! ][ الى زوجي العزيز .. مع التحيهـ ][ !

[KaY]

قلت انا بقهر ..
هناء: ئي ما تقدر ..
طالعني وقال ..
سامي : try me..
بغيت اصكه بالمزهرية اللي جداني ...قالت اخته ..
دلال : يا جماعة هدوا ...السالفة ما تنحل جذي ...
قال سامي ..
سامي: مالها إلا حل واحد ..تيي وياي بالطيب ..
انصدمت على كيفه يطردني وعلى كيفه يبيني ايي معاه ...
قلت بعصبية ..
هناء: انت على كيفك تمشي العالم ؟؟ انا مابيك يا اخي ..ماني ياية معاك شنو رح تسوي ؟؟
قال طلال بعتب ..
طلال : هناااء .
قال سامي ..
سامي: الله يخلي بيت الطاعة ...
وهذا دق ناقوس الخطر ... امي قالت ..
امي: لا توصل السالفة للمحاكم ...تقدر تنهيها هني والحين ..
هز سامي راسه بالنفي وقال ..
سامي: مارح انهيها ..إلا إذا يت معاي ...
طالعت دلال سامي وقالت ..
دلال : سامي لا تعقدها ..
طالعها وقال ..
سامي : انا مابي اعقدها ..حلها بسيط ..تيي وياي حياها الله ..ما تبي ..بتوصل السالفة للمحاكم ..وباخذها غصبن عن اللي مايرضى ..
وطلع من البيت ...طلع معصب ...وسامي عنيد ...ما تحملت وطلعت وراه .... ركضت لعنده ومسكته وخليتها يلف لي غصب وبعصبية بدرجة ان ظهره طق بالسيارة ...
هناء: انت شنو ما تحس ؟؟؟ انا ماابيك يا اخي ماابيك افهم ...
مارد علي لف ظهره عني وحط السويج يبي يبطل السيارة ...قلت وانا ماسكة ايده والفه ناحيتي ..
هناء: لا تعطيني ظهرك ..انت ما تبيني ...اعترف انك ماتبيني ...تسوي كل هذا عشان تبرد حرتك فيني ..
قال ببرود ..
سامي : حمدلله مخج شغال لسة ...
وعطاني ظهره مرة ثانية ...هني انا انقهرت زود طقيته على ظهره ضربات متتالية ... وانا اقول ..
هناء: اكرهك ..اكرهك ..
لف لي ومسك ايدي وقال بعصبية وهو يهزني ..
سامي: وانا اكرهج زود ...اكرهج اضعاف ...حالج حال عالية عندي ... عبالج اني بيي اعتذر لج واقول هناء سامحني الله يخليج ...حريمتج .. اموت ولا اقولها ...
حاولت اني اسحب ايديني منه بس هو كان اقوى ... قلت ..
هناء: ماابيك تسامحني ..ابيك تختفي من حياتي ..
آلمتني مسكته وقال ..
سامي: لا تخليني اخذج معاي الحين ..تراني اقدر اسويها ومحد يقدر يمنعني ..
هناء: سوها لو فيك خير ..
يرني وراه وانا مابي ..حاولت اني ابعدها عني بس ماسك ايدي بقوة ..بطل باب السيارة ..وانا اتصارع معاه ..
قلت له ..
هناء: هدني ..ايي وياك ..ماااابي ...يمااااااا
بس دخلني غصب ..مسك حزام الأمان ولفه حوالين ايدي ماادري اشلون بس شلني عن الحركة ... بغيت لف الناحية الثانية وركب وانا ارافس واصرخ ...
حرك السيارة ومشى ...
هناء: نزلني ..مابي اروح وياك ..مابي ..
مايرد ..يسوق وهو ساكت ... ظليت اطق الجامة بجنون ...جني مطلعيني من مصح ...لما خارت قواي قلت ..
هناء : حرام عليك ..تراني مو لابسة لا شيلة ولا عباة ..ماخذني بهدومي ..
وكنت لابسة بيجامة ...
طالعتي بلا مبالاة وقال ..
سامي: لا تخافين محد بيشوفج ..تدرين ليه ؟؟
طالعته ابي الجواب ..بس فجأة مسك راسي وخلاني انزله غصب ..
هناء: آآآي ...انت شنو تسوي ؟؟
سامي: خلج منزلة راسج لين ما نوصل البيت ...
وحاط ايده على راسي وانا ظليت جذي ليما رقبتي عورتني ... شال ايده وقال ..
سامي : الحين قومي ..ماكو احد ..
رفعت راسي وكنا ماشيين ..ومافي سيارة الحين ...منو بيي الحين الساعة 11 ونص والشوارع بدت تفظى وسامي راح منطقة فاضية ...
هناء: الحين ممكن تقولي احنا وين رايحين ؟؟
مارد علي ..
لفيت له وكررت فقال ..
سامي: ماادري فكرت ارفه عن روحي معاج ..
مالت عليك ...
هناء : خوش ترفيه بالغصب ...
ضحك وقال ..
سامي : كيفي ...
طالعته باشمئزاز ... ظلينا ساعة نمشي ...وتلفون سامي ما سكت اكيد طلال او دلال ..
سامي :لهدرجة خايفين عليج ؟؟
ما طالعته وقلت ..
هناء: على الأقل عندي اهل يسالون عني ويخافون علي من ونفسك ..
مارد علي بس قال اخيرا ..
سامي: مشكورة ..ما قصرتي .
ندمت اني قلت جذي بس قهرني حسبي الله على ابليسه ...
ظلينا ساكتين ...وانا افكر اشلون بتنتهي حياتي معاه ... اشلون بتحمل فراقه ...
حسيت ان السيارة بدت تنحرف ...وتتمايل ...طالعت سامي لقيته حاط ايده على راسه ...شكله دايخ ..قلت بخوف ..
هناء: سامي ..
نزل ايده وطالعني وقال ..
سامي: اشفيج ؟
هناء: انت اللي اشفيك ؟؟
طالع جدام وقال ..
سامي: مافيني شي ...
هناء: انزين سوق عدل السيارة قاعدة تنحرف ..
سامي: ان شاء الله عمتي ..
كنت قبل ابتسم لما يقولها بس الحين ماعطيته ويه حتى ..قلبت ويهي عنه للدريشة ...
مالت السيارة فجأة حسيت انها بتنقلب ...قلت ..
هناء : سامي ..سوق عدل ..
بس ظلت السيارة على حالها ... مالت اكثر ..طالعته لقيته حاط ايده على راسه وشكله الهمرة مو قادر يضبط روحه ولا يضبط السيارة ...نطيت انا ومسكت السكان بآخر لحظة بغينا ندعم الشبة ( عامود النور)
ولفيتها ودخلنا الرصيف ..هني سامي اغمى عليه ...صرخت بأعلى صوتي ..
هناء: ساااامي ...
بس ما قدرت اسوي شي ايديني ماسكة السكان ... ومو قادرة اسيطر عليها ... لمحت ان جدامنا حبل رمل جدامنا ... صرخت لما خلاص رح ندش فيه .. وفعلا ارتطمت السيارة بجبل الرمل ...ومن قوة الضربة طقيت الجامة الأمامية ...ورديت طقيت ظهري بالكرسي ...
وظلمت الدنيا جدام عيوني ...

[KaY]

!
.
.
.

لجـــــــل عيـــــن انسانهـ

كملتـ القصهـ

ومفاجاهـ لهـــــــا " )

باجــــــــــر راح ينزلـ تكملهـ جــــزء 28

.
.
.
!

[* مغـ،،ــرورة *]

ههههههههههههههههههه

اففف منج يابنية
لازم توقفين عند المواقف الصعبة


يلا ناطرين التكلمة ادري مو باجر بس بحااول فيج


ثانكس على التكلمة قلاابوش

[Ashwareya]

أبيه حدي تفاجأت لما شفتج كملتي هالجزء توقعت اني بحلم ولازم كالعاده اسهر

بس حدها المفاجأة حلوه و لي سويتلها المفجأة أكيد استخفت مثلي والله وبدون

مجاملة انتي احسن عضوة بهلمنتدي كله في تنزيل القصص و فعلا سلمت يداكي

يا كاي تقبلي تحياتي لج وناطرين الباجي عشان ابطل سهر ونام مثل الناس لول

وباي

[رووح الانـوثهـ]

يعطيج الف عافيــــــــه عالجهــد الرائــع والمبذوول قــواج الله ولمزيدج الرائــع ... وتستاهل المتابعـــه والتثبيت ...

[KaY]

[ الحلقـــه الثآمنـــه والعشــرون ]



.. نهآيــه الطريـق ..




