:::
الحب شعور لا مثيل له
شعور راقي نبيل مميز
يضفي على هذه الحياة لونا وردياً زاهياً
وطعما حلواً أحلى من السكر
ورائحة أزكى من شذى الورود
شعور لا يعرف طعمه إلا من عاشه وجربه
أما من لم يعشه فعزاؤه الوحيد في انتظاره
لا تعرف له وقتا
ولا تعرف له عمرا
يأتي متى يشاء ويذهب متى يشاء
.
.
.
.
حاول الكثيرون شرح شعور الحب
وقد يكونون وفقوا وقد يكونون اخفقوا
سأحاول شرحه من زاوية مختلفه
بتقسيمه إلى ثلاث مراحل
تمثل المراحل العمرية الثلاث لعمر الحب
سأحاول أن أصور شعور الحب لمن لم يعشه
مع ان الحب أكبر وأوسع وأصعب من أن يصور أو أن يشرح
و .... مع الحب
المرحلة الأولى :
مرحلة الطفولة والبداية
يبدأ أول شعور الحب بدون ما تحس أنك تحب
تراودك شكوك هل انا فعلا أحب ولا لا في اول الأيام
وبعد ما يتحول الحب من شكوك الى واقع
تبدأ بمثل العوار الغريب في بطنك ولكنه عوار لذيذ تستمع فيه
وهو تفاعل كيميائي في جسمك نتيجة الحب (حقيقة علمية مو تأليف)
وطبعا إنسى تنام طبيعي مثل الناس
يبدأ معاك الأرق وتصير من تحط راسك عالمخدة تبدا الأفكار تلعب براسك
ويطلع الصبح وانت للحين ما نمت
ومع الايام شوي شوي يبدا اسم المحبوبة ينحفر بالقلب بطريقة عجيبة
بمجرد ما تسمع اسمها حتى لو مو اهي يفز قلبك
يعني مثلا لو اسم حبيبتك نوال ، وسمعت واحد يقول
سمعت أغنية نوال الزغبي الجديده ؟
على طوول يفز قلبك من اسم نوال
وتحس ان كمية مضاعفة من الدم ضخها قلبك
وغير هذا كله تقل شهيتك للأكل بشكل واضح
يلاحظه كل اللي حولك من ربعك واهلك
ومده هالمرحلة تقريبا شهر الى شهرين وبعدين ندخل في المرحلة الثانية
المرحلة الثانية :
مرحلة الشباب والقوة
تبدأ هالمرحلة بانتهاء المرحلة الأولى
طبعا هالمرحلة هذي تبدا شهيتك ترجع طبيعية
لأن الحب يكون صار شي طبيعي وجزء من حياتك
فـمو معقول بتظل طول عمرك ما تاكل
ويرجع نومك طبيعي
ويختفي عوار البطن اللي بأول الأيام
وبهالمرحلة يزيد الحب يوم عن يوم
كل يوم يصير أقوى ويزيد حرارة
عشان جذي سميتها مرحلة القوة
لان الحب فيها يكون بأقوى مراحله
وتوثق العلاقة بينك وبين المحبوبة
وتحس انك ما تقدر تعيش بدونها
شعور مميز شعور الحب ماكو منه
لو تقعد تكلمها بالساعات ما تمل
وتحس ان الساعات هذي دقايق
صج صج دقايق مو بس كلام
ومن تخليها تشتاقلها على طول
ومهما تسوي ما تشوف الا الزين فيها
عيوبها تختفي مره وحدة ما تشوفها
كل اللي تشوفه حسناتها
وتصير بعيونك احلى وحدة بالعالم حتى لو انها عادية
واكمل وحدة حتى لو انها كلها عيوب
وعاد بهالمرحله يصير مثل الأفلام الرومانسية
كلام حلو معسول ما يخلص
وتصير أحلى أيام بحياتك
وبنفس الوقت تكثر الهوشات بينك وبين المحبوبة
لان الحب والغيره والاهتمام يولد المشاكل أحيانا
وصدق عبدالكريم عبدالقادر بو خالد يوم قال
وش أحلى من الزعل لو بعده اتراضيت
والمرحلة هذي مالها مدة زمنية محددة
ممكن تستمر سنة ممكن سنتين ممكن عشر
وممكن جم شهر
المهم ان يكون الحب صادق وحقيقي مو جذب
وبعد ما تخلص هالمرحلة يدخل الحب بالمرحلة الأخير من عمره
المرحلة الثالثة :
مرحلة الشيخوخة والنهاية
تبدا هذه المرحلة بانتهاء المرحلة الثانية
سنه الحياة ان لكل بداية ونهاية
وكل شي ابتدا لازم يجي يوم وينتهي
وفي هذي المرحلة يبدا الحب يبرد
وشوي شوي تحس ان الحب صار شي عادي
يبدا يختفي الولع والحب والشوق والوله
ويبدا يختفي الكلام الحلو والحركات الرومانسية
ويبدا كل واحد يتهرب من الثاني ماله خلقه
وتبدا تشوف عيوبها اللي ما كنت تشوفها
وتظل طول الوقت تقارن بين عيوبها وحسناتها
وتقول ويني عن هالعيوب كل هالمدة
ولازم نعرف ان الحب اللي نتكلم عنه اهني اهو حب من طرفين
أما الحب أبو طرف واحد هذا ما جربته صراحة
فمعنى ان حب أبو طرفين ان ممكن الحب يشيخ عند طرف
والطرف الثاني للحين بمرحلة الشباب
فنرجع لموضوعنا عاد ، بمرحلة الشيخوخة
تقل عاد الهوشات لان الاهتمام قل
وشوي شوي شوي لين ينتهي الحب ويموت
والحب ممكن يموت مره وحدة بيوم وليله
بأن يصير مثل الأفلام الهندية احنا خلاص لازم نفترق
صرنا ما نقدر نكمل مع بعض ومن هالحجي
او ممكن يموت على شوي شوي
بأن يصير كل واحد يتحاشى يكلم الثاني
ويوخر عنه وشوي شوي لين تموت العلاقة نهائيا ويموت معاها الحب
وهالمرحلة ممكن تمتد من 3 شهور الى 6 شهور على اكبر تقدير
وبجذي يكون مات الحب وانتهى بعد ما شفنا مع بعض مراحله الثلاث
وشلون يبدا ويكبر وشلون بالنهاية ينتهي ويموت
:::
أتمنى أكون وفقت في شرح شعور الحب لمن لم يعشه
مع ان الحب لما تعشيه غير عن لما تقراه أكيد
لكن حاولت ان أقترب قدر الإمكان من الحب
م / ن
تقـــبلوا خالـــــص احترامـــــــــــــــي
تحـــــــــــــــــ ღ دلــــــــــــــــــع ღ ـــــــــــــــــــياتي
تعليق