الشاب يا بنات يعلل ,, والشايب يدلل ,,

[كتكووته^^مكتكته]

|--*¨®¨*--|صباح الخير|--*¨®¨*--|


موضوع مثير للجدل

ولكنه موجود خصوصا لدى الكثير من فتياتنا اليوم

بعضهن يرفضن الارتباط الا بكبير في العمر

بحجة انها صغيره ,, وراح يدللها ويحطها بعيونه

بعكس الشاب


الذي يقاربها بالعمر


وفاهم كل حركات بنات اليوم

وقد يكون غير راكز ,, وطايش ,, وما عنده خبرات ,, ولا قد المسؤليه ,, وغير متزن



اما بابا عود ,,

اي الشايب ,,

شبع من الدنيا , وجرب ,, ونضج ,, وبحاجه لكتكوته صغيره عشان تردله شبابه .. ويدلعها ويغنجها


طبعا هذا مو كلامي انا

هذا كلام اغلب الفتيات اليوم ,,



اعزائي الاعضاء,,


شنو رايكم؟؟

دعوة للحوار حول هذا الموضوع وهل حقا مثل هذه الزيجات تدوم؟؟
هل ستجد الفتاه الصغنونه ضالتها عند من يكبرها بربع قرن مثلا وتحقق اهدافها المنشوده من زواج ناجح وزوج حنون رؤوف؟؟

ام ان الموت سيخطف فرحتها بعريس الغفله لا سيما انه ( ريلة والقبر ) وما ان تنضج البنوته ويستوي عودها يكون قد اكل عليه الزمن وشرب؟؟

هل ستنعم بحياه مترفه ام انها ستتحول من زوجه الى ممرضه وقريبا ارمله صغيره؟؟


ما هو السبب لرفض الكثيرات اليوم ,,, وانا وحده منهم ,, لزوج يقاربها بالعمر؟؟



لا تنسون



*·~-.¸¸,.-~*النقاش هدفنا *·~-.¸¸,.-~*

[كويـتي][F.B.I][]

اول شي اشكرج على هالموضوع الجميل لنقاش؟؟

ثاني شي في بنات يحبون يتزوجون كبير السن

والاسباب متعدده

لن كبير السن راح يدلله وراح يتقافل عنها تطلع وترد مايدري عنها والله يستر شنو تسوي من وراه
واهي تقول خل اتزوجه عشان اعيش حياتي حره واستانس وتكون صداقه متعدده وتطلع وتيي ومحد درا عنها

ام الشباب لا يعرفون حركات البنات عدل ودارسينهم وتشوفين كل واحد خايف على زوجته من المصايب الي يسمعهاا
ويكون حريص ودايم يسال عنها يعني مايفجهاا بروحها

اما الشايب لا ينام الساعه 6 المغرب واهي تطلع بعده وتروح كل مكان ويعطيها فلوس وسياره يدللها

وثاني شي راح تخسر الذريه ايذا كان الشايب عاجز عن الانجاب خلاص ماراح تيب يعني هم تغامر عشان ترتاح وتطلع؟؟

واكو بنات يتزوجون شياب عشان الثروه تقول يموت اخذ فلوسه وخلاص؟؟.....

بس حياتها مع واحد كبرها احسن يفهملها وتفهمله يدوم معاها العمر كله والاعمار بيد الله لكن كا توقعات

تجيب منه عيال وتجيب نسل لها يعني حياتها مع الشاب احسن

.....
والنقااش يتواصل لكي يصل الحل

[HoNeY RoSe]

مشكوره كتكوته ع الموضوع

امس الدكتوره فوزيه في سيره حب قالت عنه ..

هل ستجد الفتاه الصغنونه ضالتها عند من يكبرها بربع قرن مثلا وتحقق اهدافها المنشوده من زواج ناجح وزوج حنون رؤوف؟؟


يمكن اي ... بس يعني تاخذ مو اكبر منها بربع قرن .. على حافة القبر .. بعد مو زين تصير ارملة من صغرها .. بس تاخذ واحد اكبر منها بسبع او عشر سنوات بالكثير .. عشان يكون فاهم للحياة .. وناضج .. مايكونوا بنفس العمر .. مافي واحد يرشد الثاني عدل ...

