يابوي ابشر ترى شبلك توارت عن مداه اشبال

[كتكووته^^مكتكته]

من اجمل ما قيل من ابن لابيه




الابن هو شاعرنا الشاب فزاع
حمدان بن محمد بن راشد ال مكتوم




والاب
هو محمد بن راشد ال مكتوم


حاكم دبي


اما فـــــــــزاع

فهو الذي امتعنا بكلمات لمني التي تغنى بها راشد الماجد
وروح وروح لاصاله

ولحن المفارق لسلمان حميد


واليوم القى قصيــــــــــده رائعه
وكلمات جدا تعبر عن وفاء الابن لابيه
وفخره واعتزازه به


كيف لا وهذا الشبل من ذاك الاسد

اتركم مع القصيده



على وصف الرجال اللي تسمّى بالفعال رجال

لفت بيض العلوم وبيّض الله وجه راعيها


لفت ما كنّها الاّ سبّق الخيل ان بدت تختال

نواصيها النعوت وفي مناكبها.. قوافيها


قصايد والقصايد ما نساومها بجاه وْمال

نعبّ بحورها وان هاج مزملها نرسّيها


إذا امتدّ الفكر وامتدّ ليلي والقصيد وطال

توشّحت الشوارد ولبست الاشعار غاليها


كذب من قال ساعَفني عليها الجن يوم تقال

أنا البس جنّها واصدر مواردها واروّيها


أنا وْلا فخر نجل الشامخ المتمرّس الريبال

على وصفه تجاريني القصايد قبل اجاريها


على (محمد إبن راشد إبن مكتوم) طاب الفال

وطابت لي قبل لا الزم قوافيها.. معانيها


متى قالوا صواريها المعاني.. ما هناك اشكال

حرام انّي لمدّ شراعها لأكبر صواريها


على اكبر منبر ارميها ثنا وْعز وْفخر واجلال

ما دام ان الثنا لأهله.. على اكبر منبر ارميها


لاجل قرمٍ غرس حلمه لشعبه واثمرت الآمال

حقايق نبصر اوّلها.. ونتباشر بتاليها


حقايق واضحه من دون ابو راشد صعب تنطال

تباركها القلوب وتبهر الناظر مغانيها


مغانيها تراود كل عطرٍ ما خطر ع البال

واراضيها يراود كل عاشق فوع ناديها


أراضيها الخزاما والنفل والبختري والهال

وما يخطر على بال العطر يزخر باراضيها


ولي فيها محب أسرف على قلبي وحط وشال

طلب روحي وروحي منه فيها اللي يكفّيها


من اوّل ما عرفته والضلوع تجرّ له موّال

ولا ادري نيّته بضلوع صدري وش تواليها


أنا محتار ما بينه وبين (دبي) بالمثقال

يا أمّا (دبي) له تحلا أو انّه لي محلّيها


أو انّ (دبي) تحلا لان أبو راشد لها خيّال

نعم والله وتسبق خيلها من سبق واليها


(دبي) العِز من طيب النسايم عودها ميّال

تمسّي صاحب القدر ونحن باسمه نمسّيها


صدى داره بشرق وغرب وجنوب التقى وشمال

قبض الاربع جهات يلين داره ذاع طاريها


طغى عزمه على وعر الدروب وله غدت مسيال

تسيل الأرض لاقدامه وتفخر من مواطيها


غريبه كيف جادت به سنينه والسنين بخال؟

والاغرب كيف تضما له وهو بالجود يسقيها؟


لو ان المجد سهل ان كان كلٍ طال منه وْنال

دروب المجد ودروب العلا صعبه مراقيها


طويل العمر ما جيت اعتزي في وصفك الأمثال

ولكن المثايل تعتزيني بك.. والبّيها


يابوي ابشر ترى شبلك توارت عن مداه اشبال

وثب فوق الدروب وسابقت رجله خطاويها


ورث عزمك وحزمك والخصال تجرّ طيب خصال

مواثيقه على طرق المكارم بك يجدّيها


إذا شدّ الفخر لاجلك رحاله قمت اشدّ رحال

على نهجك.. عشان افرد رحاله وارجع اطويها


واذا قالوا: من ادرى بالحصابي والوزون ثقال

