هل تقبل ان يفتـــــشك احد؟!؟!؟!؟!

[كتكووته^^مكتكته]

مرحبا

موضوع واضح من عنوانه ,,

انت في مكان عام
واستوقفك شرطي وقالك بفتشك
هالامر من صلاحياته بس انت مو مسوي شي
تسمح؟؟


دخلت الى احد المحال التجاريه واحد الاشخاص فقد شغله هامه وقالولكم محد يطلع قبل ما يتفتش
تسمح؟؟


انت في مدرسه وصاح الناظر تفتيش .,
وبدأ التعبث بجنطتك ومد الايادي بمخباتك
تسمح؟؟!


كل الامثله السابقه من صلاحيات المفتشين ولكن هل تسمح؟؟

نأتي للصعيد العائلي ,,
من باب الفضول او الحرص ,,
خرجت من غرفتك لتعود بعد ساعات وتكتشف ان شخصا ما ( تعبث ) بغرفتك وحاس باغراضك وانت استقصاء الامر اكتشفت انه احد والديك والسبب ان هالامر من صلاحياته كونه والدك ومن حقه معرفة ما تخفي وتظهر
تسمح؟؟


نأتي للمتزوجين او حتى العزاب ,,
هل تسمح لزوجتك وهل تسمحين لزوجك بتفتيش اغراضك من دون سبب فقط من باب الحرص والاطمئنان؟؟


هل تسمحين لاخوك او اختك هل تسمح لاخيك او اختك بتفتيش اغراضك من باب الفضول او حتى الحرص؟
ان شك احد ما بأنك سرقت او تطفلت على احد املاكه الشخصيه واراد تفتيشك ليتأكد هل تسمح له ليطمئن وتبرا نفسك او ترفض كون هاالامر اتهام في غير محله وتعدي على اخلاقك ومثلك ؟!!


للموضوع جوانب عده ,,
اشخاص لهم صلاحات التفتيش كرجال المرور مثلا او المعلم او الوالدين
ولكن النفس البشريه ترفض ان يتطفل هؤلاء علينا كوننا لم نخطأ ,,
ما الحــــــــل ..؟

وكيف نتصرف ؟



~*¤ô§ô¤*~النقـــــــــــــاش هدفنا~*¤ô§ô¤*~

[العبداني علي]

السلام عليكم ورحمه الله وبركاته
يعطيج العافيه ماما كتكوته:)
على الموضوع الروعه
وهذا ما تعودناه منج
التميز دائما
والله يخليج لنا دوووووم
...
المشاركه
........

انت في مكان عام
واستوقفك شرطي وقالك بفتشك
هالامر من صلاحياته بس انت مو مسوي شي
تسمح؟؟

اختي العزيزه هنا فيه تفصيل في هذه القضيه
اذا كنت ماشيا على الارجل واستوقفني هكذا
((من امه طاااف)) والله ما يفتشني لو شنوووو
الا اذا التفتيش جماعي فهذا شي ثاني فحالي من حال غيري اما انا بالذات من بين هلعالم
لا ما يفتشني واذا يعني قاعدين يفتشون عشوائي هم لا ما يفتشني
واصلا من يوم يقولي بفتشك بمشي وباخليه ماني واقف له :)
واما اذا كنت على سيارتي واستوقفني مني والطريج وقالي بفتشك باعطيه (النظره هذي اللي من فوق لتحت)):) بنقده وبمشي واخليه لانه انا اذا ما سويت شي وموقني ويطلب اثباتي احرك واخليه فشلون بالتفتيش ((والله ليبطي ما فتش :)))
واما اذا نقطه تفتيش ((بس كتحفظ امني وطلب رخصه وجذي وقالي بفتشك بارفض الا اذا معاااه تصريح بالتفتيش))لان هذي اعتبرها اهانه جدام العالم...........

دخلت الى احد المحال التجاريه واحد الاشخاص فقد شغله هامه وقالولكم محد يطلع قبل ما يتفتش
تسمح؟؟

في هذي القضيه لا امانع من تفتيشي اذا كان التفتيش جماعي
ومادام ان فيه سبب مقنع لهذا التفتيش وهو ضياع شي مهم او سرقته فلا امانع
.........

