تعدد الزوجات.. هل يحل مشكلة العنوسة!!

[عنوسه ^_~ ماتهاب]

بسم الله الرحمن الرحيم

[... حديث من ديوانيتنا :P

بقول لكم السالفه امس الحريم يقولون ان بالسعوديه والكويت

يامرون المطاوعه والي متشددين شوي
ان الرجال يتزوج 2 و3 4
لان الحريم كثرو

في هالزمن والرجال قلت



ويقولون ان هذا اهو الحل الوحيد

وفي كم واحد قايلين له شرايك تتزوج منها تكسب اجر وتستر علي البنت ومنها

تحل ازمه العنوسه في الوطن العربي


طيب من هالموضوع صراحه شدراني < شدراني مثل شدني :ezpi_blush:


وقعدت افكر فيه

يا تري صج الرجاجيل قلت ؟


ويا تري صج ان تعدد الزوجات اهو الحل الوحيد؟


ومثل ما قاعد اشوف حاليا وحالات انا شفتهم بنفسي بنات يهبلون

ياخذون واحد بالـ 60 او 50 عمره

واهم مو قاصرهم شي

وفي حرمه عندها الجراه انها تقول حق زوجها تزوج علي .؟

عشان نحل مشكله العنوسه ؟



وهم سويت بحث وشفت ردود بعض الحريم


وبعطيكم نبذه




تقول أسماء محمود (23 سنة): أخاف أن أمنع زوجي من الزواج من أخرى ثم أقف بين يدي الله يوم القيامة وأنا لا أجد سببًا لمنعه سوى غيرتي وأنانيتي، وعلى الرغم من موافقتي على زواجه من أخرى فأنا أرفض أن أكون زوجةً ثانيةً.


هذا طبعا بعد ما طالبو بتعدد الزوجات بمصر
لان نسبه العوانس وصلت الي


9 ملايين عانس في مصر من الإناث، وهناك مليون ونصف المليون عانس في السعودية، والظاهرة متفشية في الوطن العربي كله.





والحين ابي رايكم بالموضوع

عنوسه ماتهاب ..]

[HITLER]

السلام عليكم

يعطيج العافيه عانــــس على الموضوع

اول شي الريايل قلووو وان اكثرووو ( افهموها )


وثانيا الواحد الحين اذا يبي يفتح بيت تطلع روحه

من مهر ومن سكن ووايد امور وغير عن اشروط اهل البنت

يعني عشان يفتح بيت ينشق جيبه

فأشلون يفتح بيتين

تبون اتحلون مشكلة العنوسه خففو المهور وسهلو شروط الزواج


اما الي يبي ياخذ فوق زوجته

اذا كانت زوجته امقصره معاه او فيها مرض مهما كان المرض يمنعها من ان اتقوم بواجباتها كزوجه فمن حقه

والله ورسوله أمرو بالعدل

يعني تعدل بينهم

وانا ما اتقوع في واحد راح يعدل اذا قلنه من نسبة !100% بس 5% راح يعدلون اما الباجي فحجي مأخوذ خيره اتحداه ان عدل


سلااام

[دنووش]

السلام عليكم ..

طبعا مراح اجاوب ع الاسئله سؤال سؤال ..

انا راح اتكلم عن المشكله او الظاهره بصفه عامة ..

انا اشوف ان التعداد قد يكون حل لمشكله العنوسه في العالم العربي ..او حتى العالم ..بس مو الحل الصريح لها ...

يمكن المشكله من وجهه نظري انو الشريحه الاكبر في مجتمعاتنا شباب (اقصد الذكور) يعني عمرهم مابين ال 15 وال 25 تقريبا .. وهالشريحه صعب عليها الزواج لعدم تحملهم المسؤوليه ..وبدري عليهم اصلا ..

وهذا سبب في العنوسه ..

غير كذا نظره المجتمع للمرأه العانس ..او بمعنى اصح للعمر اللي يطلقون عليها فيه انها عانس ..تقريبا عمر مو كبير لدرجه اطلاق اللقب عليها ..يعني بمجتمعاتنا يعتبرون البنت لو تعدت ال 25 سنه مصيبه او كارثه ..مع ان السن الانسب للزواج (من وجهه نظري) بعد ال25 ..لان الزواج مسؤوليه ولا يجب التهاون في امره ..غير كذا حلو البنت تعيش سنها ..مو تصير بمرحله المراهقه وع طول زواج ..او بعضهم بمرحلة الطفوله ..يعني ماتعيش المراهقه ولا حتى الشباب على طول ام ...وهذا ظلم ..


