إعـــــــلان

**kaka 22** · 09-11-2006, 07:06 PM

مشكوره يالغلا

ومبين عليها قصه روعه

يلا انا ناطر الجزء الثاني بس لا تطولين

؛)

**^دلوعة فريجنا^** · 09-11-2006, 07:14 PM

kaka22

من عيوني الثنتين <<<< صارت فوزية الدريع لووول

ان شاء الله راح اكملها

وتسلم عالمرور

**kaka 22** · 09-11-2006, 07:18 PM

لوووول

يلا انا ناطر يا عيوني :p

**^دلوعة فريجنا^** · 09-12-2006, 12:50 AM

الجزء الثاني

دخل محمد البيت وشاف أمه وأبوه في الصاله سلم عليهم وقعد معاهم
أم خالد: فديتك ..اليوم الغدا مب حلو من غيرك
بوخالد: ايه طبعا..لوأنا اللي مب موجود ماسويتي لي أهميه
أم خالد: حد يغار من ولده؟!
محمد: الله لايخليني منج ياأحلى أم..يبه شفيك خلها تدلعني شوي طول عمرها وهي تدلعك..
بوخالد: تزوج وخل مرتك تدلعك..أنا ماصدقت أفتك من خلود
أم محمد ومحمد ضحكوا..
محمد سأل أمه عن الجيران ومن كلام أمه عرف اتها بتزورهم اليوم

في بيت أم مشعل..
مها: يمه لاتنسين بيت جيراننا بيزوروننا اليوم
أمها: والله انهم متفرغين..تونا ساكنين
مها: يمه احنا من يومين ساكنين وفيهم الخير اللي بيجون.. في هالوقت الناس صارت تستثقل حتى الزياره
أمها: زين وصي الشغاله على الشاي والقهوه
مها: ان شاء الله

في هالوقت رن جرس بيت بومحمد.. راح محمد فتح الباب شاف أخوه خالد وبنته نور (ست سنوات) "محمد يموت فيها وهي تحبه وايد لأنه حنون"
استانس محمد ولمها ونسى اخوه اللي واقف ينتظره
خالد: عليكم السلام اخوي
محمد: هلا خالد.. اسمح لي فديتك .. ما انلام شفت نورالدنيا
الا وين حمد؟
خالد: خليته مع أمه في البيت ..حرارته مرتفعه ومارقد أمس
محمد: فديته مايشوف شر

وطلعت أم خالد بعد المغرب وخذت معاها نور.. فتحت لهم الخدامه وفي الصاله كانت مها تنتظرهم
سلمت أم خالد على مها اللي دخلت قلبها علطول من ترحيبها فيها وفي نور اللي تمت متعلقه فيها
شوي ودخلت أم مشعل عليهم.. وطبعا أم خالد ماشافت عنود اللي ماتحب لاتوجب ولاتجامل

وبعد ماخلصت زيارة أم خالد .. قعدت مها مع أمها تسولف
مها: ماشاء الله عليها يمه .. حليوه وحبوبه والا بنت ولدها شحلاتها ويازين سوالفها
أم مها: ايه..ماتوقعتها هالشكل..أنا باروح أنام الحين ..راسي يعورني (مع انه الساعه ماعدت 8.. بس أمها دايما هالشكل ماتحب سوالف مها لأنها تشبه المرحوم ابوها..امها كانت تتضايق لأن مها وابوها على قلب واحد!!!!!..)

مها تضايقت ..تذكرت ابوها.. اللي كان مايرضى عليها ويهتم فيها..ويحب قعدتها وايد..
دخل راشد الصاله..أول ماشاف مها حس انه فيها شي..قعد يستعبط عليها وينكت لين شاف ابتسامتها (ماسألها عن شي لأنه يدري انه أمهم سبب هالضيقه)

الجزء الثالث

محمد قاعد مع أمه وابوه يفطرون.. وأمه طول الوقت كانت تسولف عن الجيران وتمدح مها
أمه: عندهم بنت ماشاءالله عليها..جمال وأدب ولو تشوف نواري شلون تعلقت فيها مابغت تقوم من حضنها..
محمد: لايكون هاذي اللي اسمها مها؟
أمه متعجبه: شدراك؟
محمد: نواري جننتني أمس عقب مارجعتوا .. مهاوي ومهاوي طول الوقت..
يقول في خاطره(سرقت نواري مني اللي ماكانت تشتط الا على عمها)
أمه: ايه..وضحكت