" هناء ...هناء "
بطلت عيوني على صوت يناديني ...الدنيا جدامي ضباب ...غمضتهم شوي اخفف الدوار اللي حاسة فيه ..
بطلتهم واخيرا وضحت جدامي الصورة...
سامي: حمدلله .. قعدي هناء ..سامعتني ؟؟
قعدت بمساعدته حطيت ايدي على راسي ...آآآخ ...راسي ... لفيت حوالي ..ظلمة ما عدا انوار اللي تطلع من عواميد الإنارة ....بعدها استوعبت ...احنا لسة بنفس المكان؟؟؟؟
لفيت له ولقيته يطالعني يتأكد ان ما فيني شي ...قال وهو يرد ظهره للكرسي بعد ما تأكد ..
سامي: الحمدلله مافيج شي ...
قلت وانا اغمض عيوني ...وباستهزاء ..
هناء: صج مافيني شي بس شوية عوار براسي وضلوعي مكسرة ..
سامي: حمدلله اهون من شي ثاني ..
لفيت له بعد ما بطلت عيوني وبغيت اقول بس سبقني وقال ..
سامي :انا الحمدلله ..بس دوخة بسيطة وراحت ..
وطالعني جنه يعتابني ليش ما سألت ...صح ..ليش ما سألت ؟؟ بس خله يولي يايبني هني وآخرتها نسوي حادث ...مالت عليك ...
لفيت ويهي عنه وانا معصبة ...بس رديت لفيت ما قدرت..ضعفت وقلت ..
هناء: شي يعورك ؟؟
ارتسمت الإبتسامة على ويهه ..بس هز راسه وقال ..
سامي : لأ ... بس حاس روحي دايخ شوي ..
وغمض عيونه ورد راسه ورا وغمض عيونه وكمل ..
سامي: ترى السيارة خربانة وتلفوني مافيه شحن ..
نعم !!!!!
قلت بخرعة ..
هناء: خير ؟؟؟ شنو ؟؟ سيارتك خربانة ؟؟ وانا بظل قاعدة هني لين متى ؟؟
قال بنفس وضعيته ..
سامي: لين ما الله يفرجها ...
ورفع راسه وطالعني وقال ..
سامي: بعدين اشفيج خايفة طالعة مع وحش؟؟ طالعة مع ريلج ..
قلت بدون وعي ..
هناء: ريلي طل ...جم مرة اقولك اني ما اعتبرك ريلي ..
سامي: والله في بينا ورقة .. وعقد ...إذا نطقت بكلمة طالق وخلصتي عدتج حزتها منتي مرتي ..
وعدل من قعدته وقال ..
but in this case you are my wife سامي:
مالت عليك ... قلبت ويهي عنه مابي اتهاوش معاه ... بس قلت بعصبية وانا اطق الباب ..
هناء : الحين اشلون ..بنظل محبوسين هني لين متى ؟؟
مارد علي ..فقلت وانا اهزه بقوة ..
هناء: احاجيك انا ..
قال وهو يطالع الدريشة وببرود ..
سامي: حسني اسلوبج وانا برد عليج ...
قلت باستنكار وغرور ..
هناء: ليش ان شاء الله ؟؟ اشفيه اسلوبي ؟؟
لف لي وطالعني وطالت نظرته لي ...قلت وانا اتأفف ...
هناء : لا إله إلا الله ...لا تطالعني جذي ..
مارد ولف للدريشة ... افففففففففففف ... سكت وما اعقبت ...
مر وقت واحنا لسة قاعدين وساكتين ... طول الوقت مالفيت ناحيته ... بس ولأني مليت ...التفت وكنت ابي اطلب منه يقوم يصلح السيارة ...بس سكت عنوة لما شفته نايم ...وشكله نايم من وقت ... تقربت منه لقيته صج نايم ...
هذا من صجه !!!!!!!
احنا عالقين وهو نايم ؟؟ صج فاضي ... من العصبية قمت وبطلت الباب وطلعت وصفقته حيل ... يمكن يصحى ...رحت للدبة اللي جدام وبطلتها ...
الحين المكينة جدامي ...يلا يا فالحة صلحيها ...هذا إذا عرفتي ..
يوووه ...مالت عليك وعلى سيارتك ...صكيت الدبة بقوة ... اهتزت السيارة عبالي بيقوم بس ولا على باله ..بدنيا غير الدنيا ...
بعدت خصلات شعري اللي قاعد يلعب فيه الهوا ... سند على السيارة ..وتجتفت ...تنهدت بضيق ..
سرحت بالظلمة اللي جدامنا واللي محاوطتنا ... وقفتني هني ماله داعي بالله احد مر وشافني ..وانا مو متغطية ...سجبت ريولي ورديت دخلت السيارة ... لقيته صاحي ويتعبث بالخانة اللي جدامه .. قعدت فقال وهو لسة يتعبث ..
سامي: مرة ثانية ...طلعي من السيارة بهدوء ..ما تهزين الدنيا فوق راسي ..
وشفته يطلع علبة دوا ... ويلف ورا ويمد ايده وياخذ غرشة ماي ... راقبته وهو يشرب ... قلت ..
هناء: شنو هالدوا ؟؟
صك الغرشة وقال ..
سامي : حق الصداع ...
هناء : اي صداع ؟؟؟
غمض عيونه وصبعه يلعب بغطا الغرشة ..
سامي: اي صداع يعني ؟؟ صداع راسي اكيد ..
يحاجيني من طرف خشمه بعد ...قلت بامتعاض وانا اقلب ويهي للدريشة ..
هناء: انزين حاجني عدل ما اشتغل عندك انا ...
حسيته يطالعني بس طنشت ...باط جبدي ...سمعت صوت الباب يتبطل لفيت لقيته يبي يطلع ..وفعلا طلع ..
شفته يبطل الدبة وختفى من مرمى بصري لأنه الدبة غطته عني ..ما اهتميت رديت ظهري ورا وحطيت ايدي على يبهتي اتحسسها ...ورمت .. آآخ .. الحمدلله ما صار لنا شي ...
لنا ؟؟؟
انتبهت على روحي وانا اقولها ....لنا ؟؟
يعني انا وهو ...ليش اهتم فيه ما دام انا ابي اتطلق منه ؟؟؟
لانج تحبينه وتموتين على الأرض اللي يمشي عليها ...
ئي احبه احبه ...بس ما اقدر اقط روحي عليه ...اللي سواه مو شوية ... مرة يبيني ومرة لأ ... قاطني شهرين ما يدري عني ويايني بعدها يبيني ولا ياخذني غصب بعد ...انا ماني لعبة بإيده ...ماني لعبة ...
وتنهدت بضيق ومرارة ...ومنعت دمعة بالغصب انها ما تنزل مني ... قابل حبي له بالإهانة ....
" هناء شغلي السيارة "
مسحت عيوني بسرعة ومسكت السويج ولفيتها ...والحمدلله اخيرا اشتغلت ... طالعته وانا ابتسم وقلت ...
هناء : ايدك سحرية ..
كان واقف ومبطل الباب وساند ايده عليه ...كان يطالعني طبعا وابتسم ...ظل يطالعني لمدة حسيتها انا طولت ..
قلبت ابتسامتس لتكشيرة وقلت من طرف خشمي ..
هناء : اشفيك تطالعني جذي ؟؟
قال ببساطة وبطريقة نرفزتني ... وهو طبعا يبتسم ..
سامي: تدرين ؟؟؟
مارديت عليه ابيه يكمل وانا لسة بتكشيرتي ..
سامي: تكشيرتج حلوة ....
بطلت هني عيوني ...من صجه هذا ؟؟ الحين هذا وقته ؟؟
انفجر يضحك ومو قادر حتى يمسك روحه ...
قلت باستخفاف بس مقهورة من داخلي ..
هناء: لا تموت علينا بس ..
ولفيت للدريشة عنه ... سمعته يقول ..
سامي : تبيني اموت ؟؟
شنو؟؟ لفيت له مستغربة وقلت ..
هناء: منو ياب طاري الموت الحين ؟؟
وليش اصلا تقول جذي ...بس طبعا ما قلت لا احسسه بأهميته ...تنهد وقال وهو يطالع جدام ..
سامي : انتي ...توج تقولين لا تموت علينا ...
حمدلله والشكر ... موصاحي ...قلت وانا ابي انهي هالحوار اللي من بدايته ينون ..
هناء: الحين خلصني ودني البيت ...بلا حجي فاضي ..
سامي : اي بيت ؟؟
هناء: بيت ابوي ...لو سمحت ..
هز راسه جنه مو راضي فقلت ..
هناء : لا بتوديني غصب ...
قال جنه توني سمعني ..
سامي: شنو ؟؟ عيدي اللي قلتيه ...
قلت بثقة ..
هناء: بتوديني غصبن عنك ...يلا حرك ..
ظل يطالعني بعدين قال ..
سامي: تدرين انج مغرورة وشايفة روحج ...ولا غبية بعد ..
شهقت لما قال جذي ...انا مغرورة وشايفة روحي وغبية ؟؟؟ لا مصخها هذا ...
قلت بعصبية ..
هناء: انت صج مو ويه احد يحترمك ... إذا انا مغرورة شوف روحك اول ..قاطني شهرين ولا تدري عني ولما بينت مرة ثانية ياي تاخذني غصب وانا ماابيك ... ومطرش لي دلال اختك عشان تتوسط بينا لا يا حلو انا مارح ارجع لك طلق بالطيب احسن لك ..انا ما اطيقك ...ما اطيقك ...وإذا انا غبية انت اغبى ...
وسكت ...ظلت انفاسي المتلاحقة مصدر الوحيد للصوت في هالموقف ... قلت كل هذا بعصبية وقهر ...
طالعني بذهول وقال ..
سامي : كل هذا بقلبج من ناحيتي ؟؟؟
قلت بدفاع ...
هناء: يا سلام ما انت قلت اني مغرورة وغبية وشايفة روحي ... مو هذا بقلبك من ناحيتي بعد ؟؟
ظل يطالعني مذهول ومدهوش وقال ..
سامي: انتي لو خلتيني اكمل كنتي ...
وسكت ...هز راسه باستنكار وقال وهو يحرك السيارة ..
سامي: طول عمرج بتظلين غبية ..
قلت بعصبية ..
هناء: ما..
هني صرخ بويهي صرخة نقزت منها ...
سامي: بس انطمي ..مابي اسمع صوتج ..
بلعت باجي جملتي اللي كنت ابي اقولها ...سكت عنه لاني ابي ارد بيتنا سليمة ..ظلينا طول الطريج ساكتين ...بس حسيت ان هذا مو طريج بيتنا ...بيت ابوي ...قلت ..
هناء: انت وين رايح؟؟
مارد علي فكررت ..
هناء: رد علي وين رايح ؟؟
قال بامتعاض وعينه على الطريج ما لف ..
سامي: البيت ..بعد وين؟
هناء: هذا مو طريج بيتنا ..
سامي : بلى ...ولا نسيتي الطريج ؟؟
هناء: سامي ودني بيت ابوي ...
مارد علي ...قلت بعصبية ..
هناء: يا اخي مابي اقعد عندك ...غصب هو ؟؟
لف لي هني وقال ..
سامي: ئي غصب ...
هني وصلنا العمارة ... تنهدت ...نزل هو من السيارة قال ..
سامي: بتظلين هني ؟؟
قلت بعناد ..
هناء: ماني نازلة ...
قال ببساطة ..
سامي : اوكي ...خلج ..
وصك الباب ...افففف ...لازم يخليني اعصب ... بطلت الباب ونزلت وراه ...وقلت محترة منه ..
هناء: لا تعامليني بهالأسلوب انا ماني ياهل ..
لف لي وقال ..
سامي: انتي ما تمشين إلا بهالأسلوب ...
تأففت بضيق ... وقلت على مضض ..
هناء: انزين انا مااقدر ايي وانا جذي ...لا شيلة ولا شي يغطيني ..
شفته يفصخ جاكيته ويقرب مني ...مد ايده وقال ..
سامي: لين ما نوصل الشقة ..
الحمدلله ان بيجامتي جم طويل ...وكانت ثوب ...لبسته تحت انظاره ...ومشيت ...غطيت راسي عدل عن لا يطلع شعري .. حسبي الله على ابليسك يا سامي ..الحين انا اطلع بهالشكل ؟؟؟.. وصلنا الشقة وطبعا كانت نظراته ما تخلو من الطنازة ...
دخلت وبعدت الجاكيت عني بسرعة وحذفته عليه ..وقلت
هناء:هاك ..
مسكه قبل لا يطيح على الأرض وقال ..
سامي: مقبولة منج ..
مارديت عليه ودخلت داخل بسرعة للحمام ...طول الوقت كنت حافية ...غسلت ريولي وفتحت الماي وحطيت ايدي تحته ...واخذت كمية وغسلت ويهي ...خليته يتغلغل بخلايا ويهي عدل ..ابيه يطفي النار اللي تحرقني ... بط جبدي مالت عليه ...عليه اسلوب عجيب بالتعصيب ...يحب يشوفني معصبة ...
بعد ما هديت شوي طلعت ...
وقفت عند الباب مو عارفة وين اروح ....مابي احسسه اني ميتة اني رديت البيت مع اني مستانسة ...
طلع بويهي فجأة خرعني ...
سامي: اشفيج واقفة ؟؟
تصنعت التكشيرة وقلت ...
هناء: ليش حرام اوقف بعد ؟؟
بعدني عن مكاني وقال وهو يبطل باب الحمام عزكم الله ..
سامي: لأ ...
ودخل ...تحركت انا من مكاني ...وانا اتفحص البيت .. جني من عشرين سنة ما دخلته ... كل شي بمكانه ..لفيت حوالين نفسي وعيوني تدور على البيت ... بس فجأة طلعت صورته جدامي ... اخترعت ..حطيت ايدي على صدري وقلت بعصبية ..
هناء: يااخي اشحقة طايح فيني تخرع ؟؟
ضحك وقال ..
سامي : ياحلوج وانتي مخترعة ..
هذا اشفيه طايح فيني مغازل ؟؟ طقيته على جتفه بس مسك ايدي وباسها ...سحبت انا ايدي وقلت بصدمة ..
هناء: انت ينيت ؟؟
قرب مني وانا بعدت ...قلت بخوف .
هناء: انت شارب شي ؟؟
قال وهو يسوي روحه يفكر وطبعا ظل يقرب ..
سامي: امممممم...قبل ما اييكم البيت شربت عصير مع دلول وعيالها ...
وظل يقرب وانا ابعد قال هو ..
سامي: طافج عصير ... تحفة...بس حمود حسبي الله على ابليسه كته علي ...خرب هدومي ...
قلت وانا ابعد وانتفس بخوف وارتباك..
هناء: انت...انت رح تحكي لي يومياتك ويا عيال اختك ؟؟؟
ابتسم وقال ..
سامي: لأ ..بس انتي سألتيني شارب شي فشي ير شي ...
هني طقت ريولي بالقنفة ..وهو قرب بغيت اطيح على القنفة بس هو مسكني ..بعدت ايدينه وقلت بعصبية ..
هناء: لا ..انت مينون رسمي ..
مشيت عنه للغرفة ..بس مسك ايدي وخلاني الف غصب عني .. قال ولأول مرة برجا ..
سامي: هناء الله يخليج قعدي ابي احاجيج ...
بغيت ارفض بس شفت بعيونه الأصرار ...قعدت على مضض ...بس بعيد عنه شوي ..وقلت .
هناء: خلص قول اللي تبيه بسرعة ..
سكت ...وطال سكوته ... لفيت له باستغراب ..هني بدا يتكلم ..وقال ..
سامي : انتي صج تبين تطلقين ؟؟
ما ياه على بالي انه رح يسألني هالسؤال..عبالي رح يبرر لي مواقفه الأخيرة ...مو بس هالسؤال ..
طالعته متعجبة ...
كمل وقال ..
سامي: هناء ..يمكن انا كنت شوي مبالغ بردة فعلي ..بس انا ...
وسكت حسيته يجمع كلماته ...
سامي: انا ...احم ..ما توقعت انج تخشين شي جايد مثل هذا .. صج اني كنت ادري ان في شي بينج وبين عصام بس ..
ونزل راسه يلعب باصابعه ..شكل التوتر واصل حده عنده ..
سامي: سويت كل هذا عشان كنت ابيج تقولين لي ..ابيج انتي تيين من نفسج وتقولين لي ...موت بنت عمج خلاني اجزم انج رح تيين وتعلميني .. بتقولين ليش مارحت واخذت الصور منه بقولج انا ما كنت ادري ان عصام عنده صور لغالية ...بس عبالي يلعب عليها ...وهي بنت عمج ما قصرت .. بس صدقيني والله العالم اني ...
وتنهد .. وسكت ...حسيته مكسور ومو قادر يعبر عن اللي بداخله ...صاجة دلال يوم قالت انه كتوم وايد ..
بس هذا مو مبرر ابدا ...المفروض يثق فيني ...مو يخليني معلقة شهرين ..
قلت انا الحين ..
هناء: انا عارفة اللي تقوله صج .. وادري انك مالك يد باللي صار ...وحادث طلال وموت غالية الله كاتبهم ومحد يعرف الغيب ...بس اللي صار بينك وبيني ...منو السبب فيه ؟؟ ردة فعلك المبالغ فيها على قولتك ؟؟
ولا شكك وعدم ثقتك فيني ؟؟ لو كنت تدري من الأول ليش ما قلت لي ؟؟ليش خليت كل هذا يصير وانت بايدك تحل كل هذا ؟؟ شنو كنت تفكر فيه ؟؟ كنت تبي تجكني يعني متلبسة مرة ثانية ؟؟ لا تقولي انك ما كنت تفكر بجذي ..ترى كل اللي صار كان بايدك تنهيه وبكلمة وحدة منك ..
سامي : لا تطلعيني انا الغلطان بروحي ..انا اعترف اني غلطان ...وادري اللي سويته مو شوية حتى اني لين الحين ماني مصدق اللي قلته واللي صار بسببي ..
غمضت عيوني بألم وقلت ..
هناء : سامي اسمعني عدل ...انا ..
وبطلت عيوني وقلت ابي يفهم هالشي لاني تعبت خلاص ..
هناء: وانت ما ...
سكت ما عرفت شنو اقول .. فقال هو متشكك ..
سامي: قولي هناء ..شنو ؟؟
نزلت راسي للأرض وقلت ودموعي شوي وتنزل ..
هناء: انا وانت ما ننفع حق بعض ..
حسيت اني فجرت بويهه قنبلة ..لأن ويهه تغير ..طالعني بذهول وصدمة ..
سامي: شنو ؟؟
هناء: اللي سمعته ..
حسيته ان انفاسه بدت تطلع وتنسمع .. قال وهو يغمض عيونه يبي يتسوعب ..
سامي: هناء انتي من ...انتي عارفة شقاعدة تقـ...
قاطعته وقلت وانا ارفع صوتي يغطي على صوته ..
هناء: سامي ...
سكت وكملت انا بألم ..
هناء: زواجنا كان من اوله غلط .. انا وانت ما نليق على بعض ... المشاكل اللي مرينا فيها صج انها ما كانت بايدينا ..بس اهلي مو متقبلينك واهلك مو متقبليني ...خلاص خلنا نريح نفسنا وعن المشاكل اللي مالها داعي ونفترق ونريح اهلينا ..
هز راسه مو مصدق ...وكان يبي يتكلم بس مو عارف شنو يقول ...قلت ودمعة تنزل مني ..
هناء: تكفين سامي ... خلنا نتطلق ...كافي المشاكل اللي بينا ...
وقمت ورحت الدار بسرعة ... وخليته بذهوله وصدمته ... دخلت الغرفة وصكيت الباب لا قفلته بعد ... تسندت عليه وانا ابجي ...
ابجي على حبي ...ليش ما كل احب احد تكون النهاية الفراق ؟؟؟
ليش ؟؟؟
مسحت دموعي وانا مؤمنة ...مؤمنة ان اقدارنا حتمت لنا هالشي .. الله ما يبي نظل مع بعض اكثر يمكن يكون في هالشي خيرة ...استلقيت على السرير وردت هني سالت دموعي ...سالت وبللت المخدة ..
آآآآه يا قلبي ...

