو ناصر: حتى لو يفضي نفسه لج انتي الغالية شواخي حبيبتي ..

شيخة: انت حجتي بتصل فيه وان ناجرني ادزه عليك

بو ناصر: اوووف بسج حجي واتصلي فيه ..

شيخه: انزين انزين لا تعصب يالشيبه .. احلى شيبه والله ابو الحلول

بو ناصر: يالله عن الحجي الزايد ....

شيخه: انزين عاد والله انك مصباح .. باي

بو ناصر: في امان الله



سكرت شيخه عن ابوها وتوها بتتصل في اخوها الا تييها نوبه ببطنه خلتها تفقد توازنها وتمسك الكرسي من

الالم .. شنو هذا مغص عجيب والله ... بس وايد يالمني .. قوت نفسها ودقت على تلفون ناصر ...


ناصر: هلا شواخي .. فاضيه ماكو شغل

شيخه واهي تتالم: ناصر... الحقني تعبانه بموت ... بطني يعورني ..

ناصر بفزع: بعد عيني شواخ وينج اللحين

شيخه: بالجامعه.. تعال ناصر تكفى والله بموت..

ناصر: سلامتج ما بيصير فيج شي.. اللحين بييج ..


سكر ناصر عن شيخه وقلبه مفزوع على اخته .. قام طلع من المكتب الا طلال بويهه ..


ناصر بمفاجاه: طلووووووووووووووول

طلال يبتسم: هلا بو بدر ..


توايهو وتحاظنوا .. وناصر نسى سالفه شيخه


ناصر: انت خسيس تدري


طلال يبتسم : ادري


ناصر: انت مو بس خسيس الا انك بقمه الخساسه .. 6 شهور يالظالم مااسمع عنك شي.. وين قلت الخيرة يا بو نواف ..


طلال: لا يا ناصر والله انت بالقلب قبل العين بس مشاغل الدنيا وانا انضميت للشرطه من جم من شهر

وانشغلت بالدورات وغيره ..


ناصر: ايييه.. والله دنيا.. شخبارك بعد


طلال يتنهد: ااااااااااه ... بخير ان استثنيت روحي المتعذبه وقلبي المنكوي.


ناصر يربت على جتف طلال: هونها واتهون.. مالهمش بالطيب


طلال: يا قلبي ياطيب.. الا وين رايح مسرع




ناصر تذكر: اااااااااااه نسيت .. شواخ حبيبتي متصله فيني تعبانه بالجامعه


طلال من انذكر اسم شيخه تذكر الليالي اللي انحرم من النوم واهو يفكر فيها: سلامتها الشيخه عسى ما شر


ناصر: ماادري جايد عليها بطنها وبروح اخذها ... تخاويني


طلال بغى يروح بس : لا ما بروح اخاف ما تاخذ راحتها وياي ..


ناصر: بالعكس ابيك اتيي وياي لاني شوي مشغول يمكن اقطها المستشفى وانت تظل وياها.. ليما تخلص ..


مااحب تقعد بمكان لحالها ..


طلال تردد لكن: اوكيه بس ابيك ترد لنا لان ما عندي سيارة انا هني بالنزهة ويا الربع وراحوا عني..


ناصر: افا عليك فالك طيب يا بن ظاحي ..



وراحوا ناصر وطلال لشيخه اللي حالتها كل ما اايي لها تنقلب من سيئ الى أسوء واهي تمشي عشان يخف


الالم عليها .. يوم وصل ناصر لعند باب الجامعه ما شاف احد .. اتصل فيها


شيخه: ها ناصر وصلت


ناصر: أي انا هني وينج انتي..


شيخة: كاني ... اللحين يايتك..


ناصر: اوكيه ..


سكر عنها ...


طلال: وينها ..


ناصر بخوف: بتي اللحين .. ماادري اشفيها .. أهي صج ما تاكل شي من ايام بس شكلها وايد تعبت اليوم..



طلال: خير ان شالله ..


ناصر: الله يسمع منك ..



وعلى اخر كلمه التفت طلال من الدريشه وشاف وكانه خيال شيخه .. تاكد لان ناصر طلع لها .. قعد يتكلم


وياها بجم كلمه واهو يمسكها بحنان خلاه يشتاق لنوفو ومرووو .. من زمان ما شافهن..