مثل اذا كان وحده عمرها 20 تاخذ واحد عمره 27الى 30


هل ستنعم بحياه مترفه ام انها ستتحول من زوجه الى ممرضه وقريبا ارمله صغيره؟؟
اي ببتحول الى ممرضة .. لانه تلاقيين هذا الي اكبر منها بربع قرن .. ماظل مرض في هذا العصر الا فية ...


ما هو السبب لرفض الكثيرات اليوم ,,, وانا وحده منهم ,, لزوج يقاربها بالعمر؟؟

قلت في البداية ..

الوحده تاخذ واحد اكبر منها عشان يكون فاهم .. وناضج .. مايكون مو فاهم الحياة ولا يدري شنو صاير .. وتكون تصرفاته تصرفات .. شبابية وصياعه ..

وانه بعد راح اخذ واحد اكبر مني ب7 او 10 سنسن .. عشان يكون فاهم ومقدر الحياة الزوجية .. ويرشدني اذا كنت خطأنه في شي :)

مشكور كتكوته .. ربي يعافيج

[ŋαŋ]

ما هو السبب لرفض الكثيرات اليوم ,,, وانا وحده منهم ,, لزوج يقاربها بالعمر؟؟

الوحده مو عيب تاخذ واحد أكبر منها شيء عادي
بس ما يكون اكبر منها بربع قرن مثل ما قالت أمرأه
لأنه يمكن يكون على الحافه و يروح و تصير البنت أرمله من صغرها و اهيا توها شباب

يعني تاخذ وااحد أكبر منها بخمس سنوات سبع سنوات على الأقل
مو واحد على الحافه

و هم مو عيب تاخذ واحد شباب مثلها
بس يكون فاهم و عاقل مو طايش مثل أغلب شباب هالأيام

:)



:+: حبيبة الكل :+:

تسلمين غلاتي
ربي يعطيج العافيه

[سعودي رايق]

كتكوتتنا السكريه

بصراحه الشايب عايب

هذا مثل قديم وما يعرفه الا اللي جرب

كثير من البنات يتمنون زوج وخصوصاً من فاتها تاكسي الزواج قصدي الترين

لانها تبي ظل رجل بس اما البنات الصغار ما اعتقد انها تتزوج واحد كبير سن

تبي دلال وغنج وحب وكلام ارق من الندى لما يزل على الوردة

واعتقد الشايب العايب صعبر يوفر هذا الكلام وغير مقبول منه

... ثااااااانكس على موضوعكالعسل مثلك ياسكرتنا

..... وأظنه رد على موضوعي السابق ( كيف تغيض زوجتك )

[كتكووته^^مكتكته]

كويـتي][F.B.I][



بعض البنات تفكر مثل ما قلت

اتزوج واحد كبير على الحافه
اطلع وادش ولا يسألني

ولا تفكر بالاولاد عشان ما يكون في شيء يربطها فيه

بس هالزواج انا ابصم انه ما راح يدوم

ابدا زواج غير متكافيء

والبنت اللي تفكر انها تتزوج لمجرد الطلعه والدشه

صعب تتأقلم مع رجل كبير بالسن شبع من الحياه وهي لا تزال في البدايه مقبله عليها وتود اكتشافها

ستجد امامها كثير من المعوقات
اولها

عريس الغفله الذي فضلته على شباب اليوم


شكرا لتواجدك

[كتكووته^^مكتكته]

|--*¨®¨*--|امرآة الحديد|--*¨®¨*--|


كل شي يعتمد على تفكير البنت ومدى نضجها

قد تكون بالعشرين ولكن عقلها وتفكيرها في الاربعين

ومن ترتبط به بمثل عمرها ولكنه لا يفكر ابعد من انفه

لهذا انا اقيس الزواج على امور كثيره

السن احدها ولكنه ليس اولها ولا من اولوياتي


ولكن لا نستطيع ان ننكر انه مهم

خير الامور الوسط


ان اخذت من تعدى العقد الرابع وانا في منتصف العشرينات كم من الوقت املك لاتشارك معه في بناء حياة زوجيه سعيده وكم سنه سينعم ابنائي بوالدهم