قمت الصبح وانا حاسة روحي مكسرة ... تذكرت هني اللي قلته امس .. بس خلاص مابي اتذكر ..
طلعت من الغرفة تاركة وراي هالأفكار ...جلت بنظري بالصالة ادور عليه بس مالقيته ... رحت الحمام عزكم الله غسلت ويهي واسناني ..
قعدت بالصالة ومسكت التلفون ابي ادق على طلال اييني ...وقلت له اييب معاه عباتي وشيلة ...
صكيت عنه وانا افكر بسامي ... مااردي شنو صار عليه من امس ... اكيد زعل وتضايق ...بس هذا الحل الوحيد ... من اول ما تزوجنا واحنا بمشاكل ...ماضيه الأسود صار يطاردنا من مكان لمكان ...يينا هني عشان ننساه لقيناه موجود قبلنا ...
حسبي الله على اللي كان السبب ...
نزلت دموعي هني بس مسحتهم بسرعة مابي اتعس نفسي واتعبها ...خلاص هاذي نهاية الطريق ...
سمعت صوت الباب يتبطل ...لفيت ..وتلاقت عيونا ...لثواني بس ...نزلت راسي وبغثرت نظراتي بعشوائية بعيد عنه ....مابي قلبي يضعف ...
صك الباب ...سمعته يقول ..
سامي: تبيني ....
وسكت ..لفيت له وكانت حالته حالة .... ولو انه مو مبين عليه بس اعرفه من عيونه اللي دايما شالت الهم ..
نزل راسه وكمل بألم يحاول يتغلب عليه ..
سامي: تبيني اوصلج ؟؟
قلت ..
هناء: لأ ...لا تعب عمرك ..
وظلينا ساكتين ... حسيته لسة واقف ...وما تحرك ... تكلم اخيرا وقطع الهدوء القاتل اللي كان رح يخنقني ..
سامي: ورقة ...احم ..ورقة طلاقج بتوصلج بعد ...بعد اسبوع ..
طالعته انا هني ...
ما صدقت ..تبي الفكة .. مسرع تكلم عن ورقة الطلاق واجراءاته ...تجمعت الدموع في عيوني بس قلبت ويهي بسرعة ...
سامي: اجراءات الطلاق شوي تطول ... لا تستعيلين بتفتكين مني بسرعة ...كلها اسبوع وانتي حرة بعدها ..
غمضت عيوني انا ودموعي نزلت ..
سمعت تلفون البيت يدق ...رفعته وكان طلال ...علمني انه تحت ... صكيت عنه ورديت السماعة مكانها وانا ايدي ترجف ... اكابد الدمع لا ينزل ..
شفته يعديني ويروح داخل بس قلت بسرعة وانا اوقف ..
هناء: سامي ..
قال هو رافض يلف لي حتى ..
سامي: روحي هناء ...روحي الله يخليج ..
حسيته متألم ...حتى ما تخليني اكحل عيوني بشوفتك ...حتى بهاذي حارمني ؟؟
نزلت راسي ..واخذت اي شي اغطي فيه راسي ..وطلعت من الشقة بسرعة ..حتى ما نزلت بالمصعد نزلت بالسلم ..ودموعي وراي ...
دخلت السيارة واخذت منه العباة والشيلة ..ولبستهم ... ورحنا للبيت ...
رديت لمسقط رأسي مثل ما يقولون ...علمت طلال بكل شي ...وبسالفة الصور بعد ...هني وقف طلال مصدوم ..
طلال : حرام عليج ...الريال ما كان قصده ..يعني انتي سويتي اللي سويتيه وفوق كل هذا تبينه يسامحج؟؟
اقل شي يسويه يذبحج اصلا ..لو منه كنت دفنتج ...وطالبة الطلاق بعد ؟؟ ..
قلت وانا اغمض عيوني مابي اسمع شي ..
هناء: طلال خلاص انا اخترت ... مابي اسمع شي بهالسالفة ..
وبطلت عيوني شفته يهز راسه باستنكار واعتراض وقال قبل لا يطلع ..
طلال : على العموم ..ما دام مرتاحين بهالحل ...كيفكم ...بس صدقيني ..
وطالعني وقال كأنه يأكد لي ..
طلال : مارح تلقين احد يحبج ويقدرج مثل سامي ...انتي خسرتي شي كبير ..
وطلع ..
هني دفنت ويهي بالمخدة واطلق لدموعي العنان ...
بريحكم وبريح نفسي من المشاكل اللي عشته تسع شهور من عمر زواجنا ...
بنهي مشوار بديته مشوار العذاب ...
مر يومين من المهلة اللي حددها سامي ... امي طبعا فرحت وانا ظليت حبيسة داري احاسب روحي ..
اللي سويته صح ولا خطأ ؟
اللي سويته بيرضي منو وفي صالح منو ؟؟
خلاص بتكون النهاية الطلاق ؟؟
مابي ابعد عنك وبنفس الوقت كل ما اتذكر اللي صار ...اتراجع واحط الطلاق الحل الوحيد ....
ولأني مابي افكر اكثر ...نزلت تحت عند امي ..ابي انسى ...
امي: يما هناء ...تبين جاي ؟؟
انتبهت على امي وقلت ...
هناء: لا يما ..عليج بالعافية ..
سمعت طق على الباب ... قالت امي وهي تشرب الجاي .
امي: قومي هناء يما بطلي الباب اكيد خالتج ام عصام ...
قمت وبطلت الباب وانا مو طايقة احد ... الحين امي اكيد من فرحتها بتعلم القاصي والداني .. جنه سامي كان قاعد فوق راسها ...
انصدمت لما انتبهت للي واقف جدامي ...
عالية !!!!!!!
ظليت واقفة جني سيارة خلص بنزينها ...
ظليت اطالعها من فوق لتحت ابي اتأكد من اللي شايفته الحين ...
هاذي صج عالية ؟؟
تدرون ليه اسال هالسؤال ؟؟؟
لأن اللي جدامي كانت لابسة عباة وشيلة ...
تجدمت هي وقالت ..
عالية : السلام عليكم ..
ولأني كنت مسبهة قلت ببلاهة ..
هناء: ها ؟؟
ابتسمت ونزلت راسها للارض وقالت ..
عالية : اكيد مستغربة من شكلي ...معاج حق ..بس ..
ورفعت راسها وقالت بجدية ..
عالية : انا مرح اطول عليج .... انا ييت اعتذر لكم عن المشاكل اللي سويتها واللي سببتها لكم ...
وبالأخص اخوج طلال ... ادري انه ما كان يحبني ولا فكر بيوم انه يتزوجني ...وادري انه كان يبي غالية ..
تجمعت الدموع في عيونها وما اقص عليكم اني شفتها ..
عالية : انا آسفة والله ...ما كنت حاطة في بالي ان السالفة توصل لهالشي .. انا كنت بس ....
وسكتت شكلها مو عارفة شنو تقول ...
ولأني شفت الصدق بعيونها ... قلت اوقفها ..
هناء: لحظة عالية ..دقيقة ..
ورديت دخلت داخل وقلت لأمي ..
هناء: يما ...رفيجتي برة ..باخذ منها شي وبرد ..جدام البيت مارح اطلع بعيد ..
وصعدت فوق ...لبست شيلتي وعباتي ورديت نزلت وما نطرت رد امي ...رديت لعالية ..مسكتها من ايدها وقلت ..
هناء : تعالي معاي عند سيارتي ..
مشت وراي بطواعية ...فتحت السيارة وقعدنا داخلها ... قالت هي هني ..
عالية: انا رح اختفي من حياتكم جني ما كنت موجودة اصلا ... بس هناء ..
ومسكت ايدي كأنها تترجاني ..
عالية: اعتذر لي من طلال اخوج ..انا خلاص تبت والله هداني ...من حادث اخوج وطراق اللي عطتني اياه امج عرفت الطريق الصح ...انا وعصام كنا نعرف ان اللي ماشيين فيه غلط بس عماني حب ...
وسكتت جنها استحت ... فقلت ..
هناء: ادري عالية ..ادري انج تحبين سامي ..
مسحت دموعها وقالت ..
عالية : كنت ...انا الحين احبه مثل اخوي ... ثلاث شهور اللي اختليت فيهم مع نفسي كانت كفيلة انها ترجعني انسانة ثانية ...
ومسكت مقبض الباب تبي تطلع ...
عالية : اطلب طلب اخير منج ...سامي ..وصلي له اسفي واعتذراي على اللي سببته له ...تكفين هناء ..
مع السلامة ..




تآبــــع .. ^_^

[KaY]