ناصر: علامج حبيبتي شواخ فيج شي


شيخه تمسك بيد ناصر: نصور جبدي شابه علي ماادري اشفيني لايكون بموت توني شباب


ناصر: ههههههه الله يهداج يمكن حارج ولا شي بس وقلتي بتموتين ..


شيخه: لا نصور السالفه جايده مااقدر ... والله احس روحي بختنق من كثر العوار


ناصر يخفف دمه: انزين ما رحتي الحمام شي ماشيات


شيخه: اووووووووووه نصور حلاتك والله حزتك هاذي تستخف بدمك


ناصر:ههههههههههههههههههههههههههههههههههههههه يالله جدامي ..



راحت شيخه تفتح الباب الجدماني ولانه عليه معتم ما شافت اللي قاعد اول ما فتحت االباب انصدمت


بطلال.. وظلت تطالعه بالجيب لكزس.. طلال بعد يطالعها..



ناصر: اوووووووووووه يالخيبه ما قلت لج طلول هني ويانا ..



شيخه ما تكلمت لان ويهها شب ضو والالم زاد عليها وراحت يلست بالكرسي الوراني .. طلال بعد صخ مرة

[°•ஐ piNk ♥ DrEaM ஐ•°]

وحده ولا تكلم .. ناصر ركب من بعدها واهو يمسك جنطتها اللي حذفتها عليه .. ما تدري شلون تتكلم


اللحين.. اهي متعوده تثرثر ويا نصور بالسيارة واللحين طلال هني يعني نو واي..



طلال قطع الصمت: شخبارج شواخ ان شالله زينه ..

شيخه: تمام .. وانت



طلال استغرب من شيخه وكانها مو شيخه: الحمد لله الله يسلمج ...



صخوا اثنيناتهم وناصر مستغرب من شيخه .. عاده تكون هيله بالسيارة بس لايكون مستحيه من طلال ..


يحليلها اختيه والله ..



شيخه العوار زاد فيها ومن زوده طلعت ااه مسموعه..


ناصر: علامج شيخو


شيخه: مااقدر ناصر... شابه علي معدتي ما ادري مصاريني .. ماادري حالتي .. قطوني باي مستشفى..




ناصر: اوكيه .. انتي بس طولي بالج .. انا قلت لج جان رحتي مكان ما مكان



شيخه بعصبيه: يووووووووووز نصور والله ما عندي بارض لكلامك ..


طلال: على قوله هل الامارات هب متفيجه


شيخه: انطم انت الثاني ادري فيكم مستانسين علي


ناصر اهني انفجر من الضحك: ههههههههههههههههههههههههههههه جانزين بس اشوف شكلك من


تحت الغشوة.. ههههههههههههههههههه جنان مو.


شيخه: عساك جنون ما منه جنون...

طلال: يالله ناصر خل شيخه عنك ..

ناصر: ان شالله ...


شيخه استغربت من طلال .. يناجر ناصر عشانها ..


وصلوا المستشفى وطلع في شيخة دوده الزايده ..



شيخه: ياحسرة عمري اكو دود ببطني

ناصر:ههههههه يالخبله عادي كلنا فينا ..

شيخه: من متى فيني هالدود والله ماادري عن عمري .. يع تفكر اني كنت اكل والدود ببطني لوعه

ناصر: يالله عاد بلا مياعه بيستاصلونها منج ولا بيصير فيج شي

شيخه: شلون يستااصلونها

ناصر بتخويف: بعمليه شق بطن

شيخه: ياحسره عمري عليج يا شيخه .. دود وعمليات.. انتي شسويتي بحياتج

ناصر:هههههههههههه شيخه ههههههههههههههههههههههههه

شيخه تطالعه باحتقار: مستانس على عمرك يالكريه مو.. لكن صدقني ان مت ما بوصي بشي لك كل شي

لنورة .. ويمكن طلال بعد ..


