بمناسة زواج اختي

[سعود نت]

السلام عليكم ورحمة الله وبركاتة

أعتقد العنوان غريب نوعاً ما صح ؟؟
أخليكم مع موضوعي أقصد شطحاتي ، واتمنى اشوف تفاعلكم في حال عجبكم

المشهد الأول (..حضور زواج القريبة ،أخت،عمه،خاله،بنت عم، بنت خال..)
يزيد مار بسيارته قدام بيت فيصل وفجاه طلع فيصل من البيت يبي يشم شوية هوا :
يزيـــد : هلا فصولياااااا .
فيصل : هلا ينقص .
يزيـــد : تخاويني للحلاق أبروح أحلق على شان اليوم عرس اختي ؟
فيصل : تحضر عرس اختك !!
يزيـــد : ايه وليش مستغرب ، لاتكون انت من المعارضين لحضور عرس الاخت او العمه او الخاله ؟
فيصل : اجل انت من المؤيدين ؟
يزيـــد : الله يشفيك ياخي هذي اختي مافيها شي وحتى لو بنت عمي بحضر عرسها وحتى لو المعرس مايقرب لي عادي اهم شي ان العروس تقرب لي .
فيصل : لا ماشاء الله عليك رجال ذييييب ذييييب .
يزيـــد : فيصل ياخي تتكلم جد انت وش العيب فيه بالظبط .
فيصل : العيب انك رايح للعرس وجالس مع الرجال ولو جا احد سالك قالك من انت تقوله انا اخو العروس ، والله ياخي يا حلاااة وجهك وقتها ....!!
يزيـــد : انت الكلام معك ضايع ، انا ماني شايف سبب يعيبني وانا رايح لعرس اختي ، وانت مانت معطيني سبب رفضك لهالنقطه ، ولو جلست معك اخر شي واحد مننا بيضرب الثاني انا استاذنك فيصل .
فيصل : حياك الله روح روح معاهم بالزفه اذا اخذوا اختك للزفه خلهم يركبونك جنبها .

المشهد الثاني (..الدخول مع الأخ ، الأخت داخل قاعة النساء..)
يزيد يزف اخته هو واخوه الكبير ولما وصلوا قاعة النساء مسك يد اخته وناظر بالمرايه والغتره والطاقية والعقال والثوب والكبك كل شي ميه بالميه ، بخ على نفسه بختين من عطر اخوه الفواح وقال يالله مشينا اختي :
طلال أخو المعرس : هلا حيا الله نسبانا ، حيا الله زوجة اخوي .
يزيـــد اخو العـروس: الله يحييك ،، بعد اذنك انا بدخِّل اختي داخل لانها مستحية .
طلال أخو المعرس : لا لا يزيد ماعليش تعرف ديننا وعاداتنا وتقاليدنا ماتسمح بهالشي .
يزيـــد اخو العـروس: انا ماني داخل اغازل ..! انا داخل ادخل اختي لانها مستحية ومرتبكه ، ولما ادخلها انا بترتاح معي كوني اخوها وسندها ، وماراح ترتاح وهي مع اختي وبتستحي اكثر ، وياريت تبلغ الحريم داخل يتغطون ، وبكذا ماراح اشوفهم .
طلال أخو المعرس : لا يالغالي ماعليش على ساس لاتصير مشكله من اول يوم بين اخوي واختك وبيني وبينك توكل على الله مافيه دخله عند الحريم .
يزيـــد اخو العـروس: اتوكل على الله !!
طلال أخو المعرس : ايه توكل على الله .
يزيـــد اخو العـروس: طيب انت الحين ليش أصلاً واقف عند الحريم يابو العادات والتقاليد ليه ماتروح عند الرجال دام فيه حارس ؟
طلال أخو المعرس : انا واقف لاني بدخل مع اخوي الحين اذا زفيناه من قسم الرجال لقسم الحريم .
يزيـــد اخو العـروس: ياسلام تقولها واثق بعد ...!! يعني تامرني بالبر ونسيت نفسك .
طلال أخو المعرس : ياخي اللي داخل بنات جماعتي وبنات عمي وخواتي ، ومالك دخل أصلاً سواء ادخل أو ما ادخل العرس عرس اخوي ، وانت عرس اختك يعني انت ضيف وانا معزب .
يزيـــد اخو العـروس: لا ياحبيبي حتى انا خواتي جايات وبيدخلون الحين ، وبعدين حتى لو خواتي مو هنا مو بكيفك تدخل على بنات الناس اللي هم بنات جماعتك يابو جماعه.
طلال أخو المعرس : اقول تعوذ من ابليس وروح لصالة الرجال ، متكشخ ومتعطر كنك انت المعرس وتي تدخل على الحريم .
يزيـــد اخو العـروس: اهاااااه المساله مسالة غيره لانك ماتعرف تكشخ ؟