وطلعت من الباب ..
طلعت وخلتني محبطة ...ولسان حالي يقول ...تو الناس ...
انا وسامي خلاص .. اللي بينا انتهى ...
سندت على السكان وبديت ابجي ... لعل الدموع تغسل الهموم اللي فيني ...
طبعا ما علمت احد عن يية عالية اللهم طلال ... اللي قال وبحبور وهو يبتسم راضي بنصيبه ..
طلال : الله يسامحها ... اللي صار صار وانتهى ...
طالعته بحنان ..من بعد موت غالية ..صار غير وايد ..صاير حنون اضعاف .. وصار هادي ويفكر قبل ما يخطو اي خطوة .. لهدرجة كان يحب غالية ؟؟
قلت وانا اتقرب منه وابتسم له ..
هناء: الله يعوضك ويعطيك على قد نيتك ياخوي ..
هز راسه وقال .
طلال : الله يعين ...
وقف هو وقال ...
طلال : استعدي باجر بنروح المحكمة عشان ..
وسكت .. غمضت عيوني انا وبألم قلت ..
هناء: عشان الطلاق ...
وتنهدت وقلت .
هناء: مسرع مر الأسبوع ...
هز راسه بايجاب ..وقال جنه يحسسني ان لسة في فرصة ..
طلال : انت اللي اخترتي وتقدرين تتراجعين ..
وطلع ..
اتراجع؟؟؟
بعد كل هذا ؟؟؟
لا خلاص ...انا وسامي ..يمكن نحب بعض بس الفروقات العائلية ما تركب ..
رديت داري وانا ودي اشوفه ... ودس اكحل عيني بشوفته الأخيرة ...ودي اقوله اني عمري ما حبيت احد كثره ...
انسدحت على السرير ... اتذكر ايامنا مع بعض ...اتذكر عصبيته وحنانه ..اتذكر ضحكه وزعله ...اتذكر سكوته وكلامه ..اتذكر شروده ...اتذكر كل شي فيه ...
بس فجأة وقفت ..
ابي اشوفه ...
استغربت طبعا الحاجة الملحة اللي يت فجأة ... قمت لبست عباتي وشيلتي وطلعت من الغرفة وبايدي سويج سيارتي ... الحمدلله ان ما كان احد موجود بالصالة ..طلعت بسرعة وركبت سيارتي وشخطت لبيتنا ..البيت اللي جمعنا مع بعض ..
انا وسامي ..
وقفت جدام العمارة وانا الهث جني ياية هني ركض مو على سيارة ...بس من التوتر ...
طلعت من السيارة ودخلت العمارة ..ورحت الشقة ...بطلت بابها ودخلت ...الليت مطفي ما عدا نور الشمس اللي محلي منظر الصالة ...تحركت داخل ... وكل ما اقرب اسمع صوت وكلام ...اتبعت مصدره وكان الغرفة الثانية ..اللي لما نتهاوش انا وسامي انام هني.. ولأن باب الغرفة كان شوي مبطل وطبعا كان يغريني اوقف جريب منه واسمع وفعلا سويت جذي ...شفت عمي بو سامي قاعد على السرير وسامي واقف منحني يحط ملابسه بالجنطة ..ليش ؟؟
عمي : يعني خلاص بترجع ؟؟
سامي: ئي ..انا مالي مكان هني ..برد امريكا واعيش ايامي الباجية لي بعيد ...
وتعدل بوقفته وطالع ابوه وكمل ..
سامي: ارجع سامي العازب ...اللي ياه هني اول مرة عازب وبيرجع لها الحين وهو عازب ..
عمي : انت مقتنع باللي تسويه ؟؟
راح سامي للكبت وطلع بدلة ثانية وقال وهو يفصل البنطلون عن القميص ...
سامي: مو مهم مقتنع ولا لأ ..انا ابي ابتعد عن هني ...
وحط القميص داخل الجنطة ... وقال
سامي: حاس روحي بختنق ...
وحذف البنطلون بعصبية وقال ..
سامي: احس اني بموت هني ... إذا بموت اموت بعيد عنها ... بعييد ..
ودز الجنطة وقال بصراخ ..
سامي : بعييد ...بعييد ...
هني قام عمي ومسك ايدينه يهديه ......مسك راس سامي وحطه على صدره ..والأخير بدا يبجي ...
اول مرة اشوفه يبجي ...اول مرة ....
نزلت مني انا دمعة على المنظر اللي شفته ... بغيت ادخل واعترف له بكل شي ...بس سمعته يقول وهي بحظن ابوه وبصوت مبحوح ..
سامي: احبها ...احبها ..يا يبا ..احبها ...بس ماني قادر انسى اللي سوته ... ماني قادر ...انا مسامحها بس ترجع ...بس ترد لي ...ابي هناء يبا ...ابي هناء ...
يا قلبي ... وانا بعد ابيك ...والله العظيم ...
قال عمي وهو يمسح على شعره ويضمه لصدره اكثر..
عمي : اهدا ...اهدا حبيبي ... اشششش ..
هني انا رديت ورا ودموعي تسيل ...ولاني مابيهم يحسون فيني ...دخلت الغرفة الثانية ...وصكيت الباب بشويش ...
وظليت ابجي ...وابجي ...
إذا تحبني مرة انا احبك مليون مرة ...
انت عيوني اللي اشوف فيها لو تدري ...
انت كلي ...
وقفت بسرعة وطلعت من الغرفة ...وطلعت من الشقة كلها ...ابي اروح البيت واعلم الكل اني ابي سامي ..ومابي اتطلق منه ...مابي ..
بعلم امي اللي اكثر وحدة تبي الطلاق اني احبه وما اقدر اعيش بدونه ... ما اقدر ..
وصلت البيت ..دخلت شفت طلال قاعد ...استغرب وقال ..
طلال : انت طلعتي ؟؟؟ وين كنتي ؟؟
قلت باصرار ولأول مرة ..
هناء: طلال انا مابي اتطلق من سامي ..
ظل يبي يستوعب ...بس ابتسم اخيرا ...
طلال : كنت اعرف انج عاجل ...صج عليج هبات غريبة بس بتعقلين آخر شي ..
علمت امي اللي هاجت وماجت بس وقفت طلال معاي خلتها تسكت بس ظلت تحلطم ..ماهمني المهم سامي وخلاص ...
رديت الشقة ابي ابشره اني رديت له ...مالقيت احد ..ظليت ادوره بكل مكان بالشقة .... كنت ابي ادق على عمي لأنه آخر واحد شافه بس ...ما اعرف رقمه ...
يا الله ...وين القاه الحين ؟؟؟
لا يكون راح المحكمة يطلقني ؟؟؟ لا باجر موعدنا مو اليوم ...
انزين وين راح توه كان هني ..
سمعت صوت الباب يتبطل ابتسمت بلهفة عبالي سامي بس انصدمت انه عمي ...قلت باحباط ..
هناء : عمي ..
طالعني عمي بعد مصدوم وقال ..
عمي: هناء .. شنو تسوين هني يبا ؟؟
تجدمت منه وقلت مطنشة سؤاله وقلت بشوق ..
هناء : عمي سامي وين ؟؟
ارتبك ...قلت ..
هناء : عمي ..
رفع راسه لي وقال..
عمي : ليش تسألين ؟؟
طالعته بتشكك في شي خاشه عني ..قلت بخوف.
هناء: عمي ...سامي وين ؟؟
تنهد وقال ..
عمي : سامي ...
هزيت راسي ابيه يكمل وانا اطالعه بخوف ..
عمي :سامي بالمستشفى ..
بققت عيوني عليه بصدمة وقلت ..
هناء: لييييش ؟؟
نزل راسه وقال بحزن ..
عمي : طاح علي قبل شوي فوديته المستشفى بسرعة ...
تراجعت وانا مصدومة ... قلت ..
هناء : توني كنت عندكم ما كان فيه شي ..
رفع راسه بسرعة وقال باستغراب ..
عمي : كنت هني ؟؟
ما رديت عليه وبسرعة طلعت من الشقة ابي اروح له ... حتى ما سألت عن رقم الغرفة ولا شي ...
وصلت المستشفى بزمن قياسي لأني كنت ااسوق بسرعة الصاروخ ... ما همني الأشارات ولا شي ..
ركضت داخل وباستعجال ...دخلت اقسام غريبة عجيبة مسكت وحدة من الممرضات وسألتها بس وصلتني للرسبشن سالت عنه ..قالوا لي بالملاحظة ... حتى ما خليتها تكمل ركضت للملاحظة وانا خايفة ...لقيت دلال هناك ...قاعدة بالكراسي وهي تبجي ...لما شافتني لفت ويهها عني ...وصلت لها وقلت ..
هناء : دلال ...سامي اشفيه ؟؟
لفت لي ويهها خشمها احمر من البجي ..
دلال : دخلي شوفيه ..شوفي لين وصلتيه ..
خفت من نبرة كلامها ان فيه شي جايد ...ما نطرت دخلت بسرعة ودزيت الباب ...لقيته منوم والكمام عليه .. وكان يتنفس مع ذلك بصعوبة ...تقربت منه وبخوف مسكت ايده وقربتها مني ...بستها ودموعي بدت تنزل ...
قربت منه ومسحت على شعره وهو لسة مو حاس فيني ...حرارته مرتفعة نقلتها لي لمسة ايده ...
بطل هني عيونه بتعب ولما شافني انرسمت الصدمة عليها ... رفع ايده الثانية وبعد الكمام فقلت ..
هناء: لا خله ..
ما سمعني وبعده ...وقال بصعوبة ..
سامي: هناء ...
قربت منه وقلت ..
هناء: عيون هناء ..
غمض عيونه وكح شوي ...فضغطت على ايده ...قال ..
سامي: اسنديني ابي اقعد ..
سندت وعدلت من قعدته ... قعدت يمه وهو مسك ايدي وقال وهو يبتسم بصعوبة ماادري اشفيه ..
سامي: اشقت لج ..
مررت ايدي على وخده وهو صك عيونه جنه مستمتع من هالشي ...قلت ..
هناء: خلاص ...انا مارح ابعد عنك ابدا ...ابدا ...
بطل عيونه وقال ..
سامي: ياليت ...ياليت اللي تقولينه يصير صج ..
استغربت وقلت ..
هناء : ليش تقول جذي ؟؟ انت مو مصدقني ؟؟
غمض عيونه وسحب نفس ...وبطلهم وقال بصوته المريض ..
سامي: مصدقج ...
وكح ... قربت منه وقلت بخوف ..
هناء: سامي اشفيك ؟؟
مارد علي لأنه ما قدر وظل يكح ويكح ...طلعت انا برة وقلت وانا ادور على طبيب ولا ممرضة ولا اي احد يسعفني ...ما انتبهت لدلال ولا غيرها ...ناديت على الطبيب وركضنا للغرفة ....شفته نايم على السرير ودلال يمه تحاول تشربه الماي بس هو ما يقدر يتنفس ...طردنا الطبيب برة وانا طلعت بصعوبة وعيوني عليه ...
بد ربع ساعة ..شفتهم يطلعونه وينقلونه مكان ثاني ..سألت الطبيب وقالي انهم رح يودونه العناية ...
انشلت ريلي ....العناية ؟؟؟ ليش ؟؟؟
التفت لدلال بس هي ماتبي تكلمني ... وصل عمي بهاللحظة وقمت احقق وياه وهو يتهرب ...في شي مايبون يقولونه لي ...
ظل سامي خمسة ايام بغيبوبة .... وانا بين البيت والمستشفى ...حتى الجامعة طنشتها ... بس عشانه ..عشانه يهون كل شي ...
وفي يوم السادس ... بشرني الطبيب ان سامي قعد .. دخلت الغرفة وانا متلهفة له قعدت يمه وبشوق مسكت ايده وقلت ..
هناء : حمد لله على السلامة حبيبي ...
بَعد الكمام وقال بصوت مبحوح يالله ينسمع ..
سامي: الله يسلمج ..تعالي قربي ...
قربت اكثر وقلت وانا امسح على شعره وابتسم ..
هناء: جذي تخرعني عليك ...حرام عليك ..
طلب مني اني ارفع السرير مع ان الطبيب رافض هالشي ..بس لأنه ومثل ما يقول ..
سامي: ابي اقولج شي مهم ..
قعدت بعد ما رفعت السرير .. مسك ايدي ولعب باصابعي ..شكله مرتبك .. قلت ...
هناء : مو لازم تقولي سامي بعدين..
قال وهو يهز راسه وبصعوبة تكلم ..
سامي : لأ بقولج الحين ...
وسكت انطر يقول مبين عليه مصر يتكلم .. سكت يتنفس ... نزل نظراته لأصابعي وقال ..
سامي : انا ماكنت ابي اطلقج وانتي تدرين بهالشي ...وانتي كنت صاجة ..انا وانتي مو لايقين على بعض حتى لو كنت احبج واموت فيج وهاذي حقيقة ... انا ...
وسكت يجمع الكلمات ... سحب نفس ..جنه اللي يبي يقوله ثقيل عليه ...قال اخيرا ..
سامي: انا كنت رافض الطلاق لسببين ...الأول قلته لج توني .. لاني احبج ..والثاني لأني ..
سكت هني لأن صوته اختفى ...قلت وانا احط ايدي على خده ..
هناء : تكلم حبيبي قول ..
رفع راسه هني والقى قنبلة ولا هيروشيما ...
سامي: انا مريض بالسرطان الدم ...
وقف الزمن هني عندي ...وقف كل شي ..آمنت الحين ان بدوران الأرض حول الشمس ودورانها حوالين نفسها ....
انا شقاعدة اقول ؟؟؟ من الصدمة قمت اخربط ....قلت وانا انزل ايدي عن خده ..
هناء: شنوووو؟
سامي: مريض من اربع اشهر ...من اول ما ينا هني الديرة ...
نزلت مني دمعة وانا اصلا احس ان القناة الدمعية مالتي اختفت ودموعي هاذي تبخرت ....
كمل وقال ..
سامي: كانت تيني اعراض مثل دوخة واقعد ارجع واطيح بعض المرات ...
وقفت مبتعدة ...مو مصدقة اللي قاعد يقوله ...قال برجا ..
سامي : هناء تكفين لا تزودينها علي ... انا ماني ناقص ..
لا مستحيل ...مستحيل ...رديت قعدت عنده وانا ابجي واقول ..
هناء: ليش ما قلت لي ؟؟
سامي: انا نفسي كنت شاك وقلت اتعالج لأنه هالمرض قابل للشفاء بس ...حالتي متأخرة ...
مسح دموعي وقال وهو اصلا تنزل منه دمعة ..
سامي: لاتبجين ...مابي اشوف دموعج ... خليني اعيش الباجي من عمري بدون دموع ...تكفين هناء ...لي لي هالطلب ...
ما قدرت اتحمل ...لميته لي ...وظليت انتحب بصوت عالي ....
خلاص ...هاذي اللي رح يفرقنا ؟؟؟
هذا ؟؟؟



.
.


هنــــــــــا انتهي لليومـ !

تابعـ باجر

[* مغـ،،ــرورة *]

يسـلمو كااايو على التكلمة

وناطرين الباجـي

بس لا تطــولين

بليــــز

:(

[KaY]

[ الحلقـــه التآسعـــه والعشــرون .. والأخيـــره ]



.. ورحــل ..