ناصر: افا عليج حبيبتي انتي ما بتموتين ان متي انتي انا من لي غيرج يام السان

شيخه بدت تبجي: نصور خايفه

ناصر: تخافين وانا وياج .. افا يا بنت بدر قويه بحقي

شيخه لمت اخوها: لا تروح نصور عني .. لين بموت بموت بحظنك

ناصر:هههههههههههه ردينا على الموت اقلج ما بيصير فيج شي

شيخه : والله بيصير فيني شي.. أحس جذي.. ترى وصيتي بتاز (ارنب) لا تذبحونه وتاكلونه ادري بامي

مطافق ما تبي ارنب الا تفكر بالمجابيش.. ان مت هدوه بالشارع.. بس يمكن تصدمه سيارة.. بس خل نورة

تربيه ولا تورونه مشاريو يخاف منه ..


ناصر:ههههههههههههههههههههه يا شيخه

شيخه: واللاب توب اللي شراه ابوي عطه حق نورة لانها تبي واحد بدال كمبيوترها..

ناصر: ههههههههههههههههههه وانا

شيخه: انت شنو... ما عندي اغراض حق الصبيان..


وتمت تبجي شيخه وناصر يضحك ويهدي فيها ..


يه لهم الدكتور وقال لها انها بتخضع لعمليه بعد يومين .. أي يوم السبت.. ويبونها ما تاكل الا الاشياء

الباردة.. ظل الدكتور يكلمها وناصر طلع لان عنده موعد بعد نص ساعه ويا حموله سيايير يديده ..



طلال: وين رايح

ناصر: بروح ويا بابوه اللحين بييني وانت خل عندك الجيب .. عشان تاخذ شيخوه تردها البيت...



طلال دق قلبه: بس انا مادل بيتكم

ناصر: شفايده شيخو عيل.. اهي بتدلك ..

طلال: انزين ..

ناصر دق تلفونه: كاهو بابو .. يالله بامان الله

طلال: في حفظ الرحمن ...




راح ناصر عن طلال اللي ظل ويا شيخه .. شيخه ظلت لمده نص ساعه زياده عشان تهدى شوي الالام اللي


فيها بالدوى.. يوم صارت احسن طلعت من الحجرة تشوف ناصر.. طلال كان يشرب ماي .. يوم شافته وقفت

تطالعه.. كان بروحه .. وين راح ناصر؟؟


بس رفع طلال راسه شاف شيخه واقفه تطالعه .. راح لعندها..



طلال: خطاج السو يا شيخه المصابيح

شيخه: خطاك اللاش.. وينه ناصر

طلال: راح المكتب عنده شغل .. وانا اللي بردج البيت..


شيخه دق قلبها.. بروحي و يا طلال.. يالخيبه بستخف .باجي عقلي بيروح بهالوقت اللي بظل وياه:

انزين ..يالله نمشي..



طلال: سرينا..



مشى طلال جدامها واهي وراه واهي متونسه حيل على السالفه .. الناس يطالعونهم وكانهم ريل وحرمته


واهي عجبتها السالفه ولوما الطعم المر اللي بحلجها والالم الخفيف جان اهي اللحين عال العال.. بالسيارة


كانت يدها بالاشرطه شريط ورى شريط .. ليما وقفت على شريط حق راشد المايد .. تشغلت اغنيه حبكم وسط

الحشا سادي.. وخلتها.. بالصدفه طلعت هاذي الاغنيه المفضله عند طلال وظل يغني ويا راشد المايد ..


شيخه تطالعه من تحت الغشوى .. تطالع يده وملامحه .. غرشوب والله .. وعيونه ما تبان لانها تحت

النظارة .. بس وايد وسيم .. هنيا للي بتاخذك .. كرهت هالصمت اللي امبيناتهم وبدت هذرة



شيخه: ها طلال.. ناوي على الناس داخل الشرطه

طلال:هههههههههههه لا والله نيتي صافيه وانا دخلت حبا بالشي..

شيخه: الا اقول يا خسارة الكويت بيدك .. شرطي شنو مرور ولا شرطه عاديه

طلال: تو الناس . اصلا انا ما بظل شرطي بدرس اصير ضابط سلامه ولا غيره ولا بمكافحه المخدرات

شيخه : عيل ان صرت مدمنه بتجكني

طلال: الا اليخ العقال عليج ..

