التربية الصالحه فاقدينها

[صــوتك وصل]

السلام عليكم و رحمة الله و بركاته

كيف حالكم يا حلوين ...

انتوا ردوا بخير و الحمد لله <<< روضه

بما اني عضو يديد فحبيت اكتب لكم موضوعي صج انه طويل فستحملوني اشوي ...


موضوعي بكتبه لاني امس شفت شي صار جدامي و ودي اقوله لكم يقرقع بقلبي ما عندي حلاو اعطيه

امس و انا رايح سوق شرق كنت بشتري الجهاز اليديد مال الإتصالات E-Go الأسود

ولا اشوف صبيان يتحرشون في بنت و امها يمها ليش جذي لي هالددرجه وصلت المغازل

و لا بنت جيكر وييع وييع صج صج جيكره :ballet: تيي تقط نفسها على الولد قصب ويع ويع
و المصيبه لو تبون تعرفون البنت الجيكره تلقونها تلبس قصير اي شي بس تبي احد يطالعها
<<<<<<<<<<<<<<خبره

خل نحط اسأله :
ــــــــــــــــــــــــــ

من السبب في كل هالأمور ؟
هل البنت السبب او الولد في المعاكسات ؟

بس جنهم كافي

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــ

الموضوع الثاني طقت جبدي من سوق شرق قلت احنا مالنا غير الفنار والله يا زين الفنار هادي و مافي ازعاج

رحت اهناك طبعا اول شي حجزت سينما و ثاني شي شربت كوفي يعني انا إللي اتفلسف

و انا قاعد فوق يم سينما رقمم خمسه طبعا اي واحد يروح الفنار يعرف الكراسي إللي جدامهم جام

انا قعدت اهناك ولا اشوف صبيين يمي يمكن اعمارهم 8 او 9

كل واحد ماسك تلفون و سماعة بلوتوث يا سلام اللله يخلي ايام اول بالبيت و ماكو طلعه إلا مع الأهل يا سوق

المباركية سوق منيره ما ادري شسمه

و بعدين اشوي اشوي ولا اشوفهم يسبوون و يسب (يعني يشتم ) حق إللي ما يفهم و المصيبه في اشياء انا

إللي أكبر منهم ما اقولها ولله حرام هالتربية الله يخلي ايام قبل كلمة حمار اوووووووه رحت فيها من ابوي لو

اقولها حق اخوي و إلحين صارت كلمة عادية

و اسألتي ما اقدر اكمل الموضوع
ــــــــــــــــــــــــــــــــــــــــــــــــــ ــ

منو السبب بتربية الأطفال الأم و لا الأب ؟
هل للخدامه دور في الموضوع ؟<<<<<<<<<داش غلط هالسؤال
على ايام اول لما كنت صغير هالعمر وين كنت تطلع ؟
شنو كان يسون اهلك لما كنت تسب ؟


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــ

اذري اذيتكم بموضوعي بس يلا اخر شي استحملوني :


و إلحين واحد يطلع مع امه اوووووه يصير ياهل الكل يعايره تطلع مع امك
يقول المثل الأم مدرسه إذا اعددتها اعددت شعبا طيبا الأعراق <<<<<لول شعر مثل نفس الشي

الشي الأخير احترام الأم بقول شي بسيط بس و راح يخلص الموضوع

( ولا تقل لهما افٍ ولا تنهرهما وقل لهما قولا كريمـا ) _صدق الله العظيم_

للأسف ، صار احترام الام شي صعب ، الناس مو بس قامت تقول ( أف ) وصلت فيهم الجرأة انهم يسبون امهاتهم ..

اسأله وايد تدور فبالـي ، طرحت الموضوع لعل وعســى ألقـــى احد مايــرضى انه يسمع كلام مثــل هذا عن أي ام .. حتى لو ما كانت امه ..

والجنــه تحت اقدام الامهات ..

?

لفـــو يسار .. المخرج عاوز كدهـ !!



يــا كثــر كلامي .. ويــا طول مواضيعي ،،
ادري تعبت عيونكم .. بسـ ::
شسوي جذي مواضيعي ..::
شكــرا لتعاونكم وقرائتكمـ للموضوع ..
وهالله هالله بالردود السنعــه
وأي رد نصه يقول ( واو موضوع نايس ) ببــلغ عنه



** همسـه :: هالله هالله يا زعلان رد علينا شويه
ونلقــاكم بموضوع قادم


وصلــنا للنهــايه ،، وياكرهـي لها ..
تحياتي صوتك وصل

جميع الحقوق محفوظه لدى مطابع صوتك وصل

[ام بدر]

أول شى يعطيك ألف عافية على هالكلام والوقت اللي عندك والخلق بعد انك تكتب هاذا كله ، اخوي الكريم

انت كتبت اكثر من مليون قضية ومشكلة كل وحدة بروحها يبيلها شهر بالله الواحد يخلص شرح لها وتفسير

لكن أنا بقولك للأسف ضعف الوازع الديني وانعدام الأخلاق وتقليد الغرب في الحريات الزائدة التي لا تقف عند حرية

الآخرين بالإضافة للانشغال من قبل الأهل بالأولاد وعدم التفرغ إلا لجمع المال ، العمل ، التسوق وغيره من هلاامور

اللي فعلا ساعدت على تهميش دور الأسرة وضعف التواصل بينهم وغياب دور الأب أدى ذلك إلى ضياع الأولاد وانغماسهم في الاخطاء .