اما من ناحية التعداد ..فهو امر حلله الدين لاسباب عده اهمها عدم التوافق بين الزوجين ..او ان تكون الزوجه عقيم ..او حتى لكثره العوانس ..

بس المهم مو انو يطلعوون شائعه او سبب للزواج بآخرى عشان ظاهرة العنوسه ..او انقاذ المجتمع ..يعني الرجل يقدر ينقذ المجتمع بأمور اخرى احق واولى ..بعيد عن سالفه التعداد ..

يعني هذا اللي طلع معااي ..

وتحيااتي للجميع .

[دنووش]

لوووووووووووووووووووول هتلر ..

بالاخير الواحد يقعد عزابي ازين مو (:

[عيميه عسل]

وانا شكو بالعنوسه وشكو بان الريايل اقل من الحريم

انا عندي الشريجه تحر لو هي بالقبر والريال شلا شغل على قولته اجر ما اجر حلايا الحين يعني بيصير دين حضرته لا اهي وحده يعني انا اشوف التعدد في الحالة المستعصيه مثل الزوجه مريضه مو قادره تسوي واجباتها الزوجيه والرجل محتاج او يبي ضنا واهيا مافيها اهني اقول من حقه اما سالفه ابي اجر ما ادري شنو هذا كلام فاضي يبسون روحهم دينين واهما عيونهم فارغه

يسلمو حياتي على الموضوع واتمنى رايي ما يزعج البعض

[s.r.k]

السلام عليكم

_ _ _ _ _ _ _ _ _

ما اعتقد انة تعدد الزوجات راح يحل مشكلة العنوسة .. !

لانة أصلا تعدد الزوجات ما اعتقد شرع علشان هالشغلة .. ! و الرياييل أصناف .. كل واحد عنده عذر او سبب معين يخليه يآخذ وحدة ثانية على مرته .. و ما اعتقد انة راح يكون السبب انة يقضي على العنوسة .. !

و حتى اذكر سمعت من زمان .. انة تم الاقتراح على ان يتم اعطاء كل مواطن يريد الزواج من ثانية مبلغ و قدره ... 2000 او 3000 ما اذكر و الله .. حتى يتم القضاء على العنوسة ..!

و الحين اعتقد انة كلا الطرفين المرأة و الرجل بجيلنا الحالي ما يبون يتزوجون بسن مبجر ..

و هم بعض الرياييل قامو يتزوجون من الأجنبيات لأسباب عديدة .. .. .. ،،

.
.

و الزواج الحين مو سهل كلش ..
في وآيد شروط .. في وآيد مسؤوليات .. في وآيد متطلبات .. !
لازم يكونون على اتم الاستعداد له .. لأنة مو لعبة ..!
و الحين طبيعة المرأة غير عن قبل .. و هم الريال نفس الشي ..

و بالتالي ..

لو ظلت العانس عانس .. لو تزوجو البنات ..
هذا نصيب و الله يعطي حق كل وآحد نصيبة ..

.
.

الإختلاف بالرأي لا يفسد للود قضية :)

تسلمين أختي عنوسة على طرحج للموضوع ..

و أحس انة ردي مو وآفي و موواضح لأني بصراحة ماني قادرة أحس بالموضوع علشان ارد عليه .. و هذا اللي طلع معاي :)

و تقبلي مروري البسيط

[صريح..!!]

اشكرج يا عنوسه على الموضوع الجميل



<<<<يربت نفسه لانه يبي يصارخ وياخذكم بالصرخه هههههههه


يا اختي ابي اقول ترتيب الزواج والتعداد فيع


الزوجه الاوله :::: هم وغم


الزوجتين :::: نار وشرار


الزوجات الثلاثه ::: انت اميير


الزوجات الاربع ::: انت ملك


الزوجه في عالمنا هذا متطلباتها وصعوبة الحياه تجعل الانسان يتزوج وحده فقط


اما من يكون مقتدر عقلياً ويعرف بانه مستطيع على العدل قبل المال يتزوج


وايد قصص اعرفها بحكيها لكم


في انسان متزوج وهو شاب صغير عمره 20 زوجته حملة وطلب منها ومن اهله الزواج من ثانيه وفعلاً تزوج الثانيه وهو شاب ما شاءالله عليه