مديت ايدي له بالدوا وانا ابتسم له ...وقلت ..
هناء: يلا يا حلو بطل حلجك ..
طالعني باستنكار وقال ..
سامي : ريال شكبري انا ما ..
ما خليته يكمل لأني دسست القفشة بحلجه غصب ...وقلت ..
هناء: اخلص بس ...ريال شكبري ..مو علي هالكلام ..
بلعه غصبن عنه ...وقال وهو منقرف من الطعم ..
سامي: مر ...بعدين كسرتي ضروسي شوي شوي ..
ضحكت على شكله وطلعت من الغرفة ...واول ما طلعت اختفت ابتسامتي ...وحلت بدالها العبرة والبؤس ...بغت تنزل مني دمعة والله ...تذكرت كلام عمي ابوه لما علمني ان حالته ميؤوس منها وسامي يدري عشان جذي ما قالي ...مو قلت لكم اني انا عنده بالدرجة الأولى ...
نزلت راسي وهني نزلت دمعة للارض ...غمضت عيوني امنع نفسي اني ما اتذكر شي ..على الأقل جدامه ..
بس مو قادرة ....مو قادرة ..اشوفه يموت جدامي واسكت ؟؟ ما اقدر ....
اتمنى بس اني ما تزوجت ولاصار كل هذا ولا عرفت بمرض سامي ولا عشت بهالحياة اصلا ...
ليتني مت قبل هاليوم وكنت ناسيا منسيا ...
ولكن هاذي ارادة رب العالمين ...وما يصير نعترض ...
تحركت للمطبخ ...ورديت الدوا مكانه ..وغسلت ايديني ...ورجعت له بس تفاجأت لما شفته نايم ... لحفته عدل وطلعت مابي اقعد اكثر اشم ريحة الموت بالغرفة ...
بطلت الدرايش بالصالة ووقفت عند وحدة منهم ...اتنفس بعمق ابي الهوا يدخل ينظفني من داخل ...يملأ رئتاي ...الجو اللي عايشته خانق وكاتم ...غمتة ..غلقة ...
غمضت عيوني ومر علي الموقف لما علمني عن مرضه ... ما اقدر اصلا ما اعرف اشلون اوصف لكم شعوري ...
شي اساسي ومهم في حياتج وفوق كل هذا متعلقة فيه ...يختفي جذي ...بلمح البصر ؟؟
اللهم لا اعتراض .... اللهم لا اعتراض ..
محد يدري عن مرضه اللهم انا ودلال وعمي بس ..حتى اهلي ما قلت لهم ..سامي محرصني ما اعلمهم عشان عرس عبدالله قريب وما يبي يخرب عليه ...
يهتم في الناس وهو بعدين ...ما يفكر بنفسه ... ما اقول انه مثالي بس طيبته تخلي الواحد يحبه غصب ...
وانا اولهم ...
سالت دمعة مني ما قدرت اتحكم بمشاعري ...ما اقدر ... بس مسحتها بسرعة ...مابي افكر بهالموضوع خل اعيش لحظتي ....
صكيت الدريشة ...وخليت الباجي ...قعدت على القنفة ومسكت الريموت كنترول وقمت افر بهالقنوات وعقلي مو معاي اصلا ...بس اخر شي استقريت على العفاسي ... شفته يقرا ...رفعت الصوت وحطيت المخدة وسندت عليها وقمت اسمعه يتلو ... وانا بهالحالة من الضيق ابي اسمع شي يريحني ومارح القى احسن من القرآن ...
ماحسيت بروحي إلا بصوت يناديني ...بطلت عيوني ...اوووه نمت !!!!!!
وضحت الصورة جدامي وكان طبعا سامي ... ابتسم بعفوية وقال ..
سامي: شنو اللي منومج هني ؟؟
وقعد يمي ..قلت وانا اتعدل بقعدتي ...
هناء: لا بس كنت اطالع التلفزيون ما حسيت بروحي إلا وانا نايمة ...
مسك الكنترول وقال ..
سامي: ئي انزين قومي صلي اذن المغرب من ربع ساعة ...
رديت شعري ورا وقمت رحت توضيت وصليت ودعيت لسامي ان الله يشافيه ...طلعت ورديت الصالة لقيته قاعد يتكلم بالتلفون ...
سامي : دلول ...بس عاد حفظت الإسطوانة ..
(..............................)
قال وهو يتنهد ...ابتسمت انا ..دلال معروفة بالجرجة ..
سامي: والله حاضر والله ...
سمعته يقول بصوت واطي وبملل ...
سامي: لا إله إلا الله ...
ورد كلمها ..
سامي: وااااي دلول ...ياحبج للهذرة ...احلف بشنو عشان تصدقين اني بخير ؟؟
هزيت راسي وانا مبتسمة عليه وعلى دلال ...الله يعينه ...دلال الصراحة كلامها كثير وحنانة ...بس لاتقولون له ...
(..............................)
سامي: لأ ..دلول انتي الحين بتسافرين اشحقة تيني ؟؟
(.............................)
سامي: لأ ..دلول ..لحظة ..
وقبض ايده بملل منها ومن كلامها ..ضحكت عليه ..
سامي : هلا والله بو حمد ...
(...................................)
شفته يبتسم برسمية ...
سامي: لا اشدعوة ...بس مابي اكلف عليكم انتوا الحين مسافرين ...ماله داعي اليية ..
(...................................)
سامي: تسلم ...مع السلامة ...
وصك السماعة ...وتنهد بصوت مسموع وهو يرد راسه لظهر الكنبة ...قلت وانا ابتسم ..
هناء: اشفيك ؟؟
رفع راسه وقال ..
سامي: دلال ..حنانة ...
ضحكت على طريقة كلامه لما قالها ..قلت وانا طقه على جتفه ..
هناء: عيب اختك العودة ..
قال وهو يمسك الكنترول ..
سامي : لا جد صدعت لي راسي ...اقولها بتسافرين الحين تقولي بييك ..وين تيين وهي يالله عيالها ماسكتهم ؟؟
قلت وانا اسند ظهري بالقنفة واحط ايدي على صدغي جني اتابع شي مهم ..
هناء: اشفيهم عيالها ؟؟
قال جنه تذكر شي مزعج ..
سامي: واااي ..عيالها ...حمود وعبود وعبور ...سالفة ..قصة قصة ... انتي بس عشان تكلمنيهم يبيلج مكبر ...
مني ما قدرت امسك روحي ...ابتسم هو وقال ..
سامي: والله صج ...من الإزعاج ما تسمعين صوتج اصلا ... احاجيهم جني احاجي طوف ..احاجي روحي والله العظيم ...
قلت ..
هناء : انزين وشهد ؟؟
ابتسم لما تذكرها وقال ..
سامي : حبيبتي شهد ...صج هادية وما تسمعين لها حس ..بس لما تقعد ويا هذول ...تقلب ..يطلع ويهها الحقيقي ...
هناء: اشمعنة عندنا هادية ؟؟
سامي: انا اعقلها ...
هناء : اشلون ؟؟
سامي: لا يعني يوم تبي شي وانا اقولها لأ ..يعني لأ ...انتهى ...ما ترد تقولي ابيه ...بس عيال دلول ...لو تحاجينهم من اليوم لين سنة الياية ...ماكو فايدة ...اقولج تحاجين الطوف ...مو اوادم ..
ثللت وانا اضحك بخفة ..
هناء: حرام عليك ...يهال هذول ..
سامي: ئي ما قلنا شي ...بس إذا خليتهم ياخذون راحتهم من هم وصغار اشلون لما يكبرون ؟؟ ما تقدرين عليهم ... صعب ..
ولف يطالع التلفزيون ...سكت انا وما تكلمت وظليت اطالعه بس وانا ابتسم ... حس فيني وطالعني باستغراب ..
سامي: اشفيج تطالعيني جذي ؟؟
نزلت ايدي وقلت ..
هناء: انت ما تنفع اب ...مجرم ..
ضحك هو وقال ..
سامي: ما احب الدلع ...
قلت وانا اوقف ..
هناء: احلى شي بالدنيا الدلع اصلا ..
سمعته يقول ..
سامي : right... right
حسيته يتطنز ..لفيته له لقيته مطنشني ويطالع التلفزيون ..قربت منه وشديت شعره ...
سامي: آآآي ...
ونحشت وانا اقول ..
هناء: تستاهل محد قالك تطنز علي ...
ودخلت المطبخ سمعته يقول بصوت عالي يسمعني ..
سامي : مانتي صاحية ..
ابتسمت ...سويت شي ناكله ..طلعت وبايدي الصينية ...لما شافني مد ايدينه واخذ عني الصينية ..تذكرت هني لما كنا بالبر وسامي شال عني الصينية ...واشلون كلهم ضحكوا ...
سامي : ليش كل هذا ؟؟ انا مابي آكل ..
طالعته وقلت بأمر ..
هناء: لا بتاكل ...
سامي: بس ..
شفت هني سجين نسيتها يبتها معاي ..مديت ايدي واخذتها وقمت احركها جدامه .. قال هو هني وهو يمد ايده بسرعة ..
سامي: I changed my mind
وآكل لقمة وقال ..
سامي : perfect..
ومد لي ايده وبايده الخبزة...كل هذا سواه من الخرعة لا اذبحه ... هزيت راسي وانا اكتم الضحكة ...وكليت معاه ...
تعشينا واحنا نسولف ونطالع التلفزيون ... جذبنا فيلم ...ومر وقت وخلص ...كنت ابي اقوله يقوم ينام عشان موعد الدوا بس سبقني وبنفس الوقت صدمني ..
سامي : قومي بدلي ..بنطلع ..
بققت عيوني عليه ...من صجه هذا ؟؟
هناء: شنوو؟
وقف وقال ..
سامي: بروح ابدل قبلج ...
وراح ... هذا يتكلم من صجه ...تحركت وراه وقلت ..
هناء: بس انت ..
لف لي وهني انا سكت كان جاد وقال ..
سامي: بطلع يعني بطلع ...
وكمل طريجه للغرفة ....اووووف عنيد ...
بس رق قلبي له حرام من اول ما دريت انه مريض وانا مانعته حتى عن الهوا ...بس والله مو بايدي ...اخاف عليه ..
وعشان لا احسسه بشي دخلت الغرفة وبدلت ولبست احلى شي عندي عشان ابي اونسه ...بس موحيل بنرد بعد ساعة وعلى جذي بنتفق ولا ماني طالعة ..
وقفت عند الباب جدامه قبل لا نطلع وتخصرت وقلت ..
هناء: من الحين نتفق ...بعد ساعة نرد ..
واشرت على الساعة ابين له اني جادة ...قال بملل وبعد ايدي ..
..المهم اطلع ...what ever… سامي:
ابتسمت عليه ..حرام مخنوق ... طلعنا واستانسنا طبعا وخليت الجو بينا يكون مثل كل مرة ...اما هو ما صدق مرح صاير ولا كأنه مريض ...نفسيته عال العال ..وهذا شي ريحني ...طبعا قص علي ونساني الوقت وما انتبهت عليه وقعدنا هناك ثلاث ساعات ...لما اكتشفت هالشي كفخته ...
هناء: انا اوريك ..تقص علي ها ؟؟
صكيت الباب كنا تونا رادين ...التفت لي وهو ماشي داخل ..
سامي: والله من لديه حيلة فليحتال ..
وابتسم لي بهبل ودخل داخل ...
بدلت انا وانسدحت على السرير ...تعبت من كثر السوالف والضحك كله من سامي ... سمعت صوت الباب بعدين قال ..
سامي : بتنامين يا الكسولة ؟؟
هناء: حرام عليك ...الساعة 11 و نص الحين ..وباجر وراي دوام ...
انسدح هو بعد وقال وهو يعدل المخدة ..
سامي: نامي لا تموتين علينا ...
وخرب شعري ...ضحكت انا ...وعطيته ظهري ...وإلى العالم الأخر ...
قمت مفزوعة ومخترعة على صوت شي طاح ...التفت وكان جدامي خيال واحد ..طبعا سامي ..بس لأنه ظلمة ...قال ..
سامي: اووه قعدتي ؟؟ آسف حبيبتي بس ...
وقفت انا وقلت بخوف وانا الف الناحية الثانية ..
هناء: حبيبي اشفيك ؟؟
لمحته ينزل تحت كأنه يلتقط الأبجورة اللي طاحت .. مسكتها عنه وحطيتها في مكانها وشغلتها ..هني بان كل شي جدامي ...
سامي: ماكو شي بس ...
حسيته مو قادر يتكلم ...غمض عيونه وشكله دايخ ... مسكت ايده وجفلت من هول حرارتها ...حطيت ايدي على يبهته ...شهقت ...
هناء: حرارتك مرتفعة وايد ...
كان يبي يتكلم بس قلت انا ..
هناء: لا تعب عمرك ...