في النهاية دخل طلال ويزيد ، واحد وصل اخته وواحد وصل اخوه ، وغنت لهم الطقاقه اغنية
(حبه حبه على قلبي حبه حبه) وهاااات يارقص وهات يانظرات ، واخت يزيد عجبها فيصل واخت فيصل عجبها يزيد .

اتمنى اعرف وجهات نظركم بموضوع المشهد الأول ، ويزيدني شرف لو عطيتوني وجهة نظركم عن المشهد الثاني بعد .

سعود نت

[دقات قلبي]

رد: بمناسة زواج اختي

الدارج بعروسنا ان اخو العروس ما يدش الصالة مع اخته وخصوصا ان الحين في فناتق بدشة العروس

يعني تفضل العروس انها تدش بروحها..


واخوان المعرس اي يدشون ويباركون له ويطلعون ويكون فيه زفه كبيره وراه



هذا اللي احنا متعودين عليه



شكرا سعود نت

[سعود نت]

رد: بمناسة زواج اختي

الاخت دقات قلبي
انتي تقولين هذا اللي تعودنا عليه ، بس احنا نبي نطلع من عباية كذا لقينا نفسنا او كذا تعلمنا .

واخوان المعرس اي يدشون ويباركون له ويطلعون ويكون فيه زفه كبيره وراه

طيب هم ماباركوا له بصالة الرجاجيل ..؟ شنو سبب دخولهم لصالة الحريم ؟

ردودك مشجعه ،،، شكرا على المتابعه .

سعود نت

[دقات قلبي]

رد: بمناسة زواج اختي

الاخت دقات قلبي
انتي تقولين هذا اللي تعودنا عليه ، بس احنا نبي نطلع من عباية كذا لقينا نفسنا او كذا تعلمنا .


طيب هم ماباركوا له بصالة الرجاجيل ..؟ شنو سبب دخولهم لصالة الحريم ؟

ردودك مشجعه ،،، شكرا على المتابعه .

سعود نت

نكون واقعيين ياسعود احنا مربوطين بعادات وتقاليد وافكار تربينا عليها هذا عيب

ولا تسوي جذيه هذا مو من عوايدنا ومداخيلنا


كأنا احنا نخلقنا علشان نمشي بخط سير واحد واللي يفكر يطلع عن هالخط المتحجر يعتبر شاذ عنا.. ونضع عليه علامات الاستفهام؟؟


وعلى فكره ياسعود كل شي يتغير بهالدنيا ويتطور من علم وثقافة

والناس وصلوا القمر ويفكرون يعيشون فيه ترا

واحنا مازلنا عند عيب وما يصير واخوج عيب يدش الصاله عند الحريم على ان اخوان المعرس دشوا وباركوا له مره ثانيه نفس ما قلت صح بس هذي عاداتنا وتقاليدنا و متمسكين فيها ولا راضين نغيرها لا من كبار ولا من صغار بس ترا مو الكل في ناس يدشون مع خواتهم عادي


وعلى فكره ياسعود


ترا ما راح تتغير هالافكار


بكون واقعية ولا اقص على نفسي


..


تقبل مروري تارة اخرى


وجرأتي


اختك دقات قلبي

[سعود نت]

رد: بمناسة زواج اختي

حياك الله

على عيني وراسي كلامك كله صحيح

بس دامنا عايشين ومانقدر نشذ عن خط السير اللي تقولين عنه ، خلونا نصحح بعض الأخطاء على شان نخففها .