في بيت أم مشعل مها تأخرت على محاضرتها(سنه ثانيه جامعه) لأن عنود ماجهزت
مها: يله يا العنود باتأخر
عنود: أنا ماابي أحضر الطابور
مها: وانا شذنبي تأخريني معاج
عنود: ليش ماخليتي الدريول يوصلج ويرجع لي
مها: حرام عليج .. يروح ويرجع مرتين..بعدين جذيه بتتأخرين وايد ويسكرون بوابة المدرسه
دخل عليهم مشعل اللي ماشافوه من يومين..كان مناوب(يشتغل في الشرطه)
وسلموا عليه وعصب على عنود اللي من شافته ركضت لبست عبايتها ..مها تقول في خاطرها(ياليتك جاي من زمان )

أول مااركبوا السياره كان محمد راكب سيارته..شافهم وقال في خاطره( سرقتي نواري وأمي ماتسولف الا عنج..)

والكل راح في طريقه..!

كان يوم حلو بالنسبه حق مها لأنها قدمت زين في امتحانها.. أما بالنسبه حق محمد كان عنده مناوبه العصر..يعني يومه كان طويل..

في بيت أم مشعل..
عنود تحن على راس أمها..
عنود: يمه حتى البنات اللي أصغر مني طلعوا لهم.. وأنا باخلص الثانويه هالسنه .. وبدخل الجامعه .. يعني بحتاج جوال!
أمها: زين حبيبتي .. العصر روحي مع اختج واخذي لج واحد
عنود: فديتج ياأحلى أم..انتي مافيه مثلج

مها تسمعهم وساكته ماتدخلت .. تقول في نفسها (الله يايمه .. أنا مااستلمت الجوال الا بعد ماداومت بالجامعه.. وهاذي بس طلبت وافقتي لها علطول!!!)

عنود: مها العصر بنروح زين
أمها: روحوا كيوتل اللي في السيتي مره وحده علشان تجيبون أغراض للبيت
مها: من بيروح معانا؟ مشعل عنده شغل وراشد بيطلع مع ربعه!
عنود: مها .. الله يخليج لاتعقدينها..الا بنمر كيوتل وبندخل كارفور وبنطلع علطول
مها: يمه اشرايج
أم مها: ماعندي مانع..الله يحفظكم..

العصر طلعوا البنات مع الشغاله.. ومها تنرفزت على عنود اللي كانت مطلعه خصل من شعرها ومتعطره
وكل شوي هزأتها..

ادخلوا السيتي..وراحوا كيوتل قبل..

في هاللحظه محمد كان زهقان في الشغل.. وده يطلع.. رن تلفونه
محمد: هلا عبود
عبدالله: هلا يالقاطع
محمد: قاطع!! أمس شايفك
عبدالله: ايه.. مافيك خير تسأل عني اليوم .. بغيت أدعم
محمد: لااا.. حمدلله على سلامتك
عبدالله: شفيك ماتفهم..أقول لك بغيت مب دعمت علشان تتشكر لي بالسلامه
محمد: عبود.. مب وقته ..أنا في الشغل..بكلمك أول مااخلص
عبدالله: معليه حمود..حسابنا بعدين
محمد: ماادري شمسوي عاد أنا؟!
عبدالله: خلاص كلمني بعدين.. مع السلامه
محمد: مع السلامه

مها وعنود ادخلوا كيوتل وانتظروا رقمهم..وأول ما شافوا رقمهم توجهوا عند الموظف!!

....: هلا أختي .. تفضلي..أي خدمه بغيتي؟
عنود: كرت هلا
....: تفضلي عبي هالورقه وعطيني اياها

الموظف كان يطالعهم وكأنه شايفهم من قبل..

ياترى شسالفة هالموظف ومن هو؟! وليش يوم عرفهم ركز في مها أكثر!!