وقال بصوته المريض ...
سامي: مافيني شي لا تخافين ..
ومسك ايدي كأنه يطمني ..
مااخاف ؟؟ انت بتموت جدامي ...مو قادر تكلم حتى .. نومته ولحفته عدل ... طرت للمطبخ اييب الدوا ومعاي كمادات ...رديت الغرفة وحطي الدوا والكمادات يم الأبجورة وتقربت منه وقلت وانا امسح على شعره ..
هناء: سامي ...
بطل عيونه بثقل ..مديت ايدي اسنده عشان ياكل الدوا ...بعدها حطيت له الكمادات وقعدت يمه تقريبا لمدة ساعة ...كل شوي اجيك إذا انخفضت الحرارة ولا لأ ... بس لا امل ...مافي إلا ادق على عمي ايي يشوفه ..طلعت من الغرفة لهدوء عشان لا انبهه...مسكت السماعة ودقيت الرقم ..نطرت ليما يرد ...تلقائيا شفت الساعة 2 ونص ...الوقت متأخر ..اخاف نكون مزعجين ...طول يالله رد ...
عمي: الووو..
قلت بخجل ..طبعا لأن صوته كان مليان نوم..
هناء: الو ...عمي ...
عمي: منو معاي ؟؟
حتى ما عرف صوتي ....قلت بخجل اكبر ..
هناء: عمي انا هناء ...تقدر تيي الحين ؟؟
قال بخوف ..
عمي: سامي فيه شي ؟؟
سكت انا بس قلت ..
هناء: سامي شوي حرارته مرتفعة و..
قاطعني وقال ..
عمي: الحين ياي ..
صكيت السماعة ورديت لسامي ... وعلى حاله ...مافي شي يديد ...قعدت يمه اقرا عليه ..وهو شكله مو حاس فيني ... مسكت ايده وبديت اقرا واشد عليها ...
سمعت صوت الباب ..وكان عمي ..ما شاء الله ياه بسرعة راكب صاروخ ؟؟ ... عشر دقايق بالضبط ..طبعا كانت معاه جنطته حقت الكشف ...ولأني مابي اشوف شي يعور القلب ماادري طلعت ...حسيت اني ما رح اتحمل ورح اضعف ...
طلعت من الغرفة عشان سامي إذا قعد لا يحس بعجزه ..طول عمره قوي وما يحب احد يعطف عليه ..والدليل انه ما قال لي عن ماضيه إلا بعد ما صارت مشكلة يعني ما يطلب المساعدة إلا بالتفق ..
وقفت يم الباب انطر وانا ادعي انه يكون بخير وما يمسه شي ...
طلع لي عمي ...وكان يصك جنطته بس شكله شوي معصب لأنه قال ..
عمي: هناء ..انا مو قلت ما يتعرض للهوا لمدة طويلة ؟؟
شقولك ..هو اصر إلا نطلع ...
كمل عمي لما شافني ساكتة ..
عمي : هالمرة الله ستر المارة الياية ما ندري شنو رح يصير ..
حطيت ايدي على صدري ...لهدرجة ؟؟ بس قلت .
هناء: الحين هو بخير ؟؟؟ يعني ما فيه شي ؟؟
لما شاف عمي ضعفي وشوي وابجي ...قال بعد ما تنهد ..كسرت خاطره ..
عمي: لا يبا مافيه شي ..بتنزل حرارته ان شاء الله ..عطيته خافض للحرارة انتي ما قصرتي حطيتي له كمادات ...
هزيت راسي بتفهم وانا اصلا متوترة ..كله مني انا اللي خليته يطلع المفروض امنعه ...
عمي: هناء ..
التفت له وابتسم هو هني يطمني ..
عمي: لا تخافين ان شاء الله خير ... بس انتي هدي ...
وعدل مسكة جنطته وقال ..
عمي: يلا انا الحين بروح إذ ..
اول ما قال بروح جلبت فيه ..مسكته من ايده وقلت بترجي ..
هناء : لا عمي ...خلك هني ...الله يخليك ..
طالعني متفاجأ...انا نزلت راسي ونزلت دمعة مني ...
عمي : ان شاء الله ..جم هناء عندي ؟؟
رفعت راسي وابتسم ...ابتسمت انا ..ذكرني بسامي ...خليت عمي ينام بالغرفة الثانية ...اما انا ما ياني نوم اصلا ... ظليت يمه قاعدة وماسكة المصحف اقرا .... اصدر حركة طالعته على طول ... كان مبين عليه الضيق ..شكله مو مرتاح بالنومة ... قربت منه وعدلت المخدة ..وعدلت راسه ... وهني اختفت تققيبة الحواجب ...بسته على يبهته ورديت قريت ...
ظليت اقرا لين ما اذن الفير ... صليت ورديت قريت ... كنت اكمل صورة الكهف بس حسيت انه صاحي ..
هناء : سامي ...
قال وهو مغمض عيونه وبصوت ناعس ..
سامي : كملي قرايتج ... ابي اسمع ..
طبعا انا استغربت ...بطل عيونه وطالعني وقال يوضح ..
سامي: يريحني القرآن كملي ...
ورد حط راسه على المدخة وغمض عيونه ينطرني اكمل ...
رديت فتحت القرآن وانا لسة مستغربة ...وقريت السورة كلها ... لما خلصت حطيته على الأبجورة وقلت وانا احط ايدي والعب بشعره ..
هناء : بروح اسويلك ريوق ... مو تنام ..
قال وهو مغمض عيونه ...وبضيق ..
سامي: ماني مشتهي شي ...
قلت بهدوء وانا اقوم من الكرسي واقعد يمه ..
هناء: حبيبي ...لازم تاكل ..
بطل عيونه وطالعني بلونها الفاتح الترابي .. بس بعثرها مايبيني اشوف ضعفه قال بصوت مخنوق من الضيق ..
سامي: مابي شي ...كافي اني خليتج تغيبين ...تعبتـ..
ماخليته يكمل لأني حطيت صبعي على شفايفه امنعه من الكلام ...طالعني وابتسمت وقلت ..
هناء: لا تقول جذي ...مابي اسمعها منك مرة ثانية ... انت ريلي وزوجي وحبيبي ..وكل شي بدنيتي ...
ظلينا نطالع بعض جنا مو شايفته من قبل وظليت اتأمل ويهه وهو بالمثل ... ابتسم ابتسامة عذاب ولو انها مريضة ..
سامي: انا قلت اني احسنت الأختيار ... ماخاب ظني فيج ابدا ... لو خيروني بينج وبين الدنيا كلها ...بدون تفكير اختارج انتي ...
ابتسمت بدلع وقلت اتغشمر ..
هناء: طبعا ..ماخذ هناء جاسم ...مو شوية ..
ضحك وطقني على خدي ع الخفيف وقال ..
سامي: هذا اللي ذابحج ..الغرور ..
ضحك انا بخفة وقلت بغرور ..
هناء: شعبالك؟؟ انا هناء والأجر على الله .
وقمت وقلت قبل لا اطلع ..
هناء: بروح اسوي الريوق ...والله سامي ان ما كليت ..
قاطعني وقال ..
سامي: باكل ..باكل ...مو بايع عمري انا ...
ابتسمت له وقلت ..
هناء : good boy…
وطلعت ...تذكرت وانا بالمطبخ ان عمي موجود ... بس خليه يصحى بروحه ... سويت الأكل ..ورديت الغرفة وبايدي الصينية ...حطيتها ولفيت ابي اطلع اقعد عمي ..بس وقفني سامي..
سامي: وين ؟؟
هناء: بروح اقعد عمي ...
طالعني باستغراب وقال ..
سامي: عمج ؟؟
اووووه نسيت اقوله ان عمي هني ...اكيد بيزعل ... بس خلاص رح يعرف هو قلت وانا منزلة راسي للأرض جني مذنبة ...
هناء: امس دقيت على ابوك عشان ..
ورفعت راسي وبلعت ريجي لما شفت التعابير بدت تنرسم على ويهه .....قال ..
سامي: دقيتي على ابوي ؟؟ ليش هناء ؟؟ تعبتيه على الفاضي ...
قلت ابرر ..
هناء: كنت تعبان وايد يعني اخليك تموت جدامي ؟؟
سكت وما رد ...نزل نظراته للصينية وقال بصوت واطي وبانكسار ..
سامي: I’m already daed..
قلت بعصبية ..
هناء: سامي ..
قال بسرعة ..
سامي: روحي قعديه ..روحي ..
هزيت راسي باستنكار وطلعت من الغرفة ...طقيت الباب عليه كذا مرة وعلمته ان ريوقه محطوط على الطاولة ...
رديت لسامي لقيت لسة ما اكل شي ...قلت ..
هناء: انت لسة ما كليت ؟؟
قال وهو يمسك جيس الخبز ..
سامي: انطرج ...تعالي اكلي معاي مارح آكل بروحي ..
قعدت ومسكت عنه اسوي ...سألني ..
سامي: ابوي قعد ؟؟
هزيت راسي بالنفي وقلت ..
هناء: بس علمته ان ريوقه على الطاولة وقت مايقعد يلقاه جاهز ...
سامي: ما نمتي انت من بعد ما قمت آخر مرة ؟؟
هناء: لأ ...ليش ؟؟
وحطيت اللقمة بحلجي ..
سامي: عشان ابيج تردين ترتاحين ... امس كله مو نايمة ...وغير المحاضرات اللي ضاعت عليج ...
قلت بدون اهتمام ..
هناء: هي بدون شي ضايعة ..انا اصلا باجر بروح اوقف قيدي ...
واخذت من المربى شوية بطلت حلجي عشان آكل بس انصدمت لما شفته يطالعني ماادري اشلون قلت باستغراب ..
هناء: اشفيك ؟؟
كان ماسك خبزة بايده ويطالعني مصدوم وقال ..
سامي : توقفين قيدج ؟؟
خرعني عبالي شي جايد ... قلت وانا ابلع اللقمة ..
هناء: ئي ... الكورس هذا ضايع ضايع ...
سامي: ليش توقفين قيدج ؟؟
مارديت عليه لاني لو قلت عشانك بيذبحني وإذا قلت عشان نازلي انذارين والثالث بالطريج بيزفني ..احترت معاه ...
قال جنه يكمل عني ..
سامي: عشاني صح ؟؟
طالعته بحيرة وارتباك ..جكني ...بس شسوي بالله ؟؟ قولولي انتوا ...شنو اسوي ؟؟
هد الخبزة وردها للصينية وبغى يقوم ...قلت انا بسرعة وانا امسك ايده ماابيه يقوم ..
هناء: سامي سامي ...لحظة ..
بعَد ايده بعصبية ..
سامي: مابي اسمع شي ...
ووقف...وقفت انا معاه وكنا جدام بعض بس السرير بينا ...
هناء: انا اصلا يايني انذار ثالث بدون اي شي ..إذا ما وقفت قيدي بيفصلوني بعدين ..
طالعني بصدمة اكبر ...غبية ..بدل ما اكحلها عميتها ...
سامي: انذار ثالث ؟؟؟ ليش انتي ما تدوامين عندهم ؟؟
قلت بصوت واطي ..
هناء : لأ مو عن بس لأن معدلي نازل وايد والكورس هذا اخذت مواد وما رح انجح فيهم اصلا لأني مو دارسة ولاشي ..ولارح ادرس ..
سامي: عشان ؟؟
ما عرفت شقول ..عشان المصايب اللي كانت تحل فوق راسي ولا مرضك اللي كملها علي ؟؟؟
هناء: ااا ...احم ...عشان ...
قال يشجعني اكمل ..
سامي: ئي ...
ينطرني اكمل ...والله ماادري شقولك ... سكت وطال سكوتي ..اما هو فهم وهز راسه باستنكار ... وطلع من الغرفة ... نزلت راسي انا بحيرة وقهر ...من بعد مرضه صار حساس وايد ..مو راضي اني اساعده ولا حتى يرضى اساعده بكلمة ...هو يالله قال لي بمرضه ... ماادري اشلون ارضيه ...ماادري ...
طلعت عشان اراضيه بجم كلمة ويكمل اكله ... بس انتبهت ان عمي قاعد وياه ... رديت الغرفة واخذت الصينية وديتها المطبخ ... حطيتها على الطاولة وغطيتها عشان إذا يبي ياكل لا يتعب عمره ...
سمعت صوت تلفوني ..وكانت خلود ..
هناء: هلا خلود ...
خلود : اهلين يا القاطعة ... وينج ما تدقين ولا تسألين ؟؟
هناء: والله مشاغل ...انتي ليش ما تدقين ولا تسالين ؟؟
خلود : صدتيني ... هههههه ...المهم ..بغيت اقولج تقدرين تيين معانا السوق ؟؟
هناء: ماادري والله خلود اعتقد مااقدر ...
خلود : انتي من بعد ما تزوجتي ما قمت تيينا ولا تسألين عنا ..لهدرجة ميتة على ريلج ما تقدرين تفارقينه ساعة ؟؟
ابتسمت وقلت ..
هناء: الله يقطع سوالفج ..لا يا الخبلة بس مااقدر اخليه واروح ..هو الحين في
البيت ..