انتي يا دقات قلبي

لو تزوج واحد من خوانك وانتي بالعرس

تستانسين لما خوانك يدخلون ويرقصون معك صح ولالا ؟

بينما الحريم اللي عندكم البعض منهم بيتضايق وبتصير هالنقطه سلبية وبيقولون الناس مدخلين عيالهم علينا ليش احنا مو بنات حمايل (حتى لو هم عارفين ان الناس وصلوا القمر ويفكرون يعيشون فيه ترا ههههههههههههه )

ونفس الشي لو دخل اخو زوجة اخوك بالعرس ، تلقينك رافعه حواجبك ومعصبه وماحد يقدر يكلمك وكل ماحد من اهلك قال شفيك قلتي (هذا ماوده يطلع ويفكنا ، وليش اصلاً داخل )
كان ودي الاخوان بالمنتدى يشاركونا النقاش باللي يقدرون عليه ، احيانا نشارك على شان نحيي قسم من الاقسام ، مو حباً بالتفكير وعصر المخ والتنسيق والتصحيح والانتظار والمتابعه .

دقات قلبي

تشرفت بحضورك

سعود نت

[راحل بعيد]

رد: بمناسة زواج اختي

بسم الله ,, و الصلاة و السلام على رسول الله و على آله و صحبه و من والاه ..

والله الموضوع جدا رائع .. و كان هناك حاجة ماسة لأن يطرح مثل هالموضوع .. فـ جزاك الله خير على هذه البادرة ..

أولا .. طبعا يتحتم علينا أن نأخذ الموضوع قبل العرف و التقاليد .. من ناحية دينية اولى ..

المشهد الأول :

حضور عرس الأخت ,, ( أقصد الحضور في قسم الرجال ) يعني اكون متواجد مع الرجال فقط .. هذا لا ينافي الدين بل بالعكس .. فيه تهنئة و مباركة للأخ المسلم ,, فهو لا ينافي ديننا الإسلامي

إذن : العادات و التقاليد خلهم ينقعونها و يشربون مايها ..


المشهد الثاني :

لا من دين و لا من عادات و تقاليد .. ولا من منطق .. كلهم ينافون ان احد غير المعرس يدخل .. يدخل المعرس لحاله ( رجال يعرف يتصرف ترا لحاله ) يدخل يروح لزوجته ( و اذا ما يدل كرسيها ياخذ Navigation معاه عشان يدل ) .. و يطلع هو وياها وسط فرحة امه و خواته فيه ...

أما مسألة اخو المعرس يدخل يتميلح .. أو مسألة اخو العروس يدخل يساند أخته ( الله أكبر يا فاندام ) تقل أخته داشة حرب مو متزوجه .. فـ هذا كله خرابيط مع احترامي ,, و ما هي عزيمة و لا هي حلا عشان الكل يدخل .. يدخل المعني بالأمر .. يقضي أمره - يأخذ زوجته - و يتوكل على الله ..


هذي وجهة نظري .. بس المصيبة سالفة لو جاني واحد و قال انت تبي تنهي اللي تعودنا عليه طول عمرنا .. أبي أقول اي ابي انهي اللي تعودت عليه طول عمرك .. اللي تعودت عليه هذا جهل و دناءة و ليس من الخلق في شيء ..

و هذي هي وجهة نظري ,, اتمنى ان يتم تقبلها كما اتمنى المعذرة على نوع الأسلوب فـ الصراخ يأتي بقدر الألم ..


شاكر لكم

[سعود نت]

رد: بمناسة زواج اختي

[align=center]
السلام عليكم ورحمة الله وبركاته

الاخ (راحل بعيد) عبدالوهاب العنزي

رفقاً بالعادات والتقاليد ، ما تستحق اننا نسبها وانا اخوك ، وزي مانت تفضلت هي جات في وقت الجاهلية ..

العادات والتقاليد قالت :
* البنت ماتكشف على غير اهلها .
* اكرام الضيف واجب .
* لا تتكلم في عن رجال في غيابه .
* لاتنقل الكلام بين فلان وفلان على شان تخرب بينهم .