انت في مدرسه وصاح الناظر تفتيش .,
وبدأ التعبث بجنطتك ومد الايادي بمخباتك
تسمح؟؟!

ناسف السوالف هذي عند البنات بس واللي هو تفتيش بالطابور
اما مدارس الشباب مافيها هسوالف فيها تفتيش يكون دايما في الحصص
وانا بالنسبه لي ماكانووووا يفتشوني كلش لاني كنت ((مضرب مثل في الشخصيه الحسنه))<<كنت مطوع :) وياليتني اقدر ارجع زي اول :(
..........

نأتي للصعيد العائلي ,,
من باب الفضول او الحرص ,,
خرجت من غرفتك لتعود بعد ساعات وتكتشف ان شخصا ما ( تعبث ) بغرفتك وحاس باغراضك وانت استقصاء الامر اكتشفت انه احد والديك والسبب ان هالامر من صلاحياته كونه والدك ومن حقه معرفة ما تخفي وتظهر
تسمح؟؟

اذا احد والديني ما عندي مشكله خل يقلب على كيفه
يقلب كل شي الا السياره :)

..........

نأتي للمتزوجين او حتى العزاب ,,
هل تسمح لزوجتك وهل تسمحين لزوجك بتفتيش اغراضك من دون سبب فقط من باب الحرص والاطمئنان؟؟

لا هني نوقف مع اني غير متزوج ولكن ارفض رفضا باتا وجااازما ان تقوم زوجتي بتفتيش كبتي
ماعندي مانع ترتب ملابسي اوكي بس تفتش لا :)
...

هل تسمحين لاخوك او اختك هل تسمح لاخيك او اختك بتفتيش اغراضك من باب الفضول او حتى الحرص؟
ان شك احد ما بأنك سرقت او تطفلت على احد املاكه الشخصيه واراد تفتيشك ليتأكد هل تسمح له ليطمئن وتبرا نفسك او ترفض كون هاالامر اتهام في غير محله وتعدي على اخلاقك ومثلك ؟

!!
ما عندي مانع يفتشون على كيفهم لانهم اصلا ماراح يلقون غير ملابسي وغتري وشمغي :)
بس اهم شي ما يعفسون
هذا يخص الخواتي
اما اخواني فلا اكيد ما اسمح له يفتش لانه اذا فتش مافيها كلام بيشوف اي غتره او شماغ يعجبه وراح يلبسه ويمشي وياليته يرده مطوي او معفس اذا اخذها راحت يقطها بيتنا بيت الجيسران بين عيال عمي بسياره اي واحد
<<وانا اللي اندقر كل يوم رايح اشتري وحده جديديه :)
..................

للموضوع جوانب عده ,,
اشخاص لهم صلاحات التفتيش كرجال المرور مثلا او المعلم او الوالدين
ولكن النفس البشريه ترفض ان يتطفل هؤلاء علينا كوننا لم نخطأ ,,
ما الحــــــــل ..؟

وكيف نتصرف ؟

الحل بسيط والتصرف كذلك
فماعليك من احد اذا اللي يبي يفتشك يمون عليك ماكو مشكله خل يفتش واذا ما لقا شي نقده
وبعدها لا تسمح له كلش
واما اللي ما يمون عليك فحسب موقفك ان كان التفتيش جماعي فعادي ماكو مشكله وان كان شخصي طبعا ارفض وبكل قوه واصرار:)والدعوا سهالات :)
والف الف شكر لج ماما كتكوته على الموضووع الروعه
تحياتي

[BaSKo0Ta]

موضوعج خطير حده :) !!

