(( كلمات سرقتها من دفتر طفل !! ))

[عاشق عزف]

[align=justify]هذه كلمات مسروقه من دفتر طفل كتبها بعامية اللغه .. ودهشة السؤال ؟؟.!

السبت : فتحت عيوني .. أدور عن نور .. أمروني : < غمض > .. و ... غمضت .. بعدها ما شفت لا ابيض ولا اسود !


الأحد : كنت أسمعهم يقولون : < ألعن أبوك ! >, < يا حمار > , < يا حيوان > , < يا ثور > , < يا بقرة > , < يا لوح > , < يا جدار > ... فتوقعت اني في حديقة حيوانات .. فتحت عيوني ابغى اشوف هـ ( الحيوانات ) .. قالوا لي : " ما يصلح تشوف قلة أدب " .. سألتهم : طيب .. في عصفور ؟؟

صرخوا في وجهي : < انطم وغمض > ..!!


الاثنين : سمحوا لي اشوف التلفزيون .. كنت لحالي منسجم مع أفلام كرتون .. د خلت امي .. وكان ابو عائلة ادمز ( يبوس ) أمهم .. ركضت امي .. غيرت القناة .. وصرخت بأعلى صوتها ... " عيب عليك .. قاعد تشوف قلة أدب ..!! " ناظرتها بكل براءه وانا متعجب من اللي صار : " طيب شو صار ؟؟ أبوهم يبوس أمهم ! .. " قالت لي وهي معصبه ( التبويس .. قلة حياء !! )

بعدها بأسبوع .. شفت امي تسلم على ام الجيران و ( تبوووووسها ) .. قلت لها وانا كلي أسى " يا ماما .. التبويس قلة حياء !! " ..

الثلاثاء : كانوا بنات خالتي عندنا .. وكنت الولد الوحيد اللي يلعب معهم .. و أبوي بيحلق عيونه فيني وين ما رحت ووين ما جيت .. بعد ما راحوا .. ناداني أبوي وقال : " عيب الواحد يجلس مع بنات .. قلة أدب .. ! " ... بعدها بكم يوم .. كان أبوي جالس مع عماتي .. ناظرته بطرف عين ( وتبون الصدق حقدت عليه ) .. وقلت له : " اللي يجلس مع بنات .. قليل أدب !! " ..

الأربعاء : كنت اسمعهم يقولون ( صدام قوي ) .. وأعجبني ... بعد الأزمه .. قالوا ( حرامي ومجرم ) .. سألتهم : كيف ؟؟ !! .. قالوا : " حرامي ومجرم .. وبس .. واسكت ..!" وكنت أسمعهم بعد يقولون ( جيم كاري .. فاسد ) .. فكرهته على طول .. وكانوا يشوفون أفلامه .. و يضحكووون.. كنت أسألهم " ليه تضحكون ؟! .. ما تقولون انه فاسد " ... قالوا .. ليش تنطم بس .!؟؟

الخميس : أبوي يقول < التدخين > حرام .. و اللي يدخن يدخل النار .. وفي يوم شفت ابوي جالس مع صديقه أبو حمد .. وأبو حمد ماسك السيجاره بيده .. وقفت وسألت ابوي " طيب اللي يجلس مع اللي يدخنون .. يدخل النار بعد ؟ " !! ..

الجمعة : أسمعهم يقولون .. ان اللي يطول في مكالمته يغازل .. و اللي يروح للسوق يغازل .. و اللي يعرف انترنت يغازل ... و امي تطول على التلفون .. وتروح للسوق .. و تطقطق على الكمبيوتر .. رحت لأبوي وانا مصدووووم : " أبوووووي الحق .. أمي تغازل !!!! ...

للاسف هذي صور من المجتمع !!!

اسمحوا لي بطرح سؤالا ً هنا و أود منكم التعليق !!!!

ما رأيكم في مجتمعاتنا العربية بشكل عام .. نأمرهم بفعل شي ما و نحن نقوم بفعله مهما كان قبيحا ً ..

نريدهم أن يكونوا أعضاء صالحين في المجتمع ونأمرهم ( أي أطفالنا ) بأمور نحن لا نتّــبعها أساسا ً
أو يجدون المجتمع بأسره عكس تلك الصفه !!