وغيره الكثير ، يعني بعد لها ايجابيات وكثير من هالقوانين والانظمه تجاري تعاليم ديننا الحنيف ، بالرغم من وجود السلبيات الا انه لا يحق لنا سبها ، وانت تعلم ذلك كونك من أحد أعرق قبائل شبه الجزيرة العربية والتي انتمي لها ايضاً بفضل الله ، ولكن شكلك معصب :)

و اذا ما يدل كرسيها ياخذ navigation معاه عشان يدل

هذا لو تبي الصمان مستعد يوصلك :)

و هذي هي وجهة نظري ,, اتمنى ان يتم تقبلها كما اتمنى المعذرة على نوع الأسلوب فـ الصراخ يأتي بقدر الألم ..

ثق تماماً وبدون مجامله ، اني تنومست بردك ، وافتخرت فيه ، وزادني شرف

سعود نت
[/align]

[راحل بعيد]

رد: بمناسة زواج اختي

looooooooooooooooool حلوة الصمان


بس الله يهداك أنا ما سبيت العادات والتقاليد أنا قلت دام إن الدين ما يمانع ف ما همتني العادات والتقاليد


و إنت علي ذكرتها يا الذيب كلها الدين راضي عنها بل و ينهي عن مخالفتها .


شاكر لك يالغالي على التعقيب او عساك على القوة.

[Demon of Dark]

رد: بمناسة زواج اختي

السلام عليكم
يعطيك العافيه خيو ع الموضوع المهم
انا اقول بكل بساطه
المشهد الاولى معاه حق اكيد مايصير يدش مع اخته
والمشهد الثاني اثنينهم غلطانين
<==== صج اني من الحضر بس هم ماانحب احد يدش عندنا
نبي نستانس مو كل شوي لابسين عبايات وقاعدين انتفرج
...
تقبلو تواجدي المتواضع
لكم مني الاحترام
..

[وصايف q8]

رد: بمناسة زواج اختي

اهنيك يا سعود على هالفكره الحلوه وهالطرح الجميل


في عادات اعتدناها في حياتنا الاجتماعيه ومازلنا محافظين عليها والفكره في دخول الاخ مع اخته بلليله زفافها الى صاله الحريم مو عشان والله انها تعلم الناس ان هذا اخوي شوفوه ، الفكره ان البنت تحس بعزوتها لا دش معها اخوانها خصوصا ان العرس في اهل الزوج ايضا فالبنت تفخر بدخولها مع رجالها قدامهم.. وهذا شي يمكن ما يفهمه الا البنات لان مو حلو تدخل بروحها .. وهذا رأيي الشخصي..

وبالنسبه للرجل هم مو حلوه يدخل بروحه جذي بدون زفه يعني لازم يدخل معاها ابوه واخوانه وعمامه وخواله بعد والحريم الله لا يهينكم عبيكم عليكم لين تخلص الزفه وياخذ المعرس عروسته ويطلع يعني صحيح انهم باركوا له بصاله الرجال وخلاص بس فرحه دخول اخوهم معرس للصاله فرحه اخرى لا تنوصف الا لما يشوفون احداثها الا لما يكونون وياه ، وبعد لا ننسى فرحه الام بدخول ابنها وحوله اخوانه بالصاله هذي بعد شعور لا يوصف لدى الام..

براي هذا شي مو عيب ولا يخالف الدين الا من كانت بنفسه امور اخرى مثل التخزز والنظرات الجانبيه وكذلك الموضوع للبنات ايضا >> يعني تدرين الرجال بيدخلون الصاله تغطي عدل لين يطلعون مو تغطين شي وتخلين شيات ..

تقبل مروري..

[سعود نت]

رد: بمناسة زواج اختي

راحل بعيد

اسعدني مرورك يابعدي ، اتمنى تكون من المتابعين لمواضيعي انا يهمني تتابعني وعقب على مواضيعي سواء بالنقد او غيره .