من منا لم يرا الموقف اللي ذكرته انه الشباب يغازلون حتى والأم موجودة تدري ليش لان فعلا انعدمت الحشيمة والاحترام للأكبر سناً وانعدمت الأخلاق والإحساس بالغلط وعارفين انه ماكو عقاب ومن آمن العقاب أساء الأدب .

وهالشى معروف فعلا ماكو رادع لهم بس ما نقول إلا الله يشيل غضبه من علينا ونرد مرة ثانية الى احترامنا وتقاليدنا .


اليهال اللي كل واحد يمسك تليفونه وبلوتوث وغيره ويرقم ويغازل لا وعمره ما يتعدا 15 سنه بالله من وين تعلموا

هالامور الا من اخوانهم اللى اكبر منهم ومن غيره من الشباب في هالمجمعات الا لا سالفة ولا شغل بطالية

عليهم ولا هالقهاوي والصياعة واذية خلق الله .


لو كل واحد من مربي الأسرة فرغ عمره لو ساعة كل يوم يشوف عيالة وشنو أحوالهم ومن يكلمون ووين يروحون

ما كانت هاذى حالة شبابنا ولو كل واحد عرف ربة وصلى على الاقل صلاته ماكان راح يسوي هالامور لان راح

يخاف ربه ويقول حق عمره هالبنت مثلها مثل اختى هل واحد من هلشباب يرضا انه احد يتحرش بأخته

الغريب انة وايد بنات لمن يقولون للشباب بس عيب ماعندك خوات قاموا يردون لأ ما عندنا بكل وقاحة وقلة

ادب زين ما عليه البنت هاذى امك وعمتك وخالتك وبنت خالتك يعنى شرفك وعرضك والدنيا دوارة صج انشالة

ماحد يمر عليه هالموقف بس للأسف الكثير من هالشباب لازم يأخذون صفعة لتكون درس لهم .


شكرا على نشاطك الملحوظ وأنت في البداية استمر على نفس النشاط .

اختك ام بدر

دمت بخير وعافية

[موسيقيه حساسه]

وعليكمـ السلامـ ورحمة الله وبركاته ,,
بخير والحمدالله .. :)


اخوي مو شي يديد موضوع التحرش والمغازل .. واحنا مانقدر انقول ان البنات اهمه الغلطانين او الشباب اهمه
الغلطانين .. بنظري الاثنين غلطانين.
و بالاساس البنت الي تعطي ويه بإبتسامه او حركه فهي فتحت المجال ان الشباب يتحرشون فيها ..
والشباب بنظري اهمـ الي اغلب الاحيان يتحرشون اكثر حتى لو كانت البنت ماشيه وبحالها مايخلونها .
والسبب اكيد عالاثنين اتكلم طبعا :
- التربيه طبعا تلعب دور . فالوالدين لهمـ دور في غرس القيمـ المفيده لأبناءهمـ وتقويمـ سلوكهمـ وارشادهمـ ومراقبتهمـ او ملاحظة سلوكياتهمـ . وفي اسر ماشاءالله يتكامل دور الوالدين ويتعاونون وتلاقي الابناء اخلاق ومتفوقين .
- بنظري ان رفقة السوء تأثر وايد وتقدر انها تزيل عامل التربيه .




____----____----____----____




وموضوعك الثاني :

صراحه شي منتشر وايد .. الي بسن 8 -9 سنين يعتبر طفل . وانا استغرب من الاهل الي مخلين عيالهمـ جذي هدد
فراره بالمجمعات ولا يحوسون بالشوارع . يعني بهالعمر يكون الطفل عنده قابليه كبيره بأكتساب السلوكيات و تقليد من حوله . لان طفل وماعنده القدره على التمييز لي اللحين . وهذا ينعكس عليه. واللحين كل ياهل هالعمر تلاقيه فاهمـ كل شي ولسانه يلوط اذانه يخرع اتقوله كلمه يرد عليك عشر .

