~ [ قضـى الصيـف ] ~

[مسكينـ يآقلبيـ]

قضى الصيف ياللي تحتري نقلة القرناس
بقى هالعشرة أيام وتزين نقلاته
.....
قضى والدليل الليل لاصار به نسناس
نزيل الخلا بيت الشعر صك ذرياته
.....
تجي هالليالي غرفته كنك العساس
عليها مثل شرواك تكثر زياراته
.....
ولا ينشرح صدرك قبل تكتمل لمواس
تعد الليالي ياعسا الوقت مافاته
.....
على غرفة القرناس صرنا تقل حراس
ولا أحد"ن" بجابرنا وكل"ن" ومشهاته
.....
غلاهن يجي فيه الليالي بدون قياس
وكلن حسب فعله تحصل مكاناته
.....
فعوله تورالك من اللحق والمغلاس
وكن الخيال يعيد سابق مهداته
.....
قضى الصيف ياشاكي من الهم والأتعاس
عسى كل قلب"ن" لاصبر يلحق معاناته
.....
وأنا وأنت واللي مثلنا نستعيد أنفاس
عقب هالزمان اللي قطعنا مسافاته
.....
لك الله يزول الهم والغم والأتعاس
وكل"ن" على وجهه تشوف إبتساماته
.....
ولع والولع راعيه لو ينعذل لاباس
وأنا من عذلني قمت اطوف عباراته
.....
أناش ف قلبي ديرة"ن" ماوطوها الناس
قفر والقفر هي طب قلبي وطرباته
.....
وأنا هم قلبي ديرة"ن" خداها ما إنداس
ولء راعي الخلفات لا شفت خلفاته
.....
أحب الفضى وأحب نومي على الأطعاس
وأمد النظر والقلب ينسى معاناته
.....
وأحب الندى على الورق كنه الألماس
مع أول طلوع الشمس يازين لمعاته
.....
وأحب الزهر حيث الزهر طيب الأنفاس
وللشيح حب القلب يازين نفحاته
.....
واحب الجروم وجمعها مايبيله فاس
مع البرد جرم الرمث يازين شباته
.....
وأحب الدلال وبنها يجلي الأعماس
عقب قنصة"ن" والجيب ياقشر طباته
.....
وخوة نشاما مابهم واحد"ن" بلاس
عسا لايمي فيه تقفاه لوعاته
.....
يقولون خل البر وأقول يا هالناس
ولع والولع راعيه يمشي برغباته


...."" للشاعر / حمد السعيد ""....





.
منقول

[just:)smile]

راائعه من روااائع حمد السعيد

لا هنت عالنقل :)

[مسكينـ يآقلبيـ]

يسلموو على المرور

[برشلوني 10]

صح السانك والسان شاعرها

تقبل مروري اخوي