وفي شاب متزوج يوم من الايام وده زوجته لاهلها وذهب لصديقه له واخذها لشقته والله يكشف الخافي دائماً كانت الزوجه ناسي شي بالشقه ضروري ذهبت لها يوم دخلت الغرفه جان تشوفهم بالفراش ماقالت شي هي زعلت ولكن طلبت منه اذا اردت ان ترجعني بس عليك تغيير الغرفه كامله لانه مكان صار نجس وما احبه يقول غيرة الشقه كامله والله يحلف انه مايشوف بعينه بنت خلالالاص ويموت بزوجته حييل يقول لو تقولي تزوج علي مايتزوج


وقصه شاب متزوج ذهب ويه زوجته للعمره بسياره وطول الطرييج يقولها ابي اتزوج يرحم امج ومن الكلام يقول ردينا من مكه وافقة ما شاءالله


والقصص الظريفه


زوج اخذ زوجته من اهل المملكه منطقة الشرقيه وركبها السياره كان يعلم بانه ابو زوجته متوفي مايقدر يقولها شنو الحل لانه اهلها بالرياض قال مافي حل اله اقولها انا متزوج عليج وبوديج لاهلج لاني بسافر يقول طول الطرب تسب وتلعن وتبجي وشوي وترمي نفسها من السياره علشان انه متزوج عليها يوم وصلو امام بيت اهلها جان يقول لها يبه اجذب عليج الصج اوج توفه ردت عليه تقول افييييه الحمدلله همها مايتزوج عليها بس ولاه ابوها عادي ههههههههههههههههههههههههههههههههه



والقصه الثانيه يقول شاب انصدم متزوجته طلبت منج الزواج من صديقه لها لانها تحبها ولا تقدر تعييش من غيرها ههههههههههههههههههه


<<<<يقول ياحظه هههههههههههه




حل العنوسه مو بالزواج المتعدد ولا للزواج اسباب تصنعها المرأه يعني في ازواج في نفسهم التغيير واسترجاع الشباب لحياته اللي مضة ويه انسانه لفتره كبيره وهو يستطيع بكل النواحي يوفر الحاجات الاساسيه لكل طرف


يعني اذا كان ينوي التغيير يتعرف ويخون؟ ويسافر ويزني؟

ترى في من الشباب يحب النساء ولاتكفيه امرأه واحده شنو حله لو يطري لزوجته زعلت وراح وراضاها وكرهته بالزواج واذا خان خرب بيته وخرب حياته ويتحاسب يوم القيامه



لاتفكرون الزوج يبي يتزوج على زوجته لانها ماتنجب فقط او انها مريضه في زوجا ماتعتني بنفسها بالمره يعني مو ظلم هذا؟

وليش يطلقها تقول ممكن الحل يطلقها لا حرام يخرب حياة عياله



وفي نساء يستاهلون الزواج عليها لانه في مثل قال مايكسر خشم المرأه اله المرأه يعني تزوج عليها



والشرع حلل الكذب في ثلاث حالات والله واعلم


الكذب بالحرب


والكذب بين صديقين او قلبين لكي يتجمعون وينتهي الزعل


والكذب على الزوجه وبين الزوجات




دمتي لنا سالمه ان شاءالله من كل شر يارب


فمان الله

[إقلاع حتى الضيآع]

السلأم عليكم ورحمه الله وبركإتـ9

تعدد الزوجأت هل يحل مشكلة العنوسـ9 ...؟

اي اكيـد لأن تعدد الزوجإت يكون لكل رجل أكثر من انثى .. والمنطقي انه يقلص نسبة العوآنس ..

لكن في سبب غير انه يكون لكل آحد زوجتين فأكثر

اعتقد ان السبب هو تعقد اسبآب او بالأحرى شروط الزواج الرجل من المرأة

واكثر الشروط التي تغل البآب في وجه الرجل .. المهـر

.. وهذا الأمر هو السبب الرئيسي ـ تكآثر نسبة العنوسه للشباب وللشابات








اقـــلاع

[شوفو شموخي]

سلام

طبعامن المعروف انه في اخر الزمن راح يكون عدد البنات اكثر والحل المنطقي هو التعداد!!


لكن انا وحده متزوجه لو اموت مراح اسمح انه زوجي يتزوج علي مو انانيه لكن انا غيوره من ظلي


مره حلمت انه متزوج وحده والمشكله اني اعرفها قسما بالله اني لما شفتها ماقدرت ابتسم في وجهها مجرد

حلم!!!

المسأله تحتاج ايثار وتضحيه لكن انا وحده اقول لا والف لا!!!