عرفت ان الوزون ثقال وانت ادرى بْحصابيها


على الدنيا جدال الاّ انت والله ما عليك جدال

مع ان إيدك يجادل كل وادي سيل واديها


لو ان السحب تنشا من كفوف امست عليك ظلال

وخرّت ساجده لاهل الثرى من جود منشيها


مكارمك المكارم والعطايا من بحرك جزال

لو ان السفن تجري في يمينك ضاع شاطيها


يمينك كم لاحت وابرقت وابطت وهي تنهال

ولا والله تدري عن يسارك كم معاطيها


وكم رجلٍ بصدره حاجه وجاك وقبل لا يسال

عطيته.. كنّك ادرى بالصدور وْسرّ خافيها


وكم حلمٍ سبقته.. كان في عين الزمان محال

تقول المقبلات افضل عليك اسرار باريها


يقولون اختصرت اجيال واقول انته فخر الاجيال

إذا الأجيال بك ما تفتخر.. من يفتخر فيها؟!

[! احلى ^ شمري !]

صحححح لسانج ولسآن شآعرهاا

واختياار موفق يابنت العم ويسعدني ويشرفني اني اول من يرد عليج

وتحيآتي لج

[بدوية]

صح لساانج ولسان شاعرها تسلم ايدينج يالغاليه ع النقل الروووووعه

[كويـتي][F.B.I][]

اول شي تسلمين اختي كتكوته ثاني شي
احب اوضح
..ان هاذي القصيده لشاعر..يـاسـر التـويجري اهداها لفزاع هاذا كما تواردته الصحف الاماراتيه
والمجلات..وحبيت اوضحلكم بس
وشكراا اختي كتكوتـه

[هاوي مو شاعر]

والله والف نعم فيهم

اختي احسنتي الاختيار يعطيك العافية

ان شالله نشوف بالمرة الجاية قصيده لك

تقبلي مروري البسيط

[محسن العجمي]

صح ح ح الله اللسانج

ياكتكوته ولسان شاعرهاا

وأحسنتي النقل ووالأختيار

..

[كتكووته^^مكتكته]

عذب بكلامي
\


يشرفني ويبسطني انك اول المارين عالموضوع


منور دوم يابن العم

[كتكووته^^مكتكته]

بدويه
الله يسلمج من كل شر
منوره

[كتكووته^^مكتكته]

]اف بي اي
لا عيوني
الكلمات لفزاع مو للتويجري
ترى مو كل شي ينكتب بالجرايد صح
والشاعر حمدان شاعر من ظهر شاعر ولا هو محتاج ياخذ كلام من احد عشان يهديه لابوه
هذا للعلم بس
منور

[كتكووته^^مكتكته]

هاوي

منورني يالغلا
اسعدني تواصلك

[كتكووته^^مكتكته]

محسن العجمي

اسعدني تواصلك الدائم في متصفحي
لا خلا ولا عدم

[كويـتي][F.B.I][]

الصراحـه
اختي انا مـتـأكـد لو جذب ما اعلنـة الصحف الاماراتيـه
وراح يـسألـونه وبيجاوب بنعم اكيـد
وتشوفين هههههههه قالت شاعر قالت الله يخلي لفلوس تسوي شعار

[عاشقــ تويتي ـة]

واااي يما فديته

تسلمين يا قلبي على هالإختيار الذوق

فعلا أم الذوق عودن أداهر

^_^

وردا على أخوي اف بي آي

أعتقد إن (( حمدان )) شـاعر إبن شـااعر ماله داعي ياخذ شعر والا (( يشتري )) من غيره

ومشكوورة كت كت

[بنت الخير]

صح لسانج كت كت وصح لسان شاعرها
وتسلمين حبوبتي

اخوي كويتي
لاتصدق الجرايد واصلا حمدان شاعر مايبيله كلام
وشكرا

[الحبيب]

يعطيج العافيه كتكوته ..

عدل كلامك كويتي القصيده كانت للشاعر ياسر التويجري

اشفيج معصبه كتكوته ؟ هذا الي ذكرته جريدة يوم الامارات وجريدة الجزيره

بعدين الجريدة ما قطت خبر الي اهي متأكد منه .. بعدين لازم الواحد يتأكد من الشاعر قبل لا يكتب عنه

ما فيها شى لو اطلعت القصيده لغيره واعترفنا فيها .. وصح لسان الشاعر ياسر التويجري