و الرد على اسئلتك .. اكيد التربيه تلعب دور مثل ما قلت لك ان دور الوالدين لازمـ يتكامل يعني ماتكون المسؤليه على واحد منهمـ بس ..
والخدامه لها دور وسؤالك مو داش عرض :) .. اكيد ان الوالدين الي مالهمـ خلق عيالهمـ بتكون الخدامه امهمـ وابوهمـ الي بيرعاهمـ .. وفي خدمـ الله بالخير يايه من قريه ماتفهمـ شي .. ماتتكلمـ الا بلغتها ولا تأشر .. اكيد ان الياهل بيقلدها بكل سلوكياتها بغض النظر عن اللغه بس .. يعني مثلا في سلوكيات او عادتها يعني يقلدها بكل شي . و اكيد الخدامه بتخلي الياهل على كيفه "قلبها مو عليه" لاحسيب ولا رقيب .. فشنو راح تكون النتيجه ؟

بس احضرتني سالفه تخص موضوعنا .. اختي مدرسه وهي الي قالت لي القصه وصراحه اثرت فيني وايد .. تقول ان عندي طالب ادرسه كثير الغياب حتى بفترة الامتحانات .. ومستواه بالدراسه سيء للغايه .. واذا حضر تلاقيه كله سرحان . وملابسه صغيره عليه وشكله مو مرتب كلش .. فتقول اختي حاولت اتقرب منه اشوفه لان شكله مو طبيعي بالنسبه حق عمره الصغير .. فأخذته للاخصائيه وسألناه عن سبب غيابه .. فكان رده .. امي و ابوي تطلقو و ماعندي احد يدرسني و اييبني المدرسه .. سألته انت اللحين عايش مع منو .. قالها مع امي بس امي تلبس وتخليني.."لحظه" ,, صج صج قلبي قامـ يعورني شنو هالامـ الي ماعندها قلب همها وناستها ولبسها و طلاعاتها .. اترك لكمـ التعليق .
بس حبيت ابين لك ان دور الامـ ولاب لازمـ يتكامل لان هذا كله يعود لصالح ابناهمـ.

وبالنسبه لطلعاتنا .. "بغير جوو النكد " شوي :) قبل كانت قمة الوناسه اذا رحت مع اهلي العاب القهوه الشعبيه .. وعقب ماتطورنا شوي " العاب المثني طفل المستقبل " لووووول .. والطلعه الي اذا كنا بنقز صج هههههه انروح الفرع بالقواري كانت احلى ايامـ والله .. والله فرق عن اليهال الحين مثل مالقت افراره بالمجمعات .


ولما كنا نسب .. اكيد في عقاب .. مثلا يحرومونا من شي نحبه .. وهذا اكيد وسيله حسينا فيها بغلطنا :)




____----____----____----____




اخر شي ..
انا بسألك .. انت تطلع مع الوالده ...؟
لاني انا شايفه نادر من الشباب الي يحب يطلع مع امه او اهله بعد مادري ليش يعني مع ان شي حلو .
اتمنى انه مايعتبر هالشي انتقاص من رجولته .. ومايهتمـ براي ربعه .. اطلع مع اهلك مع امك .. محد راح ينفعك الا اهلك ..
والشي الثاني حضرتك تكلمت عن الاحترامـ .. ونرد ونقول مره ثالثه التربيه دورها مهمـ فكل ما كان الوالدين حازمين بالتربيه "ما اقصد الشده بس" انما استخدامها مع اللين حلوو حتى تقترب المسافات بين الابناء ووالدينهمـ ويفهمـ كل منهمـ الاخر حتى يزيد الاحترامـ بينهمـ ويسود الود بين جميع افراد الاسره.



____----____----____----____





الله يعطيك العافيه اخوي.. طرحك يمس واقعنا الحالي ..
انا الي طولت وانا يا كثر سوالفي << الظاهر صكيت عليك لووول ..
عساك عالقوه وما ننحرمـ من مواضيعك .. تقبل مروري .


.
.
.
.
.
.
.

[صــوتك وصل]

ام بندر يعطيج الف الف عافية على المرور الحلو

و انشالله اظل على هالنشاط

و موسيقيه

انا اول شي برد على سؤال

انا بسألك .. انت تطلع مع الوالده ...؟

انا يمكن النادي و الكليه ماخذ اكثر وقتي يعني ارد من الكلية لي النادي

بس هذا مو مبرر اني ما اطلع وياها انا مخلي مرات لو اسبوع مافي عندي وقت اطلع معاها بالإسبوع مرتين نروح نقز

انا وياها على البحر و نتعشى

و طبعا لازم اطلع وياها يعني لما تروح الجمعية او سوق قبل العيد و هالسوالف كله انا وياها

هذي امي لو شنو يصير بالدنيا بتظل امي ما عندي غيرها

و يعطيج الف عافية على المرور

[*TanTosHa*]

