كلام المريخي

[ميلاني]

أشكي له
جتني قصيده كنها رسم رسام ... أصيلة وآنا هـــــواي الأصــــــيله

ومن يوم جتني هاجس الشعر حوّام ... ومن طيب راعيها نويت احتسي له

لوّ الــــمراجل نعتبرها بالارقام ... أنا اشهد انه بياخذ اكبر حصيله

غلام سعد اللي لهم مثله غلام ... أشفى غليل ابـــــوه واشفى غليله

وعنده قلم مهو مثل كــل الاقلام ... محرّم مـــــا يكتب الا الجميله

هو يشتكي لي كل ما صار منضام ... وانا على طول ان زعلت اشتكي له

بقول له دامه على الوقت لوّام ... الوقت بيـــــدنا ولابـــاد حيله

ياخوي لا تتعب بتحسيب الاعوام ... مافات خلّه واتركه لا تخيله

شفني أنام أحيان واحيان ما نام ... أفرح دقايق وانطوي كل ليله

كني شعب بغداد والوقت صدام ... ما هو بكيفي غصب قمت انحني له

حملي تقسّم وانقسم عشرة اقسام ... حاولت اشيله لكن ازريت اشيله







يا حلو لثغتها
نور عيني تبعثرني متى ما لفت ... وكل الاوراق تتلخبط بشوفتها

لا حضر نورها نور الليالي خفت ... ذيك حتى المسا يحسب لطلتها

المشاعر ليا من صادفتها دفت ... والاحاسيس تتباشر بجيّتها

أنجذب حيل صوب عيونها لا غفت ... تجذب الكون كله جاذبيتها

إن صفا جوها دنياي معها صفت ... ما يروّق مزاجي غير ضحكتها

البراءه ليا منا كبرنا اختفت ... بس اهي عكسنا زادت براءتها

إن حكت من خجلها دنّقت وارجفت ... هذا هالحين وشلون بطفولتها ؟!

كن بلسمها لثغه ليا سولفت ... بس يا حلوها ويا حلو لثغتها






لمحت لك
ياللي تعيش بهنا ... حس بشعوري أنا

لمّحت لك ألف مرة ... وانته ولا انته هنا

جيتك وكلي غرام ... وسمّعتك أحلا الكلام

وانته ولا ملتفت لي ... يا سيدي والله حرام

طولت بالي عليك ... لكن تعبت ارتجيك

مدري أبيك وتبيني ... أو بس أنا اللي أبيك

ياللي العمر ما كفاك ... متى تحس بغلاك ؟

أموت واعرف حبيبي ... ايش آخرتها معاك ؟






بيني وبينه
يا بو فهد لا صرت تنشد عن الحال ... حالي بها ياخوك عشرين علّه

لي صاحبٍ يسوى ثلاثين رجال ... كـــلٍ شهـــد وآنا بعد شـــاهدٍ له

طيّب ، وفي ، كريم في كل الاحوال ... ومن عاشره اقسم قسم ما يملّه

كنت آتعذر له إذا زل أو عـــال ... بــيني وبـينـــه مـــا تجي أي زلّه

مـــا كنت اظنه يسمع القيل والقال ... إلين مــــا قفّى وانا مقبـــلٍ لّه

كشّر بوجهي واحسبه ضايق البال ... واقول في نفسي : مهي عادةٍ لّه

اثره سمع يا بو فهد هرج الانذال ... حطوني ابغضته وانا منصحٍ لّه

واليوم ابيك تحلّها وانـــت حلاّل ... يا سيفي اللي لا تضايقت اسلّه

يا طيب فعلك يوم اطالع بالافعال ... انا اشــــهد ان اللي يغلّك تغلّه

يا بو فهد كنّ المراجل لك عيال ... والطيب كنّه عود وانت ولدٍ لّه
ــ
سلامتكم

[قلـ الأسـد ـب]

صح لسانك ولا هنت ميلاني تحياتي لك يا الغالي

[عنوسه ^_~ ماتهاب]

صح لسانك ولسان شاعرها يا بطه

[عيسىالمطيرى]

صح لسانك ولسان الشاعر خالد المريخى وتسلم أيدياتك على نقـل القصيده هنآآ


أخوك : عيسى المطيرى

[ميلاني]

يسلمووو عالردود حبايبي ويعطيكم العافيه
عانس يالبطه هيييين

[محبــوب القلـوب]

شاكر لك يالبطة مو انا قلت عنوسة لووووووووول ياسلام شنو الابداع ميلاني والله عاجبني فيك ياميلاني ذوقك واختيارك الموفق للمواضيع وبالتوفيق وتقول انت مو من حزبي هااااااااا هين هين

ياللي تعيش بهنا ... حس بشعوري أنا

لمّحت لك ألف مرة ... وانته ولا انته هنا

جيتك وكلي غرام ... وسمّعتك أحلا الكلام

وانته ولا ملتفت لي ... يا سيدي والله حرام
ياميلانـــــــــــــي والله حرااااااااااااام

[ميلاني]

كلكم على راسي
العزوبي انا ويا الحق مو ضدك فهمت ثانيا انا كنت بدش وياك بس انت خربتها بشي فهمتني
وشاكرلك عالمرور وعالكلام العسل يا عسل

[نرجسيييييه]

[all1=3399CC]تسلم ايد خطت وصح لسان قائلها واختيار جميل اخوي ميلاني تقبل تحياتي [/all1]

[ميلاني]

يسلمج ربي نرجسيه
ويعطيج الف عافيه عالكلام الحلو