حبيت أشكرج وايد على المشاركات الطيبه في قسم المناقشات الجاده ... وان شالله لي عودة علشان " أعقب " على الموضوع :)

[كتكووته^^مكتكته]

ارحم يا زعيم

اختي العزيزه هنا فيه تفصيل في هذه القضيه
اذا كنت ماشيا على الارجل واستوقفني هكذا
((من امه طاااف)) والله ما يفتشني لو شنوووو
الا اذا التفتيش جماعي فهذا شي ثاني فحالي من حال غيري اما انا بالذات من بين هلعالم
لا ما يفتشني واذا يعني قاعدين يفتشون عشوائي هم لا ما يفتشني
واصلا من يوم يقولي بفتشك بمشي وباخليه ماني واقف له
واما اذا كنت على سيارتي واستوقفني مني والطريج وقالي بفتشك باعطيه (النظره هذي اللي من فوق لتحت)) بنقده وبمشي واخليه لانه انا اذا ما سويت شي وموقني ويطلب اثباتي احرك واخليه فشلون بالتفتيش ((والله ليبطي ما فتش ))
واما اذا نقطه تفتيش ((بس كتحفظ امني وطلب رخصه وجذي وقالي بفتشك بارفض الا اذا معاااه تصريح بالتفتيش))لان هذي اعتبرها اهانه جدام العالم

والله قوي تعطيــــــــه طاف وتمشي :)

))<<كنت مطوع وياليتني اقدر ارجع زي اول :(

نتمنالك كل خير

يقلب كل شي الا السياره

اجل البلا كله بالسياره


ارحم يا زعيم
سمعنا وجهة نظرك
بالنسبه ما اقتنعت عدل بسالفة رفضك لشرطي المرور مثلا بتفتيشك بحجة انك موبغلطان هالشي موب انت تثبته
ومن ناحية الميانه بعد ما اقتنعت كيف يعني اللي يمون يفتش واللي ما يمون لا !!
السالفه تميل اكثر للخصوصيه واحترام حقوق وواجبات الغير ما هي سالفه ميانه وانا اختك

سعيده بمشاركتك
يالله حيـــــه

[كتكووته^^مكتكته]

بسكوتي
بانتظار باكج حبوبه
وجهة نظرج تعنيلي الكثير ومشاركتج بالموضوع تثريه وتعززه
حيـــــــــــأج

[بوقلبين]

[align=center]الشكر اولا على الطرح الرافي والمتميز
كما تعودنا كتكوته افكار متجدده دائما



بشكل عام
انا من الناس اللي يحترمون القانون واحب امتثل لأوامر رجال الأمن طالما مافيها مساس للكرامه

والاهل امر عادي اذا كان احد الوالدين اكيد من باب المصلحه والخوف علي

اما موضوع الزوجه مرفوض رفض تام سواء من المرأه او الرجل
لان يكون هذا شك وعدم ثقه


واللي الواحد شوي ممكن ايتضايق منه ويحز بنفسه اهو موضوع المحل التجاري لان فيها شبه سرقه
فيكون الامر مقزز والنفس الامينه ماتقبله .. بس الواحد ممكن يوافق مجبر اخاك لابطل


وللحديث بقيه[/align]

[العبداني علي]

ارحم يا زعيم
سمعنا وجهة نظرك
بالنسبه ما اقتنعت عدل بسالفة رفضك لشرطي المرور مثلا بتفتيشك بحجة انك موبغلطان هالشي موب انت تثبته
ومن ناحية الميانه بعد ما اقتنعت كيف يعني اللي يمون يفتش واللي ما يمون لا !!
السالفه تميل اكثر للخصوصيه واحترام حقوق وواجبات الغير ما هي سالفه ميانه وانا اختك