الاعمار بيد الله وحده وقد اموت قبله ولكن كل شي ممكن ان نمشيه عالبركه الا الزواج يحتاج دراسه وتفكير


شكرا لحضورك

[كتكووته^^مكتكته]

×?°ريـم الـشـوق×?°




الله يرزقج انشاءالله بابن الحلال اللي يقدرج


تقارب الاعمار قد ينجح وقد يفشل
كما هي عاده كل امر ايل للسقوط او الصعود شريطه ان يدرس جيدا ويعرف الانسان كيف يتحكم به لا ان يسيطر الامر عليه


والزواج من احد هذه الامور التي لا تؤخذ عن طريق التباهي او الاقاويل انما الخبره والمعرفه والمشوره

وفقك الله

[كتكووته^^مكتكته]

*·~-.¸¸,.-~*سعودي رايق*·~-.¸¸,.-~*

من فاتها القطار

او التاكسي على قولتك

ما اظنها بتكون فارقه معاها لو تاخذ شايب او شاب


هذا اذا كانت لا تريد الزواج الا للزواج فقط



انا اتكلم عن بنات صغار بعمر الزهور ولا يزال الوقت امامهم والفرص متاحه وكبيره

ما هو سبب اصرارهن على من هو في سن والدهن

اغلب الردود التي صادفتها من بنات جيلي

هي انها تكون متعلقه بشخصيه والدها وحنيته
وهنا لا تريد الا من يكون نسخه عنه

وهذا لا يتحقق الا حين تأخذ من هو في عمره

الاراء تختلف

ولكن بنظري يظل هذا الزواج غير متكافيء


ونسبة الفشل فيه اكبر من النجاح

ليس لسنه فقط

بل لامور كثيره منها قدرته على الانجاب وتربيه الابناء ورعايتهم

مو معقول رجل في 50 ولده عمره شهر

حتى مو حلو شكله وهو شايله ويلاعبه

:)


ولا تطمن مو رد على موضوعك

الخير لي قدام انشاءالله بس طول بالك
:)


شاكرتلك طلتك يا رايق

[عيميه^بدويه]

تسلمين كت كت على هالموضوع العجييييب


اول شي انا ما اوافق هالشي انا لو يلحقني شايب بالسوق ولا بالشارع ودي الهمطه واكسر راسه


بعد اتزوجه لا يبا اول شي فارق العمر باجر اتزوجه وابتلش فيه لا يقدر يطلع معاي ولا يوديني مطاعم ولا سينما


كله تعبان وماله خلق ثاني شي مو كل شي بالدنيا ماده وبعدين اذا الشاب اللي باخذه يشرب ولا يخربط


هذا الغلط من البنت نفسه واهلها في شي اسمه يسالون عنه قبل الزواج ولا تنسين فارق العمر اساس كل شي


باجر ولده عمره سنه واهوا يصك الخمسين بينهم خمسين سنه لا يدلل ولده ولا يلحق عليه حتى بالروضه


صراااحه انا اول وحده ارفض وبشده زواج الفتاه بكبير السن مهما كان الفتاه تبي واحد يكون معاها على


(((( قلب وااااحد )))) هذا لو اقوله ودني ((( الماريييينا )))) ماله خلق عرفتي بنت عمي صج انه يتلهمط بس


هذي الدنيا ومشكووووووووره عالموضوع الا بحاله وحده تصكين التسعين مثل ((( يدييييييييييده ))) وبس


بالزواج عووود اسمج نفقتي ههههههه

[الكل بالكل]

والله يا كتكت الشايب اهون من يهال هالايام
عالاقل يخاف على اسمه وسمعته وسمعة البنت

