اي سؤال عن الجامعه الخليجيه بالبحرين؟؟لا تتردد

[صمت الوهم]

السلام عليكم ورحمة الله

انا طالب بالجامعه تخصص هندسة كمبيوتر وعندي بعض المعلومات عن (طرق التسجيل - نظام الدوام - نظام الدرجات -...........الخ) لذلك
اللي عنده اي سؤال او استفسار او حتى معادلة شهادات الدبلوم و قبول فيها انا حاضر لأن روحاتي اسبوعيه.

وهذا موقع الجامعه للي حاب يطلع عليه
www.gulfuniversity.net

ملاحظه :::
الجامعه الخليجيه بالبحرين تم الاعتراف بها ويمكن الان للطلبه اعتماد قبولهم من الملحق الثقافي الكويتي بالبحرين لانه ظروري لفتح ملف بالتعليم العالي .

تم وبحمد الله الاعتراف بالجامعات البحرينيه ولكن بتخصصات محدده يرجى التأكد منها من التعليم العالي .

الــ5 جامعات البحرينيه هي كالآتي::

1- الجامعه الخليجيه
2-الجامعه الاهليه
3-الملكيه للجراحين
4-العلوم التطبيقيه
5-جامعة دلمون للعلوم التكنولوجيه

وبــ 3 كليات جامعيه هي::

1-كلية البحرين الجامعيه
2-كلية الملكيه
3-كلية نيويورك للتكنولوجيا

[Ra7_al2aml]

يعطيك العاافيه

وان شاءالله الاعضاء يستفيدون للي يرغبون في الالحتاق بالجامعه

[Demon of Dark]

يعطيك الف عافيه اخوي

ان شاءالله اللي يحب يلتحق يستفيد من معلوماتك

لكن مثل ماقلت للحين مو معترف فيها

انا كنت بدرس فيها ماستر وترددت لان الشركات تعترف فيها لكن الوزاره ماتعترف يعني وهقه :)


وربي يوفق الجميع

[صمت الوهم]

مشكووووورين على المرور

وبالتوفيق ان شاء الله

[ramboo]

مشكور اخوي على الموضوع وانا زميلك في الجامعه وفي مجلس الطلبة

وحبيت اقولكم ان اليوم في الصحف تم الاعلان عن اعتراف الكويت بالجامعات المعترف فيها في البحرين يعني بما فيهم الجامعه الخليجية يعني ليس مجرد اعلام مثلما ذكرت يا عزيزي صمت الوهم






الجامعه ما شاء الله صارت كلها كويتيين للعلم انا بحريني

[guitarist_q8]

صارلي يومين ابحث بالنت واخيرا طحت على منتدى كويتي يتكلم عن هالجامعه
اول شي احب امسي عليكم وانا اليوم سجلت معاكم لاني بسئلكم عن هالجامعه سمعت عنها من الشباب وحبيت استفسر اكثر واتاكد

اول شي انا عندي دبلوم من كلية الدرسات التكنلوجية علوم تطبيقية
واقدر اكمل عليه هندسه كيميائية او ميكانيكية والجامعة الخليجية فيها ميكانيكية
حبيت اعرف عن المعادلة شلون يعادلون دبلومي وشكثر يعادلون تقريبا
وسؤالي الثاني عن نظام الدراسه لاني سمعت انه في عندهم نظام حق الموظفين يوم بالاسبوع اول 3 ايام متواصله بالشهر بالنظام المكثف وهذا الانسب لي لاني موظف بالبترول واداوم شفتات فهل هذا موجود عندهم فعلا
وهل هذا النظام معترف فيه عندنا ولا المعترف بس نظام الالتزام الحظور الكامل
ياريت تفيديني اخوي واذا عندك اي معلومات ثانيه مثل اسعار الدراسه او اي شي ياريت تفيدنا وشكلي كثرت الاسئله عليكم
وانشالله اكون صديق لكم بالهمنتدى الطيب

[badwar]

انا بعد ياجماعة هاليومين ابحث عن اشخاص عندهم فكرة عن الجامعة بس المشكلة حاليا توني اكتشف انه المعترف فيها فقط تخصصين ليس الهندسة وانا احاول كذلك اسال عن الهندسة ويقولون انه تكاليفها عالية

[joria]

مساء الخير
انا خريجه كلية الدراسات التكنلوجيه تخصص هندسه كمبيوتر وحابه اني اكمل بالجامعه الخليجيه فأذا ممكن تساعدوني ببعض المعلومات عن طريقة التسجيل والدراسه والمواد وهل يعادلولي موادي كلهم والا نصهم تقريبا
واكون شاكره لكم

[ramboo]

مرحبا اخواني
حبيت اهنيكم على الاعتراف الكامل اليوم وانا بالجامعه نزلو اعلان ان الكويت اعترفت بجميع التخصصات
بنالسبة للمعادلة حياك الجامعه واختار التخصص والدكتور المسئول عن التخصص بشوف المواد اللي تتعادل لك .
بالنسبة لنظام الدوام صحيح في يوم بالاسبوع وثلاث ايام بالشهر.
بالنسبة للاخت يعتمد على الشهادة والنتائج ويكون في معادلة وانا تخصصي هندسة كمبيوتر ونظم معلومات.