شيخه: مااكبر عليك عقد ... تليخني بالعقال شنو تيسه ولاادري

طلال:ههههههههههههههههههه اصلا ماكو تيسه .. اكو بقرة

شيخه بحاجب مرفوع: والله..

طلال واهو متونس على الجو: ايه .. مثل ما الحمار ماكو شي اسمه حمارة اكو شي اسمه اتان الحمار ..

شيخه: بعد

طلال: ايه .ههههه شفيج مو مصدقتني

شيخه بنص عيون: لا يكون بس تقصدني بالكلام..

طلال: ههههههههههههههههه يا شيخه اللبيب بالاشارة يفهم

شيخه: هههاااااااااااااااااااااااااا

طلال:ههههههههههههههههههههههههههههههههههههههههههههه ههه


سكت عنها واهي بعد سكتت عنه.. وايد يتلاعب بالحجي اوريه لكن


طلال: اشفيج رخيتي الرجاب وقعديتها..

شيخه مافهمت شقصده: لا بس افكر باللي انوعدت فيه لا تحقق لي شي ..

طلال: شنو

شيخه: اكو واحد .. يسمي نفسه اصيل لكن وعوده وعود هنود مو عرب..

طلال فهم شقصدها: انتي امري وانا تحت الطلب

شيخه: اللحين .. ِشرايك


طلال: اللحين ... مااقدر انتي اليوم امانه يوم اللي تستاذنين من ناصر انا اخذج وين ماتبين انتي ونورة

شيخه: امحق .. نورو بالسالفه يعني 50 50 .. انا ابي فول 100

طلال: ههههههههههههههههههههههههه اسف يا عزيزتي خبري اخوج قبل

شيخه: يالبخيل .. اطلع على حقيقتك

طلال: الحمد لله ما قلت شي هههههههههههههههههه

شيخه: أي والله مغشوش انت..

طلال: والنعم فيني حلاتي والله ( كان يقلد على كلامها بهالجمله )

شيخه: وييييييييييه صج ما تعرف تقلد .. اقبض السكان ووقفني عند محل بريد محترم..

طلال: توه بطنج يعورج تبين بريد؟

شيخه: الدكتور يقل لي البريد زين ..

طلال: شهالدكتور الكشخه

شيخه: والله شيخه المزايين شلون على دكتورها بعد ..

طلال:هههههههههههههههه أي والله..



دخل السوق وياها وراح عند راعي البريد .. شرى لها بريد من كل الانواع كاكاو فراوله ومانجو وحتى

فانيلا.. عطاها الجيس وقبل لا يدخل السيارة وقفه واحد من الشباب اسمه فواز



فواز: اهلا بطلال بن ظاحي .. وينك يا اخينا عنا وحشتنا

طلال: كاني بالدنيا انتو وينكم ..

فواز : والله زين مني شفتك عشان اعزمك على عرس مشاري ارفيج سيف بعد جم يوم

طلال: يمكن مااقدر ايي لاني باجر برد الجهراء..

فواز : حاول انزين ... (يطالع السيارة) شعنده بالمعتم .. لا يكون حرمتك بس داخل

طلال: هاا... ايه حرمتي بالداخل ..

فواز: عرست طلال..



طلال تورط. شقول له.. بنت خالتي وياي .. فوازو مخه وصخ وبيفهم السالفه غلط: ايه حرمتي تزوجتها قبل

شهرين ..


فواز: الف مبروك بو نواف الف مبروك .. منك المال ومنها العيال..

طلال: الله يخليك .. يالله من رخصتك بو راشد..

فواز: خلنا نشوفك

طلال: ان شالله مع السلامه



دخل طلال السيارة ولا يدري ان شيخه سمعت اللي قاله كله لارفيجه.. ليش طلال قال عنها انها حرمته .. هل


اهو يفكر فيها بنفس الطريقه إللي اهي تفكر فيه .. يا ربي لو بس يحس فيني طلال بيذبحني ناصر.. دخل


طلال واهو متلوم على عمره ليش قال جذي. فواز يعرف ناصر بعد وان قال له ناصر بيستغرب الشي اللي


طلع مني .. والله حاله كله من شيخو . لو ما انها تبي بريد جان اللحين انا ما انحطيت بهالموقف البايخ ..