عدنا:)
بصراحه مادري شاقووولج اكثر من اللي قلته
ولكن البسبب في رفضي لرجل الامن انه يفتشني كما قلت لك
فيها تفصيل اذا كنت ماشيا على الاقدام فهذا من سبع المستحيلات اسمح له يفتشني
لاني اعتبرها اهانه
وش شايف يوم يفتشني شايفني شايل وياي صناديق فيها خمور ولا كراتين كلها ذخيره واحد على ريوله شنو بيكون وياه تلفونه وبوكه بعد شنو بيفتش بعد
هذا اسميه استعباط من رجال الامن.
واما اذا كنت على سياره وماشي بالطريج ولحقني مثلا وقالي اسفط وبعدها يقولي ابفتشك اقول هذا فاضي ماكو شل وراه بس لاحقني ومسفطني علشان يفتش حلوه هذي هم هذا لاعطيه طاف وامشي واخليه لانه استعباط اسميه من رجال الامن.
اما اذا نقطه تفتيش واكو تفتيش جماعي ماكو مااانع لان حالي من حال غيري
(( والخير يخص والشر يعم))
...........
:)
اما بالنسبه لاغراضي فماكو شي عندي يحتاج هلمساله كلها
لان غرفتي ماكو فيها غير كبت وسرير وكمبيوتر بس:)
والكبت ماكو فيه غير ملابسي جم دشداشه وجم شماغ
وجواز وجنسيه وشهاده رابعه ثنوي ودروع التفوق ايام الدراسه بس اكثر من جذي ماكو:)
<<مايحب يكون محتفظ باشياء كثير
فما فرقت عندي احد يقلب ولا ما يقلب لان اصلا غرفتي الكل يدشها وانا ما شاء الله مجابلها اربع وعشرين ساعه لوووووووول مو كله فراره ومادري عن كل من يدشها
<<اظن غرفتي بعد ايام بتصير غرفه معيشه من كثر ما يدشونها الشباب لووووول
اما الميانه وما الميانه فهذا شي اكيد وبعدين منو هذا اللي ما يممون علي وداش بيتنا ورايح لغرفتي :) ويقلب اغراضي هذا ما جابته امه ليل حين <<اخس يا خطير لووووووول

عساني وضحت شي بس :)
<<حاس انه ما قال شي يوضح اكثر :)

[*TanTosHa*]

أنا الصراحه ما عندي مانع انه يفتشووني خصوصا اذا فيها مصلحه حقهم ,,
بعدين انا واثقه من نفسي فخل يقتشون ,,,
يعطيج العافيه كتكت
ومشكورة على هيك موضوع
وما قصرتي ,,
^_^

[كتكووته^^مكتكته]

بو قلبين
دومن منورني بتواصلك
وشفنا التفاوت بين القبول والرفض في وجهة نظرك
منور

[كتكووته^^مكتكته]

ارحم يا زعيم

شاكره طلتك الثانيه
ولا تنسى ان الاختلاف بالراي لا يفسد للود قضيه

[كتكووته^^مكتكته]

تنتش
نورتني طلتج الحلوة
حياج الله

[BaSKo0Ta]

عدنا والعود أحمد .....


بالنسبه لي .. اذا كان الموقف يستدعي التفتيش .. لمصلحة الجميع .. لن أرفض .. وخصوصاً ان البنات في أيام الثانويه يتعرضن لمواقف التفتيش المفاجئه ولا تتجرأ احداهن أن ترفض ذلك لأن ذلك من مصلحة المدرسه .. وهلم جرا ..

أما اذا كان التفتيش لا داعٍ منه .. ولا هدف ولا مبرر له .. سوف أرفض طبعاً .. رغم ان الرفض قد يتوارى أمام الخجل من الموقف ..

شكراً كتكوته :)

[عمـري]

اكيد راح اسمح اذا ما سمحت راح ادش بسين وجيم انا بغنا عنه

ولو مكنت مسوي شي او عندي ممنوع اكيد ماراح اخاف

على قولة المثل لا تبوق ولا تخاف

بس اكيد راح اتضايق

[كتكووته^^مكتكته]

بساكيتو

يسلملي عقلج
انا بالنسبه لي
اذا كان انسان يملك صلاحيات
ماله داعي ادخل معاه في مشكل
بس والله بالدوام ووحده حبت ( تستهبل ) وفقدت شي مهم وغالي باهمالها وقالت محد يطلع قبل ما يتفتش
راح ارفض حتى وان فتشت الجميع
حياج

[كتكووته^^مكتكته]

عمري

مو كل من هب ودب يفتش
في امور فيها بعض الخصوصيه وصعب احد يطلع عليها
مثلا اجهزة التفتيش الموجوده بصالات الافراح لمنع النقال المزود بكاميرا
هذي ممكن اسمح فيها
والطريقه المتبعه بالفنادق والمطار للتفتيش
ايضا مسموحه للحمايه
لكن ان يجي شخص ويتعبث بنقالي مثلا او داري
هالمبدا مرفوض