[البحر الهادي]

شوفو شموخي
ههههههههههههههههههه حرام عليج كله حلم
اشلون لو اسويها لووووووووووووووووووووووووووول
-------------------------------------------------------
عنوسه
كل الردود الي قريتها تقريبا لم تدخل في بالي
==
اولا - الله احل الزواج من 4
ثانيا - شيء اكيد يحل تعدد الزوجات ومشكلة العنوسه للذي يستطيع ماليا
ثالثا- الان كل البنات متوظفات يعني لا تريد من زوجها الي ان يكون ستر عليها
وتريد ان تسعد في حياتها واولادها وان تحس بانها موجوده في الكون بشريك
وحب وحنان واولاد
صحيح ان الحياة تغيرت او الاخص ان الانسان لا يمكن تحمل للمسوؤليات وغيرها
ولكن الحل موجود وهو بان الزوجه الثانيه موظفه شنو المانع اذا تصرف علي نفسها
وتساعد زوجها في مستقبل حياتها والاهم انه يكون يحبها مثل ما يحب زوجته الاولي
كثير ما نسمع او نقراء قصص بنات في سن الزهور صغيرات يتزوجون اكبر منهم بكثير
لماذا ؟ الم نسأل انفسنا هذا السؤال ؟
وهو دليل بان البنت تريد ما حلل الله لها من معاشره واولاد وستر لها وان تحس بكونها انثي
لها وما عليها من مسوؤليات
انا افضل تعدد الزوجات اذا كانت الزوجه الثانيه تكون موظفه حتي تساعد علي حياتها
لان في وقتنا هذا الحياة صعبه جدا
وان يكون الزوج يقدر الحياة الزوجية ويحاول ان لا يظلم وان يعدل بما يستطيع

كل الشكر

[ViOliet]

مرحبا حبيبتي

موضوع رائع ... تعدد الزوجات حلال ما نقدر نحرمه ع الرجال

لكن التعدد مشروط بالعدل ... هل يستطيع كل رجل ان يتميز بهالصفة ؟

و رأيي انه نسبة العنوسة كبيرة مو بسبب غلاء المهور فقط ، ، ، هناك سبب

مهم و وجيه و هو انه اغلب البنات تخاف ترتبط و تتزوج من رجل

اقل منها في المستوى الثقافي او اقل منها في المستوى الإجتماعي

و نفسها تتزوج انسان راقي فكر و راقي تعامل ... و القوامة للرجل ...

تخيلي لو اتزوجت رجل يصرخ و يشتم و يتطاول و يتأمر ...

اشوف الكتير من البنات يخافوا و بقوة من هالسبب ... و في من تشتكي

من زوجها و تقول انها تكرهه و مو قادرة تتقبله لسبب انه غير قادر

ع التعامل بأدب و رقي

مع انه صاحب مهنة رائعة و وسيم جدا في الظاهر راقي جدا ...


ويا تري صج ان تعدد الزوجات اهو الحل الوحيد؟

انا اقول انه حل في حالة واحدة و ارضى فيها هي اني اكون انا الزوجة التانية

و اكون احبه هههههههه بكل صراحة ...

يعني بجد لو الرجل حب واحدة تانية ؟ مو افضل انه يتزوجها ؟ او نقول لا ما

يصير ... عشان اسباب زي هادي ربنا شرع التعدد مو عشان نقص في

المرأة او انه الرجل عينه فارغة

وفي حرمه عندها الجراه انها تقول حق زوجها تزوج علي .؟

هنا حأجاوب في حال انا اللي زوجها يبغى يتزوج :

ايوة ممكن ان كانت ما تحب زوجها ، ، ، و يفرح هوه بأنه له كلمة

و عادل هههههههه و ما يدري انه

شكله يكسف و يبين للكل انه زوجته ما تحبه و لا تبغاه و ان اتزوج 3 يبين

انه الإتنين ماحد فيهم حبه .

و يقولوا انه الطريق لقلب الرجل معدته هههه

و الطريق لقلب المرأة اذنها هههههههه

تهت عن الموضوع ... تسلمي يا غالية ع الموضوع الحلو ...