وطول الدرب واهم صاخين واخيرا وصلوا ..



شيخه قبل لاتطلع: ما بتدخل


طلال: بسلم على خالتيه دقيقه وبدق على احد الربع ايون ياخذوني .. خذي مفتاح السيارة



مدت شيخه يدها وطلال عطاها المفتااح... طلع من السيارة واهي بعد .. دخل داخل البيت وياها يسلم على


خالته..


ام ناصر كانت قاعده بالعريش: هلا والله بطلال


طلال راح لخالته: هلا والله بام ناصر الغاليه .. شلونج



ام ناصر: ابخير الله يسلمك انت شخبارك ويا بيتكم


طلال: الحمد لله ابخير يسلمون عليكم .. وينكم قطعتونا من بعد الغاليه



ام ناصر ذكرت وضحه وحزنت: ايه الله يرحمها والله يا وليدي مشاغل الدنيا.. بس ان شالله بنكون عندكم بعد


جم يوم .. (تصد لشيخه) ها يمه ان شالله احسن


شيخه: يمه أي احسن بسوون لي عمليه



ام ناصر: قال لي ناصر..خير يا بنيتي ما بيصير فيج شي.. مشاري زوج اختج صابه إلى صابج وسوى


العمليه ..


شيخه: انا هذا لا تييبين لي طاريه فاله شين علي..


ام ناصر: طبي لسانج يالمايعه والله انج ما تنعطين ويه ..محاربه هالريال على شنو محد يدري


شيخه: لانه خال ومصدق روحه


ام ناصر: ثمي السانج .. هاذي مريضه وجذي


طلال:ههههههههههه يالله خالتي عن اذنج ..


ام ناصر: وين رايح .. خلك ويانا تعشى



طلال: مشكورة خالتي بس باجر الصبح برد الجهراء وانا هني ويا ربعي.. مرة ثانيه ان شالله


ام ناصر: ان شالله ..سلم لي على الكل هناك وبالخصوص قمور


طلال: يوصل خالتي .. يالله برخصتكم ..


ام ناصر تقوم واهي تحمل الدلال: مرخوص ياوليدي در بالك على حالك .. دخلت ام ناصر وظل طلال ويا

شيخه .. يبي يطلع بس ما يطيع قلبه .. يبي يشوف ويهها الحسن مرة ثالثه .. مع انه مطبوع بباله بس يبي يشوفها ..


طلال: يالله في امان الله


شيخه بكل نعومه: في وداعه الله ..



راحت وياه لعند الباب واهي تخاويه بالطلعه .. وكانه من صج حرمته .. قبل لا يطلع التفت لها



طلال: شيخه

شيخه وقلبها يدق: عيونها


طلال: تسلم لي عيونج ... شيخه وريني ويهج قبل لااطلع..



شيخه انصدمت من طلب طلال.. ليش يبي يشوفها قبل لا يطلع.. بس ما ردته وارفعت الغشوى .. وبان الوجه

الصبوحي .. يحليلها والله ...قمر ..غض طلال بعيونه للارض


طلال: يالله . بامان الله ... يالغاليه

شيخه واهو رايح: الله يحفظك .. يالغالي..



بس طلع طلال يو له اصحابه وشالوه وياهم وعيونه ما انشالت عن بيت خالته .. يطالع المستقبل.. الحلم

الجميل.. شيخه اللي بسرعه تغلغلت بحياته ..


شيخه ظلت واقفه مكانها تستعيد اللحظات...لا .. اللي يصير وياها مع طلال له تفسير واحد بس .. الحب ما

غيره ..

[بنت الخير]

مشكوره سارونتي ع التكمله وادعووووووووووووولي باااااااجر اول يوم امتحان الله يستر ياربي
مومستعده عدل للامتحانات ادوعولي

[أمونه]

تسلميييييين غناتي سويره ع التكمله الروعه

قواج الله يالغاليه


ناطرين البااجي


وبنت الخير مووووفقه ان شاء الله

[عاشقــ تويتي ـة]

تسلمين ســااارونتي

الحين بنزل هالجزء وبقراه

^_^