سعود نت

[سعود نت]

رد: بمناسة زواج اختي

Demon of Dark

المشهد الاولى معاه حق اكيد مايصير يدش مع اخته
والمشهد الثاني اثنينهم غلطانين

طيب اختي بما انك بنت وبيوم من الايام بتكونين عروس باذن الله او يمكن كنتي عروس ،، اتركي كل شي على جنب وقولي لنا بصراحه ، ماودك اخوك يمسك يدك ويدخلك لين يوصلك للكوشه ، ويمزح معاك شويتين ويرفع معنياتك لين تطمئنين بعدين يمشي ،، حلوه ولالا ؟ ولا حلوه بس لها سلبيات ؟

<==== صج اني من الحضر بس هم ماانحب احد يدش عندنا
نبي نستانس مو كل شوي لابسين عبايات وقاعدين انتفرج

اختي كل مجتمع بالعالم حتى بامريكا قايم على شريحتين (الحضر والبدو) ، احنا مانقول هالاشياء محصوره على البدو بالعكس هي للاثنين سوا ، وانا اطلب رايك كــ بنت واطلب من فلان رايه كــ رجال ، ويهمني ويشرفني اشوف رايك وتجاوبين على اسالتي .

سعود نت

[سعود نت]

رد: بمناسة زواج اختي

وصايف q8

الفكره ان البنت تحس بعزوتها لا دش معها اخوانها خصوصا ان العرس في اهل الزوج

هذي الغايه اللي كنت المح لها من اول واستغربت انه في منتديين انا مشارك فيهم منزل نفس الموضوع ولاحد ذكر هالشغله الا انتي ..!! ولا هو قصور فيك بس مع تقارب وجهات النظر والعادات والتقاليد ومع ان 80% من الخليجيين يدخلون العيال مع خواتهم الا ان ماحد ذكر هالشي واذا اعتبرنا ان هالشي خطأ ، فا اعتقد السبب اللي ذكرتيه يشفع لانه يكون صح .

وبالنسبه للرجل هم مو حلوه يدخل بروحه جذي بدون زفه يعني لازم يدخل معاها ابوه واخوانه وعمامه وخواله بعد والحريم الله لا يهينكم عبيكم عليكم لين تخلص الزفه وياخذ المعرس عروسته ويطلع يعني صحيح انهم باركوا له بصاله الرجال وخلاص بس فرحه دخول اخوهم معرس للصاله فرحه اخرى لا تنوصف الا لما يشوفون احداثها الا لما يكونون وياه ، وبعد لا ننسى فرحه الام بدخول ابنها وحوله اخوانه بالصاله هذي بعد شعور لا يوصف لدى الام..

على فكره كوننا ننتمي لنفس القبيله (هذا ماعرفته من خلال بعض مشاركاتك) اعتقد ان هذا عامل مشترك بيننا وعمله موحده لن نختلف عليها وسنؤمن بها اليوم وغدا وبعد الغد كما آمنا بها سابقاً، الا انني ارى في هذه النقطه لاحاجة لدخول صالة النساء ويكفي زفة المعرس من صالة الرجال لباب النساء وليدخل والد المعرس فقط ، مع العلم انكي بعثرتي اوراقي بخصوص هذه النقطه حينما ذكرتي فرحة الام برؤية اولادها .

تقبلي فائق الاحترام والتقدير

سعود نت

[غاليه بعيون مغليها]

رد: بمناسة زواج اختي

يعطيك العافيه على موضوع


حيل حلو وعجبني


وانا مع دقات قلبي وكلامها كله صح


ولزم تعيش بالواقع يا سعود


هذا عالمنا ماكو شي تغير فيه ولا تنسي العادات والقاليد

[سعود نت]

رد: بمناسة زواج اختي

غاليه بعيون مغليها

يعطيك العافيه على موضوع


حيل حلو وعجبني


وانا مع دقات قلبي وكلامها كله صح

الله يعافيك والله يخليك لدقات قلبي ويخلي دقات قلبي لك

ولزم تعيش بالواقع يا سعود

ولازم نقارنه بالمنطق بعد لان واقعنا اللي نعيشه مو اصح من المنطق المتفق عليه من جميع الشعوب .

هذا عالمنا ماكو شي تغير فيه ولا تنسي العادات والقاليد

انا كنت ادافع عن العادات والتقاليد مانسيتها وانا اخوك .

شكرا لحضورك وتشرفت بمرورك

سعود نت