تآبـــــع .. ^_^

[KaY]

خلود : ما يضر بس ساعتين ثلاث اربع ..
كملت عنها ..
هناء: خمس ست سبع ...حنا الحريم ما يكفينا ساعة ..
ضحكنا انا وهي ...وقالت ..
خلود : تكفين هناء حاولي ترى ما عندي احد يوديني عبود مو فاضي ..يلا بلييييز..
قلت باحراج من رفضي المتكرر ..
هناء: خلود والله مااقدر ...سامي تعبان شوي وما اقدر اهده ..
خلود : لا إذا على جذي خلاص ...يلا اشوفج باجر بالعرس ..
قلت متفاجأة ..
هناء: باجر العرس ؟؟
خلود : يا حظي ..ما تعرفين متى عرس ولد جيرانكم وبنت خالتج ؟؟؟
هناء: لا بس ما ..
خلود : بس بس ...خلاص باجر اشوفج .
وسدته بويهي ...ضحكت عليها هالدفشة دومها جذي ...مسرع عرسهم ...مع انه مر شهر على ملجتهم بس سريع ما حسيت ...
والله من المشاكل ما حسيت بشي ...سمعت صوت باب شقتنا ...طلعت لقيت سامي قاعد بروحه ..اكيد عمي طلع ...
وقفت عند الستارة مترددة احاجيه ولا بيهب بويهي ويعصب ...من اول ما مرض صاير عصبي ويتحسس من اي شي ..
قعدت يمه وهو طبعا ما ما التفت لي ...كان ماسك الجريدة ويقراها ...مع اني ادري انه ما يحب يقرا الجريدة بهالقعدة ..كان منسدح على القنفة ورافع الجريدة يقراها ... سحبت الجريدة فجأة ... وقلت وانا اجفسها ...واحطها على الطاولة ..
هناء: عرس ولد عمتك باجر ..
غمض عيونه وقال ..
سامي: I know..he told me before..
قلت باستنكار..
هناء: اشحقة ما قلت لي ؟؟
سامي: كنت بقولج بس ما ياه وقت ...
وطالعني وكمل ..
سامي : انت تخلين احد اصلا يقول شي ..
طنشت جملته وقلت وانا ابتسم بدلع ..
هناء: سموي ...
قال بقرف ..
سامي: وووع ...جم مرة اقولج لا تناديني بهالأسم ؟؟؟ مااحبه ..
ضحكت عليه وكملت ..
هناء: حبيبي ... لا تزعل مني ...والله سويت جذي عشان اكون قريبة منك ..
سامي: تروحين تهدين دراستج ؟؟؟ منطق عجيب الصراحة ...
هناء:يعني شسوي ...خلاص الكورس الياي برد ادرس واشد حيلي ان شاء الله ...لا تكبرها وهي صغيرة سموي ..
قعد وشد شعري على الخفيف .
هناء: آآآي ...
سامي: ويعاه ... لا تناديني بهالأسم .. بعدين إذا ما درستي الحين بتدرسين بعدين ؟؟؟
هزيت راسي بايجاب وقلت بثقة ..
هناء: اكيد ...لا تخاف انت بس ..
سامي: لا اخاف ؟؟ والله ما يندرى عنج انتي ..
ووقف ..قلت انا ..
هناء: بروح السوق ابي اشتري شي حق عرس عبدالله ..
لف لي وقال ..
سامي: حتى انا ...ما عندي شي ينلبس مثل الناس ...
ودخل داخل ...رحت وراه واستأذنت منه اروح السوق مع البنات ...بدلت وطلعت دقيت عليهم ورحنا شريت لي ثوب بسيط لأن مالي مزاج اشتري شي اصلا ..قبل ما نطلع من السوق شريت دشداشة حق سامي ...لأنه ما يقدر يطلع ...
رديت البيت لقيته قاعد على اللاب توب ولابس جاكيت ...استغربت بس يمكن بردان ...ما علقت ...
هناء: السلام عليكم ..
التفت لي وابتسم وقال ..
سامي : وعليكم السلام ...ها شريتي اللي تبين ؟؟
هزيت راسي بايجاب وقلت وانا اروح الغرفة ..
هناء: بروح البسه واوريك اياه ..
دخلت داخل ولبسته وطلعت له ...بقق عيونه علي جنه مو مستوعب اخترعت وقلت ..
هناء: شنو ؟ اشفيك تطالعيني جذي ؟؟
مارد علي وظل يطالعني .. ابتسم بوهن وقال ..
سامي: تدرين ؟؟ تصلحين تحفة فنية ..
قلت باستنكار ..
هناء: شنووووو؟
برر بسرعة وقال ..
سامي: اقصد لوحة فنية ...يعني لو واحد يقعد يرسمج ويحطج في معرض بتاخذين المركز الأول ...
ابتسمت بخجل وقلت ..
هناء: مشكور هيدا من زواك...
كتم ضحكته وقال ..
سامي : مشكور وهيدا من زواك طالعي الترقيع بس ....اشلحيه هلق ما صدأتي ؟؟
قلت وانا ابتسم عليه..
هناء:غلبتني باللهجة ...
سامي: لكان ماتأدري عليي انا سامي مو ...
وقلنا مع بعض ...
سامي + هناء : حيالله ...
ضحكنا ودخلت انا داخل ... الله يديم علينا هالضحكة يا رب ...
اليوم الثاني ...من الصبح راح سامي تحت معارضتي وتشديدي عليه لقاعة الرياييل على اساس انه ولد عمته الوحيد ولازم يوقف معاه بعرسه ... حرصت عليه ما يقعد بالبراحة وقت طويل ... اما انا لبست وانا اصلا بالي مشغول بسامي ..كل شوي ادق عليه واسأل ...
المغرب كنت ابدل هدومي لأني بروح لهم خلاص ..ياه سامي وهو الحمدلله مافيه شي ... دخل يتسبح وانا جهزت الدشداشة وحطيتها بالسرير ... انشغلت انا بتعديل روحي لأني ما رحت الصالون ... قلت الكحل بايدي ..
هناء: هاذي دشداشتك مكوية ومعدلة ...
طالعها باستغراب بس ما علق اخذها وطلع ...بعد تعديل وتمحيص بويهي طلعت ... قعدت بالصالة انطره ..عشان نروح مع بعض ... مسكت الريموت انطره و..
سامي: ها اشرايج ؟؟
التفت وكنت اطالعه عادي بس انبهرت بعدين ..ما قدرت انزل عيوني ... وقفت وحماس صفرت رديت ايام اول ..
هناء: احلى ...لالا جذي ما اقدر ...بتغطي علي ...
سامي: مو حلو ؟؟
هناء: مو حلو ؟؟؟ منو الخبل اللي يقول جذي ؟؟؟ انت احلى من الحلو بعد ..
قال وهو بعدل من غترته ...
سامي : اخجلتم تواضعنا ...يلا مشينا ...
بالسيارة اطالعه كل شوي ...اول مرة اشوفه بالدشداشة من اول ما تزوجنا ...طالع احلى ... ابتسمت برضا وانا حامدة ربي على هالريال ...
وصلني اول شي لقاعتنا ...قبل ما اصك الباب قلت ..
هناء: مو تقعد وتنسى عمرك ...ادق عليك تيني ...عشان موعد دواك ..
طالعني بملل وقال ..
سامي: حتى بيوم العرس تذكرني ...
ابتسمت عشان لا احسسه بطفش ..
هناء: وعشان لا تنقعني بعد ...
ضحك هو وانا معاه ... مشى عني بعد توصيات مني وهو بس يهز راسه بايجاب ...دخلت وامة محمد هناك اللي اعرفهم واللي ما اعرفهم بس شغالة ابتسامة لهاذي ولذيج ..تعب حلجي ..قام يعورني بعد ...
بعد ساعات من الرقص والردح والسمر ...دخل المعرس اخيرا ..وكان معاه ربعه اللي هم – اللي اعرفهم بس – طلال وعصام وسامي حبيبي ابوه وعمي بو عبدالله بو عصام ...كنت انا باخر الصالة بس عيوني كانت على واحد بس ...طبعا عرفتوا ... طبعا اشتغل اليباب ...عصام وطلال رقصوا شوي اما سامي اللي كانوا طلال وعصام يشدونه كان رافض ...اصلا مبين عليه مستحي ... ضحكت عليه ...وهم كنت اضحك على حركات عصام الهبلة بالرقص ..دزه طلال عشان يقعد وسمعته يقول ..
طلال : فضحتنا يا الخبل .ارقص عدل ترى ما رح ازوجك اختي ..
ضحك سامي ..يت خالتي ام عبدالله ودزت سامي وقالت ..
ام عبدالله : هو سامي ...ليش ما تشاركهم ؟؟
قال سامي بابتسامة خجولة ..
سامي: لا عمة مافيني على خبال عصوم ...الحين مارح يهدني ابد ..
عصام : انتوا اشفيكم طايحين فيني خبل وخبل؟ ..
قال ابوه ..
بو عصام : لأنك خبل اصلا ...
هني ماتوا كلهم من الضحك ...بعدها تصوروا وطلعوا ... خلصنا حنا الحريم ..وطلعت انا بعد ما دقيت على سامي وردينا البيت ...
كانت ليلة مميزة بصراحة ...
هناء: اشحقة ما رقصت ؟؟
قال بهدوء وهو يلحف روحه ..
سامي: ريال شكبري ارقص ؟؟ خليه حق عصوم وطلال اخوج ..انا مافيني اصلا ..
وغمض عيونه شكله تعب وايد ...
هناء: بس طلعت بالدشداشة روعة ..
ابتسم وهو لسة مغمض عيونه ..
سامي: طلول اخوج طول الوقت اخليه يعدلي الغترة دوخته ...
وبطل عيونه وكمل ..
سامي: هههههه..غير القاعة اللي كانت اصلا مو جاهزة ..
قلت بتفاجأ..
هناء : لا؟؟
سامي: والله ...دخلت انا لقيت ...
وضحك جنه يتذكر ..
سامي: دخلت لقيت عبدالله زانط الهندي اللي كان مشرف على ترتيب القاعة ..زين اني دخلت وبعدتهم عن بعض ..كان عبود معصب ...هديته واشرفت انا عليها ...
هناء: وطلال عصام وينهم وعمي بو عصام بو عبدالله ابوك ؟؟
سامي: طلال وعصام كانوا مشرفين على البوفيه ..اما ابوي وزوج عمتي وبو عصام ما خلينهم يسوون شي ...
وحط راسه على المخدة ...نمت يمه وقلت ..
هناء: تصبح على خير حبيبي ..
ما سمعت رد ...التفت لقيته مغمض عيونه شكله نام ...طفيت ليت الأبجورة ... وإلى عالم الأحلام ...
مرت ايامنا عادي ... والحين عدت ثلاث شهور بدون ما اداوم بالجامعة لأني وقفت قيدي .... حنيت فوق راس سامي عشان يروح يتعالج بس مو راضي ...صج انه ماكو امل بس على الأقل يحاول ...الأمل بالله كبير ... حاولت يمين يسار ماكو فايدة ...بس زين انه رضى يروح يراجع بالمستشفى كل ما اسبوعين طبعا يروح وهو كاره عمره بس المهم يروح ...طبعا إلى الآن ما علمنا احد ...وشكلي مارح اعلم ..
عرفت ان عبدالله وانتصار رح يسافرون لبنان شهر عسل ..اخروه عشان دراستها والحين هي خلصت وعقب باجر بتسافر ...
دخل علي سامي المطبخ وانا اجهز الغدا ...
سامي: هنوتي ...
التفت له ..
هناء: هلا ..
سامي: طلعي من هني جنج خدامتنا على هاللبس ...
شهقت بس ما قدرت اكتم ضحكتي ...
هناء: انا خدامتكم ؟؟؟ هين انا اوريك ..
وطلعت من المطبخ ووقفت جدامه وقلت ..
هناء: نعم خيو سامي ؟
سامي: بطلع ...تراني مليت من عرس عبدالله ما طلعنا ...قومي بدلي ..
ما قدرت اعترض لأنه صاج وانا بعد احتاج طلعة ابي اشم هوا عشان اجدد نشاطي ...
طلعنا وبالسيارة فاجأني انه اجر يخت او مثل ما يقولون قارب صغير شوي ...
هناء: يخت ؟؟
سامي: مو يخت بالمعنى المفهوم بس يعني تقدرين تسمينه يخت ...
ما صدقت إلا لما شفته بعيني ..ولعلمي المسبق انه يحب اليخوت ما عارضته ...
سامي: هاتي ايدج ..
مديت ايدي لأيده ومسكتها عشان اركب اليخت ... وااااو رائع .... جلت بنظري فيه ..كان فيه غرفة صغيرة وغرفة التحكم بس ... حلو ...لونه ابيض وبالنص خط بني عريض ...
دخل سامي غرفة التحكم وبدا يعلمني هذا حق شنو وهذا حق شنو .... استغربت انه يعرف كل هذا ...مو اقولكم يعشق اليخوت ؟؟
وقفت جدام البحر وهوا شهر ابريل الحار يلفحني ... غمضت عيوني استنشق قدر كبير منه ....بطلتهم وقمت اطالعه بشوق وشغف ...من زمان عنك يا بحر ... بس صج لين قالوا عك غدار ... ماادري ليه احسك غدار حالك حال البشر ... من برة حلو من داخل ابشع منك مافي ...
قمت افكر بشياء متفرقة وسامي قاعد داخل غرفة التحكم شكله يتعبث فيها ..ملقووف .. بس احبه ...
عمري ما حسيت اني في يوم رح القى احد يمسح دمعتي ولا يواسيني ولا يوقف معاي وقت المحنة مثله ..
صج لين قالوا الحب بعد الزواج احسن واحلى ... مرت جدامي كل المواقف اللي صارت لي من اول ما تزوجت سامي لين الحين ...
حسيت بايد تطوقني من جتفي ...وكان سامي طبعا ...
سامي: الحلو شنو يفكر فيه ؟؟
حطيت ايدي على جتفه وقلت ..
هناء: تصدق ؟؟ اخاف من البحر ...ماادري ليش
سامي: منو ما يخاف منه ...على كبره وحلاة المناظر اللي فيه داخله ..بس يخوف ...
هناء: بس دايما يتغنون فيه ..ويكتبون اشعار..
سامي: يتغنون بجماله وغدره بنفس الوقت ...
هناء: اشلون بالله هاذي ؟؟
سامي: هذا احلى شي اصلا ... غدار بنفس الوقت حلو ... بمعنى اصح مافي شي كامل ...
هزيت راسي بايجاب وعيني لسة على البحر ..
هناء: صح مافي شي كامل ... الكامل الله سبحانه ..
سكتنا ...ظلينا نتأمل البحر ... وبنفس الوقت مستانسة من قرب سامي لي ...
هناء: صج ..انت قلت لي انك ترسم ماشفت ولا رسمة لك ..
سامي : منو قالج انج بتشوفينهم ؟؟ انا مااوري احد رسوماتي ..
هناء : يعني لسة ترسم ؟؟
هز راسه بلا مبالاة وقال ..
سامي: يعني ...
قلت بحماس ..
هناء: خلاص مو مشكلة ارسمني الحين ..
طالعني بعدين ضحك بخفة وقال ..
سامي: ئي بسهولة هاذي ارسمني الحين ...بعدين اشايفتني ليوناردو دافنشي ؟؟
قلت وانا ارد شعره ورا ..
هناء: لا وانت الصاج فان كوخ ..
ابتسم بانبهار وقال ..
سامي: بعد !! تعرفين فان كوخ ...والله مثقفة انتي ..
دزيت راسه شوي بصبعي وقلت ..
هناء: جم مرة اقولك انك ..
قاطعني وقال يقلد صوتي ..
سامي: متزوج هناء جاسم مو حيالله ...
ورد لصوته الطبيعي وقال ..
سامي: حفظت هالإسطوانة ...اللي يقول الحين متزوج اشواريا راي ...
تخصرت انا وقلت ..
هناء: من وين تعرفها ؟؟ انا احيدك ما تشوف افلام هندية ..
سامي : يعني إذا ما اشوفها ما اعرف عنها شي ؟؟ هاذي معلومات قديمة ... قبل ما اشوف رقعة ويهج ..
شهقت وقرصته قرصة ما ينساها طول عمره ..

[KaY]