تحياتي

[nawal]

عنوستناا الغاليه

انا بختصر الكلام بجم كلمه فقط


الزواج من عانس المفروض يكون من اجمل الزيجات ليش؟

لان العانس تملك احساس لاتملكه المطلقه او الارمله

وتعدد الزوجات حلله الشرع لاخلاف على ذلك مهما كانت الاسباب

لكن اقول بالنهايه

اذا بقيت عانس ولم تتزوج ^^ وصانت نفسها

وشرفها ^^ لها عريس من الجنه

يفوق عريس الدنياا بالجمال والمال والاخلاق

بس:love2:

[عنوسه ^_~ ماتهاب]

الحوار حلو معاكم والاراء نختلف
وعلي فكره انا مو من مؤدين تعدد الزوجات ولي عوده
للرد

علي كل واحد :)

[المنــــفي]

شخصيا لا أنفي أن نية الزواج الثاني قائمه وموجوده لدي

وهذا سبب ردي على الموضوع

ماني فاهم الزوجه مثلاً اللي تدعي حب زوجهــا
وانها تغار عليه وترفض زواجه الثاني وتستميت بالرفض
مقابل أنها ممكن تغض الطرف نوعا مــا ولدرجه كبيره
عن علاقاته العابره سواء في بلده أو أثناء سفر اته
شلون تحبه وبنفس الوقت ما تحب له الخير

يعني أنه يرتكب المعصيه عندها
أهون من أنه يسوي الحلال

طبعا هذا الأمر يترتب عليه أنه ممكن يخونها
مع وحده مريضه أو مع فلبينه أو خدامتهم
يعني لو يتزوج وحده نــد لها وايــد أفضل من خيانتها
مع بنات ليل لاقيمه لهم
(( مابي أغير الموضوع وأدش بسوالف الخيانه
لكن رفض الزواج الثاني أحد أسباب الخيانه ))

طبعا أنا مع وجــود ضوابــط للزواج الثاني
يعني الأمــر مايكون سلق بيض

مو عشان نخفف نسبة العنوسه
نزيد في عدد المطلقات

يعني الرجل المقتدر الذي
يرى في نفسه الأستطاعه لتحمل
مسؤلية بيت ثاني من كافة الجوانب ويدرك
أن الأمر في ذمته
(( يعني السالفه مو نزوه أو تجربه عارضه ))
مو يتزوج شهر وبعدها يقول أنا مو قد الزواج الثاني
لأن فيه انسانه رضت فيه بالرغم مافيه من عيوب وعلمها بأنه ليس
لها وحدها
فعيب يتخلى عنها لظروف عارضه

طبعا أنا أشوف المطلقه أفضل من العانس خصوصاً
أذا الله رزقها (( المطلقه )) بأولاد من هذا الزواج
يعني تجربة الزواج كان لها أثمره

الزواج الثاني لدى الزوجه الأولى يعتبر وصمة عار
من ناحية الغيره وكذلك رأي المجتمع

وللأسف من واقع تجارب الكثيرين
تنقلب الزوجه الأولى 360ْْْ درجه
وتبدأ بالأهتمام بزوجها وبنفسها
يعني ما تصحى للأسف ألا لما تقع الفاس بالراس
وينك قبل لا ياخذ عليك وينك من كلامه ونصايحه !!

الزواج الثاني ماهو حل مطلق للعنوسه
ولكن للرجل المقتدر أحصن وللمرأه ستر

دمتم سالمين


شكرا لك عنوسه ماتهاب على هذا الموضوع

[شوفو شموخي]

المنفي


اسبب الرئيسي لرفضي انه يتزوج ثانيه مو عشان وصمة عار!!! لا ابدا مو معناته كل من تزوج زوجها مقصره لكن انا


احبه ومابي احد يشاركني فيه ومن قال اني برضى بالعشيقه !!!


لا لاعشيقه ولازوجه امه واخته وبنته هم الاناث في حياته وبس:)


الرجال اللي يبي يخون مايملي عينه مو 4 حريم لو مشروع له كل يوم يتزوج وحده بيخون لانه مريض بالتنويع


واللي محترم نفسه وزوجته ومتربي راح يصون نفسه لو يتغرب سنين


الغريب انك تلاقي زوج يصلي فرضين ويترك الباقي ويقول ابي اعدد سنة الرسول!!ترك الفرض وطبق السنه!!


عجيب!!

التعدد حل لكن لازم يطبق بشروط وبموافقة الزوجه الاولى

اما سالفة انه الزوجه الاولى تصير افضل لما يتزوج عليها حراااااااااام


لما تنكسر في داخلها الثقه يمكن تستمر من باب انها تحافظ على اولادها وبيتها لكن مشاعرها تجاهه

راح تتحول الى !!!!!! مع مرور الزمن


كل الشكر لك