اي سؤال انا حاضر لكم انا طالب بهندسة الكمبيوتر ونظم المعلومات+امين سر مجلس الطلبة+موظف بالجامعه
تفضلو في اي وقت حتى اذا تبون تراسلوني بالايميل ماعندي مانع حاضر لكم

[صمت الوهم]

مشكور يا اخي الفاضل ramboo ونعم فيك ان كنت من البحرين كلنا اهل لانه بالفعل مثل ما تفضلت تم الاعتراف فيها الاسبوع الماضي ولكن لدي أسباب منعتني من الدخول للانترنت و تعديل الملاحظه وشاكر لك من اعماق قلبي, ولنا لقاء ان شاء الله بس ماتعرفت على شخصك الكريم

معاك أخوك وليد الشمري طالب كويتي بنفس تخصصك هندسة كمبيوتر ونظم معلومات.

[صمت الوهم]

السلام عليكم
اخي
guitarist_q8
تحيه طيبه بعد
بخصوص الاعتراف تم الاعتراف بجميع التخصصات ولله الحمد الاسبوع الماضي ويمكنك الان اعتماد قبولك من الملحق الثقافي الذي يترأسه الدكتور الفاضل منصور الفضلي
اما بخصوص المعادله تستطيع انت بنفسك حساب عدد الوحدات التي سوف يتم معادلتها لك حيث ان الجامعه تعادل المواد التي تدخل في خطتها الدراسيه والتي يكون معدلها C فما فوق ,
اما نظام الدوام نعم مثل ما تفضلت يوجد نظامين للحضور وهما اسبوعي وشهري فالاسبوعي تستطيع اخذ من 12وحده الى 20 وحده بالسمستر , اما الشهري فالحضور يكون 3 ايام بالشهر وتكون ايام الخميس والجمعه والسبت وتستطيع فقط أخذ 12 وحده فقط كحد أقصى
ملاحظه :: برسالة القبول يتم الكتابه بأنك طالب منتظم بالنظام الصباحي(الحضور الكامل) حتى وان كنت بالنظام الشهري.
وأخيرا وليس آخرا الأسعار
نظام الجامعه نظام وحدات لكل ماده فالماده تتكون من 3 وحدات دراسيه وكل وحده قيمتها 100 دينار بحريني=73دينار كويتي تقريبا.

وبالتوفيق ان شاء الله واي استفسار او سؤال او اي شي لا يردك الا لسانك وانا اخوك عزيز وغالي
وحياك الله اخ
أخوك :: وليد الشمري

[صمت الوهم]

السلام عليكم



عزيزي BADWAR المعلومات اللي كتبتها ل
guitarist_q8
تفيدك
اذا عندك أسئله معينه أبشر بعزك

أخوك::وليد الشمري

[صمت الوهم]

السلام عليكم
أختي
joria
تحيه طيبه وبعد
بخصوص التسجيل يجب ملىء أستمارة التسجيل وكذلك عدد 4 صور شخصيه +شهادة الدبلوم + شهادة الثانويه العامه +صورة الجواز + 25 دينار بحريني.
أما الدراسه
فإن شاء الله سهالات لان ال midterm عليه 30 درجه وبيد الدكتور هم 30 درجه ومجموهم 60 وامتحان ال final من 40 درجه يعني بإختصار اذا نجحتي بالميدتيرم ب 25 وعطاج الدكتور 25 = 50 يعني يبيلج 10 درجات بالفينال للنجاح واعتقد هالشي مو صعب اذا كنتي تبين حيالله نجاح وبس.

اما المعادله تعتمد على درجاتك بالمواد قالمواد اللي نسبتها c فما فوق يعادلونها بشرط تتوافق مع خطتهم الدراسيه واللي اعرفه معاي طلبة خريجين التكنولوجيا هندسة كمبيوتر عادلوهم معادله لا تقل عن 45 فما فوق.

ولأي خدمه او استفسار مثل ما قلت للي قبلك لا يردك الا لسانك وانا اخوك

والسلام ختام

[ramboo]

هلا اخوي صمت ..

ياجماعه انا حاضر لكم اي شي تحتاجونه واقدر اسويه حاضر واعتذر على التاخر في الرد

[guitarist_q8]

هلا اخوي صمت ..

ياجماعه انا حاضر لكم اي شي تحتاجونه واقدر اسويه حاضر واعتذر على التاخر في الرد

اخوي ياريت تقدر ادزلي اميلك خاص ابي احاجيك يمكن تقدر تساعدني