في رثاء أخي رحمه الله

[smawat]

يا خوي الله معاك
الله معاك . . . الله معاك
كنت أقولها لك وأنت للمدرسة رايح . . . الله معاك
كنت أقولها وأنت للملعب رايح . . . الله معاك
كنت أقولها لك وأنت لحفلة التخرج رايح . . . الله معاك
كنت أقولها وأنت مع ربعك طالع . . . الله معاك
وبكل مرة . . كنت ترجع لي أسمع صدى ضحكتك تسابق خطاك
ما دريت ان في الخميس ذاك يوم قلت لك الله معاك . . . كان آخر وداع لي وياك.
ما دريت إن القدر كان ناطرك هناك
لوأدري والله لو أدري جان مو بس أقول لك الله معاك
جان أقول لك ياخوي خذني معاك
فديتك . . . لا تتركني أعيش الدنيا بلياك
فديت ضحكتك، فديت روحك، فديت جروحك، فديت قلبك اللي وقف بين ضلوعك، لا تتركني أعيش الدنيا بلياك .
يا خوي أبي أعيش الدنيا معاك مو مع ذكراك
بس هذا نصيبك . . . وهذا نصيبنا معاك
اليوم واليوم واقفه على راسك اهمس باذنك يا خوي يا ولد أمي وأبوي هالمرة الله ومحمد معاك
أقولها لك و ودي لو أسمع منك جواب
أقولها لك ودموعي غرقت التراب
يا خوي الله ومحمد معاك

[mnaary]

الله يرحم اخوك ويغمد روحه جنة الفردووس

[Z@G®†éY]

الله يرحمه ويغمده الجنه

مشكور اخوي

[lulu]

عظم الله اجرج والبقيه بحياتج
وإن شاء الله تكون آخر أحزانج
الله يصبرج يالغاليه سموات على فراق اخوج
والله بكيتيني وذكرتيني بوفاة اخوي الله يرحمه
فراق الاخو صعب والشوق والذكريات تذبح الانسان
الله يعينا وربي اختارهم والله يصبرنا على فراقهم
وربي يرحم ويغفر لأمواتنا ويسكنهم فسيح جناته أجمعين
تسلمين يالغلا وربي يعطيج كل الصحه والعافيه