تويت
يا مل عينٍ تهامـل تقـل مطروفـه
نوبات أرد الدموع ونـوب تعصانـي
سمعت للناي تـال الليـل معزوفـه
والناي صوته حزين ويبعث أحزانـي
كن المحاني بحد السيـف منصوفـه
حسبي على اللي فتح جرحي وخلاّني
والحال مما تشوف العيـن منحوفـه
بري القلم قامـت الشـدات تبرانـي
أشوف الأدرع يدوج ومعجبه صوفـه
والجوع يطوي ضلوع الذيب سرحاني
وأشوف ناسٍ لجمع المـال ملهوفـه
على الردى كل واحد يطـرد الثانـي
يا خوف قلبي من المجهول يا خوفـه
زيف الحقايق يعـزّز حجـة الجانـي
القصد معـروف والنيـات مكشوفـه
غلطان يالمنتظـر خسـران يالعانـي
يا نفس ما انتي ورى المقفين مكلوفه
ما عاد ينفعك لا قاصـي ولا دانـي
من صدّ عنّي ضعينه قلـت ذالوفـه
لا منـه زودي ولا بيديـه نقصانـي
عواطفـي تقـل بالبـارود منسوفـه
مشاعري سمّدت واهتـزت أركانـي
اللي يمينه عـن الطـولات مكفوفـه
وش فايدة رجعته لو هو حدا إخواني
كانه نسي واجبي ما همّنـي شوفـه
والله لورّيـه نسيـانـه ونسيـانـي
اللي يبينـي يـدلّ البيـت ويشوفـه
قلبـه دليلـه ولا يحتـاج عنوانـي
لو دوني الناس منتشره ومرصوفـه
ينشد ويرجع وينشـد ليـن يلقانـي
لو العراقيل فـي ممشـاه مصفوفـه
يصبر لها ويتخطّاهـا علـى شانـي
وليا تعذّر عـن المسيـار بظروفـه
وقّفت ركض الحياة ورحت له عانـي
كانه تجاوز خطايه شفـت معروفـه
ما يرصد أخطاي غير قلوب عدواني
ومن لا بغاني لو الطوفه على الطوفه
تـروح الأيـام لا جيتـه ولا جانـي
يا صار باللون الأسود صابغٍ جوفـه
ما تصنـع الـود بيبانـه وبيبانـي
للشاعر :فرحان قيران الدهمشي ..
تعليق