تناقض عجيب

فكيف ذلك

و أيضا كيف لنا أن نربى أطفالنا بتلك الطريقة لسلبيه التى تقوم على الأوامر و النواهى و لا نناقشم ثم يكبر هؤلاء الأطفال لنعود نشكو بأن أبناءنا لا يصارحوننا بأسرارهم و يفضلون الحديث مع أصدقاءهم ؟

ألسنا نحن من غرس تلك البذور فيهم ؟

ألسنا نحن سبب هذا البعد ؟

أتمنى أن أستمع إلى أراءكم

خالص تقديري وإمتناني

وعذرا لبعض الالفاظ ولكن كان يحتم علي نقل الصورة كما هي في حياتنا ..

سلامتكم

من ايميلي[/align]

[HoNeY RoSe]

ههههههههههه

صراحه هالياهل حده واو لووول..

مسكين تأدبى بحياته كل شي عيب وقلت حيا ..

:)

مشكوره بايا ع الموضوع

[الناس غيروك...]

والله ما ادري شنو اقول بس ترا كل المجتمعات جذي سواءا العربية او الغربية ..

[BiShOw]

و الله حاله


يسلمو عالموضوع ...


بس على فكره ترا الكبت يولد الانفجار فمو كل شي يصير نقول عيب و حرام ,,،،

انزين سكتنا ...

طيب و بعدين ... نقعد بطاليين و ما نسوي شي لان "عيب"

[BaSKo0Ta]

[align=center]

عاشق عزف

موضوعك مميز بجد !!

للأسف .. هذا العيب والكبت اللي نعلمه عيالنا .. قاعد ينعكس بطريقه سلبيه جداً عليهم ..

وقاعدين يعيشون تناقض في حياتهم لمن يكبرون .. وفي أشياء لازم يتعلمونها بتقدمهم في العمر .. لكنهم يمتنعون عنها بسبب العيب اللي تعلموه في الصغر .. وهذا قد يسبب مشاكل عاطفيه .. ونفسيه .. وجنسيه أيضاً !!






[/align]

[دلــ بزياده ـــع]

لؤؤؤؤؤؤؤؤؤل

فديته هالياهل مظلوم وايد :(

ميرسي

[عازف السيمفونية]

ولا تنهَ عن خُلُقٍ وتأتي مِثلَهُ .. عارٌ عليكَ إذا فعَلتَ عَظيمُ


عاشق العزف ..
فعلاً ( واقع ) لم نحس به في يوم ..
نظن دائماً أنها أمور روتينيه في حياتنا ..

لكن ..!

من يقف ويدقق في هذه التصرفات يجد أنها طرق مؤديه إلى نهايات مظلمه .. قد لاتحمد عقباها ..!

عزيزي ..
نحن كـ(عرب ) ليست من شيمنا هذه التصرفات ..!!

فـ لذلك أنا أستنجت أمرين :

1/ إما هالتصرفات ليست منا .، وهي تفرعات شخصيه لا تعرفها قواميس العرب !!

2/ إما نحن ( معربين النطق ) ، أي أنا عرب بالتحدث والتصرف .، لإن هذه الأمور ليست من قيم الرجل أو المرآه العربيه الشرقيه ..!


..

موضوع جداً جميل .. عاشق عزف
الله يعطيك العافيه


ع ـــآزف

[bent alkuwait]

[align=center]مشكور وقواك الله[/align]

[حنان الشوق]

بصراحة هذاا حالنا
المفروض نحاول بقدر الامكان
ان نربي اطفالناا بالطريقة الصحيحة

مملكة الاطفال مملكة صعب وصفهاا وفهمهاا بنفس الوقت

تسلم اخوي ماقصرت
يعطيك العافية ,,

[عبـاس بن فرنـاس]

خووووووووش ياهل

و الله يعينه على اهله الي مووو مترقعين

و صج هذا حالنا ما نتغير ابد

[*TanTosHa*]

تربية الطفل معقدة جدا ,,وتتطلب وايد اشياء من الاب والام ,,
فطبيعه الطفل فضولي ويحب بعرف كل شي ,,فلازم تكون ايجاباتنا على تساؤلاتهم مو متناقضه مثل ما ذكرت ,,وان نتوصل لحل لهذه التساؤلات بطريقه سهله ممكن ان الطفل يقتنع فيه ,,

ألف شكر لك خيي على هالطرح المميز
وا قصرت
^_^