منو يعرف ليش النمله طاحت من الجبل؟؟

[كتكووته^^مكتكته]

موضوع عجيب قراته بأحد الصحف

كاتب هالموضوع يسخر من عقليه بعض البشر

اللي يتهافتون على القنوات الفضائيه التي لحست عقول البعض

وتحاول هالقنوات مص اموال الفرد من خلال تحميس غير شريف بينه وبين فرد من دوله اخرى

وهات يا تصويت

ويامسجات

طبعا هالشي نشوفه وللاسف واضح اكثر شي بالمجتمع الخليجي

من خلال البرامج الهابطه كستار اكاديمي والوادي وغيره


هذه البرامج التي تشرك مشارك خليجي معاها حتى تزيد الربح الخسيس لها بالنهايه

وفي نهايه المطاف

تكون الحصيله سب وشتائم بين ابناء الخليج عبر sms وكلام جدا مخزي


اترككم مع المقاله وعقبها نتناقش

نملة طاحت من الجبل .. ليه ؟


و يالله كثفوا إتصالاتكم وتواصلوا معنا .. والمنافسة قوية بين السعوديين والمصريين
أخواننا في الكويت ما شفنا حماس من عندهم وبإمكانهم الإتصال بنا على الرقمين
( شركتي الإتصال بالكويت) ...ولا زال التنافس بين السعوديين والمصريين ...فين باقي
الشعب العربي ؟؟؟؟؟

أين الشعب العربي ؟؟
مذيعة تتسائل بكل جنون عن الشعب العربي ... تشحذ همم الشعب العربي و تستحثهم
للإتصال ببرنامج (كبسة ربح) والإجابة على أسئله ساذجة لا تقل سذاجة عنها وعن
معدّ البرنامج وعن كل متصل على هذا البرنامج ..
إليكم نموذجاً مبسطاً من الأسئلة ..

-نملة طاحت من الجبل.. ليش ؟
-لاعب نزل للملعب ببطانية ..ليش ؟
-غبية أحرقت بيتها ..ليش؟

فعلاً أسئلة منطقية !!!
أيصل بنا الحال أن تكون مسابقاتنا على هذا النحو الساذج ؟..أيصل أن يذاع على الهواء
مباشرة عن إحتدام المنافسة بين الشعب السعودي والمصري للبحث عن إجابة ساذجة؟

تنادي هذه المسكينه ..المساكين الذين يقبعون خلف الشاشة للإجابة على تساؤلاتها..
ولكن !! لو لم تكن هي أو من أعد البرنامج على يقين بوجود من سيرد على هذه الأسئله
هل تعتقدون أنها ستوافق على تقديمه ؟
الإجابة " لن توافق " فهي تحمل يقيناً جازماً بوجود من سيرد عليها ويتفاعل ..
وبالفعل.. أصابت الهدف بيقينها ..فالإتصالات تتهافت عليها بشكل غريب ومن رجال
يظهر من أصواتهم أنهم كبار في السن .. والأغرب من ذلك أنه يعطي إسمه كاملاً
أمام الملأ ويظهر حماساً منقطع النظير في إعطاء الإجابة .. ويتنهد بحسرة في حال كانت
إجابته خاطئة ...

ولازال الحماس من الشعب السعودي والمصري قائماً على أشده
و أخواننا في الكويت يواصلون الإتصال ... أين باقي الشعب العربي ؟؟

شتّان بين نداء مذيعة قناة strike و نداء جوليا بطرس للشعب العربي؟
الندائين يختلفان في المغزى منهما ..

أوجه الشبه بين الندائين:
1- فتاة التي تنادي .
2-النداء للعرب بشكل عام .

الفرق بينهما:
1- هذه تدعوا للسذاجة وجوليا تدعو لتوحيد الصف العربي ....
2- غفلة العرب عن نداء جوليا .
3- تلبيتهم بحماس لنداء مذيعة برنامج (كبسة ربح).!!

(مخرج 13)

متى نرى قناة عربية على غرار قناتي
(Discovery) أو (National Geographic) ؟

و لنتسائل الآن

نملة طاحت من الجبل .. ليه ؟



.............. انتهى ..............