**^دلوعة فريجنا^** · 09-12-2006, 12:51 AM

التكملة هذي بس عشانك يا kaka22

وان شاء الله تعجبك

**ولـــد الصليبيه** · 09-12-2006, 02:01 AM

والله البدايه تقول أن القصه حلوه

والصراحه شوقتيني حق القصه

يالت لو تكملين القصه حبووبه

ويعطيج العافيه مقدما يالغاليه

:>

**بدوية** · 09-12-2006, 05:19 AM

دلووعه مبين على القصه انها حلووه مثل كاتبتها ياليت تكملينها ننتظر البااجي

**BO_GHAZI** · 09-12-2006, 06:03 AM

قصة حلوة شكرا على

الموضوع

**kaka 22** · 09-12-2006, 04:21 PM

يعطيج العافيه يالغلا
ويلا ناطرين التكمله بس مو تطولين :p

**رووح الانـوثهـ** · 09-12-2006, 04:30 PM

تسلمين عالقصة الحلوة لمزيدج ..

**BO_GHAZI** · 09-12-2006, 04:32 PM

مشكوووووووره اختي على

القصه يعطيج

العافيه

**^دلوعة فريجنا^** · 09-12-2006, 07:27 PM

تسلمون يا قلبي عالردود والمتابعة

وعلى قولت أخوي " ولد الصليبية "

التكملة بعد هذا الرد :)

**^دلوعة فريجنا^** · 09-12-2006, 07:34 PM

الجزء الرابع

الموظف أول ما اكتشف من هم.. تم يطالع مها ويحاول يشوف ملامحها اللي ماكانت واضحه من تحت الشيله
وماعجبته عنود ولا اسلوبها..لأنها وايد فري وتتكلم معاه(أبي رقم حلو.. باين عليك طيب وتساعد.. عاد أنا ما آخذ أي رقم......الخ)

ومها كانت هاديه .. ومب عاجبها اسلوب أختها بس ماقدرت تفشلها جدامه..

خلصوا من كيوتل واطلعوا..
عنود: عرفتي من هذا؟
مها: من يعني؟
عنود: ولد جيراننا اللي كان معانا في السيتي
مها: لايكون ولد أم خالد.. الله يفشلج.. فضحتينا
عنود: ليش شسويت..الرياييل مايجون الا جذيه
مها: كل هذا علشان رقم..!

مها تضايقت وايد من اسلوب اختها.. وتضايقت أكثر لما عرفت انه ولد جيرانهم..

في هاللحظه محمد يكلم نفسه( أنا شاسوي هنيه..ليش مااروح وراها.. بس أبي أشوفها..)
ومن دون تركيز استأذن وقال حق واحد من زملاءه يوقف مكانه لين يرجع ومشى وراهم
محمد (شفيني.. أنا ألحقهم.. لو درى عني عبود شبيقول عني.. لا.. لا بدخل كارفور باخذ لي كافي واطلع)

دخلوا كارفور ومحمد وراهم .. مها راحت صوب الشوربات .. رفعت الشيله علشان تشوف عدل
بس فجأه قلبها نغزها.. وحست انه فيه أحد يراقبها..
محمد كان واقف يشوفها.. وأول ماشاف وييها فز قلبه واستانس..هو مايعرف شسبب هالفرحه!! بس ارتاح يوم شافها.. هي علطول لفت ويهها شافته .. انتفضت وتغطت علطول..
انتبه محمد حق نفسه وانحرج .. وطلع من كارفور.. رجع لشغله

عنود: مهوي.. شفتي ولد جيراننا المزيون كان هنيه..
مها: لحقتي تدققين بويهه.. امشي نخلص أغراضنا..
مها كانت تدري ان نظره وحده لمحمد تنعرف فيها انه حلو ومزيون فعلا.. مها مستغربه وألف سؤال يدور في بالها.. متى طلع؟ توه في كيوتل؟ وليش كان واقف يطالعني.. لايكون يتوقعني مثل اختي.. طلع مغازلجي.. بس هو ماقال شي.. واللي يغازلون يتكلمون..وليش وقف مجابلني .. ليش مب عنود!!

محمد رجع لدوامه وكان مشغول البال..(أنا شسويت؟؟ الحين شبتقول عني البنت.. بس أنا ماكلمتها.. شاللي صار فيني.. ليش فز قلبي يوم شفتها..أنا شفت بنات حلوين من قبل.. اشمعنى هاذي.....)

محمد ومها رجعوا البيت وكل واحد يفكر في الثاني..

محمد كان منسدح في الصاله يغني..
( بعيده وقفت وأنا بعيد بلهفتي.. مااحد عرف باللي حصل.....)

أم خالد: حمود.. غريبه قاعد.. العاده اذا دوامك طويل تنام.. وتغني.. رايق بعد
محمد: يمه ماادري أحس اني مرتاح اليوم
أم خالد: الحمدلله.. ان شاء الله دوم مو يوم

محمد..كان متفاجئ من نفسه.. ومب عارف شالسالفه..غير انه رايق ومايبي شي يعكر مزاجه..

طلع محمد يتمشى في الفريج لأول مره في حياته يمشي في فريجهم..كان متعمد يدور جدام بيتهم..
وفجأه شاف مشعل.. توه راجع من الدوام وقف سيارته ونزل.. محمد راح صوبه من غير مايحس ولايدري شبيقول!!

محمد: السلام عليكم
مشعل: هلا..عليكم السلام ورحمة الله وبركاته
محمد: أنا جاركم وهذا بيتنا
مشعل: مجابلنا يعني.. زين والله.. أنا من جيت ماشفت أحد بالفريج غير الياهال
محمد: وأنا أول مره أشوفك
مشعل: أنا أغلب أوقاتي مناوب واليوم خلصت وعندي اجازه بكره..فرجعت البيت
محمد: زين يوم انه عندك اجازه.. بكره عشاكم عندنا
مشعل: ليش التكلفه ياخوي
محمد: لا تكلفه ولاشي.. وبالمره نتعرف على بعض أكثر
مشعل: ان شاءالله
محمد: ايه وقول حق الأهل بعد.. الوالده بتنتظرهم
مشعل: يبلغ ياخوي

ورجع محمد بيتهم.. وهو متوهق ومايدري شلون عزمهم.. من غير مايتفق مع أمه.. يمكن أمه مرتبطه بشي.. لا بس أمه طلعاتها نادره..

شاف أمه قاعده.. باسها على راسها

محمد: أمي اسمحي لي سويت شي من غير ما أشاورج
أمه: شمسوي فديتك؟
محمد: عزمت الجيران عندنا على العشا بكره
أمه: زين سويت ياولدي عسى عزمت المره وبنتها بعد.. أنا بعد متملله وودي بقعدتهم
محمد: صج يمه.. يعني ماعندج مانع
أمه: لا فديتك.. واذا على العشا بوصي أبوك وبنرتب كل شي.. وبقول حق مرت أخوك تجي وتسوي الحلو

محمد طار من الفرحه.. واستانس على اسلوب أمه.. وحبها وطلع

الجزء الخامس

في بيت أم مشعل

مشعل دخل وبلغ أمه وخواته.. وماعندهم مانع..وأصلا مايقدرون يقولون شي لأن مشعل عطا الرجال كلمه
مها فز قلبها من سمعت طاريهم.. وتمنت ان نواري تكون هناك علشان تخفف من توترها..

في يوم العزيمه..

مشعل وراشد اجهزوا.. بس ينتظرون مها اللي أول مره تأخرهم..كانت متوتره ومب عارفه شتلبس أو شتحط في ويهها..وشتسوي بشعرها!!

أمها: شفيها هاذي.. لايكون علبالها بتروح عرس.. شتسوي للحين
مشعل: خليها على راحتها يمه.. ماتأخرنا
راشد: ايه لوبعض الناس متأخرين جان ماقلتي شي.. مع انها دوم تنقعنا والا بس هالمسجينه
عنود: من قصدك؟
أمهم: رشود لسانك يبي له قطع..اسكت انت وياها أحسن
مشعل طالعهم وضحك

طلعت مها وكانت حاطه ظل وردي خفيف على عينها ومتكحله.. وفاتحه شعرها
مشعل: ماشاء الله..شكلج بتنخطبين اليوم
عنود احترت لأن على كثر المكياج اللي حاطته محد علق عليه الا مشعل اللي كان بيخليها تغسل ويهها بس أمه سكتته..

أول ماوصلوا استقبلهم خالد وأشر على صالة الحريم وراحوا الشباب الميلس..
ومحمد انقهر لأنه مالحق يشوفهم..

أم خالد كانت وايد فرحانه فيهم وفاطمه مرت خالد عجبتها مها.. وتمنت انها تكون من نصيب محمد
طبعا أم خالد سولفت عن عيالها والبنات فهموا ان اللي يشتغل في كيوتل اسمه محمد ..
مها ارتاحت يوم سمعت أمه تمدحه وحست ان أمه متعلقه فيه وايد..

في الميلس.. الشباب بسرعه خذوا على بعض وكل واحد يسولف عن المواقف اللي تصير في الشغل
وبالذات مشعل بحكم انه شرطي.. وكان يتكلم عن مغامراته..وسوالفه وايد حلوه.. استانسوا خالد ومحمد عليه وضحكهم مغطي المكان..
راشد: ماجنكم نسيتوني..كل سوالفكم عن الشغل .. ماتبون سوالف عن المدرسه
بوخالد: ايه والله ياراشد..شكلهم بيطردوننا بعد شوي
مشعل: البيت بيتك..احنا الطالعين وانت الداخل
بوخالد: بيتي بيتكم يالغالي.. والتفت على عياله وقال: شفتوا شلون الكلام الذرب مب انتوا..!
خالد: ماهقيتها منك يبه .. احنا كلامنا مب ذرب؟
محمد: ايه خلاص الحين لقيت مشعل في صفك.. بتستغني عنا
بومحمد ومشعل اضحكوا..

مشعل ارتاح لهم وحس انهم طيبين وحليوين..وكان محتاج لقعده مثل هاذي من زمان ..
وراشد بعد استانس عليهم بس كان يتمنى يلقى حد في سنه

طبعا محمد كان يحاول يكسب مشعل .. مايدري ان راشد حبيب مها وقريب منها والا جان ماهده

من هذا اليوم .. مشعل ومحمد وخالد مايقطعون بعض .. كل واحد يتصل للثاني بين كل يومين
الجزء السادس

مها تأخرت في رقادها لأنها كانت سهرانه من بعد مارجعت من بيت جيرانها..وحتى ماراحت الجامعه..
رن تلفونها فوق السبع مرات لين ردت

مها: ألووووو
لولوه أقرب صديقاتها: انتي وييينج؟ شهالرقاد.. ولاقلتي انج مب جايه بعد..
مها: لولو فديتج اسمحي لي راحت علي نومه ومحد وقظني ولاسمعت الجوال
لولوه: أهم شي انتي بخير؟
مها: ماادري شاقول لج!
لولوه: تكلمي فيج شي؟
مها: لاتحاتين بس صارت لي مواقف غريبه في هاليومين وقالت لها كل شي من أول ماشافت محمد..
لولوه: هذا يدل على انه معجب فيج
مها: لا.. مااعتقد يمكن في عنود
لولوه: ليش عنود شفيها زود عنج.. بعدين هو كان يطالعج مايطالعها..!!
مها: بس أنا ماحب الشباب اللي هالشكل..يلاحقون البنات..أنا مب من هالنوع
لولوه: ويمكن علشان هالسبب هو حب يتأكد اذا كنتي منهم والا لا
مها: ماادري .. أصلا ليش أفكر بالموضوع
لولوه: يمكن لأنه عجبج وحبيتيه
مها: هاااه..(وفزت من فراشها) لا مب بهالسرعه
لولوه: الحب مافيه بطيء وسريع
مها: بس أنا ماعندي هالسولف
لولوه: مهوي..هالسالفه يبي لها قعده

وسكرت لولوه من مها..واتفقوا يكملون كلامهم في اليوم الثاني اذا شافوا بعض..

مها قامت من فراشها.. ولفتت نظرها دريشتها اللي من سكنت البيت مافتحتها مع انه دريشتها عاكس.. فتحت الستاره علشان الشمس تدخل.. وماصدقت اللي شافته وقعدت تفرك عيونها وتفتحها.. كان محمد قاعد جدام بيتهم وشكله يفكر..وكل شوي طالع بيت مها.. وكل مارفع عينه صوب دريشتها..نقزت الصوب الثاني.. راح عن بالها انه دريشتها عاكس ومايقدر يشوفها.. ويوم لاحظت هالشي تمت تضحك على نفسها..
تقول في بالها: (معقوله يعني هو بعد ماراح الشغل..والا يمكن خلص من وقت والا ماعنده شغل الحين.. وشفيه قاعد برا؟..وانا شدخلني أصلا..!)

فيه مشاعر قويه داخل مها لمحمد.. بس هي ماكانت تهتم لهالمشاعر وتحاول تشغل نفسها بأي شي ثاني علشان ماتفكر فيه)

محمد كان تعبان وفعلا ماداوم لأنه قام متأخر وفضل انه مايروح.. وتم قاعد عند البيت لأنه يدري انه اخوان مها في الدوام يعني محد بينتبه له..وحتى لو احد شافه مايقدر يقول له شي لأنه يعتبر في بيته.. ومايقدر يراقب بيت مها الا من هالمكان لأن غرفة أمه بس اللي تطل على بيتهم.. ولو وقف عندها أكيد بتشك فيه
محمد راسه كان يدور .. حرقته الشمس مسكين .. كل هذا علشان يشوف طلة مها وهي راجعه من الجامعه.. مسكين مايدري انها أصلا ماراحت..

يأس محمد من الانتظار.. ورجع داخل.. وقف على صوت أمه وهي تقول:
والله ياليت.. الله يسمع منج يافاطمه.. بس لو محمد يوافق..أنا وأبوه ودنا اليوم قبل باجر

وسكرت أمه التلفون.. علطول سألها.. يمه شعندكم انتي وفاطمه.. شالسالفه؟

أمه: ماعندنا الا كل خير ان شاء الله.. بس فاطمه كانت تكلمني عن وحده وتمدحها..وودنا تكون من نصيبك
محمد: ومن قال لها اني أبي أتزوج علشان تدور لي؟
أمه: محمد فديتك.. ماردك تتزوج واحنا ودنا نفرح فيك.. ماتقول لي شناقصك! بعدين الزواج مب بالغصب اذا ماعجبتك البنت خلاص.. والله انها خوش بنت
محمد: تبين الفكه مني بهالسرعه يايمه!
أمه: لا.. انت حتى لوتزوجت بتسكنون معانا..واللي مريحني ان البنت اكيد ماراح تمانع لأنها بتكون قريبه من أهلها بعد..
محمد: من هي ؟
أمه: بنت الجيران يايمه
محمد: من؟
أمه: شفيك؟ اقول لك بنت الجيران
محمد:!!!!
أمه: مها اخت مشعل وراشد
محمد: مممها!
أمه: شقلت ياولدي.. تراها خوش بنت والقريب أحسن من البعيد
محمد: متى بتخطبونها؟
أمه: متى ماسمعنا ردك.. بس المهم تكون مقتنع .. مانبي نظلمها
محمد (قبل ما أمه تخلص كلامها): يمه..اليوم.. اليوم اخطبيها فديتج
أمه: يابعدعمري كنت حاسه انك ماراح تردني..
محمد: متى بتروحين يمه؟
أمه: طبعا مب اليوم.. أول شي بكلم العرب ونحدد الوقت
محمد: عجلي يمه
أمه: توك ماتبي تتزوج.. الحين مستعجل شاللي قلبك
محمد(شاقول لها الحين): لا بس فكرت فيها.. وابي أستقر

محمد طلع من عند أمه مستخف مب عارف شيسوي.. حس انه أمه تقرا أفكاره.. وفاطمه مرت أخوه اللي بعد سبب في اختيار مها..وده بس يشوفها علشان يشكرها..
وقعد يكلم نفسه ( يعني خلاص باخذها.. فديتها.. ماصار لي شهر واستخفيت عليها.. شلون لوعشت معاها العمر كله؟؟!)

**kaka 22** · 09-13-2006, 02:22 AM

يعطيج العافيه

ويلا ناطرين الجزء السابع يالغلا

إعـــــــلان

·~-.¸¸,.-~بنت الجيران·~-.¸¸,.-~

·~-.¸¸,.-~بنت الجيران·~-.¸¸,.-~

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

إعـــــــلان

*·~-.¸¸,.-~*بنت الجيران*·~-.¸¸,.-~*

*·~-.¸¸,.-~*بنت الجيران*·~-.¸¸,.-~*

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

·~-.¸¸,.-~بنت الجيران·~-.¸¸,.-~

·~-.¸¸,.-~بنت الجيران·~-.¸¸,.-~