صوتك وصل ..
بصراحه طرح يستحق النقاشـ ..
وأنته تكلمت عن أكثر من موضوع من خلال الظواهر الي شفتها ..
الظاهره الاولى ..
..
السبب الرئيسي واضح ..!
اهوا التربيه ..
يعني اذا الام عادي عندها البنت شلون بتكون ..؟
والحين البنات صايرين قليلات ادب ..
يعني اهمه يبون الشباب يعاكسونهم ..!
طبعا انا ماقول الكل بس الاغلب ..
قبل فتره كنت رايحه مطعم مع اهلي والوقت كان متأخر ..
كانو اغلب الطاولات فاضين دشو بنات ..ما قعدو اله يم الطاوله الي فيها شباب ..
والشباب عيدو والبنات يضحكون ..@@! وانا مصدوومه ..!!
..
المسئولين عن التربيه أكيد الام و الأب ..
بس الحين صارت الخداما ..
باجر عيالنا يتكلمون هندي واندنيسي :d
وللاسف انه ماكو اهتمام وله رعايه من قبل الوالدين ..
وهالشي يؤثر عليهم بشكل سلبي بالمستقبل ..
والمجتمع يصير فاشل ..
ولمن كنت صغيره كنت دايما مع امي واخاف اروح اي مكان بدونها او مع خواتي لكبار ..
وأكيد يستوجب علينا احترام امنا وتقدير الي سوته حقنا ..
بس للاسف الحين على قولتك كل واحد لسانه شطوله على امه ..@@ ! جنها مو امه حتى ؟
الله يهديهم ان شاء الله ..
ويعطيك العافيه
ما قصرت على الطرح
..
.

[ScReAmQwEeN]

صوتك وصــل أولاً يعطيك العافيــه على الطرح .. بدايــه موفقـه !! !!

ثانيــاً كل مااشوف اسمك اتذكر ابو عيده لووولز >>> شكووو دخــلي بالموضوع خخ


ثالثاً : بخصوص الموضوع الأول .. انــا اشوف الغلط على الكــل شباب والبنات يعني الشاب لو مايبي يغازل لو تيي جدامـه ملكـة جمال العالم ماتتحرك فيه شعره ومايعطي ويــه وهمن البنــات إلي محترمـه نفسها وماتبي سوالف الشباب ومغثتهم بالمجمعات تلبس لبس محترم وتمشي يم الطوفــه أحســن لها .. بس يعني لصدمنــي أن معقولــه الشباب يغازلون بنتها والأم ساكتــه أنـا لو مكانها بالجنطــه على راســه أنزل السبايكــي ماله بالأرض من الطق خخخخخخخخخخ .. ..

امـا الموضوع الثانــي .. انــا اشوف التربيـه تلعب دور أهنيــه الصبي لو متربي بيتــه عدل مايتجراء يلفظ مثل هالألفاظ وترى ماوقفت على المجمعات تعال شوفهم بالفريج شنو يسون يهال صغار لو شافوا شغالـه طالعه اليمعيه مايخلون شي مايسونــه حركات والفاظ لو تسمعهم او تشوفهم تقول هذيل متربين بشوارع مو بيت أوادم والمسؤوليــه تقع على عاتق أولياء الأمور يتوقعون لمن يوفرون لعيالهم النت والتليفونات يعني ريحوهم وسوا انجاز مايدرون ان هلاكهم في هالنت والأجهزه إلي مليانــه فســاد .. .. عشان جذي اقولك أن الغلط الاول على الأم والأب .. ..

امـا الموضوع الثالث .. مايبيلهــا مناقشــه .. (( امك ثم امك ثم امك ثم امك ثم ابوك )) والأم جنتك ونارك راضيها تراضي ربك وماشوف عيب أن الواحد يطلع مع امــه أو يخدم امــه ولي يشوف عكس جذي هذا انسان مريض نفسي اكيد ولا يوم المنــا إلي احط ايدي بيد أمــي واتمشى وونسها وستانس معاها .. .. والله يخليك الأمـك .. ويستر على عيال المسلمين ..


سوري طولت عليك .. بس شسوي فيك أنت موضوعك طويل ويبيلـه نقاش .. .. خخخخ :)

تقبل مروري

[ezgrttee]

اخوي بكل بساطة

العلم في الصغر كالنقش على الحجر

لو الاب والام يعلمون اطفالهم من الصغر اصول التربية السليمة والاحترام واسس الدين الاسلامي

كان شفنا اغلب شباب وبنات اليوم بعيد عن هالسوالف والخرابيط

ولكن للاسف العتب الاكبر على الاهل


صوتك وصل للمعنيين اخوي صوتك وصل : )

تسلم على موضوع

وشاكرلك تواجدك

[صــوتك وصل]

يعطيكم الف الف عافية

و هم انتوا صوتكم وصل

و الله لا يحرمني من ردودكم الحلوه

و كلامكم كله صح