هناء: قبل ما تشوف رقعة ويهي ها ؟؟ واللي يقولك انك ما رح تشوف ويهي مرة ثانية ..
قرب مني وقال بجاذبية ..
سامي: واهون عليج ؟؟
مارديت ولفيت ويهي عنه وانا مستحية من داخل بس اتدلع عليه ..
وقف جدامي وقال وهو يبتسم ..
سامي : ادري ما تقدرين على فراقي ...شسوي يوم انا اكون مرغوب لهدرجة ..
قلت ..
هناء: لا ؟؟؟ وايد واثق من عمرك ...منو بالله اللي ميت عليك ؟؟
قرب وقال بهمس ..
سامي: انتي ؟؟
ظليت اطالع عيونه الساحرة ... بعَد عني شوي وقال بمكر وثقة بنفس الوقت ..
سامي: تنكرين ؟؟
لأ ...ما اقدر اصلا ..
مارديت عليه فقال ..
سامي: حلفي انج تقدرين ؟؟
طالعته بصدمة فهو ضحك ...قلت بعصبية وانا ادزه ابي اطيحه على البحر ..
هناء: خبل خبل ...
وهو ظل يضحك ...مسك ايدي بحركة مباغتة ولفني ناحية البحر وصار هو الحين اللي رح يطقني ... قلت بخوف وترجي ..
هناء: لا لا ..سامي عفية لا تقطني ...
قال بخبث ..
سامي: ترى إذا هديتج خلاص قولي على الدنيا السلام ..
قلت اكسر الغرور اللي فيه واتحداه ..
هناء: اعرف اسبح ..
وهدني شوي بس انا جلبت فيه بسرعة وصرخت وقال ..
سامي: والله ؟؟ منو تعرف تسبح الحين ؟؟
هناء: سامي حرام عليك ...
وقمت اصرخ ...ردني للوضع الطبيعي وهو يضحك فاطس من الضحك دزيته بعيد عني وانا اعدل شيلتي وقلت ..
هناء : حيل يضحك ؟؟؟
ما قدر يرد علي لأنه قعد على الكرسي من الضحك ...قمت كفخته على جتفه ... وسويت روحي زعلانة لين ما هو راضاني ...
اذن العصر علينا واحنا لسة ما تغدينا ...رد سامي للمرفأ وصلينا وردينا لليخت مرة ثانية ...سوينا كل هذا لأنا ما نعرف ناحية القبلة وين ...
وصلت لليخت قبله فجهزت الغدا اللي خذيناه ويانا ... شفته ياي ..
سامي : ها الشيف رمزي اشيايبة وياج ؟؟
هناء: الغدا اللي ما رضيت تاكله بالبيت ...
تغدينا ...ورديت انا الصحون والأكل داخل بالجيس ... طلعت له لقيته حاط ايده على راسه شكله تعب ..رحت عنده بسرعة وقلت بخوف ..
هناء: سامي ...اشفيك ؟؟
رد شعره ورا وقال ..
سامي: لا تخافين دوخة بسيطة ...خلصتي اكلج ؟؟
اي اكل اي بطيخ ...مسكت ايده وقلت ..
هناء: الحين نرد البيت يلا ...
قال بتعب واضح ..
سامي: ليش ؟؟ مستانسين هني احنا ... خلينا بهالجو الحلو ..
هزيت راسي بالنفي وقلت بعناد وخوف ..
هناء: لأ...قوم الحين ..
طالعني بجدية وقال ..
سامي: هناء...انا مابي ارد تكفين لبي لي هالطلب ...اعتبريه آخر طلب اطلبه منج ..
طالعته باستسلام ...وقعدت يمه وقلت ..
هناء: بس مانطول هني ...يعني بعد نص ساعة نرد البيت ..كافي الوقت اللي قعدناه ..
ابتسم وهو حاط ايده بمخابيه ..شكله بردان ...وقال ..
سامي: ان شاء الله عمتي ...جم هناء عندي ؟؟
وطالعني بعيونه العذاب وقلت وانا ابتسم على مضض ..
هناء: وحدة ..انا ..
ضحك بتعب وقال ..
سامي : واثقة من روحج وايد ...
قمت عنه وانا ابتسم ورديت للصحون والأكل اللي خليته ...كملت شغلي وخليت سامي يتمنظر بالبحر ...
لما خلصت طلعت مرة ثانية ...شفته واقف لسة بمكانه ...قربت منه وانا اناديه ..
هناء: سامي ..خلاص مرت النص ساعة ..
التفت لي وقال ..
سامي: مسرع ...تونا يايين ..
هناء : صارلنا اربع ساعات هني ... يلا خلص الوقت المحدد لك ..
سامي: صح صاجة ...
قالها بطريقة غريبة ..بس طنشت ورديت اخذ جنطتي من الغرفة الجيس اللي فيه الصحون ... لما طلعت مرة ثانية شفته قاعد ماادري اشفيه ... قربت منه وقلت ..
هناء: حبيبي ..في شي ؟؟
التفت لي وظل يطالعني شوي جنه يتاملني وقال ..
سامي: لأ ...
وقف بس رد قعد ...مسكته بسرعة وقعدت يمه ..
هناء: سامي ...
مسك ايدي وشد عليها وقال وهو مغمض عيونه ..
سامي: لا تخافين مافيني شي ...مشينا يلا ..
وقفت معاه وانا ماسكة ايده .. بس ما مدانا نمشي خطوتين إلا وقف ..سألته بخوف ..
هناء: سامي ...اشفيك ؟؟
مارد علي حسيته يترنح بوقفته ... سندته عدل وانا اسأله مرة ثانية بس ما يرد علي ..شفته يبطل عيونه ..حط ايده على يبهته جنه دايخ ... مو قادر يوقف ...بغيت اقعده بس طاح بشويش وانا معاه ..ايدي على ظهره ..وانا اقول بخوف وبصوت عالي ..
هناء: سامي ...سامي رد علي ..
بس ظل مغمض عيونه ..نزلته للارض بسرعة وبشويش عشان لا يتعور ... وركضت لغرفة التحكم احاول اني اطقطق فيه بس نسيت اشلون استخدمه ... قمت اطق الأزرار بعشوائية وخوف وارتباك واضح بس مافي ..ودموعي تنزل ....طقيت الأزرار بايديني حيل واصرخ ..
هناء: ما تشتغــل ...اشتغلي ..
رديت له ... لسة على حاله غير انه مبطل عيونه بس مو قادر يقعد ..ركضت عنده وسندته على فخذي ...وقلت ..
هناء: الحين ادق على خفر السواحل اييون ياخذونا ...لا تعب عمرك انت بس ..
كنت بين جملة وجملة اخذ نفس ...
كان يتنفس بصعوبة ..يغمض عينه ويبطلها ...قال بصعوبة ..
سامي : لا تعبين عمرج ...
وتنفس وكمل ..
سامي: ماكو فايدة ..
وغمض عيونه ..بعدين بطلها ..بلع ريجه وقال ..
سامي: شكلي بودع ..
انصدمت ...جفت دموعي فجاة .. ظليت اطالعه مخترعة ...غمض عيونه وابتسم وقال بصوته اللي بدا يختفي ..
سامي: ماكو فايدة هناء ..
لأ ..لأ مستحيل ..قلت وانا اهده اروح احاول بجهاز التحكم ..
هناء: بروح ادق عليهم ..
بغيت اقوم بس مسكني من ايدي ...لفيت له ...بلع ريجه وقال بصعوبة ..
سامي: لا تروحين ...
وغمض عيونه وتنفس ...وكمل ..
سامي: سمعيني عدل هناء ...
وكح ....قلت بخوف ودموعي كل مالها وتزيد ..
هناء: لاتكلم ..سامي الحين اييون ..
قال سامي بصوته المبحوح والواطي ..
سامي: انا شكلي مارح اعدي هاليخت ...
وسكت يتفس ...قلت انا بسرعة وباعتراض ..
هناء: لا تقول جذي ..
غمض عيونه وسحب نفس ..
سامي : خليني اكمل ... ابي اطلب منج شغلة اخيرة ..
غمضت عيوني لان دموعي حالت بأني اشوفه عدل ...وسالت على خدي ...
سامي: لا تبجين هناء ...اوعديني انج ما تبجين بعد ما اموت ...
نزلت راسي ودموعي تنزل وانتحب بصوت عالي شوي ...
سامي: اوعديني ...
هزيت راسي بايجاب بسرعة عشان لا يتكلم اكثر ..
هناء : وعد ..وعد ..
ابتسم وقال..
سامي : هناء ...
طالعته وقلت ...بصوت باكي ..
هناء: نعم ..
سامي: عيشي حياتج من بعدي ...
هزيت راسي بالنفي وباصرار ودموعي تسيل وبغيت اتكلم بس هو قال يسبقني ..
سامي: لا تربطين نفسج فيني ...انا خلاص بودع انتي عيشي حياتج من بعدي ...
وسكت ياخذ نفس ...
سامي: اوعديني ...
إلا هاذي يا سامي ...ما اقدر ..هني شد على ايدي حيل وقال ..
سامي : شهد ....شهد يا هناء ..امانة برقبتج ... ابوي رح ينشغل عنها ...لا تخلينها بروحها ...وامها هادتها مارح تسأل عنها ....
وكح ...مسكت ايده بغيت اتكلم بس الغصة منعتني ....
سامي : سامحيني هناء على ....على كل شي ... بس اعرفي اني ما كان قصدي اسوي اي شي يضايقج ... سامحيني يا الغالية ...
ما قدرت اتحمل ... وبديت انتحب وابجي .... مد ايده ونزع الدبلة بصعوبة وبمساعدتي وقال ..
سامي: خليها معاج ....
وكمل وهو يبتسم ..
سامي: ورسوماتي تلقينها بكتاب يومياتي شكلج من العصبية ذاك اليوم ما شفتيهم ...
طالعته مو مصدقة ودموعي تسيل ...قال وهو لسة يبتسم وغمض عيونه ..
سامي: ادري انتي من العصبية ....
اخذ نفس ..
سامي: ما تشوفين جدامج ..
وسكت شكله تعب ... مسك ايدي وشبك اصابعه باصابعي وقال ..
سامي: هاذي وصيتي هناء ...
وبطل عيونه وقال وهو يطالعني ..
سامي: ديري بالج على روحج ...
مسكت فيه وقلت ..
هناء: سامي انا احبك لا تروح ..
سامي: وانا اكثر ...كنت انطرج تقولينها ...بس ..
وابتسم بوهن شديد بس قطب حواجبه شكله يتالم بس قال ..
سامي: خلاص كاهو قلتيها ...
هناء : لا تروح سامي ...
وغمضت عيوني ابجي ...
سامي: خلاص هذا يومي ... ادعيلي هناء الله يثبتني وقت السؤال ...
هني ماقدرت ....خلاص حسيت ان ويهي كله دموع ... سمعت همهمة منه واعتقد انه يتشهد ... بعدها
حسيت انه مسكة ايده خفت ...هديتها طاحت على الأرض بكل طواعية ..سكن ...سكون سكون الأموات ...
هزيته وانا مصدومة وخايفة ....وانا اقول ..
هناء: سامي ...
ماكو رد ...
هزيته بقوة اكبر بس لا جواب .... هني ما صدقت ... قمت اطقه على خده واصرخ بإسمه بس ولا حركة ...عرفت هني انه مات ...مات ولا رح يرجع ابدا ...
ضميته لصدري وصرخت صرخة قوية من اعماق قلبي ...
هناء: سااااااااااااااااااااااااااااااامي ..

صرخة ترددت بسما تعلن نهاية حبي وموته ....

[KaY]

غمضت عيوني على هالذكريات ....صرختي لسة تردد على مسامعي ...وصوته لسة يرن بأذني ...
انتبهت للشمس تعلن مغيبها .... طالعت حوالي اتأكد اني ما تحركت من مكاني ..من بعد الغدا وانا قاعدة هني اتذكر ايامي مع سامي .... ابتسمت بألم عليه ....الله يرحمك يا سامي ويغمد روحك الجنة ...مع انها مرت ست سنين بس مارح انساه ابدا ..
سمعت صوت من بعيد التفت وكانت شهد ياية ومعاه كراسة رسوماتها ...طلعت فنانة مثل اخوها ....
انتبهت على صوت شهد تناديني ...
هناء: هلا ..
ابتسمت وقال ..
شهد : شوفي
وبطلت جدامي كراستها عشان توريني ..ابتسمت لها ..
هناء:رائع ....مدهش ...متى رسمتيهم ؟؟؟
قالت وهي ترد شعرها ورا ..
شهد : من زمان ... صج مشتعدة حق البرنامج ؟؟؟
هناء: يعني .... الله يستر الحين مااطلع حلوة بالتلفزيون ...
ضحكنا ...هني دخل طلال معاه ولده سامي ومرته خلودوه اللي تزوجوا اخيرا ...
طلال : ها هنوي ...مستعدة ؟؟
ابتسمت وقلت ..
هناء: كلكم تسالوني نفس السؤال ...ئي مستعدة يلا مشينا ...
رديت من المقابلة كانت معقودة بيني وبين برنامج عن الشباب المكافحين ...طبعا هاذي مو ثروتي ...اكتشفت بعد ما مات سامي انه كاتب لي شوية من ورثه والنص الثاني لشهد بس انا الوصية عليها ...
طبعا استلمت مكتبه بما اني دكتورة بعلم الإقتصاد ...
قطعت علي شهد ذكرياتي اللي كنت استرجعها قبل ما اروح البرنامج مع حبيب قلبي سامي اللي صار له ست سنين ميت ...
تذكرت ايام العزا ..واشلون اني مابجيت من الصدمة ...ظليت مصدومة ايام ...مومستوعبة انه مات ...
واذكراخته دلال اشلون كانت ميتة روحها من البجي عليه ..وابوه اللي كان واقف عند باب ديوانية الرياييل ساند راسه على الطوفة والدمعة تنزل على خده شفته خلسة طبعا ... حتى امه يت العزا وخالاته اللي طول عمرهم يكرهونه ...وعالية اللي حظنتني تبجي وانا ساكتة ما تصدر مني حركة ...
موت سامي اثر على الكل ..بس الحين كلهم تعايشوا مع الوضع إلا انا ..رديت كل اللي تقدموا لي ...
بطلت كتاب يومياته وشفت صورتي اللي طلبها مني اول مرة تذكرون ؟؟؟
رسمها بالدفتر عنده بس قبل كان محتفظ فيها بمحفظته ...طبعا شفت باجي الرسومات ... كبرتها وبرزوتها عندي في الفيلا اللي تفاجأت انه بانيها بس ما لحق يقولي .... الحين انا وامي وشهد وهاني قاعدين فيها ... اما عن الشقة هم امتشفت انها ملك ...لما مات صكيتها وما خليت احد يدخلها ابدا غيري كل اسبوع اييها انظفها بنفسي ..خليت كل شي على حاله حتى الهدوم ما طلعتهم من الكبت ...اغسلهم جنه رح يرد باجر واردهم الكبت بعد ما ينشفون ... كل هذا اسويه ومحد يدري ...
مرت ست سنين بسرعة البرق ... كل يوم وكل سنة وكل ساعة فيها حبي لك يزيد ..
مسكت القلم ...وكتبت ..
" إلى زوجي العزيز ...مع التحية .. اليوم ذكرى فراقك السادسة ...لن انساك ....زوجتك المحبة والمخلصة ...هناء "



[ النــهــآيـه ]

[KaY]

.
.
.

انتهتــــــ القصهـ

وانتهىى مشواريـ هنــــــــا

.
.
* مغـ،،ــرورة * & Ashwareya
ღمـهـاويღ


لم يكنـ بامكانيـ تكملهـ القصهـ من دونكمـ

سعدتـ بمتابعتكمـ لي

اتمنى تكـــــــوون اعجبتكمـ بقدر ماعجبتنيـ

تقبلو احتراميـ عزيزاتيـ

.
.

الى قصهـ جديدهـ

.
.
.

[* مغـ،،ــرورة *]

حـــرام

:(


هـذا الحـب ولا بــلاش

يسـلمو حبيبــتي كــاي علـى القصـة

قصـــة روعـــــــة بصــراحة

ومـادري فـي حجـي وايـد بداخـلي بـس مو عارفـة شـلون اقـوله

لان فـعلا قصـة ولا اروع

انـا اقـول يعطـيج الـف الـف الـف عافيـــة

[Ashwareya]

لقد تحمطت بالعل من هذه القصه ولا أبالغ غن قلت انني غنهرت داخليا وخارجيا

ولا أزال أحس بأنني أحتاج للبكاء أكثر أعود إلى العامية حرام عليج يا كاتبة هذه الرواية

لأنه البطل (سامي) حسيت ما عاش يوم مثل الناس والبشر بس صدقوا لما قالوا

إن الطيبين غموتون إبسرعه وأمنتى إني أقابل إبحياتي شخص يشبه طيبت سامي

بس غلط إن ما تحطلنا نهاية عصام على العموم انا حطيتله نهايه وإهيا بختصار غنه الله

بينتقم منه بيوم محد بينفعه فيه أشكرج إختي كاي ماقصرتي معانا كلش واتمني في

قصصج القادمه انشاءالله نهايه سعيده نستمتع فيها كلنا وسلمت يداكي يا كاي وأشكرج

:cheers: :icon_razz: