قصة فتاة في ليلة عرسها تكتب بدموعها

[عازفه الآهات]

عشقت



وعُشِقت



ولكن ها هو القدر يقف بطريقهما



أين هى الآن وأين الحبيب





في ليلة عرسها تبكى ..

حزينه وقلبها يحكى ..

يقول الحمد لك ربى على كل حال ..

على الصحه .. على النعمه ..

على قلبٍ شكى همه ..

وصبر طال ..



تجيها أمها وتقول ..

خلاص يا بنيّـتى إنسى ..

قوّى قلبك الحانى وإقسى ..

نصيبك هو نصيبك ..

ما بيدينا شى ..

ولو كان الله كاتب لك حبيبك ..

ما وقف فى دربكم شيى ..





تجاوبها ..

أبى أعرف ..

أبوى شلّى إستفاده الحين .. ؟!

لو ذابحنى كان أبرك ..

وزوجى .. إيش ذنبه المسكين ؟!

يعيش باقى العمر .. مع جثه تتحرك !

عليك الله يا يمّه .. قوليلى إشلون أضمّه .. ؟!

واذا ودّه يكلمنى .. وشاف دموعى فـ عيونى ..

قولى إشلون أكلمه .. ؟!

واذا نادانى بإسمى ..

وانا أخطيت فى إسمه ..

يا ترى وش موقفه منى ..

وهو يسمع إسم غير إسمه ؟!!









تجيها أمها وتقول ..

خلاص فضيها من سيره ..

خلاص يا بنيّـتى إنسى ..

قوّى قلبك الحانى وإقسى ..

نصيبك

هو نصيبك ..

ما بيدينا شى ..

ولو كان الله كاتب لك حبيبك ..

ما وقف فى دربكم شى ..


بقولك شى يا يمّه .. وخليها من الأسرار ..

أبكتب له رسالة شوق ..

بشاكيه الألم والعوق ..

عقب ما أنتهى منها ..

بكل الحرص أرسليها ..

وخبيها عن الأنظار ..

وابى منّك وعد صادق ..

توصليها لذاك المغرم العاشق ..

وبعد ما يوصلك ردّه ..

على طول بلغينى بآخر الأخبار ..





ربع ساعه يا يمّه ..

عطينى بس ربع ساعه ..

أبكتب له عن اللى طفّى ما فى القلب ولاعه ..

أبكتب له الين دمع القلم ما يجف ..

تعالى بعدها وإستلمى ما فى الظرف ..



وكتبت من حزنها أبيات ..

تقول فيها ..



سلاماتى .. تحياتى .. وأشـواقـى الشديده

.................. على اللى روحه قبالى .. وأنفـاسـه بعيده



على اللى إفترقنا غصب عن عينـى وعينه

.................. بعد ما كنت أنا وهو نحلم بلحـظـه سعيده



بعيش بغربتى لحـالـى .. وهـو الله يعينه

.................. يكمّل نصفه الثانى .. ويلـقـى مـن تريده



مثل ما قالت أمـى .. مـا لـنـا إلا قدرنا

.................. والا مـن زمـان المفتـرض إيـدي بإيده



يسامحك الله يالوالـد .. علـى عمـر قتلته

.................. بعد ما ماتت إبنيتـك وش اللـى بتستفيده ؟!



أنا آسفه على أعذارى .. وربى غصب عنى

.................. نعم بتزوّج فلان .. بس بعيش عمرى وحيده



ما حّد ممكـن إنّـه يملا عيـونـى بدونك

.................. تذكّر كلمتى هـذى .. أنـا فـ حبّـك شهيده



تذكّر كلمتى أرجـوك .. لأنهـا مـن فؤادى

.................. فؤادى اللى ذبحوه اليوم .. وطعنوه فـ وريده



تذكّر كلمةٍ فيهـا شـعورى ومـا طـرى لى

.................. أنا فـ حبك شهيده .. وذى ترى آخر قصيده





وجتها الوالده عندها ..

وهى تحاول تغض الطرف ..

وتسألها ..

وش اللى بداخله هالظرف ؟!



أبيات ..

هى أبيات .. لحبٍ من حياتى

فات ..

لحبٍ من حياتى طار ...

بسرعه أرجوك أرسليها ..

وهى تذرف .. دموعٍ نار ..



على هونك يا يمّه ..

على هونك ..

خلاص إطّمنى إنتى ..

برسل ما كتبتى ..

وإستعدّى ..

بعد شوى بيزفونك ..



يزفونى .. ؟؟!!

وربى كان أهون لو يكفنونى .. !!









و بعد أيّام ..


تسافر لاجل تقضى فى فرنسا .. شهر العسل ..

والمكتوب للعاشق وصل ..!!

وهى مع زوجها تضحك ..

وهو من فرحته يضحك ..

يقول أفديكى أنا بروحى ..

وبيتى .. ومالى .. والأهل ..

وهى تقول أشكرك بالحيل ..

لأنك من جديد .. رجّعت فى قلبى الأمل ..



وساعه بعد ساعه ..

فرحتهم تزيد ..

فى الصبح يتجولون من باريس .. لحتى الليل ..

وفى الفندق .. يشربون قهوه بالهيل ..

بعدها يسهرون .. كل الليل ..



وحانت ساعة الردة ..

بعد ما طالت المدة ..

وموعدهم بعد ساعات ..



وأول ما وطوا أرض المطار ..

من الفرحه بكوا ..

وإستقبلوهم أهلهم بأحضانهم ..

سلامات .. سلامات ..

عساكم بس تهنيتوا ..

يجاوبهم ... الله يسلمكم ..

والحمد لله الهنا فى حجرنا بات ..









تطير البنت ناحية أمّها ..

إشتقت لك حيل يا يمّه ..

وهاتى حضنك الدافى ..

ترى مشتاقه أضمّه ..

وعلمينى عن أحوالك ..

عن أخبارك .. عساك بخير ؟


بخير يا بنيّـتى .. دامك بخير ..

بس ما سألتينى .. ؟!

خير يا يمّه .. خير ؟!

نسيتى إنك أرسلتى رساله ..

قبل ما ترحلين بخير وسهاله .. ؟!




صحيح ... تونى تذكّرت !!!

أرسل لك جواب ..؟



بعد ما أرسلتها ..

صرت أنتظر منّه خطاب ..

ومرّت أيام وليالي وساعات ..

بعد مدّه .. شهر أو يمكن شويه يزيد ..

لقيت نفس الرساله .. عند صندوق البريد ..

تقول : لم يقرأها أحد .. !!

قلت بنفسى أتأكّد ..

وصلت لباب منزلهم ..

وكلّمنى أخوه ..


عرفتى ليش ما فى رد .. قرأ الأبيات .. ؟؟؟!!!


فى نفس اليوم لى إنتى تزوجتى ..

وكنتى حيل مغتمّه ..

حبيبك ما قدر يتحمّل الصدمه ..

مع كل الأسف ... مــــــــــــــات !!!!!!!!



عازفـــ الآهات ـــــــــــــــــــــه

[Demon of Dark]

:( :( :(

قصه مؤثره واحس ان فيها شيء من الشعر اكثر من كونها قصه وبس
كلمات رائعه تشعرك بالرغبة في المواصلة بالقراءة
مشكوره اختي ويعطيج الف عافيه

تقبلي تحياتي

[نـ ألعشره ـأكر]

قصه والله تبجى الواحد

لاحول ولا قوه الابالله

تسلم ايدج على الموضوع

[a7la 3eemiya]

لا حول ولا قوة إلا بالله

قصة مؤثرة ..

يعطيك العافية

[اماراتى كوول]

هذا الحب اللى حيب من قلبه
والله يعين كل محب
والله يجمع كل محب مع حبيبته
صه حلوه وماثره

[دنووش]

عازفه عزفتيلنا اليووم اروع ماخطه قلمك ..

قصه مؤثره حيل ..

اللي يقهر انها عاشت وباوقات نسته ..وهو مات عشانها !!!

تحيااتي .

[» STyLeyO «]

بصراحه خوش قصه وخوش حركه قصه بس شعريه ناااايس وماقصرتي وهذا الحب ولا بلاش لوووول

ويل

جاااو

[عازفه الآهات]

اشكر الجميع على هذا المرور الحلو
اختكم عازفه الآهات

[شــمــآلــي]

الله الله ...

هذيلي مجموعة قصائد تحكي قصه ...


الموفروض تنقل الى همس القوافي ...


تحياتي لك

[zytoooona]

وااااي واااي

لا القصه اتعور القلب

هذاا الحب الصجي ولا بلاش

يسلموو يا قلبي على القصه الراائعه صراااحه شدتني وكنت ودي اكمل واكمل بعد من كثر ما اهي حلوووه وتشد