عزيزي العضو.. بصراحه جم مره ارسلت رساله لمثل هذه النوعيه من البرامج؟؟
هل انت متابع جيد لهذه البرامج وتحرص على ادق تفاصيلها؟
لةو خيروك بين برنامج real tv وبرامج قناة discovery مثلا او برنامج علمي اخر ايهما تختار ولماذا

للامانه؟؟

[عنوسه ^_~ ماتهاب]

بخصوص قنوات الاغاني والي يدزون مسجات كنت اعتقد بالبدايه انه القناة نفسه تسوي جذيه بس ليما اقرا الكلام انصدم وقول هذا جهل صراحه

وتسلمين اخت كتكوته



وبخصوص الاختيار انا مشترك بشوتايم عشان قناة discovery :)

وكان افضل برنامج فيها ليما تكلمو عن الحقل المغناطيسي للارض وسبب تدني قوته عن سنين الماضيه واقصد بالماضيه قبل الف سنه

واهيا قناه علميه يجيبون كل شي جديد ويعطونج المسببات لاشياء معينه واعتقد انه المشاهد يستفيد منه اكثر من القنوات الي اسميه مسجات

تسلمين كتكوته علي هالموضوع المهم

[*~بنت الفريج~*]

يعطيج العافية

موضوعج ذكر أكثر شي يبط جبدييييييييي بالتلفزيون

والله ناس فاضية وماعندها شغل

انا اكرررررره القنوات مالت المسجات بشكل مو طبيعي

ينرفزوني يرفعون ضغطي يبطون جبدي اييبون لي حارج كلشي كلشي

باختصار ماحبها

ويعني مادري شلون واحد عنده عقل وفاهم يسوي هالشغلات السخيفة

يعني ماكو شغل اجاوب ليش نملة طاحت من على جبل؟؟

والله انا اقول من كثر الملاقة والسخافة



انزين خلي هالبرامج

برامج المسابقات الغنائية

بيييه شكثر ماحب اللي يدزوون مسجاات

يعني شنو ادز مسجات واتصل عشان أفوز واحد اهوا مايدري عني ولا يعرفني




لا وشغلة تقهر أكثر

اهيا مرة شفتها في منتدى

واحد أو ماطلع عيسى من ستار اكاديمي

حط موضوع بمنتدى مضمونه : بييه ليش نسبة عيسى بالتصويت جذي ؟ صراحة تفشلون يالبحرينيين محد صوت


شهالسخافة؟؟ الحين اذا صوتنا نصير مانفشل؟؟


وي وي وي ماحبهم


وبعد المحطات اللي فيها تحت شريط حق المسجات وييييييييع

هاي شلونكم ... باي بروح انام .. انا فلان من مادري وين .. انا مادري منو الحلوة

:@


انزين الحين بجاوب على اسئلتج :p


عزيزي العضو.. بصراحه جم مره ارسلت رساله لمثل هذه النوعيه من البرامج؟؟

ولااااا مرة ولاافكر ولا افكر اني افكر فيها



هل انت متابع جيد لهذه البرامج وتحرص على ادق تفاصيلها؟
لاا .. انا من أشد المعارضين لها ومن أشد اللي يكرهونها



لةو خيروك بين برنامج real tv وبرامج قناة discovery مثلا او برنامج علمي اخر ايهما تختار ولماذا

للامانه؟؟

discovery


احب بعد

animal planet

:p

قولو عني ياهل بس احب برامج الحيوان وجذي

واحب بعد البرامج اللي عن الحضارات والبرامج اللي عن الاشياء الغريبة

وبعد المسلسلات الاجنبية الكوميدية احياناً


غير هذا ماشوف التلفزيون

لأن ماعندي وقت اصلاً ^_^


مشكورة على الموضوع .. طلعت اللي بقلبي كله ^_^

[كتكووته^^مكتكته]

مشرفنا الغالي


انك تمر على احد مواضيعي امر

وانك تكون اول المارين امر ثاني


الف شكر لك


انا بعد مشتركه بقناة ديسكفري

وامووت وايد على برامجها


انا عموما تستهويني هالنوعيه من البرامج

والبرامج العلميه والسياسيه واللي تعتمد عالحوارات والمواجهات

ابدا مااحب برامج الاغاني والمنوعات والمسابقات وان كان بعضها هادف ومفيد

الا اني افضل الكتاب عليها

واعتبره خير صديق للانسان


مشرفنا الكريم


نورت

ولاتبخل علينا بطلاتك العزيزه

[ساسكي]

تدرون ليش هالقنوات ماشي حالها ؟
لأن فيه بقر قاعدين يربحونها من خلال المسجات
أما بخصوص ( ستار أكاديمي ) فهي ذات توجهين الأول هو إنحراف الشباب و الثاني المربح

الله يعافينا و إياكم من قلة العقل و يثبتنا على ديننا و يرجح عقولنا ( آمين )

أما أنا فكنت أفضل قناة ( دبي الإقتصادية ) لأنها كانت تطلع برامج مفيده و علمية و أنا من عشاق العلوم .
ألحين أنا أشوف قناة DW الألمانية و المترجمه بالعربية و أيضا قناة Discovery

[كتكووته^^مكتكته]

بنت الفريج


اللي تقول كلام نفس كلامج ينقص السانه اللي يقول عنج ياهل

بالعكس عالم الحيوان في اسرار غريبه عجيبه احنا الكبار نجهلها ومانعرفها

تسلملي طلتج

والله يكملج بعقلج يارب

[كتكووته^^مكتكته]