مو نفس هالشباب اللي لا دين ولا حيا ولا اخلاق

طبعا البعض

انا اقول ما فيها شي لو اتزوج واحد بدايه الاربعينات يعني
اظن معقول


مو بالستينات عاد

وبالنهايه الاعمار بيد الله
ومحد يموت الا بيومه

[كتكووته^^مكتكته]

^&)§¤°^°§°^°¤§(&^عيميه^بدويه^&)§¤°^°§°^°¤§(&^




شاكرتلج هالحضور

وعلى قولتج

تاخذينه تبتلشين فيه
لا يدللج ولا هم يحزنون


بس هم الصغير
يكون مو قد المسؤليه ولا قد الزواج
وكما قال حبيبنا عليه الصلاة والسلام


خير الامور الوسط

[كتكووته^^مكتكته]

~*¤ô§ô¤*~*¤ô§ô¤*~الكل بالكل~*¤ô§ô¤*~*¤ô§ô¤*~



صحيح محد يموت الا بيومه

وهالايام الشباب صايرين يموتون بشكل كبير بسبب الحوادث والامراض المنتشره اللهم يا كافي

لكن ايضا في شي اسمه تكافيء
تقارب
تفاهم

وما اظن اللي عمره ستين بيقدر يتأقلم مع ام العشرين
ولا هي تقدر بعد
والاسباب كثيره


مهما كان نابغة زمانه

الا ان في فروق كثيره وحواجز تمنع
بالنهايه الدين اهم شي والاخلاق والسمعه الطيبه
سواء كان شايب او شاب

[المتكتك]

شكرا على الموضوع

وانا بختصر بالموضوع

في دراسة تقول ان البنت لغاية سن 30سنة تحب يكون زوجها اكبر منها

ومن سن 35 سنة ومافوق تحب يكون زوجها اصغر منها

سبحان الله هذي طبيعة المرأة

وانا وجهة نظري لازم الرجل يكون اكبر من المرأة على اقصى حد يكون الفارق بينهم 10 سنوات

واعتقد ان البنت الصغيرة دايما تبي رجل كبير لانها تشوف فيه الامن والحنان اللي شافته من ابوها وللحين ما عرفت شنو معنى الزواج بالشكل الصحيح عشان جذي تفضل الكبير بالعمر على الشاب اللي تشوفه بوجهة نظرها طايش وكل ماكبرت بالعمر تغيرت نظرتها وهذا اللي اثبتته الدراسة اللي ذكرتها لج

ومثل ماالبنات يحبون الكبير بالعمر بعد الشباب يحبون الصغار بالعمر لانه يقولج المرأة تعجز قبل الرجل وهذي حقيقة عشان جذي نادر جدا تلقين واحد يتزوج وحدة اكبر منه

ولازم البنت والشاب قبل ما يحددون السن لشريك العمر لازم يعرفون شنو معنى الزواج وشنو الاشياء اللي لازم يكون فيها تكافؤ بينهم عشان يستمر الزواج وينجح

وشكرا لكي

[عجب]

اختي كتكووته

السلام عليكم ورحمة الله وبركاته

اولا الزواج .. ليس عيبا .. وليس حراما لا عرفا ولا شرعا .. من كبار السن

ثانيا الزواج له شروط ويمكن اهمها التكافؤ في العقل والمنطق .. وليس السن هو المقياس

ثالثا من تجارب الكثير الذين اعرفهم نجح زواج كبار السن على الصغار من وجهة نظري بمعدل 75%

رابعا نبينا محمد (ص) تزوج امنا عائشة رضي الله عنها وهي صغيرة .

خامسا تزوج نبينا محمد (ص) امنا خديجة وهي اكبر منه سنا

سادسا العمر الزمني للفتاه لا يقاس بالعمر الزمني للرجل .. وكثير من اهل الاختصاص اعطى فارق من 5-10

سنوات بين الرجل والمرأة لصالح الرجل .. كون المرأة تحمل وتلد وهذا محسوب من عمرها الزمن.

سابعا الاختلاف بالرأي لا يفسد للود قضية .

بالتوفيق