ساسكي

تسلملي هالطله

وهالراي السديد

بس وين اللي يفهم عاد

[سعودي رايق]

كتكوته مكتكته

موضوع ولا احلى وانشالله الجميع يتفهم مغزى هذه القنوات الهدامه


واكيد هناك عقلا ينتقدون هذه الامور وعدم ترك مسار الامه انحداري

......... تحياتي لك أختي

[كتكووته^^مكتكته]

سعودي رايق


الف شكر لتواجدك العذب


شاكرتلك يالغلا

[AWRAD]

تسلمين كتكوته على الموضوع
---------------------------



عزيزي العضو.. بصراحه جم مره ارسلت رساله لمثل هذه النوعيه من البرامج؟؟

اذكر اول ما بدت القنوات تحط شريط حق المسجات .. دزيت مسج واحد اهدي فيه اغنيه حق نفسي :) .. كان على قناة روتانا .. كنت حابه اجرب .. وعقبها ما دزيت

بس حق البرامج اللي ذكرتيها .. ولا مرة دزيت .. لانها وايد تستخف بعقليه المشاهد
كنت ما اعرف هالقناه .. بس كنت اسمع رفيجاتي يسولفون عنهم و عن سخافتهم.. حبيت اشوفهم .. حطيت على القناة وحاولت اتابعها علشان اعرف شنو اخرتها .. بصراحه ما استحملت .. نقدت على روحي اللي ضيعت عشر دقايق من وقتي علشان اشوفها


هل انت متابع جيد لهذه البرامج وتحرص على ادق تفاصيلها؟

لا والله

لةو خيروك بين برنامج real tv وبرامج قناة discovery مثلا او برنامج علمي اخر ايهما تختار ولماذا

اكيد برنامج علمي
بس انا اساسا ما احب اشوف التلفزيون :) .. والبرنامج الوحيد اللي اتابعه من اوله لي اخره : اوبرا


الله يعطيج الف عافيه .. وشكرا على طرحج هالموضوع .. لان هالبرامج ماله داعي تنعرض اساسا

[كتكووته^^مكتكته]

حبيبتي اوراد



اوبرا هذي موضوع ثاني

يمكن في يوم اخصص موضوع حقها بروحها

ماراح اتكلم عن شخصيتها لان مو هذا المهم

ماعلينا

كل شي بوقته حلو


شاكرتلج طلتج وتجاوبج


منوره قلبوشه

[الكل بالكل]

كتكوتي


يعطيج العافيه وهنيئا للمنتدى عضوه رائعه ومشرفه قديره مثلج

فعلا برامج سخيفه همها الوحيد الربح وان كان يستخف بعقول البشر

وطبعا للاسف اغلبهم من اهل الخليج
صدقيني برنامج مثل هالبرامج لو مااشترك فيه خليجي بيخسر والسبب اننا خيرنا لغيرنا صايرين مثل عين عذاري


مو هذا المهم

انا تعرفين

عمري ماطرشت مسج ولا افكر لانهم صج سخيفين


طبعا برامج مث لقناه ديسكفري فيها فايده اكبر رغم انها قناة مو خليجيه ولا عربيه
وهذا يدل على اننا نتراجع والغرب يتقدم
بوقت الي احنا لاهين فيه بستار المهازل

[msn]

موضوع جدا حساس وحلوو



انا واحد من الناس من بدا ستار اكاديمي وانا قاعد اتشمت على الي يدزون مسجات


وعلى فكره اهي بس يبيله شويه تفكير بالذات على ستار اكاديمي انهم مايطلعون الخليجين الا اخر شي



وبالنسبه للبرامج الثانيه ماطلعت الا بعد ستار اكاديمي وغيره



وهالاشيااء تخلي الواحد يفكر يسوي قناه حق الخبول ويسحب فلوسهم ،،،




وانا بصراحه القناه الي صج تعجبني الحره animal planet
وغيره من القنوات المفيده طبعا


وشاكرلج

[كتكووته^^مكتكته]

الكل بالكل



ليتنا نتعظ
ونعرف ان اغلب هالبرامج هدفها الوحيد زعزعه صفوف الخليجين وزرع الفتن بينهم

بس وين اللي يقدر عاد ويحس

[::.нĩτΊєґ.::]

[align=center]طاحت من الجبل يمكن خبله او تبي تنتحر هههههه
والله سؤال يحير ويشغل المخ

والله صراحه الي يعلق على الشي لازم يكون متابعه
خطوه وبخطوه
وهذي القنوات غزت عالمنا العربي اتوقع انه من الجهل والتخلف
وقلة الايمـان << وهذا السبب المباشر[/align]